Yeremiya 30:18 - Emakhuwa Bible

¹⁸ Yave oneera ha: ‘Kinooceendya oreereliwa wa iheema sa Yakobe ni kinoomorela ikharari mookhalamwawe. Esidade enooraseliwa mmathalanimwaya ni empa ya emwene vanipuroniwaya.

Yeremiya 30:18 Iomraidhean Croise

1 Nyaha 29:1

Vano mwene Davide aaheerela muthukumano wootheene: “Muluku omuthanlale mwanaka mulopwana Salomoni, vaheera owo ori mmiravo, ni khaxuttihiwe nnenesene. Muteko ori mutokotokoxa, niwoko Empa etokotoko eyo kheetekeliwa atthu, mene wa Yave, Mulukwaahu.

1 Nyaha 29:19

Mumvahe mwanaka mulopwana Salomoni murima wookwanela weera iiwelele malamulowaanyu, mahusihowaanyu ni ikanosanyu, weera ateke Empa ya Yave ela, mwa yeeyo kirehererenlaaka seiyo sintthuneya.”

Nehemiya 7:4

Vano, esidade yaari etokotoko ni yoothanuwa, mene yaamankemo yaari vakhaani. Vanonto, impa iyo seera sihinaaye oraseliwa.

Icipo 102:13

Munoovenya, mmorelaka ikharari oSiyoni, niwoko yoophiya ehuhu yoomoonihera murimaanyu wooreera; yoophiya ehuhu yootthuneya.

Icipo 102:14

Vano malukwaaya anaasiveliha arumeiyaanyu; mathalaaya antannya ikhararisaya.

Icipo 122:7

Okhaleke murettele mpuwa wa ixirisanyu ni olipihiwa mpuwa wa mapurowaanyu oolipaxa.”

Icipo 48:13

ngwehawehe nnenesene soowiixaakiherasaya ni mapurowaaya oolipaxa weera muthalihere sa seiyo ikhapira sa muhoolo.

Icipo 48:3

Muluku ori mmapuronimwaya oolipaxa; Owo oniixoonihera ntoko Wootthawelawaya.

Icipo 78:69

Aateka Nipuronawe Nootteela* noorakamela ntoko erimu, ntoko elapo aakhalinghaawe wa mahuku ootheene.

Icipo 85:1

Ii! Yave. Mohoonihera murimaanyu wooreera wa elapwaanyu; mooreherera weetteleya nnene oYixrayeli.

Yesaya 44:26

Ti miyo kinkwanihera masu a murumeiyaaka ni otthoma wa anamitthengaaka; ti Miyo kinghima sa oYerusaleemu: ‘Onoomakiwatho,’ ni sa mittetthe sa oYuda: ‘Sinootekiwa’ ni sa mathalaaya: ‘Kinoorasela.’

Yesaya 44:28

Ti Miyo kinghima sa Siru: ‘Owo ti mukukhulaaka ni onookwanihera sootheene sinkisiveliha; owo onoohima sa oYerusaleemu: “Eyo eraseliwe” ni sa Empa ya Yave: “Epakiwe mathipelo.” ’”

Yeremiya 23:3

Miyo muneenaaka kinimwaathukumanyiha yaawo ahalahanle a muhuwaaka mweelaponi sootheene kiwoomolenlaakawo ni kinimwaahokoloxera yaacaayamo. Wu animunnuwa erelaneke.

Yeremiya 29:11

Vano Miyo koosuwela soowuupuwelasaka kiweerelakani nyuwo,” onghima Yave, “soowuupuwela keerelaka murettelaanyu ohikhanle woophwatani, soowuupuwela woovahani oweherera ni sa muhoolo.

Yeremiya 29:14

Miyo kinimwiihiya weera kiphwanyiwe ni nyuwo,” onghima Yave, “ni kinimoohokoloxani wootthukiwani. Miyo kinimoothukumanyihani mmilokoni moothemwene ni mmapuroni moothemwene koomwaraxenlaakani, ni kinimoohokoloxerani mmapuroni kootthukenlaakani,” onghima Yave.

Yeremiya 30:3

Vekhaikhai anoophiyera mahuku,’ onghima Yave, ‘kineeraaka kiceendye oreereliwa wa mulokwaaka, aYixrayeli ni aYuda, ni kinimwaahokoloxera elapo kaavanghaaka makholowaaya, weera ekuxe,’ oneera Yave.”

Yeremiya 31:23

Yave a ikuru sootheene, Muluku a oYixrayeli oneera ha: “Miyo kaahokoloxaka wootthukiwani, muloko wa oYuda ni mittetthesaya onimweeratho: ‘Ii! Wookhala woororomeleya, ii! Mwaako wootteela – Yave ooreeliheni.’

Yeremiya 31:38

“Vano anoophiyera mahuku,” onghima Yave, “eneeraaya eraseliwe esidade ela wa Yave, okhuma etoore* ya Hananeli mpaka mulako wa oNloothoni.

Yeremiya 31:4

Miyo kinimootekatho, Ii! Mwaamwali oowiikosoopa oYixrayeli! Weyo onooraseliwa! Weyo onimwiiphwanelihatho ni miheya ni onookhuma wiinaka ni yaawo anghakalala.

Yeremiya 31:40

Nreyareya nootheene sinriheliwaayamo mittembo ni ettuura, ni itarato sootheene siri oreyareyani na oKideroni mpatta ninkhuma nsuwa, mpaka nlootho na mulako wa Ikavalu*, sinootteeliheriwa Yave. Esidade kheesusihiwatho hoye hoye kheephwatiwa.”

Yeremiya 32:15

Niwoko Yave a ikuru sootheene, Muluku a aYixrayeli oneera ha: ‘Impa, imatta ni imatta sa iwuuva* sinoohokoleela othumihiwa elapweene yeela.’”

Yeremiya 32:44

Imatta sinoothummwa ni eparatha*, ni soolempwa sinoottittiwa silipihiwaka ohoolo wa anamoona mulaponi mwa Benyamini, mmittettheni sirukureenre oYerusaleemu, mmasidadeni sa oYuda, ni sa mmanyaakoni, sa vathi wa mmanyaakoni ni oNegeba, niwoko Miyo kinooreherera oreereliwawaya, onghima Yave.”

Yeremiya 33:11

masu a otthapa ni a ohakalala, masu a namatthomera ni namatthomeriwa, ni masu a yaale anruuha soovaha sootthapela wa Empa ya Yave yeeraka: Muntthapele Yave a ikuru sootheene, niwoko Owo ti ooreera, osivelawawe woororomeleya khoommala. Vano Miyo kinooceendya oreereliwa wa elapo ela ntoko khalayi,’ onghima Yave.

Yeremiya 33:7

Kinooceendya oreereliwa wa oYuda ni oYixrayeli ni kinooreherera ntoko waaraaya khalayi.

Yeremiya 46:27

“Wa nyuwo murumeiyaaka Yakobe – muhoove! Ii! Yixrayeli, muhituthuwe! Miyo kinimoovuluxani mulaponi yoorakamela, ni ekhapiraanyu mulaponi mutthukiwaanyu. Yakobe onoohokolowa ni onookhala mmuretteleni; oolipeene ni khaawo eniimuungurumihe.

Yeremiya 49:39

“Wa soothesene, kinooreherera oreereliwa wa Elami mmahukuni a muhoolo,” onghima Yave.

Yeremiya 49:6

Wa soothesene, vahoolowaya, kinooreherera oreereliwa wa awAmoni,” onghima Yave.

Ezekiyeli 36:11

Kinoowaattiha atthu ni axinama, ni awosa anooyaranasa yaatteke. Kinimwaatekiha ntoko khalayi, ni kinooweettiherelani nnene opwaha khalayi. Hiiho, nyuwosa munoosuwela weera Miyo ti Yave.

Amosi 9:14

Kinimwaahokoloxa aYixrayeli, mulokwaaka oronghiwe wootthukiwani; awosa anoorasela isidade sooheleya nthala ni mmo anookhalamo. Anoophatteya imatta sa iwuuva*, ewureke eviinyuwaaya; anoolima woophatteyamo nyiri eceeke soowiimasaya.

Zakariya 1:12

Vano ndyelo a Yave aamweerela Yave: “Yave a ikuru sootheene, mpaka yaakhani muhimorelaka ikharari oYerusaleemu ni mittetthe sa oYuda, mwa seiyo munyoonyeringwaanyu wa iyaakha miloko mithannamiili iya?”

Zakariya 1:16

Tivawo, ti yeeyo Yave eenraawe: “Kinghokoleela oYerusaleemu ni ikharari ni Empaaka enooraseliwawo. Vano efiiyu yooringelano enimookoleliwa oYerusaleemu,” onghima Yave a ikuru sootheene.

Zakariya 12:6

Vanihukuni nenenenno kinoopakiha weera ahooleli a oYuda elikane ni niikho eriyari ya ikhuuni sincipale, ni ntoko muthuko ovarelaka eriyari ya ithatu. aYuda anoohisa woomalela miloko sa mukhwipimwaya sootheene, mene oYerusaleemu onookhala vanipuroniwaya woolipeene.

Zakariya 12:7

Yave onoovuluxa toko woomaka wa oYuda weera nttittimiho na ekhapira ya Davide ni amaki a oYerusaleemu nihipwahe nno na oYuda.

Zakariya 14:10

Elapo yootheene okhuma oGeba mpaka oRimoni, mpatta wa ohitto wa oYerusaleemu enookhala ntoko wAraba. Vaheera oYerusaleemu onookhalihiwa ni onookhala vanipuroniwaya, okhuma mulako wa Benyamini mpaka nipuro waaraayawo Mulako Woopacera, mpakatho Mulako wa oNloothoni ni okhuma etoore* ya Hananeli mpaka nipuro emvottiwa eviinyu ya mwene.