San Mateo 7:5 - Tz'utujil (Ja Cꞌacꞌa Chominem)

⁵ Ja queriꞌ xa cacaꞌ epalaj ja neban. Ja wi newajoꞌ neyaꞌ consejo tre ja rewachꞌalal rjawaxic nabey chi neyaꞌ can ja ritzelal ja cꞌo chipan ja recꞌaslemal ixix utzcꞌa chi nixcowini neyaꞌ utzlaj tak consejo tre ja rewachꞌalal.

Tz'utujil NT

⁵ Jara' xcaca' eplaj neban. Wnewajo' neya' rna'oj ewch'alal nc'atzina nabey mul neya' cana rtzilal jc'ola chpam ec'aslemal ixix ch-utz c'ara' nquixecwina neya' utzlaj na'oj tzra ewch'alal.

San Mateo 7:5 Iomraidhean Croise

San Mateo 22:18

Pro ja Jesús arjaꞌ bien rotak ja ritzelal ja ncajoꞌ nqueban tre in quewaꞌ xbij chique riꞌ: —Cacaꞌ epalaj ¿nak tre tok newajoꞌ ninecꞌambajaj?

San Mateo 7:3

¿Nak tre tok neyaꞌ cuenta tre jun ti ril nuban ja rewachꞌalal pro mateyaꞌ cuenta tre jun nimlaj ewil neban ixix? Ja tok neban queriꞌ jariꞌ caniꞌ neyaꞌ cuenta tre jun ti rcꞌutal cheꞌ ja cꞌo parwach ja rewachꞌalal pro mateyaꞌ cuenta tre jun nimlaj cheꞌ ja cꞌo panewach ixix.

San Mateo 7:4

In chakajaꞌ nak moda nebij tre ja rewachꞌalal: —Wachꞌalal, tayaꞌaꞌ lugar chake chi nkayaꞌ jun consejo chawe tre ja il mac ja cꞌo pan acꞌaslemal, nixcheꞌ tre, pro más na nim ja il mac cꞌo pan ecꞌaslemal ixix.

San Mateo 7:6

Ja xin Dios maxta teyaꞌ chiquewach winak ja xa e caniꞌ tzꞌiꞌ. Ja rtzobal Dios caniꞌ juleꞌ abaj ja congana nimak rjil maxta teyaꞌ chiquewach winak ja xa e caniꞌ ak, matzij xa tiqueban tre ni mta, ja queriꞌ caniꞌ nquepakꞌ chi cakan, matzij nebe chewij caniꞌ nqueban tzꞌiꞌ natquetiꞌ.

San Lucas 12:56

Cacaꞌ epalaj, ixix bien nchꞌobtaj emwal nak rcꞌamonto ja netzꞌat jeꞌe chicaj in ja netzꞌat jeꞌe chwach ja rwachꞌulew pro ¿nak cꞌa tre ja tok matichꞌobtaj emwal nak rcꞌamonto ja ntajini nuban ja Dios chewach chipan ja tiempo ja rokcꞌo wiꞌ riꞌ?

San Lucas 13:15

Ja cꞌa kajaw Jesús tok xcꞌaxaj ja xbij ja jefe quewaꞌ xbij tre riꞌ: —Caꞌiꞌ apalaj. Ixix ja pa tak xulaꞌnbal kꞌij ¿la mta cꞌa jun chewe ja maquita nuquirel ja rwacax owi ruquiej in maquita nucꞌamel neryaꞌaꞌ ruyaꞌ?

San Lucas 4:23

Ja cꞌa Jesús quewaꞌ xbij chique riꞌ: —Anin cꞌo nseguro chi quewaꞌ nebij chwe camic riꞌ: —Como neꞌatzursaj ja winak queꞌatzursaj cꞌa chakajaꞌ ja rawach tak aj tinamit. Como cꞌo juleꞌ milagro xaban chipan ja tinamit Capernaum tabanaꞌ cꞌa chakajaꞌ waweꞌ chipan ja ratinamit atat, nixcheꞌ chwe.

San Lucas 6:42

In chakajaꞌ ¿nak moda nebij tre ja rewachꞌalal: —Wachꞌalal, tayaꞌaꞌ lugar chake chi nkayaꞌ jun consejo chawe tre ja il mac ja cꞌo pan acꞌaslemal, nixcheꞌ tre, pro xa mateyaꞌ cuenta tre chi más na nim ja il mac cꞌo pan ecꞌaslemal ixix? Ja queriꞌ xa cacaꞌ epalaj ja neban. Ja wi newajoꞌ neyaꞌ consejo tre ja rewachꞌalal rjawaxic nabey chi neyaꞌ can ja ritzelal ja cꞌo chipan ja recꞌaslemal ixix utzcꞌa chi nixcowini neyaꞌ utzlaj tak consejo tre ja rewachꞌalal.

Hechos 19:15

Ja cꞌa rcꞌajol Esceva ja tok queban mandar ja ritzel espíritu quewaꞌ bix chique rmal riꞌ: —Anin bien wotak nak ocnak wiꞌ ja Jesús in chakajaꞌ bien wotak nak ocnak wiꞌ ja Pablo pro nak la ixocnak wiꞌ ixix, xecheꞌx rmal ja ritzel espíritu.