Hoxeya 8:5 - Emakhuwa Bible

⁵ Ii! oSamariya, mvonyere okerekhere milukusanyu sipakiwe ntoko mwaamombe! Isarasaka soopattelasa seiyo. Mpaka yaakhani muhiwereyaka okhala ootteela?

Hoxeya 8:5 Iomraidhean Croise

2 Nyaha 13:8

Vano nyuwosa muntthuna owanano omwene wa Yave, ori mmatatani mwa ekhapira ya Davide! Vekhaikhai nyuwosa muri nakupa mutokotoko ni mookhalano imombe sa eyuuma yoorikaxa opankaawe Yerobowami weera sikhale milukusanyu.

Icipo 19:13

Mukihiihe wa soottheka sa emwayiini weera sihikilamule. Hiiho kinookhala ookwanela ni oohinthowa.

Masu a Miruku 1:22

“Nyuwosa muhisuwenle opaka yooreera, mpaka yaakhani muneeraanyu mpwaherere ni ohisuwelawanyu? Nyuwosa anamatthebwa, mpaka yaakhani muneeraanyu muhakalalele otthebwawanyu? Ni nyuwosa alolo, mpaka yaakhani muneeraanyu muhoonele esuwelo?

Yesaya 45:20

Muthukumane ni nkarwani, muthukumane nyuwosa anamatthawa a miloko. Yaale ankuxa miluku sa etthaabwa, yaale amvekela miluku sihingwera ovuluxa ti oohisuwela etthu.

Yeremiya 13:27

Miyo kohoona mitekosanyu sa mwiikho, oraruwawanyu ni soohaawelasanyu soonanara, soopuutasanyu sohuuliheya muru mmattumuxani ni mmatta. Ii! Wa nyuwo, oYerusaleemu! Mpaka yaakhani muneeraanyu mpwaherere okhala oohitteela?”

Yeremiya 4:14

Ii oYerusaleemu! Mukatthe soonanara siri mmurimanimwanyu ni mvulixiwe! Mpaka yaakhani muneeraanyu mukhaleno soowuupuwela soonanara?

Yeremiya 48:13

Vano Mowabe onimuulihiheya muru ni Kemoxi, ntoko aYixrayeli yuulihihengyaaya muru ni oBeteli, mwa weiwo yaaroromelaayawo.

Hoxeya 10:5

Muloko onkhala oSamariya ommoova muluku opakiwe ntoko mwaamombe a oBeti-Aveni. Mulokwaaya onuumukhupanyere, vamoha ni asaserdotaaya a miluku yaahakalalela waarawaya, niwoko awo ahaakhiwa, onaronghiwa wootthukiwani.

Hoxeya 10:8

Altaari* a Empa ya Sootakhala ari soottheka sa aYixrayeli, anoophwatiwa. Nyiiwa ni malaxi sinimunnuwa saakutteleleke altaaraaya*. Vano awosa eniyeerele nyaako: “Munikhuneele!” Ni wa mattumuxa: “Munipittuwele!”

Hoxeya 13:2

Vano awosa annatthekaxa; wa eparathaaya* aniipakelano miluku, icaambulo soohaniwa moota wooratteliwa, sootheene iyo ti miteko sa namaratta. Eneeriwa sa muloko owo: “Awosa anaapaka sooveleela atthu ni ambeeca miluku ni ekhalelo ya mwaamombe.”

Hoxeya 8:6

Mwaamombe ola opakiwe ni aYixrayeli! Opakiwe ni namapattha. Owo khahiyono Muluku. Mwaamombe a oSamariya onoopwexakasiwa.

Amosi 8:14

Yaale anlipela mwa nsina na oSamariya yeeraka: ‘Mwa nsina na muluku a oDani,’ hoye hoye, ‘Mwa nsina na muluku a oBerxeba,’ anoomora woohivenyatho.”

Mikeyasi 1:7

Icaambulosaya soopatthiwa sootheene, sinoonyaanyiwa ni soovaha sootheene sa impa sa milukusaya sinoolalihiwa ni mooro; kinoophwata icaambulosaya sootheene. Seenre seiyo iwo othukumanyinghaaya sakhala ntoko soowina mooraruwani, icaambulo iyo sinoovareleyatho muteko ntoko nlivo na mooraruwani.”

Miteko 7:41

Ehuhuweene yeele yaapaka muluku mukina ni ekhalelo ya emombe ekhaaneene. Yaaruuhela soovaha ni yaahakalalela yeeyo matataaya yaapankaaya.

Deuteronomiyo 32:22

Vano mooro woopatta musaranimwaka: Onuukhuruwe mpaka moowiixeraxa wa okhwa, ohisaka etthaya ni soohephasaya, olalihaka mathipelo a nyaako.