Joshua 6:18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁸ Ẹkẹvuọvo ovwan kẹnẹ oma kẹ obo re vwo ze kẹ ẹghwọrọ na, ọke ra da vwẹ ayen ze kẹ ẹghwọrọ nu wa da rha vwẹ obọ te obo re vwo ze na ku we che ru erhọn rẹ Izrẹl dia kẹ ẹghwọrọ, ku wa cha so okpetu kẹ.

Joshua 6:18 Iomraidhean Croise

2 Samuẹl 21:1

Etiyin owẹvwe de rhi fi vwẹ ọke ri Devid vwẹ ẹgbukpe erha, nẹ ukpe ra ro ukpe; Devid da guọnọ Ọrovwohwo mrẹ. Ọrovwohwo da ta, Abe rẹ ọbara ọ hẹ enu rẹ Sọl vẹ evwruwevwi rọye, kidie o hwe ihwo ri Gibiọn.

Aghwoghwo 9:18

Aghwanre yovwi nọ ekuakua rẹ ofovwi, ẹkẹvuọvo oruimwemwu ọvo guọghọ emu esiri buebu.

Jona 1:12

Ọ da ta kẹ ayen, We mu vwẹ rere wa kpare ovwẹ phihọ abadi na, etiyin abadi na kọ fọ kẹ ovwan, kidie me riẹnre nẹ fiki mẹ ọye abadi na rhe vwọ họnre gangan na.

Ọbe ri Pọl si rhe Ihwo ri Rom 12:9

We jẹ ẹguọnọ rẹ ovwan dia ọ rẹ unu diodi-i; Jẹn umwemwu tu ovwan oma, churu obọ mu obo ri yoma.

2 Kọrẹnt 6:17

Fiki rẹ ọtiọye na gbe vrẹn nẹ ohri rẹ ayen, gba hẹriẹ oma nẹ ayen, eriyin Ọrovwohwo tare, Wọ vwẹ obọ te emu ogbegbe-e; ki mi dede ovwan reyọ

Ẹfesọs 5:11

We vwo obọ vwẹ iruo ofefe re ruẹ vwẹ ebri na-a, ẹkẹvuọvo kpe rẹ ọyena we tue ayen phia.

Urhi Rivẹ 13:17

Wo gbi jẹ emuẹgha ọvuọvo tamu obọ wẹ-ẹn; rere Ọrovwohwo mrasa vwo kurhẹriẹ nẹ ophu ọgangan rọye, ro nẹ aruẹdọ wẹn, rọ rie ehrọre wẹn, ro ru we bu phihọ kirobo ro veri kẹ esẹ–ovwan na;

Urhi Rivẹ 23:10

Ọ da dianẹ ohwo ọvo herọ vwẹ uherevie rẹ ovwan rẹ oma rọye fonro-o vwi fiki rẹ emu rọ phia kẹ vwẹ ason ọ Me yan phia nẹ erhọn na, ọ gbe ro evun rẹ erhọn na ọfa-a,

Urhi Rivẹ 7:26

Wọ ghwẹ ẹgua cha uwevwi wẹ-ẹn, o de rhi hirhe phihọ ohwo re duvwu iyori kẹ, jo tu we oma tototo, jọ nyẹnyẹ owẹ oma; kidie emu rẹ iyori oruẹ.

Jems 1:27

Omamọ rẹ egagọ ro jẹ ẹgua evwo vwẹ obaro rẹ Ọghẹnẹ rẹ avwanre kugbe Ọsẹ rẹ avwanre na ọ na, rere o mie te asan rẹ emephran orivwi kugbe eyauku re hẹ ukpokpogho, rere o rhe si oma rọye phrẹphrẹ nẹ etatọrọ rẹ akpọ na.

Joshua 7:1

Ẹkẹvuọvo ihwo rẹ Izrẹl de gbe oma rayen ẹgua vwẹ oma rẹ ẹravwo re vwo ze na; kidie Ekan rẹ ọmọ ri Karmi, ọmọ ri Zabdi, ọmọ ri Zerah, ohwo rẹ orua ri Juda, da reyọ evo vwẹ eravwọ re vwo ze na; ophu rẹ Ọrovwohwo da tua kpahe ihwo rẹ Izrẹl.

Joshua 7:13

Vrẹn, phorho ihwo na oma, re wọ ta, phorho oma rẹ ovwan kpahe hẹrhẹ odẹ rọ cha na, kidie enẹ Ọrovwohwo tare, Ọghẹnẹ rẹ Izrẹl, Obo re vwo ze izobo hẹ ohri rẹ ovwan, E Izrẹl, we gbi se hirhe opharo ku ivwighrẹn rẹ ovwa-an, bẹsiẹ we vwo si ekuakua re vwo ze izobo na nẹ ohri rẹ ovwan.

Joshua 7:15

Ohwo re muru vẹ obo re vwo ze izobo na ka torhẹ te ọye te obo ro vwori ejobi, fikiridie ọ chọ urhi rẹ ọphọ rẹ Ọrovwohwo na, kidie o ru emu rẹ omaẹvuọ vwẹ Izrẹl.

Joshua 7:25

Etiyin Joshua da ta, Die wọ vwọ so okpetu kẹ avwanre? Ọrovwohwo na je so okpetu kẹ wẹ nonẹ na. Izrẹl ejobi da vwẹ ikpokpo phio hwe, ayen da vwẹ erhanre torhẹ ayen, ayen da vwẹ ikpokpo phi ayen hwe.

1 Jọn 5:21

Emọ na, we si oma rẹ ovwan nẹ ẹdjọ.

1 Samuẹl 15:9

Ẹkẹvuọvo Sọl vẹ ihwo na de ji Agag vwo, kugbe igodẹ ri me yovwi kugbe irhuẹn eshare kugbe eranvwe vẹ ivwri, kugbe emọ rẹ igegede kugbe obo ri me yovwi ejobi, o rhe hwe ayen ejobi tototo-o; obo ri tuoma ri fi emuọvo-o ejobi ayen de hwe eyena.