3 Q'ončux q'oççağe, Q'ončuxe Şot'ay s'i.
Şuva me s'ila Padçağ? Zorba, bitova başarbala Q'ončux! Davoğo taşala Q'ončux!
Ext'a vi q'ılınca, vi bı̌yex ğaç̌p'a, ay q'oççağ! Vi zora, vi kalaluğa ak'est'a!
Barta Va, İz s'i Q'ončux bakalt'u çalxeq'at'un, Avabakeq'at'un me dünyəni kalo Vi baksuna, ay Ala Arśi Buxačux!
Ef gala Q'ončuğon İçin davabale! Və̌n isə ef ük'ə buz k'inək' efanan!»
Şot'in araboğoy təkərxo t'etəre lə̌q'p'i ki, araboox zorint'un taysay. Misirluğon pit'un: «Ekinan israilluğoxun t'it'en, Q'ončuğon İçine şot'oğoy tərəf baki beşi əleyinə davabsa!»
Moiseyen Buxačuğo pine: «İsrailluğoy t'ǒğǒl taśi "za ef t'ǒğǒl yaq'abiyo ef bavoğoy Buxačuxe" uk'ayiz, şot'oğonal zaxun xavar haq'es bat'unkon ki, "p'oy Şot'ay s'i hik'ə?" T'e vədə zu k'ə uk'az?»
Buxačuğon Moiseya pine: «Zu Həmişə Bakalozu». Oşa pine: «İsrailluğo upa ki, "Həmişə Bakalo" s'iyen bakalt'ine ef t'ǒğǒl za yaq'abe».
Buxačuğon Moiseya saal pine: «İsrailluğo upa: "Həmişə Bakalt'in, ef bavoğoy Buxačuğon - Avrahami Buxačuğon, İsaak'i Buxačuğon saal İak'ovi Buxačuğone za ef t'ǒğǒl yaq'abe". Mo Bezi həmişəluğ s'ine. Barta Za nəsiləxun nəsilə metərq'at'un çalxi.
