San Juan 7:32 - Tz'utujil (Ja Cꞌacꞌa Chominem)

³² Ja cꞌa fariseo ejeꞌeꞌ quicꞌaxaj chi ja winak kas pan ekal quimajon rbixic chi ja Jesús arjaꞌ ja Cristo. Rmalcꞌariꞌ tok quecꞌam quiꞌ cuqꞌuin ja jefe quixin sacerdote, xequetak juleꞌ soldado chi nquechap ja Jesús.

Tz'utujil NT

³² J-e' c'a fariseo xecc'axaj je' wnak kas pnejkal quemjon rbixic che Jesús jara' Cristo. Rmal c'ara' tak xquec'om pa qui' y xepeta cuq'uin je' cjefe sacerdote y xequetak jle' soldado chnequechpa' Jesús.

San Juan 7:32 Iomraidhean Croise

San Mateo 12:14

Ja cꞌa fariseo ejeꞌeꞌ xebe, xequimoloꞌ quiꞌ in quemaj rchꞌobic nak nqueban tre ja Jesús chi nquicamsaj.

San Mateo 23:13

Pro congana lawuloꞌ chewe ixix ja rix maestro rxin ja ley xin Dios ja tzꞌibtal can rmal ja Moisés in chewe ixix ja rix fariseo, cacaꞌ epalaj como ixix nixtajini netzꞌapij quebey ja winak chiquewach utzcꞌa chi maqueꞌoc chipan ja gobierno xin chilaꞌ chicaj. Nixtacꞌa ixix ta ixocnak ta chipan in nixtacꞌa neyaꞌ ta lugar chique ja winak ja cꞌo quigana neꞌoc chipan.

San Mateo 26:58

Ja cꞌa Pedro arjaꞌ rtrarben ja Jesús pro cꞌa cꞌa nat nutzuꞌ pon chic wiꞌ. Arjaꞌ xekaji ja bar cꞌo wiꞌ ja nimlaj jay rxin ja lokꞌlaj sacerdote, xococ chwa jay in tzꞌabeꞌ cuqꞌuin ja pulisiyaꞌ, nrajoꞌ nutzꞌat nak ja xtibantaji.

San Juan 11:46

Pro ecꞌo chic juleꞌ chique, ejeꞌeꞌ xebe cuqꞌuin ja fariseo, xequibij chique ja milagro ja xuban ja Jesús.

San Juan 12:19

Ja cꞌa fariseo xa pokon quenaꞌ rmal in quemaj rbixic chibil tak quiꞌ: —Queꞌetzꞌataꞌ mpeꞌ ja winak leꞌ xebe ruqꞌuin ja Jesús pro ni canojelal, camic majun nokcowini nkaban chic tre, xecheꞌe.

San Juan 18:3

Ja cꞌa Judas arjaꞌ xeꞌercꞌamaꞌ juleꞌ soldado e rachbil juleꞌ pulisiyaꞌ ja nesamaj pa quicuenta ja jefe quixin sacerdote in pa quicuenta ja fariseo. Ja tok xecꞌamtaj rmal cꞌacꞌariꞌ xucꞌamel chic quebey, xebe chipan ja lugar. Cꞌo kꞌakꞌ quecꞌamel ja nquitzꞌatbej quebey in cꞌoli banbal tak chꞌaꞌoj quecꞌamel chakajaꞌ.

San Juan 7:30

Rmalcꞌariꞌ ja xbij chique xa chewiꞌ ja tok laj quechap chi nquecoj preso pro majun nak ta chique chapo ta rxin como majaꞌn terilaꞌ ja hora rxin chi nchapi.

Hechos 5:26

Ja cꞌa jefe quixin ja chajil templo e rachbil ja pulisiyaꞌ xebe chi quicꞌamaric ja rapóstol. Ja cꞌa tok xeꞌekaj cuqꞌuin xequechap pro xarwariꞌ mta pokon queban ta chique como nquixbej quiꞌ chiquewach ja winak: —Matzij koqueqꞌuiak tzaꞌn abaj, xecheꞌe. Cꞌacꞌariꞌ xequecꞌamto ja rapóstol.