aKolosi 1:5 - Emakhuwa Bible

⁵ niwoko na oweherera onoowehererani wiirimu. Nyuwo woopacera mohiiwa sa oweherera wu mwaha wa masu a ekhaikhai, masu ooreeraxa

aKolosi 1:5 Iomraidhean Croise

Icipo 31:19

Ii! Ti otokotoko oreerawanyu murima mwaathokororenlaanyu yaale angwoovani. Vamaithoni wa atthu munimwaavaha oreerawanyu murima yaale anootthawelelani Nyuwo.

Luuka 12:33

Muthumihe murinaanyu ni mvahe samahala. Mwiipakele mahottha ahinrowa othaala yaaviraka ehuhu, aani muhakhu woohimala wiirimu, weiwo khaawo namwiiya onkhuveela, hata tthumpwiha ohintthumpwihaawemo.

Miteko 10:36

Nyuwo moosuwela mutthenga orumihiwe ni Muluku wa muloko wa aYixrayeli, onuuluma sa masu ooreeraxa a murettele mwa Yeesu Kristu, Apwiya a ootheene.

Miteko 13:26

Axunna, anamwane a Abrahaamu ni nyuwo mummoova Muluku, wa hiyo noorumiheliwa mutthenga ola wa ovuluxiwa,

Miteko 23:6

Vano Pawulo, asuwelaka weera akina a yaawo yaari aSaduki* ni akinatho aFarisi*, aakhuwela eriyari ya eSineedriyu*: “Axunna, miyo ti muFarisi*, mwaana a muFarisi*. Miyo kinthorihiwa niwoko kinroromelaaka mwa ovenyerera wa akhwiiye!”

Miteko 24:15

Vano, mwa Muluku kookhalano owehererawene weiwo ntoko wa atthu ala, weera onuukhale ovenyerera wa oororomela ni oohiroromela.

aRooma 10:8

Vano, Yoolempwa* enghima eheeni? “Nsu nri vakhiviruwanyu; nri mmwaano ni mmurimanimwanyu.” Nsu nenenenno na nroromelo ninlaleiyaahu ti nna:

1 aKorinto 13:13

Hiiho singhala vaanaano iya tthaaru: nroromelo, oweherera, ni osivela. Vaheera yootthuneyaxa wa itthu seiya, ti osivela.

1 aKorinto 15:19

Waari weera hiyo naaroromenle mwa Kristu wa okumi wa vathi ola paahi, nimphwanela ikharari waapwaha ootheene.

2 aKorinto 5:19

weera Muluku mwa Kristu iiraanyiha elapo ya vathi ni mwaneenaaweru, ahaalikelaka soottheka sa atthu. Owo aanivaherera hiyo masu a wiiraana.

2 aKorinto 6:7

mmasuni a ekhaikhai, mukuruni sa Muluku, ni ikapwitthi sa ekhaikhai sikhaleke sa owana, naari wiixaakiha,

aGalata 2:14

Koonaka weera awo khayeentte ntoko ekhaikhai ya masu ooreeraxa, kaamooperera Pedru variyari wa atthu ootheene: “Nyuwo muYuda, vano khamunkhala ntoko muYuda, mene ntoko oohikhala aYuda. Tivawo, ongwereya hai waanyeserera atthu oohikhala aYuda otthara ekhalelo ya aYuda?”

aGalata 2:5

Khaniwiiwelenle yaawo hata vakhaani weera ekhaikhai ya masu ooreeraxa ekhale ni nyuwo.

aGalata 5:5

Hiyo ningweherera munroromeloni ninrweela wa Munepa Wootteela waakhuleliwa ni Muluku ori owehererawahu.

awEfeso 1:13

Nyuwo mookhalatho mwa Yoowo vahoolo woowiiwa ni woororomela masu a ekhaikhai, masu ooreeraxa awo yoovulunxeni, ni nyuwo mohiiyaatheriwa ni Munepa Wootteela woororomelihiwa.

awEfeso 4:21

Mwa yeeyo, nyuwo mohiiwa yuulummwaka ya Yoowo ni mwa Yoowo mooxuttihiwa mwaha wa ekhaikhai eri mwa Yeesu.

aKolosi 1:23

mwapwaherera oolipeene ni ookhalihiweene munroromeloni, muhisusaka wa nroromelo mwaakhenlaanyu mwiiwakaru masu ooreeraxa. Awo ti masu ala nyuwo mwiiwalaanyu, ni alaleeriwe atthu ootheene a elapo ya vathi, ni miyo Pawulo koothatuwa murumeiyi a masu ooreeraxa ala.

aKolosi 1:27

Wa yaale Muluku aalakela waasuweliha variyari wa amalapo mihakhu soovuwa sa ntikhinelo nna, nri Kristu mwa nyuwo, oweherera wa ovuwa.

aKolosi 3:16

Masu a Kristu ekhaleke mwa nyuwo moota wookwana. Muxuttihane ni mulakane mukina ni mukhwaawe ni miruku sootheene, ni mwiipe masalimu ni icipo sikina sa mmunepani, muntthapelaka Muluku mmirimanimwanyu.

1 aTesalonika 2:13

Ninnamutthapelatho Muluku nihihiyereraka, niwoko, ngwaakhelani nyuwo masu a Muluku wa hiyo, khamwaakhenle ntoko masu a mutthu, mene, ntoko araaya ekhaikhai, ntoko masu a Muluku amvara muteko mwa nyuwo munroromela.

2 aTesalonika 2:16

Apwiya Yeesu Kristu aneenaaya ni Mulukwaahu Atiithi, mwa Yoowo onisivenle ni onivanghe opepesa woohimala ni ororomela wooreera niwoko na mahala,

1 Timootheyo 1:15

Masu ala ti oororomeleya ni oophwanela waakhuleliwa nnenesene: Kristu Yeesu aarweenle elapo ya vathi waavuluxa anamattheka, ni a yaawo miyo kiri ootepaxa.

2 Timootheyo 4:8

Vano enookiweherera ecireemba ya ekhaikhai Apwiya, Mphuki oororomeleya, eneeraaya ekivahe nihuku nno, ni khoohiyono wa miyo paahi, menetho wa ootheene ansivela orwawaya.

Titu 1:2

Nroromelo ni esuwelo ela yoolipiheriwa munroromeloni ya okumi woohimala, mwa yoowo Muluku oohootha aaroromelihalaawe ehinaaye ehuhu.

aHeberi 7:19

woonaka weera malamulo ale khayaawenre yookwanela. Woovoleihiwa wa hiyo oweherera woopwahaxa, mwa yoowo hiyo nimmwaattamelaahuno Muluku.

1 Pedru 2:2

Ntoko anamwane ooyariwa vaanaano, muhaaweleke mukaka wootteela wa Munepa, weera niwoko na yoowo, nyuwo munnuwe mwa ovuluxiwa,

1 Pedru 3:15

Munttittimihe toko Kristu ntoko Apwiya mmurimanimwanyu. Mahuku ootheene mukhale oolikaneene weera ngwaakhule yakhalaru atthu eneera yookohakoheni mwaha wa oweherera ori mwa nyuwo.

2 Pedru 1:12

Tivawo, kinoowuupuxerani nyuwo mahuku ootheene sa seiya, naamwi musuwelaka ni mukhalaka oolipa mwa ekhaikhai mwaakhenlaanyu.

1 Yohaane 3:3

Ootheene yaawo akhalanne nroromelo nno mwa Yoowo, aniitteeliha asineenaaya, ntoko Owo oraawe Ootteela.