ଫିଲିପିୟ 1:10 - ମୁଣ୍ଡା ନାୱା ନିୟାମ୍

¹⁰ ନେତାଃ ସାନ୍ତେ ଚି ଆପେ ବେଶ୍ ତେ ବେଶ୍ କାଜିକୋକେ ସୁକୁଅଃପେ, ହାର୍ ମାସୀହ୍ ରାଃ ହୁଲାଙ୍ଗ୍ ସାନ୍ତେ ଫାର୍ଚିକାନ୍ ବାଇତାଇନ୍ ପେ, ଆଡୋଃ ଆଲୋପେ ଦୋଷୀୟୋଃୱା।

ପାର୍‌ମେଶ୍ୱାର୍‌ଆଃ ଜୀନିଦ୍‌ ବାଚାନ୍‌ ନାୱା ନିୟାମ୍‌

¹⁰ ଏନାତେ ଆପେ ଅକ୍‌ନାଃ ବୁଗିନାଃ ତାନାଃ ଏନାପେ ଆଟ୍‌କାର୍‌ଉରୁମ୍‌ ଦାଡ଼ିୟା । ଏନ୍ତେ ଆପେ ଖ୍ରୀଷ୍ଟ୍‌ଆଃ ହିନିଜୁଃ ହୁଲାଙ୍ଗ୍‌ରେ ସବେନ୍‌ ଲେକାନ୍‌ ସତ୍‌ରାଏତେ ଫାର୍‌ଚି ଆଡଃ କା ଚିଟାକାନ୍‌ ତାଇନାଃପେ ।

ଫିଲିପିୟ 1:10 Iomraidhean Croise

ମାତ୍ତିଉ 16:23

ଏନ୍ତେ ୟୀଶୁ ବିୟୁର୍ କେତେ ପାତ୍ରାସ୍ କେ କାଜିକେଦାଏ, “ହେ ଶାଏତାନ୍ ଇଙ୍ଗ୍ଆଃ ନାଡ଼େଏ ତେ ଗେନାନ୍ ମେ, ଆମ୍ ଇଙ୍ଗ୍ଆଃ ପାର୍ମେଶ୍ଵାର୍ ରାଃ କାମି କେ ଛେକାଃ ତାନାମ୍, ଚିୟାଃଚି ଆମ୍ ପାର୍ମେଶ୍ଵାର୍ ରାଃ ପାହୋମ୍ ଲେକା କାହା, ମେନ୍ଦୋ ହୋଡ଼ୋକୋୱାଃ ଲେକା ପାହୋମ୍ ତାନାମ୍।”

ମାତ୍ତିଉ 26:33

ନେୟା ରେ ପାତ୍ରାସ୍ ଇନିଃକେ କାଜିକେଦାଏ, “ଆଗାର୍ ସବେନ୍ କୋ ଆମ୍‍କେ ବାଗେ ତାମେୟାକୋ ରେଦୋ ବାଗେ ଚାକୋ, ମେନ୍ଦୋ ଇଙ୍ଗ୍ ଚିଉଲା ହଗି କାଇଙ୍ଗ୍ ବାଗେ ମେୟା।”

ଯୋହାନ୍ 1:47

ୟୀଶୁ ନାଥ୍‍ନିଏଲ୍ କେ ଆୟାଃ ନାଡ଼େଏ ହିଜୁଃତାନ୍ ନେଲ୍‍କେତେ ଇନିଜାଃ ବିଷାୟ୍ ରେ କାଜିକେଦାଏ, “ନେଲିପେ, ନିଈ ସାର୍ତିଗୀ ଇସ୍ରାଏଲୀ ହୋଡ଼ ତାନିଃ, ନିଜାଃ ତାଃ ଲୋଗୋ ବାନୋଗା।”

ଯୋହାନ୍ 3:20

ଚିୟାଃଚି ଅକଏ ଶିତୃ କାମିତାନାଏ, ଇନିଃ ମାସ୍କାଲ୍ କେ ହିଲାଙ୍ଗ୍ ୟାଏ ହାର୍ ମାସ୍କାଲ୍ ନାଡ଼େଏ ତେ କାଏ ହିଜୁଗା, କାରେ ଦୋ ଆଜାଃ କାମି ନେଲ୍ କୋଃୱା।

କୁଲାକାନ୍ 24:16

ନେୟାତେ ଇଙ୍ଗ୍ ଆପାନ୍ ଗି କୋଷିସ୍ କାତେୟାଇଙ୍ଗ୍ ଚି ପାର୍ମେଶ୍ଵାର୍ ରାଃ ହାର୍ ହୋଡ଼ୋକୋୱାଃ ନାଡ଼େଏ ରେ ଇଙ୍ଗ୍ଆଃ ମୋନ୍ ସବେନ୍ ହୁଲାଙ୍ଗ୍ ନିର୍ଦୋଷ୍ ଗି ତାଇନୋଃକା।

ରୋମ୍‍ରେନ୍ 12:2

ନେ ଅତେଦିଶୁମ୍ ରେନ୍‍କୋ ଲେକା ଆଲୋପେ ବାଇୟୋଃୱା; ମେନ୍ଦୋ ଆପେୟାଃ ମୋନ୍ ନାୱା ହୋବାଜାନ୍ତେ ଆପେୟାଃ ସେସେନ୍ ହ ବାଦ୍‍ଲାଅ ଇଦିଅଃକା, ଏନାତେ ଆପେ ପାର୍ମେଶ୍ଵାର୍ ରାଃ ବୁଗିନ୍, ହାର୍ ସୁକୁଲେକା ହାର୍ ଠାଉକା ସାନାଙ୍ଗ୍ କେ ଆଟ୍‍କାର୍ କେତେ ସାରିକାତେପେ।

ରୋମ୍‍ରେନ୍ 12:9

ଦୁଲାଡ଼୍ ଦୋ ବେଗାର୍ ବେଦା ତାଇନ୍‍କା; ଏତ୍କାନାଃ ତେ ହିଲାଙ୍ଗ୍ ଏପେ, ବୁଗିନାଃ ରେ ତାଇକାନ୍‍ପେ।

ରୋମ୍‍ରେନ୍ 16:17

ନାଆ ହେ ହାଗାକୋ ହାର୍ ମିଶିକୋ, ଇଙ୍ଗ୍ ଆପେ ତେ ଆର୍ଜିପେତାନିଙ୍ଗ୍ ଚି, ଅକନ୍ ହୋଡ଼ୋକୋ ଏନ୍ ସାର୍ତି ଶିଖାଅକାନ୍ କେ ବାଗିକେତେ ଏନାରାଃ ଉଲ୍‍ଟା ଅକନାଃ ଆପେପେ ନାମ୍ କାଦା, ବାଗ୍‍ଡ଼ାଅ ହାର୍ ଥୋଦୋଃ ରାଃ ହୋଡ଼ ବାଇଏନ୍ ତାନାକୋ, ଇନ୍‍କୁ ତେ ସାଙ୍ଗିନ୍ ରେ ତାଇନ୍‍ପେ।

ରୋମ୍‍ରେନ୍ 2:18

ଆଡୋଃ ଇନିଜାଃ ସାନାଙ୍ଗ୍ କେ ସାରିତାନାମ୍ ହାର୍ ମୁଶା ନାବୀ ରାଃ ଆଇନ୍ ରାଃ ଶିକ୍ଷା ନାମ୍ କେତେ ବୁଗିନ୍-ବୁଗିନ୍ କାଜିକୋକେ ବେଶ୍ ପାତି ତାନାମ୍;

ରୋମ୍‍ରେନ୍ 7:16

ଆଗାର୍ ଅକନାଃ ଇଙ୍ଗ୍ କାଇଙ୍ଗ୍ ସାନାଙ୍ଗ୍ ତାନା ଏନାକେଗି ରିକାତାନିଙ୍ଗ୍, ଦୋ ଇଙ୍ଗ୍ ମାନାତିଙ୍ଗ୍ କେତାନିଙ୍ଗ୍ ଚି ମୁଶା ନାବୀ ରାଃ ଆଇନ୍ ବୁଗିନ୍ ତାନାଃ।

ରୋମ୍‍ରେନ୍ 7:22

ଚିୟାଃଚି ଇଙ୍ଗ୍ ଭିତାର୍‍ରେନ୍ ହୋଡ଼ମୋ ତେଦୋ ପାର୍ମେଶ୍ଵାର୍ ରାଃ ଆଇନ୍ ତେ ଥିମ୍ବାଗି ସୁକୁଅଃ ତାନାଇଙ୍ଗ୍।

ରୋମ୍‍ରେନ୍ 8:7

ଚିୟାଃଚି ପାପୀ ହୋଡ଼ମୋ ରେ ମୋନ୍ ଲାଗାଅ ଦୋ ପାର୍ମେଶ୍ଵାର୍ ରାଃ ବାଇରୀ ବାଇୟେନ୍ ତାନାଃ, ଚିୟାଃଚି ଏନାଦୋ ପାର୍ମେଶ୍ଵାର୍ ରାଃ ଆଇନ୍ ରାଃ ଆଧିନ୍ ବାନୋଃୱା ହାର୍ କା ହୋବାଅଃୱା।

୧ କରିନ୍ଥିୟ 1:8

ପାର୍ମେଶ୍ଵାର୍ ଆପେକେ ଟୁଣ୍ଡୁ ସାନ୍ତେ ହ କେଟେଃ ରିକାୟାଏ ଏନାତେ ଆପେ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ ହୁଲାଙ୍ଗ୍ ସାନ୍ତେ ନିର୍ଦୋଷ୍ ତାଇନୋଃୱାପେ।

୧ କରିନ୍ଥିୟ 10:32

ଆପେ ଜେତାୟାଃ ବିଶ୍ଵାସ୍ ବାଗେ ରାଃ କାରାନ୍ ଆଲୋପେ ବାଇୟୋଃୱା ୟାହୁଦୀକୋ ନାଙ୍ଗ୍ କାହା, ୟୁନାନୀ ହୋଡ଼ୋକୋ ନାଙ୍ଗ୍ କାହା ହାର୍ ପାର୍ମେଶ୍ଵାର୍ ରାଃ କାଲିସିୟା ନାଙ୍ଗ୍ ହ କାହା।

୧ କରିନ୍ଥିୟ 8:13

ଏନାମେନ୍ତେ ଆଗାର୍ ଜୋଜୋମାଃ ଇଙ୍ଗ୍ଆଃ ମାସୀହ୍ ହାଗା କେ ବିଶ୍ଵାସ୍ ବାଗେ ରାଃ କାରାନ୍ ହୋବାଅଃତାନ୍ ରେଦୋ, ଇଙ୍ଗ୍ ଚିଉଲା ହଗି ଜାଲେକାତେ ହ ମାସ୍ କାଇଙ୍ଗ୍ ଜୋମେୟା, ଏନ୍‍କା ଆଲୋକା ହୋବାଅଃକା ଚି ଇଙ୍ଗ୍ ଇଙ୍ଗ୍ଆଃ ହାଗା ରାଃ ବିଶ୍ଵାସ୍ ବାଗେ ରାଃ କାରାନ୍ ବାଇୟୋଗାଇଙ୍ଗ୍।

୨ କରିନ୍ଥିୟ 1:12

ଚିୟାଃଚି ଆଲେ ଆଲେୟାଃ ଆଟ୍‍କାର୍ ଧାଡ଼ି ସେଣା ତେ ନେ ଗୋୱା ଚେତାନ୍ ରେ ଘାମାଣ୍ଡ୍ ତାନାଲେ, ଚି ନେ ଅତେଦିଶୁମ୍ ରେ ହାର୍ ଖାସ୍ କେତେ ଆପେୟାଃ ଥାଲା ରେ ଆଲେୟାଃ ଚାଲ୍-ଚାଲାନ୍ ପାର୍ମେଶ୍ଵାର୍ ସାନାଙ୍ଗ୍ ଲେକା ନେକା ପାବିତାର୍ ହାର୍ ସାର୍ତି ଲୋଃ ତାଇକେନା। ଅକନାଃ ନେ ଅତେଦିଶୁମ୍ ରେନ୍ ହୋଡ଼ୋକୋୱାଃ ସେଣା ତେ କାହା ମେନ୍ଦୋ ପାର୍ମେଶ୍ଵାର୍ ରାଃ ଆନୁଗ୍ରାହ୍ ଲୋଃ ତାଇକେନା।

୨ କରିନ୍ଥିୟ 2:17

ଚିୟାଃଚି ଆଲେ ଇନ୍‍କୁୱାଃ ଲେକା ନାହାଲାଲେ, ଅକନ୍‍କୋ ପାର୍ମେଶ୍ଵାର୍ ରାଃ ବାଚାନ୍ କେ ମେଶା ସାନାଅ ୟାକୋ; ମେନ୍ଦୋ ସୋଜ୍ ମୋନ୍ ତେ, ହାର୍ ପାର୍ମେଶ୍ଵାର୍ ପାଡ଼େତେ ପାର୍ମେଶ୍ଵାର୍ ଆବୁକେ ନେଲ୍ ତାନାଏ ମେନ୍ତେ ମାସୀହ୍ ରେ କାଜିୟାଲେ।

୨ କରିନ୍ଥିୟ 6:3

ଆଲେ ଜାହାନ୍ କାଜି ରେ ଜେତାଏ କେ ବିଶ୍ଵାସ୍ ବାଗି ରାଃ ଜେତାନ୍ ମାଉକା କାଲେ ଏମେୟା, ଏନାତେ ଆଲେୟାଃ ସେୱା ରେ ଜେତାନ୍ ଦୋଷ୍ ଆଲୋ ହିଜୁଃକା।

୨ କରିନ୍ଥିୟ 8:8

ଇଙ୍ଗ୍ ଆପେକେ ଆନାଚୁ ଏମାପେତାନ୍ ଲେକାତେ ଦୋ କାହା, ମେନ୍ଦୋ ଏଟାଃକୋକେ ଯୋଶ୍ ଏମେ ଲାଗିନ୍ତେ ଆପେୟାଃ ଦୁଲାଡ଼୍ ସାର୍ତି ଚି କାହା ଏନାକେ ସାରିଲାଗିନ୍ତେ କାଜିପେ ତାନିଙ୍ଗ୍।

ଗାଲାତିୟ 5:11

ମେନ୍ଦୋ ହେ ହାଗାକୋ, ଆଗାର ଇଙ୍ଗ୍ ନାଆ ସାନ୍ତେ ଖାତ୍ନା ରାଃ ପାର୍ଚାର୍ ତାନିଙ୍ଗ୍, ଏଣ୍ଡେ ଚିନାଃ ମେନ୍ତେ ନାଆ ସାନ୍ତେ ସାତାଅଃ ତାନିଙ୍ଗ୍? ନେକାରେଦୋ କ୍ରୁଶ୍ ତେ ଆଡୋଃ ଠୋକାର୍ କାକୋ ନାମେୟା।

ଏଫିସିୟ 4:15

ମେନ୍ଦୋ ଦୁଲାଡ଼୍ ତେ ସାର୍ତି ରେ ସେସେନ୍ ତାନ୍ ଲୋଃ, ସବେନ୍ କାଜି କୋରେ ଅକନିଃ ବୋଅ ତାନିଃ ମାନେ ମାସୀହ୍ ରେ ହାରା ଇଦିଅଃପେ।

ଏଫିସିୟ 5:10

ହାର୍ ନେୟା ଆଟ୍କାର୍ ଉରୁମେପେ ଚି ପ୍ରାଭୁ ଚିନାଃ ରେ ସୁକୁଅଃ ତାନାଏ।

ଏଫିସିୟ 5:27

ହାର୍ ଏନାକେ ମିୟାଃ ଏନ୍‍ଲେକା ମାସ୍କାଲାନ୍ କାଲିସିୟା ବାଇକେତେ ଆୟାଃ ସାମାନାଙ୍ଗ୍ ରେ ତିଙ୍ଗୁୟାଏ, ଏଣ୍ତେରେ ଜେତାନ୍ ଦାଗ୍ କାହା, ଜେତାନ୍ ସୁର୍କୁଇଙ୍ଗ୍ କାହା, ଜାହାନ୍ ଏଟାଃ ଦୋଷ୍-କାଜି କାହା, ମେନ୍ଦୋ ପାବିତାର୍ ଆଡୋଃ ନିର୍ଦୋଷ୍ ତାହିନା।

ଏଫିସିୟ 6:24

ଅକନ୍ କୋ ଆବୁୱାଃ ପ୍ରାଭୁ ୟୀଶୁ ମାସୀହ୍ କେ ସାର୍ତି ତେ ଦୁଲାଡ଼୍ ମାଣ୍ତାଅ ତାନାକୋ, ଏନ୍ ସବେନ୍ କୋୱାଃ ରେ ଆନୁଗ୍ରାହ୍ ହୋବାଇଦିଅଃକା।

ଫିଲିପିୟ 1:16

ଚିମିନାଙ୍ଗ୍ କୋ ନେୟା ସାରିକେତେ ଚି ଇଙ୍ଗ୍ ସୁସାମାଚାର୍ ରାଃ ବାଞ୍ଚାଅ ଲାଗିନ୍ତେ ବାଇକାନାଇଙ୍ଗ୍, ଇନ୍‍କୁ ଦୁଲାଡ଼୍ ତେ ପାର୍ଚାର୍ ତାନାକୋ।

ଫିଲିପିୟ 1:6

ଇଙ୍ଗ୍‍କେ ନେ କାଜି ରାଃ ଭାରୋସା ମେନାଃ ଚି ପାର୍ମେଶ୍ଵାର୍ ଅକନିଃ ଆପେ ରେ ବୁଗିନ୍ କାମି ଏଟେଃ କେଦାଏ, ଇନିଃଗି ଏନାକେ ୟୀଶୁ ମାସୀହ୍ ରାଃ ହୁଲାଙ୍ଗ୍ ସାନ୍ତେ ପୁରାୟାଏ।

ଫିଲିପିୟ 2:16

ଏନାତେ ମାସୀହ୍ ରାଃ ହୁଲାଙ୍ଗ୍ ଇଙ୍ଗ୍ ମାରାଙ୍ଗ୍ ଜାନିଙ୍ଗ୍ ଲେକା ପାହୋମେ ୟାଇଙ୍ଗ୍ ଚି ଇଙ୍ଗ୍ଆଃ ନୀନିର୍ ହାର୍ ନା ଇଙ୍ଗ୍ଆଃ କାମି ସାମାଗୀ କା ହୋବାନା।

୧ ଥେସ୍‌ଲନିକା 3:13

ଏନାତେ ପ୍ରାଭୁ ୟୀଶୁ ଆପେୟାଃ ମୋନ୍ କୋକେ ନେକା ପେଡ଼େଏ ଏମେକାଏ ଚି ଚିମ୍ତାଙ୍ଗ୍ ଆବୁୱାଃ ପ୍ରାଭୁ ୟୀଶୁ ଆଜାଃ ସବେନ୍ ପାବିତାର୍ ହୋଡ଼ୋ କୋଲୋଃ ହିଜୁଗାଏ, ଇମ୍ତା ଆପେ ଆବୁୱାଃ ପାର୍ମେଶ୍ଵାର୍ ଆଡୋଃ ଆପୁ ରାଃ ସାମ୍‍ନାଙ୍ଗ୍ ରେ ପାବିତାର୍ ରେ ନିର୍ଦୋଷ୍ ହୋବାଅଃୱାପେ।

୧ ଥେସ୍‌ଲନିକା 5:21

ସବେନ୍ କାଜିକୋକେ ଆଟ୍‍କାର୍ ଉରୁମ୍ଏପେ; ଅକନାଃ ବୁଗିନାଃ ତାନାଃ ଏନାକେ ସାବେପେ ହାର୍ ମାନାତିଙ୍ଗ୍ଏପେ।

୧ ଥେସ୍‌ଲନିକା 5:23

ଶାନ୍ତି ରାଃ ପାର୍ମେଶ୍ଵାର୍ ଆଏଃଗି ଆପେକୋକେ ପୁରାଃ ଲେକାତେ ପାବିତାର୍ କାଏ; ହାର୍ ଆବୁୱାଃ ପ୍ରାଭୁ ୟୀଶୁ ମାସୀହ୍ ରାଃ ହିଜୁଃ ସାନ୍ତେ ଆପେୟାଃ ପୁରା ଆତ୍ମା ହାର୍ ଜୀଉ ହାର୍ ହୋଡ଼ମୋ ନିର୍ଦୋଷ୍ ଗି ବାଞ୍ଚାଅ ତାଇନୋଃକା।

1 ଯୋହାନ୍ 4:1

ହେ ଦୁଲାଡ଼୍ କୋ, ସବେନ୍ ଆତ୍ମା କେ ଆଲୋପେ ପାତିୟା; ମେନ୍ଦୋ ଆତ୍ମା କୋକେ ସାରିଉରୁମ୍ କୋପେ ଚି ଇନ୍‍କୁ ପାର୍ମେଶ୍ଵାର୍ ପାଡ଼େତେ ତାନ୍‍କୋ ଚି କାହା: ଚିୟାଃଚି ଥିମ୍ବାଗି ହିହିଡ଼୍ ନାବୀ କୋ ଅତେଦିଶୁମ୍ ରେ ଅଡୋଙ୍ଗ୍ କାନାକୋ।

ଉଦୁବ୍‍କାଜି 2:2

ଇଙ୍ଗ୍ ଆମାଃ କାମି, ଆଡୋଃ ଆମାଃ ପାରିଶ୍ରାମ୍, ଆଡୋଃ ଆମାଃ ସାହାତିଙ୍ଗ୍ କେ ସାରିୟାଇଙ୍ଗ୍; ଆଡୋଃ ନେୟା ହ ଚି ଆମ୍ ଖାରାପ୍ ହୋଡ଼ୋକୋକେ ନେଲ୍ କାମ୍ ସାହାତିଙ୍ଗ୍ ଧାଡ଼ିକୋୱା, ଆଡୋଃ ଅକନ୍‍କୋ ଆପାନ୍ କେ କୁଲାକାନ୍ ଚେଲା ମେନ୍ତେ କାଜିୟୋଃ ତାନାକୋ, ହାର୍ ନାହାଲାକୋ, ଇନ୍‍କୁକେ ଆମ୍ ଆଟ୍‍କାର୍ ଉରୁମ୍ କେତେ ହିହିଡ଼୍‍କୋ ମେନ୍ତେ ନାମ୍ କେଃକୋୱାମ୍।