San Juan 6:37 - Tz'utujil (Ja Cꞌacꞌa Chominem)

³⁷ Canojel ja winak ja neyataj chwe rmal ja Tatixel ejeꞌeꞌ neꞌurkaj wqꞌuin in tok neꞌurkaji mta ariꞌ ja maquita nenucꞌul canojelal.

Tz'utujil NT

³⁷ Conjelal wnak je nqueyataja chwa rmal Ttixel j-e' c'ara' nquerkaja wq'uin. Y tak xtquerkaja wq'uin majo'n xtquench'akij el ta, conjelal quenuc'ul wq'uin.

San Juan 6:37 Iomraidhean Croise

San Mateo 11:28

Ewanojel ja congana nixel cꞌay chi rbanic cumplir ja rereligión ja wi caniꞌ cosnak chic ja rewíꞌ ewanma chuxeꞌ jun nimlaj ijkaꞌm nenaꞌ kaj, ja wi queriꞌ ebanon mejor ja neban, quixajoꞌ in tiyukeꞌ ecꞌuꞌx wqꞌuin. Ja wi nyukeꞌ ecꞌuꞌx wqꞌuin, anin nyaꞌ chewe chi nxulaꞌni ja rewíꞌ ewanma.

San Mateo 24:24

Queriꞌ nbij chewe como ecꞌoli winak ja nepi na, juleꞌ xtiquecoj quiꞌ chi e Cristo in juleꞌ xtiquecoj quiꞌ chi e profeta xin Dios pro ma katzij ta ja nquibij. Ejeꞌeꞌ cꞌo nimak tak milagro xtiqueban, jutzꞌit laj nequeban engañar ja winak ja rechaꞌon rmal ja Dios pro jariꞌ mta moda xquequechꞌec ta.

San Juan 17:11

Padre Santo, camic maquinqꞌuejeꞌ chic más waweꞌ chwachꞌulew pro ja rejeꞌeꞌ neqꞌuejeꞌ na pro ja ranin ninmeloj chic jutij awqꞌuin. Pan abiꞌ atat queꞌachajij can queꞌawaraj can ja reꞌayaꞌon chwe utzcꞌa xta jun xtiqueban ja caniꞌ kabanon ajoj awqꞌuin xa jun kabanon.

San Juan 17:2

Como atat ayaꞌon chwe chi cꞌo nukꞌaꞌ chique canojelal ja winak. Queriꞌ abanon chwe utzcꞌa chi anin cꞌoli ja utzlaj cꞌaslemal nyaꞌ chique canojel ja winak ja reꞌayaꞌon chwe pro jun utzlaj cꞌaslemal ja mta qꞌuisic trij.

San Juan 17:24

Nataꞌ, ja winak ja reꞌayaꞌon chwe cꞌo ngana chi triꞌ neꞌeqꞌuejeꞌ wiꞌ ja bar xquineqꞌuejeꞌ wiꞌ anin. Queriꞌ nwajoꞌ chique utzcꞌa chi necowini nquetzꞌat ja nimlaj gloria xin Dios wcꞌan ja caniꞌ ayaꞌon chwe. Como atat nij inawajoꞌonto wiꞌ ja tok majaꞌn titzꞌucarsaxto ja rwachꞌulew.

San Juan 17:6

Ecꞌoli ja rachiꞌiꞌ ja reꞌachaꞌon chiquicojol ja winak waweꞌ chwachꞌulew, ejeꞌeꞌ eꞌayaꞌon chwe. Anin bien xinkꞌalasaj chiquewach janiꞌ ja ranaꞌoj. Ejeꞌeꞌ nij e awxin wiꞌ in camic eꞌayaꞌon chwe, quiniman ja ratzobal.

San Juan 6:39

Ja Tatixel ja takyonpi wxin quewaꞌ rvoluntad riꞌ, chi canojel ja reyaꞌon chwe rmal ni majun chique xtintzꞌilaꞌ ta in tok xterilaꞌ ja qꞌuisbal tiempo nenuyic canojelal chipan ja camíc.

San Juan 6:65

In xbij chic chique: —Rmalariꞌ ja tok xinbij chewe chi mta moda xturkaji jun winak wqꞌuin chi nyukeꞌ rucꞌuꞌx wqꞌuin ja wi matiyataj tre rmal ja Tatixel chi nyukeꞌ rucꞌuꞌx wqꞌuin. Queriꞌ xbij ja Jesús chique.

San Juan 9:34

Ja cꞌa rejeꞌeꞌ quemaj chic ryokꞌic ja rachi, quewaꞌ quibij tre riꞌ: —Ja ratat xa rmal il mac tok nij at moy wiꞌ xatalaxi ¿in atat nawajoꞌ nokatijoj ajoj? Queriꞌ quibij tre in quiwasajel chiquicojol chijutij in ma xquecꞌul chi ta.

Romanos 5:20

Ja cꞌa Dios tok xuyaꞌ ja ley tre ja Moisés jariꞌ xcꞌutbej chi xa janiꞌ benak más pa nim ja ritzelal ja nqueban ja winak. Pro masqui be más pa nim ja il mac pro más chi na be pa nim ja totajem ja nkacochij tre ja Dios.

Filipenses 1:29

Queriꞌ rbanic como ixix yatajnak jun privilegio chewe chi yukul ecꞌuꞌx ruqꞌuin ja Cristo in nixsamaj pa rcuenta. Pro ma ruyon tariꞌ como cꞌo chi na jun privilegio yatajnak chewe jariꞌ chi netij rpokonal rmal ja Cristo chakajaꞌ.

1 Timoteo 1:16

Pro ja Jesucristo arjaꞌ congana xpokonaj nwach masqui in nimlaj ajꞌil in ajmac chiquewach canojelal ja winak. Arjaꞌ xucuy ja wil numac in jariꞌ xcꞌutbej chiquewach ja winak chi cꞌo rpaciencia chi nerucuy ja rajꞌil ja rajmaquiꞌ. Queriꞌ xuban, xucuy ja wil numac jariꞌ xcꞌutbej chi ni nerucuy wiꞌ ja juleꞌ chic nak xqueniman rxin ja nquewil na ja utzlaj cꞌaslemal ja mta qꞌuisic trij.

2 Timoteo 2:19

Pro ja chake ajoj ja yukul kacꞌuꞌx ruqꞌuin ja Jesucristo, ja rbanon ja Dios chake ok caniꞌ jun jay bien tiquili ja rsimientoꞌil in mta yojtajic trij in caniꞌ tzꞌibtal chwach ja rsimientoꞌil quewariꞌ: —Ja kajaw Dios arjaꞌ rotak quewach ja winak nak chique ja katzij chi e rxin. In chakajaꞌ caniꞌ tzꞌibtali: —Canojel ja winak ja nquibij chi e xin Cristo rjawaxic chi nqueyaꞌ can ja ritzelal, neꞌe.

Hebreos 4:15

Ja lokꞌlaj sacerdote kaxin arjaꞌ bien rotak chi xok way xok yaꞌ, rotak npokonaj kawach como arjaꞌ bien xunaꞌ janiꞌ ja natcꞌambajax chipan ja prueba. Nojel ja prueba ja rokkꞌaxnak ajoj chipan ni majun ja maquita kꞌaxnak arjaꞌ chipan chakajaꞌ xarwariꞌ ni majun ril rumac.

Hebreos 7:25

Rmalcꞌariꞌ tok ncowini nokrutoꞌ chijutij ja yukul kacꞌuꞌx ruqꞌuin chi arjaꞌ ncojo kaxin chwach ja Dios. Arjaꞌ ni cꞌas wiꞌ chijutij chi rbanic orar pa kacuenta chewiꞌ tok ncowini nokrutoꞌ chijutij.

1 Juan 2:19

Ejeꞌeꞌ riꞌ winak ja xeꞌelel chikacojol in xokqueyaꞌ can, bien kꞌalaj chi ma e kachbil ta. Ja wixta e kachbil maquita xokqueyaꞌ can ariꞌ. Ma chaka ta xeꞌeli, triꞌ ntzꞌa̱t wiꞌ chi ni majun chique kachbil ta.

Apocalipsis 22:17

Ja rEspíritu Santo rachbil ja rxjayil ja Carnelo ejeꞌeꞌ quewaꞌ nquibij riꞌ: —Catpeti Jesús, necheꞌe. In chakajaꞌ ja necꞌaxani quirtawaꞌ xtiquibij riꞌ: —Catpeti Jesús, xquecheꞌ ta. Ja winak ja nquenaꞌ chakichiꞌ quepi cꞌa in xa nak ta ja cꞌo rgana npeti tipeti, turtijaꞌ ja yaꞌ ja rcꞌamonto ja utzlaj cꞌaslemal ja mta qꞌuisic trij in xa sipan ja yaꞌ.