Éxodo 32:1 - Bible in Tzeltal de Oxchuc y Tenejapa

¹ Ja'uc me to, c'alal la yil te israeletic te ma ba coj tel ta wits ta ora te Moisés, la stsob sbaic tel ta stojol Aarón, jich la yalbeyic: —Jajch'an, pasbotic diosetic cu'untic te ya xneelaj bael cu'untic, melel te Moisés te la sloq'uesotic tel ta Egipto ma jna'tic bila la spas —xiic.

Bible in Tzeltal Bachajón

¹ Te c'alal la yilic te pueblo te ma ba co tal ta wits ta ora te Moisés, bahtic ta stojol Aarón soc hich la yalbeyic: Hahchan, pasbotcotic diosetic te ya xnahilij bahel cu'untic, como te Moisés, te winic te la sloq'uesotic tal ta Egipto, ma jna'tic bin la spas, xchihic.

Éxodo 32:1 Iomraidhean Croise

Génesis 19:14

Jich loc' bael te Lot, ba sc'opon te queremetic te chapal ya yic' sbaic soc te yantsil-nich'nabe, jich la yalbey yaiyic: —Jajch'anic, loc'anic tel, yu'un ya yich' lajinel yu'un Cajwaltic te lume —la yut. Ja'uc me to, te queremetic la scuyic te ma meleluc.

Génesis 21:26

Jich yu'un la yal te Abimelec: —Ma jna' mach'a la spas jich, soc ma la awalbon ta ora, ja' to nax ta ora to la caiy stojol —xi'.

Génesis 39:8

Ja'uc me to, ma la sc'an stuquel te José. La yalbey te yinam te yajwale: —Te cajwale yac'ojbon ta jwenta spisil bitic ay yu'un. Ma'yuc bi ya snop ta yo'tan yu'un sbiluc ta sna.

Génesis 44:15

Albotic yu'un te José: —¿Bi yu'un jich la apasbonic? ¿Yu'un bal ma ba ana'ojic stojol te ay jp'ijil yu'un sna'el? —la yut.

Génesis 44:4

Loq'uelic to bael ta ti'lum a te winiquetique, ma to xc'ubic bael a, te José la yalbey te mayordomoe: —Baan, nutsa te winiquetique. Teme la atae, jich me xc'o awalbey: “Tojol te la jc'uxtayex te ja'exe, amen te bila la apasbonic tele. ¿Bi yu'un la awelc'anbonic tel te vaso pasbil ta plata?

Salmos 106:19

Ta bay wits Horeb la spasic sloc'ombail alal wacax: la yultesic ta c'ajc' te oro, la spasic ta yajcananic, soc la squejan sbaic ta stojol.

Éxodo 13:21

Ta c'aaleltic la sjoin te Cajwaltic, jich yilel te bit'il balal tocal te yac ta ic'aw ta beel. Ta ajc'ubal balal ta tilel jichuc c'ajc' xojobajem ta lec. Jich ju' yu'unic beel ta c'aal ajc'ubal.

Éxodo 14:11

Soc jich la yalbeyic te Moisés: —¿Yu'un bal ma wejt'ix muquenaletic ta Egipto te la aloq'uesotic tel tey a, te tal awac' lajucotic ta muc'ul jochol taquin q'uinale? ¿Bistuc jich la apasbotic? ¿Bistuc la aloq'uesotic tel ta Egipto?

Éxodo 16:3

Jich la yalic: —¡Teyuc la smilotic a te Cajwaltic ta Egipto! Tey joinejtic ta naclej te yoxmal jti'baltic, we'otic ta lec ja' to c'alal la sc'an co'tantic. Yan te ja'exe la awic'otic tel yu'un ya amilotic ta wi'nal jpisiltic ta jochol taquin q'uinal —xiic.

Éxodo 20:23

Jich yu'un ma me xapasic loc'ombaetic ta oro soc ta plata te ya ach'uunique.

Éxodo 24:12

Te Cajwaltic, jich la yalbey te Moisese: —Moan tel ta wits ta banti ayon, tey me ya amaliyon a. Yu'un ya cac'bat pejch'el tonetic te tey ts'ibubil cu'un a te mandaliletic swenta sp'ijtesjibal te israeletique —xi'.

Éxodo 24:18

Och bael Moisés ta yolil te tocale, mo xan bael ta wits. Tey jalaj cha'winic c'aal soc cha'winic ajc'ubal a.

Éxodo 32:11

Te Moisés ja' la sc'opon te Cajwaltic, jich la yalbey: —Cajwal, ¿bi yu'un te ya x'ilinat ta stojol te lum awu'un, te ja'at nix la aloq'ues tel ta Egipto ta smuc'ul awu'el soc yu'el te ac'abe?

Éxodo 32:22

Te Aarón la sjac': —Cajwal cu'un, ma x'ilinat ta jtojol. Te ja'ate ya me ana'bey ta lec yo'tanic te lum, te ya smulanic spasel te bila ma lecuque.

Éxodo 32:23

Ja'ic la yalbonic: “Pasbotic dios cu'untic te ya yic'otic ta beele, melel ma jna'tic bi la spas te Moisés te la sloq'uesotic tel ta Egipto”, xiic.

Éxodo 32:7

Jich yu'un te Cajwaltic la yalbey te Moisese: —Baan, coan bael, melel te lum la aloq'ues tel ta Egipto, la sboltes sbaiquix.

Éxodo 33:3

Tey xbaex a ta bay ya x'oquin leche soc chab c'oem. Te jo'one ma ba ya joinex bael teme repente ya jlajinex jilel ta be, melel ma xapejc'an abaic ta jyalel, ma xach'uunic mandal —xi'.

Ezequiel 20:8

‘Pero ja'ic stuquelic ma ba la sc'an la yich'onic ta muc', ma la sc'an yaiybonic jc'op. Ma ba la xch'ay ta yo'tanic te bitic ilaybil sba cuybilic ta Dios yu'unique, soc ma ba la xch'ayic jilel te loc'ombaetic yu'un te egipcioetique. Jo'on la jnop ta co'tan te ya jt'omes bael quilimba ta stojolic, jich ya cac'bey castigo ta stojolic ta Egipto, asta ja' to teme lamaj te sc'ajc'al co'tan ta stojolique.

Oseas 12:13

Ta swenta jtul j'alwanej te Cajwaltic la sloq'ues tel ta Egipto te lum Israel; ta swenta jtul j'alwanej la scanantay te lume.

Miqueas 6:4

Jo'on la jloq'uesat tel ta lum Egipto, la cac'at ta libre yu'un mosoil. Jo'on la jticun bael te Moisés, te Aarón soc te María, swenta yu'un ja'ic ya yiq'uex tel.

Números 14:22

Jich yu'un te jo'on ya cal te ma jtuluc te mach'atic yilojbonic yutsilal jxojobil, soc te jchajp señailetic la jpas ta Egipto soc ta jochol taquin q'uinal, te ja' nax la spason ta prueba yilic bayal buelta ta jochol taquin q'uinal, te yu'un ma sc'an xch'uunbonic te jmandale,

San Mateo 24:43

Na'aic me jich bit'il in to: Te yacuc sna' stojol te yajwal na te bi ora ya xtal te j'eleq'ue, wiq'uil sit ta smaliyel te jichuque, soc ma la yac' ta jamel sna te jichuque, soc ma la yac' bajt'uc ta elc'anel bael te sbiluque.

San Mateo 24:48

“Yan teme amen yo'tan te abate, jich ya xcaj yal ta yo'tan te ma xtal ta ora te yajwale.

Hechos 17:29

Jich yu'un teme yal-snich'anotic te Diose, ma me jcuytic ta Dios te bila loc'taybil te pasbil ta oro o ta plata o ton te la spas te ants-winiquetique, chican te bi yilel la sc'an te la snop ta yo'tanique.

Hechos 19:26

Ja'uc me to, awilojiquix soc awaiyojic stojol te bila yac ta yalel te Pabloe. Bayuc nax ya yal te ma ja'uc Dios te bila pasbil ta jc'abtic naxe, soc la yac' c'otuquix ta yo'tanic tsobol ta jtul te jlumaltique soc ta spamal sq'uinal te Asiae.

Hechos 7:40

Jich la sc'oponic te Aarone: “Ya jc'antic ya apasbotic cajcanantic swenta yu'un ya xneelaj cu'untic ta beel, yu'un ma jna'tic te bila la spas te Moisés te la sloq'uesotic tel ta bay sq'uinal Egipto”, te xiique.

Deuteronomio 31:8

Ja' nix me te Cajwaltic te ya xneelaj bael ta atojole, soc ya me sjoinat spisil ora. Ma ba ya yijq'uitayat soc ma ba ya spijt'esat. Ja' yu'un, ma me xiwat, ma me xyu'uninat xiwel —xi' te Moisese.

Deuteronomio 9:1

“Aiya awaiyic, israeletic: C'otix yorail te ya xc'axex bael ta jejch' ja' Jordán, soc te ya xjajch'ex ta at'el ta spisil awipic ta stsalel ta guerra yantic nacionetic, te c'axem jich smuc'ulic soc c'axem jich yipic a te bit'il ja'exe. Ya me atsalic niwac lumetic te buen toyolic sjoyob ts'ajc'ule.

Deuteronomio 9:9

Te jo'one moon bael ta wits, ja' ba quich' tel te cha'pejch' tonetic, ja' te pejch'el tonetic yu'un te trato la spas ta atojolic te Cajwaltique. Tey jalajon cha'winic (40) c'aal soc cha'winic (40) ajc'ubal a, xujt' ma ba we'on.

Josué 7:13

Jajch'an tsoba te lum Israel. Albeya ac'a xchajban sbaic te ya xtal stejc'an sbaic ta jtojol te pajele. Melel jo'on te Ajwalilon te Dioson awu'unic jich me ya calbey: “Ja'ex ta apisilic la atsaquic te bila sc'oplal ya yich' jinel ta jc'axele. Jich yu'un teme ma ba ya ajin, soc teme ma ba ya aloq'ues ta atojolic, ma xju' ya atsal te acontroique” ya me cut.

2 Pedro 3:4

Jich me ya yalic ta labanwanej: “¿Tal balix te Cristo, te jich la yal te ya xcha'tale? Melel te c'alal lajic bael te jme'-jtatique, stalel ay te q'uinale, ja' to ta xjajch'ibal te la yich' pasel te ch'ulchan balumilale”, te xiique.