Ezera 3:11 - Emakhuwa Bible

¹¹ Yaamwiipela Yave icipo soottottopela ni sootthapela: “Owo ti ooreeraxa; waasivelawawe aYixrayeli ompwaherera wa mahuku ootheene.” Vano atthu ootheene yaakhuwelaxa vamoha, emuttottopelaka Yave niwoko mathipelo a Empa ya Yave yaatekiwa.

Ezera 3:11 Iomraidhean Croise

1 Nyaha 16:34

Muntthapele Yave, niwoko Owo ti ooreera; osivelawawe khoommala.

1 Nyaha 16:41

Hemani ni Yedutuni yaari ni yaawo, nitho akina yaaromoliwe masina weera emutthapele Yave, ekhuwelaka: “Osivelawawe khoommala.”

2 Nyaha 5:13

Yaawo yiipa mapalapatta ni anamwiipa a icipo, ereene murima mmoha, yaamvuwiha emutthapelaka Yave. Moorumani wa mapalapatta, ikengere ni ikaruma sikina, yaakhuwelaxa, emvuwihaka Yave ni yaahiipa moota ola: “Owo ti ooreera; osivelawawe khoommala.” Hiiho, nihutte naasareya Mpaani mwa Yave,

2 Nyaha 7:3

aYixrayeli ootheene yoonnaaya mooro okhuruwaka ni ovuwa wa Yave osareyaka Mpaani mwa Muluku, yaakokhora vathi yuuramihelaka ikhovesaya vatthayani, yaamulapa, enamutthapela Yave, yeeraka: “Owo ti ooreera; osivelawawe khoommala.”

Nehemiya 12:24

Asitokweene a aLeevi yaari Haxabiya, Xerebiya, Yexuwa, mwaana mulopwana a Kademiyeli ni asikhwaaya yaakhala ohoolowaya weera, mpatta mmoha wiipaka icipo sa olapa ni otthapela, mpatta mukina owaakhuleleke, ntoko Davide, mulopwana a Muluku aalamulenlaawe.

Nehemiya 12:40

Nakupa oomiili a anamwiipa aarowa mmapuronimwawe Mpaani mwa Muluku ni miyo kaarowatho vamoha ni mpatta wa asitokweene

Icipo 100:5

Vano Yave ti ooreera ni osivelawawe woohihiyanyiheya ti woohimala. Ororomeleyawawe onkhala ni ikhapira sootheene.

Icipo 103:17

Vaheera osivela woororomeleya wa Yave ori woohimala wa yaale ammoova ni ekhaikhaiyaawe eri ni anamwane a anamwanaaya,

Icipo 106:1

Munttottopele Yave! Muntthapele Yave niwoko Owo ti ooreeraxa. Osivelawawe ompwaherera wa mahuku ootheene.

Icipo 107:1

Muntthapele Yave, niwoko Owo ti a murima wooreeraxa ni osivelawawe ompwaherera wa mahuku ootheene.

Icipo 118:1

Muntthapele Yave niwoko Owo ti ooreera murima; osivelawawe khoommala.

Icipo 131:1

Ii! Yave murimaaka khoohiyono woowiixoona; maithwaaka khaahiyono oowiikuxerera; nkiniihelanamo ni itthu sitokotoko naari sookitikhinihaxa.

Icipo 135:3

Munttottopele Yave niwoko Yave ti ooreera murima; mmwiipele icipo soottottopela Nsinanawe, niwoko ti noosiveleyaxa.

Icipo 47:1

Miloko sootheene nyuwo, mwiipe makuphi, munkhuwelele Muluku ni icipo sa ohakalala.

Icipo 47:5

Muluku oowela arukureeriweeneno okhuwela wa ohakalala ni oruma wa mapalapatta.

Okhuma 15:21

Miriyami aawaakhulela iipaka: “Mmwiipele Yave, niwoko oowina moovuwani. Oovonyera mphareiyani ekavalu* ni namweettihaaya.”

Yesaya 12:6

Amaki a oSiyoni, mukhuwele ni mwiipe ni ohakalala, niwoko Ootteela a oYixrayeli ti Mutokweene variyariwanyu.”

Yesaya 44:23

Mwiipe ni ohakalala erimu, niwoko Yave opanke yeeyo; mukhuwelaxe, nyuwo moowiixera mwa elapo. Mpacereke wiipa nyaako, nyuwosa othakho ni nyirisanyu sootheene, niwoko Yave oomoopola Yakobe, Owo onoonihera ovuwawawe oYixrayeli.

Yesaya 6:3

Awosa yaamukhuwelelana, yeeraka: “Ootteela, ootteela, ootteela ti Yave a ikuru sootheene; elapo yootheene yoosareya ovuwawawe.”

Yeremiya 33:11

masu a otthapa ni a ohakalala, masu a namatthomera ni namatthomeriwa, ni masu a yaale anruuha soovaha sootthapela wa Empa ya Yave yeeraka: Muntthapele Yave a ikuru sootheene, niwoko Owo ti ooreera, osivelawawe woororomeleya khoommala. Vano Miyo kinooceendya oreereliwa wa elapo ela ntoko khalayi,’ onghima Yave.

Axewu 2:3

‘Taani ahalahanle a nyuwosa oonne Empa ya Muluku ela ngwaaranimwaya woopacera? Naalikanxeraka yeele, kheenlikana ni yeeyo munoonaanyu vano.

Zakariya 4:7

Ii! Nyaako sooweraxa, nyuwosa taani? Ohoolo wa Zerubabeli munoothatawalihiwa. Vano onimwiikaathi nluku noottittimiheyaxa atthu ekhuwelaka: ‘Muluku areelihe nna, Muluku areelihe nna!’”

Zakariya 9:9

Muhakakalaxe mwaana muthiyana a oSiyoni; mukhuwele mwaana muthiyana a oYerusaleemu! Moone, mwenaanyu ongwaattamelani, oororomeleya ni oowineene, a murima woomaaleleya ni angwenleene buuru, aani mwaaxaana a buuru muthiyana.

Luuka 1:50

Ikhararisawe simphiyera ikhapira sootheene sa yaawo ammoova.

Yoxuwa 6:10

Yoxuwa aalamulela muloko: “Muhikhuwele hata muhinyakule naari muhuulume mpaka nihuku kineeraaka koolamuleleni weera mukhuwele. Vano nihuku nno muneeraanyu mukhuweleke!”

Yoxuwa 6:16

Emaara yanaathannapiili, asaserdoti* yiipaaya mapalapatta, vano Yoxuwa aalamulela muloko: “Mukhuweleke, niwoko Yave ohoovahererani esidade!

Yoxuwa 6:5

Mwiiwaka oruma wa mapalapatta wiipiwa woopwaherera, muloko wootheene okhuwelaxeke ni vano exiri ya esidade enoomora ni muloko onoowana, khula mutthu vanipuroni aneeraawe akhale.