San Juan 7:35 - Tz'utujil (Ja Cꞌacꞌa Chominem)

³⁵ Ja cꞌa raj Israel ejeꞌeꞌ quemaj chic tzij tre ja cꞌa bix chique rmal ja Jesús: —¿Bar cꞌa xtibe wiꞌ ja rachi leꞌ in makocowini nkawil chic? ¿La nbe cuqꞌuin ja kach tak aj Israel ja recꞌo pa tak tinamit quixin ja winak ja ma e aj Israel ta, la triꞌ nbe wiꞌ chi neꞌertijoj ja ma e aj Israel ta?

Tz'utujil NT

³⁵ J-e' c'a aj Israel xquemaj chic tzij tzrij je xbixa chca rmal: —¿Abar nba wa' jala' acha y majo'n nkocwin ta nkawil? ¿Le nba cuq'uin nic'aj chic kwinak aj Israel jec'ola ptak tnamet cxin je' wnak jme aj Israel ta? ¿Le tzra' nba wa' y nquertijoj je' wnak jme aj Israel ta?

San Juan 7:35 Iomraidhean Croise

San Mateo 12:21

Arjaꞌ nekaj na rbixic cuqꞌuin ja winak ja ma e aj Israel ta in ejeꞌeꞌ nyukeꞌ na quecꞌuꞌx ruqꞌuin, neꞌe ja Dios.

San Lucas 2:32

jun Toꞌonel ja racojon como jun luz ja nsakirsan quebey ja winak ja ma e aj Israel ta in chakajaꞌ acojon como yaꞌbal kakꞌij ajoj ja rok aj Israel ja rok tinamit awxin. Queriꞌ xbij ja Simeón.

San Juan 12:20

Ecꞌo cꞌa juleꞌ winak aj Grecia, ejeꞌeꞌ eꞌurkajnak pa Jerusalén, epenak chi ryaꞌic rukꞌij ja Dios chipan ja nmakꞌij pascua.

San Juan 7:1

Cꞌacꞌariꞌ be ja Jesús chipan juleꞌ chic lugar ja cꞌo chipan ja departamento Galilea, matirajoꞌ nbe pa tak lugar ja cꞌo chipan ja departamento Judea como triꞌ ecꞌo wiꞌ juleꞌ aj Israel quimajon rchꞌobic nak nqueban tre chi nquicamsaj.

San Juan 8:22

Ja cꞌa raj Israel ejeꞌeꞌ quemaj tzij chibil tak quiꞌ: —¿La ncamsaj kaj riꞌ ruyon xa chewiꞌ tok makocowini nokekaji ja bar xtibe wiꞌ arjaꞌ? xecheꞌe.

Hechos 11:18

Ja cꞌa tok bix queriꞌ chique mchita quibij tre ja Pedro. Quemaj ryaꞌic rukꞌij ja Dios, quewaꞌ quibij riꞌ: —Ni katzij wiꞌ chi ja ma e aj Israel ta yatajnak chique ejeꞌeꞌ chakajaꞌ rmal ja Dios chi nqueqꞌuex quinaꞌoj in nqueyaꞌ can ja ritzelal in nquewil ja utzlaj cꞌaslemal ja mta qꞌuisic trij, xecheꞌe.

Hechos 11:20

Pro ecꞌo juleꞌ chique, nicꞌaj e aj Chipre in nicꞌaj chic e aj Cirene, ejeꞌeꞌ tok xeꞌekaj pan Antioquía quemaj tzij cuqꞌuin ja ma e aj Israel ta in queyaꞌ rbixic ja kajaw Jesucristo chique.

Hechos 14:1

Ja cꞌa Pablo rachbil Bernabé ja tok xeꞌekaj chipan ja tinamit Iconio xeꞌoc chipan ja jay xin molbal riꞌil quixin ja raj Israel. Quemaj rbixic ja utzlaj tzij in congana e qꞌuiy ja winak yukeꞌ quecꞌuꞌx ruqꞌuin ja Jesucristo rmal tanto chique ja raj Israel in chique ja ma e aj Israel ta chakajaꞌ.

Hechos 17:4

Ja cꞌa raj Israel ecꞌoli chique yukeꞌ quecꞌuꞌx ruqꞌuin ja Jesucristo in xeꞌoc cachbil ja Pablo in Silas. Ecꞌo juleꞌ griego ja nqueban respetar ja Dios e qꞌuiy chique yukeꞌ quecꞌuꞌx ruqꞌuin ja Jesucristo chakajaꞌ. Ecꞌo juleꞌ ixokiꞌ ja nimak quekꞌij e qꞌuiy chique queriꞌ queban chakajaꞌ.

Hechos 18:4

Ja cꞌa pa tak xulaꞌnbal kꞌij ni npi wiꞌ ja Pablo chipan ja jay xin molbal riꞌil, ntzijon cuqꞌuin ja rach tak aj Israel in cuqꞌuin chakajaꞌ ja ma e aj Israel ta utzcꞌa chi nyukeꞌ quecꞌuꞌx ruqꞌuin ja Jesucristo.

Hechos 21:21

Ejeꞌeꞌ cꞌo juleꞌ tzij bin chique cumal ja winak ja quimajon atzijoxic. Ma utz ta ja tijonem ja nayaꞌ chique ja kach tak aj Israel ja recꞌo pa tak tinamit quixin ja ma e aj Israel ta, cha. Quewaꞌ ja tijonem ja nayaꞌ chique riꞌ, cha. Jun, ma rjawaxic chi ta chi nquinimaj ja nbij ja Moisés. In jun chic, ma rjawaxic chi ta chi neba̱n circuncidar ja tak calcꞌwal. In jun chic, mejor nqueyaꞌ can ja kacostumbre ja rok aj Israel. Queriꞌ abin chique, cha.

Hechos 22:21

Pro ja kajaw Jesucristo quewaꞌ xbij chic chwe riꞌ: —Mejor catelel como camic natnutakel pa jun lugar nat, natbe chic cuqꞌuin ja winak ja ma e aj Israel ta, neꞌ chwe. Queriꞌ xbij ja Pablo chique ja winak ja rach tak aj Israel.

Romanos 1:16

Queriꞌ nbij chewe como ja utzlaj tzij xin Cristo, anin ma qꞌuixbal ta nnaꞌ nyaꞌ rbixic. Ma qꞌuixbal ta como ja utzlaj tzij xin Cristo jariꞌ ja nimlaj poder xin Dios, nerutoꞌ ja winak chipan ja quil quemac, nerutoꞌ xa nak ta chi winakil ja nyukeꞌ quecꞌuꞌx ruqꞌuin ja Jesucristo. Cuqꞌuin ja raj Israel xekaj wiꞌ rbixic nabey in chakajaꞌ ntajini nekaji camic cuqꞌuin ja ma e aj Israel ta.

Efesios 3:8

Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Colosenses 1:27

como ja Dios arjaꞌ rchꞌobon chic chiquewach ja rtinamit chi cꞌo chic ja Cristo pa tak ewanma ja ma ix aj Israel ta in rmalariꞌ ewotak chic chi nixeqꞌuejeꞌ na pa gloria ruqꞌuin ja Dios. Jawaꞌ ja cꞌa xinbij chewe riꞌ xa awatali nabey pro ja Dios rkꞌalasan chic chikawach camic utzcꞌa chi triꞌ nkatzꞌat wiꞌ chi janila nim ja gloria xin Dios ja nsamaji checojol ixix ja ma ix aj Israel ta.

1 Timoteo 2:7

In rmalariꞌ tok xinchaꞌi chi xinoc apóstol rxin ja Jesucristo chi nyaꞌ rbixic. In yataj chwe chi xinbe cuqꞌuin ja ma e aj Israel ta chi quitijoxic. Jariꞌ ni katzij wiꞌ, ja Jesucristo arjaꞌ rotak chi ni katzij wiꞌ, ma npayil ta. Ja tijonem ja xinyaꞌ chique jariꞌ nak rbanic chi nyukeꞌ quecꞌuꞌx ruqꞌuin ja Jesucristo in nak rbanic ja utzlaj tzij ja rcꞌamonto.

2 Timoteo 1:11

In rmal ja utzlaj tzij xin Jesucristo chewiꞌ tok xinchaꞌi chi xinoc apóstol rxin chi nyaꞌ rbixic in yataj chwe chi xinbe cuqꞌuin ja winak ja ma e aj Israel ta in jariꞌ utzlaj tzij xentijoj tre.

Santiago 1:1

Anin in Santiago in ajsamajel rxin ja Dios in chakajaꞌ in ajsamajel rxin ja kajaw Jesucristo. Wachꞌalal, anin ntakel rutzil ewach ja rix cablajuj tribu aj Israel ja rixchictajnak ixbenak nojel nat nakaj.

1 Pedro 1:1

Anin in Pedro in apóstol rxin ja Jesucristo. Anin ntzꞌibaj ja carta riꞌ in ntakel ewqꞌuin ja rixsalunel chipan ja retinamit jeꞌe ja rixcꞌo pa tak tinamit ja cꞌo pa rcuenta Ponto, pa rcuenta Galacia, pa rcuenta Capadocia, pa rcuenta Asia in pa rcuenta Bitinia.