Yeremiya 11:8 - Emakhuwa Bible

⁸ Vaheera awosa khayaakiiwale hata khayaakipwantthe; ohiyanawaya yaatthara ettiyamaaru ya mirimasaya soonanara. Tivawo kaaruuhenlaaka malapho ootheene ala a wiiraana kaalamulenlaaka otthara, awosa ehiiwelelaka.’ ”

Yeremiya 11:8 Iomraidhean Croise

Nehemiya 9:26

Wa soothesene, yaari oohiiwelela yoovaanyakani. Yaarera ettuli Nlamulonanyu. Yaawiiva maprofeetaanyu, mwa yaawo yaawooperera weera yoohokoleeleni Nyuwo. Yaapaka sootakhala sitokotoko.

Nehemiya 9:29

Nyuwo mwaawooperera weera ehokoleele Nlamulonanyu, mene awosa yaahiixoona ehiiwelelaka malamulowaanyu. Yaatthekela ikanosanyu, mwa seiyo sintthuneya wiiwelela weera ekhale ni okumi. Ni murima woowuuma yaahoorerani ettuli, ekhalaka attiyamaaru, ehitthunaka owiiwani.

Yeremiya 13:10

Muloko ola wootakhala onkhootta wiiwa maswaaka, ottharaka ettiyamaaru ya mirimasaya, orumeelaka miluku sikina weera olape, okhaleke ntoko laamba ola – oohimutekoru.

Yeremiya 3:17

Ehuhuweene yeeyo animwiitthana oYerusaleemu ‘Ehice ya Emwene ya Yave’ ni miloko sootheene sinoothukumana oYerusaleemu weera sittittimihe Nsina na Yave. Seiyo khasirwatho sitthara ettiyamaarwaaya.

Yeremiya 31:32

Khookhala ntoko wiiraana kaapankaaka ni makholowaanyu kaavarenlaaka ni ntata weera kaakhumihe wExipitu; niwoko aananariha wiiraanawaka, kaarookhalaru Iyaya,” onghima Yave.

Yeremiya 32:23

Awosa yaahoorwa okuxa elapo ela, mene khaawiiwelenleni hata khayeettenle Nlamulonanyu. Khaapankeru etthu ya seiye mwaalamulenlaanyu. Tivawo yiiruhenlaaya erisa yootheene ela.

Yeremiya 34:14

‘Simanleene iyaakha ithannapiili, khula mutthu a nyuwo amutapuxeke muHeberi mukhwaawe iithuminghe wa nyuwosa. Oorumeenleeneni iyaakha ithannamosa, nyuwo munoomutapuxa.’ Vaheera makholowaanyu khayaakiiwelenle hata khayaakipwantthe.

Yeremiya 35:15

Kaahoorumihelasani imaara sincipale arumeiyaaka ootheene, maprofeeti. Awosa yeera khula mutthu a nyuwo waatthuneya ohiya mweettelowaawe woonanara, okhaliha nnene soopakasawe ni ohiya otthara miluku sikina weera alape. Hiiho, nyuwosa mwaammaka mulaponi koovanghaakani nyuwo ni makholowaanyu. Vaheera nyuwosa khamwaakipwantthe hata khamwaakiiwelenle.

Yeremiya 35:17

Vanonto Yave a ikuru sootheene, Muluku a oYixrayeli oneera ha: ‘Mwiiwe, kinooruuhela oYuda ni amaki ootheene a oYerusaleemu erisa yootheene mwa yeeyo kaawoopererenlaaka; niwoko kaahaaleela, mene khayaakiiwale, kaawiitthana, mene khayaakaakhunle.’ ”

Yeremiya 38:20

Yeremiya aahaakhula: “Awosa kheewinnyererani. Mmwiiwelele Yave mpakaka yeeyo kinooleelaakani, weera sootheene siweetteleni nnene ni okumaanyu wuureleye.

Yeremiya 44:16

“Hiyo khanipwatthelaru munnivahaanyu mwa Nsina na Yave!

Yeremiya 44:17

Ettiitthu nnoopaka sootheene nihimmaahu weera nnoopaka: nnoomuhisera erubani* pwiyamwene a wiirimu ni nnoomuyeehera soovaha sa soowura, ntoko nipankaahu hiyo, makholowaahu, mamwenaahu ni ahoolelaahu mmasidadeni sa oYuda ni mmiseweni sa oYerusaleemu. Ehuhuweene yeele naaruwera, naari ooweetteleya nnene nihihaawelaka etthu.

Yeremiya 44:5

Vaheera awosa khayiiwale naari khayaakipwantthe; khaahingye sootakhalasaya hata khaahiyerenre ohisera erubani* miluku sikina.

Yeremiya 7:13

Nyuwosa mwaapakaanyu itthu sootheene iya,’ onghima Yave, ‘Miyo kannooleelani imaara sincipale, mene khamwiiwale; kaawiitthanani, mene khamwaakhunle.

Yeremiya 7:24

Vaheera awosa khayaakiiwale hata khayaakipwantthe; ohiyanawaya yaatthara soowuupuwela soovaanya sa mirimasaya soonanara. Yaahokoleenle ottuli ohiya ohoolo.

Yeremiya 7:26

Vaheera awosa khayaakiiwale hata khayaakipwantthe. Yaari oottiyamaaru ni yaapaka soonanara waapwaha makholowaaya.’

Ezekiyeli 20:8

Vaheera awosa yaakivaanya ni khayaakiiwelenle; khayiivenxenre icaambulo soohiira mwa seiyo saari vamaithoniwaya, hata khayaahingye miluku sa wExipitu. Tivawo keenraaka weera kaamwaayeehera isarasaka ni kaamwaanyoonyeriwa wExipitu.

Zakariya 1:4

Muhikhale ntoko makholowaanyu, wa yaawo yaalaleeriwe ni maprofeeti a khalayi masu ala: ‘Yave a ikuru sootheene oneera ha: ‘Muhiyeke iphirosanyu ni mitekosanyu soonanara.’ Mene awosa khayaatthunne wiiwa naari khayaakipwantthe, onghima Yave.

Zakariya 7:11

Vaheera yaakhootta opwattha; ni murima woowuuma yaahoorerani ettuli, ekhalaka attiyamaaru.