San Lucas 2:7 - Tz'utujil (Ja Cꞌacꞌa Chominem)

⁷ Triꞌ cꞌa xalax wiꞌ ja ti ral talaꞌ, ti nabey winak. Xubar pa tziak. Ja cꞌa tok bartaj rmal cꞌo jun quiwabal chicop xcanoj in xcotzꞌbaꞌ chipan. Queriꞌ cꞌa xuban, pa quicꞌolibal chicop xeqꞌuejeꞌ na wiꞌ como enojnak chic ja winak chipan ja posada.

Tz'utujil NT

⁷ Tzra' c'a xalex wa' ch'it ral ch'tala', jara' nabey ac'al, y xubar pe tziak. Tak xbartaja rmal c'ola jun cwibal chcop xcanoj y xcutz'ba' chpam. Cara' c'a xuban, pquec'olibal chcop xec'je' wa' com enojnak chic wnak chpam je' psad.

San Lucas 2:7 Iomraidhean Croise

San Mateo 1:25

Pro ja tre tiempo tok majaꞌn talaxi ja ti ral ja María ja nabey winak ni majun nak ta queban. Ja cꞌa José tok xuyaꞌ rubiꞌ ja tacꞌal, Jesús xbinaꞌaj tre.

San Mateo 13:55

Pro ¿la ma arjaꞌ ta cꞌalaꞌ ja rcꞌajol ja josol cheꞌ? In ja ruteꞌ ¿la ma arjaꞌ ta cꞌa ja rbinaꞌan María? In ja rchꞌalal ¿la ma ejeꞌeꞌ ta cꞌa ja Jacobo, José, Simón in Judas?

San Mateo 8:20

In bix tre rmal ja Jesús: —Ja rutiwaꞌ cꞌo quicꞌolibal ja bar newar wiꞌ in chakajaꞌ ja tak tzꞌiquin cꞌo quesoc pro ja chwe anin ja rin Alcꞌwalaxel ja xinoc alaxic cuqꞌuin ja winak mta wochoch ja ni ta wxin wiꞌ anin ninwar wiꞌ, neꞌxi.

San Lucas 10:34

be ruqꞌuin. Ja tok xekaj ruqꞌuin cꞌo juleꞌ aceite rachbil vino xuyaꞌ chwach ja bar soctajnak wiꞌ jariꞌ xkꞌombej. Ja tok kꞌomtaj rmal cꞌacꞌariꞌ xubatzꞌ. Como cꞌo ruquiej rcꞌamonto xtzꞌubaꞌel ja rachi trij, xucꞌamel pa jun pensión, bien xuban cuenta.

San Lucas 2:6

Kas cꞌa triꞌ pa Belén ecꞌo wiꞌ ja tok tzꞌakati ja kꞌij rxin.

San Lucas 2:8

Ecꞌo cꞌa juleꞌ yukꞌul tak carnelo, triꞌ ecꞌo wiꞌ chinakaj ja tinamit Belén, quimajon quichajixic ja tak carnelo chakꞌaꞌ pa tak kꞌayis.

San Juan 1:14

Ja Ralcꞌwalaxel ja nkꞌalasani janiꞌ rnaꞌoj ja Dios arjaꞌ kajto, xoc kach winak, qꞌuejeꞌ chikacojol. Katzꞌat ruqꞌuin kawach chi ja rcꞌaslemal arjaꞌ mero rcꞌaslemal ja Dios, junan ruqꞌuin ja rcꞌaslemal Dios Tatixel, mchita jun ralcꞌwal ja Tatixel ja queriꞌ chi ta. Arjaꞌ nojnak ja rutzil xin Dios pa ranma, nojel ja nuchꞌob, nojel ja nbij in nojel ja nuban ni katzij wiꞌ.

2 Corintios 8:9

Como ixix bien ewotak chi ja kajaw Jesucristo congana samaji ja rutzil xin Dios pa ranma. Como arjaꞌ masqui congana biyom nabey pro ma xpokonaj ta xuyaꞌ can ja rbiyomal, ma xpokonaj ta xoc mebaꞌ pro emwal ixix tok xuban queriꞌ. Arjaꞌ xoc mebaꞌ utzcꞌa chi xa rmal ja rpobreꞌil tok nyataj ixix chewe ja biyomal xin Dios.

Gálatas 4:4

Pro ja Dios tok tzꞌakati ja tiempo ja chomarsanto rmal tokocꞌariꞌ xutakto ja Cristo ja Ralcꞌwal. Xalaxi ja Ralcꞌwal Dios chwirukꞌaꞌ jun ixok in qꞌuejeꞌ na pa rukꞌaꞌ ja ley ja yaꞌon can tre ja Moisés ojer rmal ja Dios.