Números 20:5 - Bible in Tzeltal de Oxchuc y Tenejapa

⁵ ¿Bi yu'un la aloq'uesotic tel ta Egipto te la awic'otic tel ta bay q'uinal te c'ax ma'yuc yutsile? Ma'yuc bi ya xju' ya jts'untic xujt'uc; ma'yuc higuera, ni ts'usubiletic, ni granado; soc ni ma'yuc ja' ya cuch'tic —xiic.

Bible in Tzeltal Bachajón

⁵ ¿Bin yu'un la aloq'uesotcotic tal ta Egipto yu'un yac awic'otcotic tal li' ta q'uinal te mero ma lecuc? Ma xcol trigo, higuera, ts'usub soc granada; soc mayuc ha' ya cuch'tic, xchihic.

Números 20:5 Iomraidhean Croise

Nehemías 9:21

Cha'winic ja'wil la awac'bey swe'elic ta jochol taquin q'uinal, ma'yuc falta la yaiyic, ma ba laj te sc'u'ique, soc ma ba sijt' yacanic tey a.

Jeremías 2:2

—Baan, albeya te lum Jerusalén, awtaya, swenta yu'un ya me yaiyic stojol ta lec: “¡Jich ya yal sc'op te Cajwaltique! Ya jna' te c'alal ach'ixat to a, jun awo'tan ta jtojol, te c'alal la quic' quinaminate, c'ux la awaiyon ta awo'tan. La ats'aclinon ta jochol taquin q'uinal, ja' te lumq'uinal te mero ma'yuc bila ya xju' ta ts'unel tey a.

Jeremías 2:6

Ma la anopic ta awo'tanic te ya aleonic, jo'on te la jloq'uesex tel ta Egipto, te la quiq'uex bael ta jochol taquin q'uinal, taquin te q'uinale, soc puro jemeltic, ja' te q'uinal te ma'yuc ja' tey ae, nojel nax yu'un te bitic xiweltic sbae, ja' te lumq'uinal te ma'yuc mach'a ya xnain tey a, ja' te ma'yuc mach'a ya xju' xc'ax tey a.

Números 16:14

Te ja'ate ma'yuc bay awic'ojotiquix bael ta q'uinal ta bay ya x'oquin leche soc chab c'oem, ni ma'yuc bay awac'ojbotiquix jq'uinaltic soc jts'usubiltic. Ja' xanix ya ac'an te ya jch'uuntic iq'uel bael awu'un jichuc ma'sitetic. Ma xju', ma jc'antic ya xbootic ta atojol —xiic.

Números 20:24

—Te Aarón ya me xlajix. Ma ba ya x'och bael ta bay q'uinal ya cac'bey te israeletic, melel te ja'ex ma la ach'uunbonic jmandal ta sloq'uibja' Meriba.

Números 27:14

Melel ma la ach'uunbonic jmandal ja'ex te chebexe, ta bay jochol taquin q'uinal Zin te c'alal jajch'ic ta tulan c'op te lum ta jtojole. Ja'uc me to, ma la awac'onic ta ich'el ta muc' ta stojolic te c'alal la sc'an ja' yuch'ic —xi'. (Ja' ya yalbey sc'oplal te sloq'uibja' te Meriba sbiile, te ay ta Cades ta jochol taquin q'uinal Zin.)

Deuteronomio 8:15

Te Cajwaltic la yic'otic ta beel ta muc'ul jochol taquin q'uinal te xiweltic sba, te banti ay bayal jti'awal chanetic soc tsequetic, soc te banti ma'yuc ja', pero te Cajwaltic la sloq'ues ja' ta buen tulanil ton. Jich la yac'beyex awuch'ic ja' tey a.