JUELE 2:12 - BIVHILI KHETHWA Mafhungo Madifha

¹² Muṋe washu u ri, “Tshifhinga ndi tshone, vhuelelani ha Nṋe nga mbilu yaṋu yoṱhe, ni ḓidzime zwiḽiwa, ni tsengise miṱodzi, ni lile.

JUELE 2:12 Iomraidhean Croise

2 SAMUELE 24:10

Huno musi Dafita o no vhala vhathu zwa thoma u mu dina, a amba na Muṋe washu a ri, “Ndo tshinya nga maanḓa nga zwe nda ita. Zwino Muṋe washu, nkhangwele vhuvhi hanga nandi. Ndo ita zwithu zwa vhutsilu.”

2 KORONIKA 30:6

Vhaḓinḓa vha bva vha tshi tevhedza ndaela ya khosi na vharangaphanḓa, vha gidima vha ṱanganya ḽoṱhe ḽa Juda na ḽa Israele vhe na maṅwalo ane a ri, “Vhathu vha Israele, vhuelelani ha Muṋe washu Mudzimu wa Abrahamu na Isaka na Israele, uri na Ene a vhuye ha inwi no salaho no ponyokaho zwanḓani zwa mahosi a Ashuru.

2 KORONIKA 6:27

zwenezwo vha thetshelese u ṱaḓulu, vhalanda vhau Vhaisraele u vha hangwele vhutshinyi havho. Vha funze u ita zwine zwa vha zwone, u nise mvula fhano shangoni ḽe wa ṋea vhathu vhau uri ḽi vhe ḽavho.

ESTERE 4:16

“Nga vha kuvhanganye Majuda vhoṱhe vha re muḓini wa Shushani, vha ḓidzime zwiḽiwa, vha nthabelele. Vha fhedze maḓuvha mararu vha sa ḽi tshithu vha sa nwi tshithu na vhusiku. Nṋe na vhashumi vhanga vha vhasidzana ri ḓo ita-vho nga u ralo. Musi ro no ita hezwo, ndi ḓo ya ha khosi, naho mulayo u sa tendi. Arali nda lovha, ndi ḓo ḓi lovha zwanga.”

EKISODA 33:5

Muṋe washu o vha o laya Mushe uri a vha vhudze a ri, “Ni vhathu vha tshipimbi. Arali nda ṱuwa na inwi naho tsha tou vha tshifhinganyana zwatsho, ndi nga ni lozwa tshoṱhe. Zwino bvulani nungu dzaṋu, ndi hone ndi tshi ḓo vhona zwine nda ḓo ni ita.”

YESAYA 22:12

Muṋe wa zwoṱhe, Muṋe washu Mulangazwoṱhe o ni vhidza musi wonoyo uri ni lile ni tou honḓa, ni palule ṱhoho dzaṋu, ni ambare madzanganda nga u pfa vhuṱungu.

YESAYA 58:4

ni tshi ḓidzima ni vusa khani na luṱana, na ita na u likitana nga mavili! Ni vhona unga u ḓidzima ho raloho hu nga ita uri thabelo dzaṋu dzi pfiwe ṱaḓulu naa?

JEREMIA 3:22

Vhuyani, inwi vhana vha sa fulufhedzei, ndi ḓo ni ilafha na vho fulufhedzea. “Ni ri, ‘Ee, ri ḓa ha Iwe, u Yahavee Mudzimu washu.

JEREMIA 36:7

Khamusi vha ḓo luvhelela Muṋe washu, muṅwe na muṅwe a litsha nḓila dzawe mmbi, ngauri mbiti na ṱhamu dze Muṋe washu a ri dzi ḓo wela vhathu havha ndi khulu.”

JEREMIA 4:1

Muṋe washu u ri, “Arali u tshi funa u vhuya iwe Israele, ndi zwone, vhuelela kha Nṋe. Arali wa laṱa midzimu yau i nengisaho, u songo tsha pambuwa nḓilani.

JEREMIA 4:2

Arali wa ana wa ri, ‘Nga Yahavee a tshilaho’, u ane u ngohoni, u ite zwi re zwone, u haṱule nga khaṱhulo mbuya; ndi hone tshakha dzi tshi ḓo shudufhadzana nga Nṋe dza zuwa Nṋe.”

ESEKIELE 33:11

Vha vhudze u ri, ‘Nga vhutshilo hanga – hu amba Nṋe Muṋe wa zwoṱhe Yahavee – ndi ri, a thi takaleli lufu lwa muvhi, ndi takalela muvhi a tshi laṱa vhuvhi hawe uri a tshidzwe. Vhuyani, vhuyani ni laṱe vhuvhi haṋu! Inwi vhathu vha Israele, ndi mini ni tshi funa u fa?’

DANIELE 9:3

Nda rembulutshela ha Mudzimu Muṋe wa zwoṱhe ndi tshi khou luvhelela nga thabelo ndi tshi ḓidzima, ndo ambara madzanganda, ndi tshi dzula milorani.

HOSIA 12:6

Huno zwino ni fanela u vhuelela ha Mudzimu waṋu, ni vhe na lufuno lu sa shanduki, ni ite zwi re zwone, ni dzule no lindela Mudzimu waṋu.

HOSIA 12:7

“Vhathu vha Efraimi vho no tou vha Vhakanana, ndi vhashavhi vho faraho zwikalo zwi sa fulufhedzei, vha tama zwa u fhura.

HOSIA 14:1

Israele, vhuelela ha Muṋe washu Mudzimu waṋu. No khukhulwa nga vhuvhi haṋu na wa!

HOSIA 6:1

Vhathu vha ri, “Iḓani ri vhuelele ha Muṋe washu, Ene o ri ṱhukhukanya, u ḓo dovha a ri fhodza. O ri huvhadza, u ḓo pomba mbonzhe dzashu.

JUELE 1:13

Inwi vhotshifhe, ambarani madzanganda ni lile, honḓani inwi ni no shuma aḽiṱarini. Iḓani, lalani no fuka madzanganda, inwi vhane na shumela Mudzimu wanga, ngauri nḓuni ya Mudzimu waṋu a hu tshee na nduvho ya thoro na ya waini.

ZAKARIA 7:3

na u vhudzisa vhotshifhe vha thembele ya Muṋe washu Mulangazwoṱhe, na vhaporofita, vha ri, “Nṋa ndo fanela u ḓi lila nda ḓidzima nga ṅwedzi wa vhuṱanu, sa zwe nda vha ndi tshi ḓi ita miṅwaha minzhi yo fhelaho naa?”

ZAKARIA 7:5

“Vhudzisa vhathu vhoṱhe vha shango na vhotshifhe u ri, ‘Musi ni tshi ḓidzima ni tshi lila nga ṅwedzi wa vhuṱanu na wa vhuṱanu na vhuvhili miṅwaha ya 70 yo fhelaho, vhukuma no vha ni tshi itela u hulisa Nṋe naa?

MALAKIA 1:9

“No no ralo na dovha na ri, ‘Zwino lingani u kwengweledza Mudzimu uri a ri itele vhuthu.’ Ni tshi mu ṋekedza zwiṱhavhelo zwo raloho nga zwanḓa zwaṋu, ni vhona unga u ḓo ni ṱanganedza naa? Hu amba Nṋe Yahavee Mulangazwoṱhe.

MISHUMO 26:20

Ndo mbo ḓi thoma u ḓivhadza ipfi ḽa Mudzimu Damasko na Jerusalema, nda konou ṱanganya ḽoṱhe ḽa Judia nda ya na kha vhannḓa, ndi tshi funza uri vhathu vha furalele vhuvhi havho vha rembulutshele kha Mudzimu, vha ite zwine zwa sumbedza uri vhukuma vho rembuluwa.

VHARANGAPHANḒA 2:4

Musi muruṅwa o fhedza u amba zwenezwo, Vhaisraele vhoṱhe vha thoma u lila,

VHARANGAPHANḒA 20:26

Ndi hone Vhaisraele vhoṱhe vha tshi gonya Bethele vha yo lila vho dzula phanḓa ha Muṋe washu. Musi wonoyo vha ḓidzima zwiḽiwa ḽa vhuya ḽa kovhela, vha ṋekedza Muṋe washu zwiṱhavhelo zwi fhiswaho na nduvho dza vhuthihi.

1 SAMUELE 7:3

Samuele a amba na Vhaisraele a ri, “Arali ni tshi vhuelela ha Muṋe washu nga mbilu dzaṋu dzoṱhe, laṱani midzimu yaṋu isili, na zwifanyiso zwa mudzimu wa musadzi Ashtharotho. Ḓikumedzeni Muṋe washu tshoṱhe ni luvhe Ene fhedzi, ndi hone a tshi ḓo ni lamukisa zwanḓani zwa Vhafilista.”

1 SAMUELE 7:6

Vha mbo kuvhangana Mitsipha, vha ka maḓi, vha a shulula phanḓa ha Muṋe washu. Musi wonoyo vha ḓidzima zwiḽiwa, vha bula vhuvhi havho vha ri, “Ro khakhela Muṋe washu.” Henefho Mitsipha Samuele a laya Vhaisraele.