San Juan 3:15 - Tz'utujil (Ja Cꞌacꞌa Chominem)

¹⁵ Queriꞌ nba̱n na tre utzcꞌa chi canojelal ja winak ja xtiyukeꞌ quecꞌuꞌx ruqꞌuin ejeꞌeꞌ maquetakel chipan ja rpokonal, nyataj jun utzlaj cꞌaslemal chique pro jun cꞌaslemal ja ni mta wiꞌ qꞌuisic trij.

Tz'utujil NT

¹⁵ Cara' nba'na tzra ch-utz c'ara' conjelal je xteyke'a quec'u'x ruq'uin majo'n nqueba ta chpam nimlaj lowlo' y nyataja chca utzlaj c'aslemal rxin Dios je rxin junlic.

San Juan 3:15 Iomraidhean Croise

San Mateo 18:10

Kas tebanaꞌ cuenta nak neban chique waꞌ ja re taknoꞌy riꞌ, nixtacꞌa jun ta chique xteban ta tre ni mta. Como anin nbij chewe chi ja chilaꞌ chicaj ecꞌoli ja ángel quixin in jariꞌ ángel mta ariꞌ ja maquita yatajnak chique chi neꞌekaj chwach ja Nataꞌ ja cꞌo chilaꞌ chicaj.

San Mateo 25:46

Ejeꞌeꞌ riꞌ nebe na chipan ja nimlaj rpokonal ja mta qꞌuisic trij pro ja utz netzꞌa̱t rmal ja Dios ejeꞌeꞌ nebe na chipan ja utzlaj cꞌaslemal ja mta qꞌuisic trij. Queriꞌ xbij ja Jesús chique ja rdiscípulo.

Marcos 16:16

Canojel ja winak ja xtiyukeꞌ quecꞌuꞌx wqꞌuin in neba̱n bautizar ejeꞌeꞌ nquewil ja totajem xin Dios. Ja cꞌa ma xtiyukeꞌ ta quecꞌuꞌx wqꞌuin ejeꞌeꞌ nkꞌe̱t tzij chiquij in neta̱kel chipan ja nimlaj rpokonal.

San Lucas 19:10

Xattotaji como ja Ralcꞌwalaxel ja xoc alaxic cuqꞌuin ja winak arjaꞌ penak chi quicanoxic ja winak ja retzaknak chipan ja il mac utzcꞌa chi nquewil ja totajem xin Dios.

San Juan 1:12

Pro kanojelal ja xokniman rxin, kanojelal ja yukeꞌ kacꞌuꞌx ruqꞌuin, arjaꞌ xuyaꞌ chake chi xokoc ok ralcꞌwal Dios,

San Juan 16:33

Nojel awaꞌ ja xinbij chewe chipan awaꞌ jun tucwakꞌabil riꞌ utzcꞌa chi nyataj na chewe ja quicotemal xin Dios ja tok xa jun chic ebanon wqꞌuin. Ja chipan awaꞌ rwachꞌulew riꞌ congana rpokonal xtetij na pro quixquicoti como ja ritzelal rxin ja rwachꞌulew jariꞌ ni ma cowinnak ta wiꞌ chwij, nij anin wiꞌ inchꞌocmajnak. Queriꞌ xbij ja Jesús chique ja rdiscípulo.

San Juan 20:31

Pro cꞌoli ja xintzꞌibaj chipan awaꞌ jun libro riꞌ utzcꞌa chi nenimaj ja Jesús chi arjaꞌ ja Cristo ja Ralcꞌwal Dios in tok queriꞌ nenimaj jariꞌ nyataj chewe ja utzlaj cꞌaslemal ja mta qꞌuisic trij como jariꞌ nyataj chake ja tok xa jun nkaban ruqꞌuin.

San Juan 3:16

Ja Dios congana nerajoꞌ canojelal ja winak rmalcꞌariꞌ tok xutakto waweꞌ chwachꞌulew ja Ralcꞌwal, xarariꞌ jun. Queriꞌ xuban utzcꞌa chi canojelal ja winak ja xtiyukeꞌ quecꞌuꞌx ruqꞌuin ejeꞌeꞌ maquetakel chipan ja rpokonal, nyataj na chique jun utzlaj cꞌaslemal ja ni mta wiꞌ qꞌuisic trij.

San Juan 3:36

Ja wi nyukeꞌ acꞌuꞌx ruqꞌuin ja Ralcꞌwalaxel jariꞌ awcꞌan chic ja utzlaj cꞌaslemal ja ni mta wiꞌ qꞌuisic trij. Pro ja wi matanimaj ja Ralcꞌwalaxel jariꞌ ni matawil wiꞌ ja utzlaj cꞌaslemal in ni cꞌo wiꞌ ryewal ja Dios chawij.

San Juan 5:24

Bien tecꞌwaxaj ja xtinbij chewe riꞌ, ja wi cꞌo jun winak nuyaꞌ rxquin tre ja ntzobal in wi yukul rucꞌuꞌx ruqꞌuin ja Tatixel ja takyonpi wxin jariꞌ rcꞌan chic ja utzlaj cꞌaslemal ja ni mta wiꞌ qꞌuisic trij in matitakel chipan ja nimlaj rpokonal, arjaꞌ kꞌaxnakpi chic chipan ja camíc, jariꞌ rwilon chic ja utzlaj cꞌaslemal.

San Juan 6:27

Ixix congana samaj neban chi rcanoxic ja reway pro juleꞌ way ja xa nocꞌowi pro ma xar tawaꞌ samaj teban. Pro ja neban, congana ta nixsamaji chi rcanoxic ja way ja ni mta wiꞌ ocꞌowem nuban, juleꞌ way ja rcꞌamonto ja utzlaj cꞌaslemal ja mta qꞌuisic trij. Ja Ralcꞌwalaxel ja xoc alaxic cuqꞌuin ja winak arjaꞌ nsipan chewe ja way ja cꞌa xinbij chewe riꞌ. Como Dios ja Tatixel arjaꞌ bien rkꞌalasan chic chi arjaꞌ takyonto rxin ja Ralcꞌwalaxel, xecheꞌxi ja winak rmal ja Jesús.

San Juan 6:40

Ja Tatixel ja takyonpi wxin quewaꞌ rvoluntad riꞌ, chi canojel ja winak ja ncotakij rwach ja Ralcꞌwalaxel in nyukeꞌ quecꞌuꞌx ruqꞌuin ejeꞌeꞌ nyataj chique ja utzlaj cꞌaslemal ja mta qꞌuisic trij. Ja cꞌa tok xterilaꞌ ja qꞌuisbal tiempo anin ninyico quixin chipan ja camíc. Queriꞌ xbij ja Jesús chique.

San Juan 6:47

Ni katzij wiꞌ ja xtinbij chic chewe riꞌ, ja winak ja cꞌo yukulbal quecꞌuꞌx wqꞌuin ejeꞌeꞌ cucꞌan chic ja utzlaj cꞌaslemal ja mta qꞌuisic trij.

Hechos 13:41

—Ixix ja rix yokꞌonelaꞌ bien tecꞌwaxaj, congana cꞌascꞌoꞌi xtetzꞌat ja tok xtikaji ja nimlaj juicio chewij. Como anin cꞌo jun nimlaj milagro xtinban pan etiempo ixix pro jariꞌ matenimaj masqui cꞌo jun xtichꞌobo chewach. Queriꞌ rbin can ja Dios, neꞌe ja Pablo chique.

Hechos 8:36

Kas quimajon binem chipan ja careta ja tok cꞌo jun yaꞌ quewil: —Tatzꞌataꞌ mpeꞌ, cꞌo jun yaꞌ leꞌ. ¿La maxta cꞌa utz ninban bautizar camic? neꞌe ja rachi.

Romanos 5:21

Queriꞌ cꞌa rbanic utzcꞌa chi nyataj chic chake ja totajem ja nkacochij tre ja Dios utzcꞌa chi pa rukꞌaꞌ chic nokqꞌuejeꞌ wiꞌ. Caniꞌ tre nabey xa pa rukꞌaꞌ ja camíc xokqꞌuejeꞌ wiꞌ in xa nokcam rmal. Pro ja camic utz chic nokrutzꞌat ja Dios in rmalariꞌ arjaꞌ chijutij rmajon rsipaxic chake ja totajem. Queriꞌ cꞌa nuban chake utzcꞌa chi nokeqꞌuejeꞌ na chipan jun utzlaj cꞌaslemal ja mta qꞌuisic trij. Pro xa rmal ja kajaw Jesucristo tok xtiban queriꞌ chake.

1 Corintios 1:18

Ecꞌo cꞌa winak masqui bien nkachꞌob chiquewach nak rbanic ja rcamic ja Cristo chwach cruz pro ejeꞌeꞌ xa pa tzꞌanem nquecoj wiꞌ. Ejeꞌeꞌ riꞌ winak ja cucꞌan ja bey ja xa nerucꞌamel chipan ja nimlaj rpokonal. Pro ja chake ajoj ja kucꞌan ja bey ja nokrucꞌamel chipan ja totajem xin Dios bien chꞌobtajnak kumal chi ja rcamic ja Cristo chwach cruz jariꞌ cꞌamyonto ja nimlaj poder xin Dios chi katoꞌic.

2 Corintios 4:3

Pro ja utzlaj tzij xin Cristo ja nkayaꞌ rbixic wi ecꞌoli winak ja matichꞌobtaj cumal xa ni queyon wariꞌ ja netajini nebe chipan ja nimlaj rpokonal.

Gálatas 2:20

Ja chwe anin, anin jun xincamsax ruqꞌuin ja Cristo chwach ja cruz. Ja cꞌaslemal ja cꞌo chic chwe camic jariꞌ ma anin chi ta ja rincꞌasli, Cristo chic ja cꞌas pa wanma. Ja yukulbal nucꞌuꞌx ruqꞌuin ja Cristo ja Ralcꞌwal Dios jariꞌ cꞌayon chic wxin chipan awaꞌ cꞌaslemal ja cꞌo chic chwe waweꞌ chwachꞌulew. Janila ninrajoꞌ ja Cristo como arjaꞌ ma xpokonaj ta xuyaꞌ riꞌ pa camíc mwal.

Hebreos 10:39

Ja cꞌa rajoj wachꞌalal ma ok cachbil ta ja xa nemeloj can chiquij ja matiyataj chique chi nequiwilaꞌ ja totajem rxin ja Dios. Ajoj ok cachbil ja cꞌo yukulbal quecꞌuꞌx ruqꞌuin ja Dios in noktotaji chijutij rmal.

Hebreos 7:25

Rmalcꞌariꞌ tok ncowini nokrutoꞌ chijutij ja yukul kacꞌuꞌx ruqꞌuin chi arjaꞌ ncojo kaxin chwach ja Dios. Arjaꞌ ni cꞌas wiꞌ chijutij chi rbanic orar pa kacuenta chewiꞌ tok ncowini nokrutoꞌ chijutij.

1 Juan 2:25

In quewaꞌ rtzujun can chake riꞌ, jun utzlaj cꞌaslemal ja mta qꞌuisic trij.

1 Juan 5:1

Kanojel ja kaniman ja Jesús chi arjaꞌ ja Cristo ja chaꞌon rmal ja Dios, ja wi queriꞌ kaniman ok ralcꞌwal Dios cꞌariꞌ. Caniꞌ tre jun alcꞌwalaxel ja wi nrajoꞌ ja rtataꞌ nerajoꞌ cꞌariꞌ chakajaꞌ ja juleꞌ chic rchꞌalal.

1 Juan 5:20

In kotak chakajaꞌ chi ja Jesús ja Ralcꞌwal Dios peti waweꞌ chwachꞌulew in xuyaꞌ chake chi kotakij rwach ja Dios ja katzij chi Dios. In ajoj xa jun kabanon ruqꞌuin ja Dios ja katzij chi Dios in xa jun kabanon ruqꞌuin ja Jesucristo ja Ralcꞌwal, ruyon arjaꞌ ja Dios ja katzij chi Dios, ruyon arjaꞌ nyowi ja utzlaj cꞌaslemal ja mta qꞌuisic trij.