San Juan 17:24 - Tz'utujil (Ja Cꞌacꞌa Chominem)

²⁴ Nataꞌ, ja winak ja reꞌayaꞌon chwe cꞌo ngana chi triꞌ neꞌeqꞌuejeꞌ wiꞌ ja bar xquineqꞌuejeꞌ wiꞌ anin. Queriꞌ nwajoꞌ chique utzcꞌa chi necowini nquetzꞌat ja nimlaj gloria xin Dios wcꞌan ja caniꞌ ayaꞌon chwe. Como atat nij inawajoꞌonto wiꞌ ja tok majaꞌn titzꞌucarsaxto ja rwachꞌulew.

Tz'utujil NT

²⁴ Nedta', je' wnak je'ay-on chwa kas quenwajo' quenc'utuj chawa, abar xtenq'ue' wa' anen, tzra' ta xtec'je' wa' j-e' chka'. Cara' quenwajo' chca ch-utz c'ara' nquecwina nquetz'et nimlaj agloria jay-on chwa, com atet enawaj-on ta tak q'uemjana twankersasa ruch'lew.

San Juan 17:24 Iomraidhean Croise

San Mateo 25:21

In bix tre rmal ja rpatrón: —Utz xaban tre ja samaj, atat at jun utzlaj moso, janila naban cumplir ruqꞌuin ja rasamaj. Xa ti ma nim ta ja xinyaꞌ can chawe pro xaban cumplir. Camic, más chi na qꞌuiy xtinyaꞌ chawe chi nasamajij. Camic catajoꞌ, ninawachbilaj chipan ja quicotemal, neꞌxi.

San Mateo 25:23

In bix tre rmal ja rpatrón: —Utz xaban tre ja samaj, atat at jun utzlaj moso, janila naban cumplir ruqꞌuin ja rasamaj. Xa ti ma nim ta ja xinyaꞌ can chawe pro xaban cumplir. Camic, más chi na qꞌuiy xtinyaꞌ chawe chi nasamajij. Camic catajoꞌ, ninawachbilaj chipan ja quicotemal, neꞌxi.

San Mateo 25:34

Ja cꞌa recꞌo pa riquikꞌaꞌ quewaꞌ xtibij chique riꞌ: —Ixix utz ixtzꞌaton rmal ja nataꞌ Dios, camic quixajoꞌ cꞌa, quixoc chipan ja gobierno xin chilaꞌ chicaj, jariꞌ ja herencia ewxin chominto ojer ja tok majaꞌn titzꞌucarsaxi ja rwachꞌulew.

San Mateo 26:29

Anin nbij chewe camic chi jawaꞌ riyaꞌl uva riꞌ ni matintij chi wiꞌ waweꞌ, cꞌa tokoriꞌ xtintij chic ja tok xterilaꞌ ja kꞌij chi nkatij chic ewqꞌuin chipan ja gobierno rxin ja nataꞌ Dios xarwariꞌ cꞌacꞌa chic nojelal triꞌ, neꞌ chique.

San Lucas 12:37

Congana quiꞌil chique ja rajsamajelaꞌ ja recꞌascꞌotnak chi raybexic ja quipatrón ja tok xturkaji. Ni katzij wiꞌ nbij chewe, ja patrón arjaꞌ nchomarslaꞌ riꞌ chanim, nertzꞌubaꞌ pa mesa in numaj quilixic.

San Lucas 23:43

Ja cꞌa Jesús xbij tre: —Ni katzij wiꞌ ja xtinbij chawe riꞌ, chipan awaꞌ jun kꞌij ja rokcꞌo wiꞌ riꞌ ok caꞌiꞌ awqꞌuin nokbe chipan ja utzlaj lugar ja bar cꞌo wiꞌ quicotemal, neꞌ tre.

San Juan 1:14

Ja Ralcꞌwalaxel ja nkꞌalasani janiꞌ rnaꞌoj ja Dios arjaꞌ kajto, xoc kach winak, qꞌuejeꞌ chikacojol. Katzꞌat ruqꞌuin kawach chi ja rcꞌaslemal arjaꞌ mero rcꞌaslemal ja Dios, junan ruqꞌuin ja rcꞌaslemal Dios Tatixel, mchita jun ralcꞌwal ja Tatixel ja queriꞌ chi ta. Arjaꞌ nojnak ja rutzil xin Dios pa ranma, nojel ja nuchꞌob, nojel ja nbij in nojel ja nuban ni katzij wiꞌ.

San Juan 12:26

Ja winak ja neniman wxin rjawaxic chi triꞌ nekꞌax wiꞌ ja bar ninkꞌax wiꞌ anin in chakajaꞌ triꞌ neꞌeqꞌuejeꞌ wiꞌ ja bar incꞌo wiꞌ anin. Xa nak ta ja neniman wxin ejeꞌeꞌ nya̱ꞌ na quekꞌij rmal ja Nataꞌ.

San Juan 14:3

In como xinbij chewe chi ninbe chi nenchomarsaj ja relugar pro ninmelojpi chic jutij nixuncꞌamaꞌ kaj utzcꞌa chi nixqꞌuejeꞌ chic wqꞌuin. Queriꞌ nban utzcꞌa ja bar xquinqꞌuejeꞌ wiꞌ anin triꞌ nixqꞌuejeꞌ wiꞌ ixix chakajaꞌ.

San Juan 15:9

Caniꞌ rbanon anin chwe ja Tatixel arjaꞌ nij inrajoꞌon wiꞌ in queriꞌ nbanon anin chewe chakajaꞌ nij ixnwajoꞌon wiꞌ in camic nbij chewe, quixqꞌuejeꞌ chipan ja rajoben riꞌil wxin.

San Juan 17:2

Como atat ayaꞌon chwe chi cꞌo nukꞌaꞌ chique canojelal ja winak. Queriꞌ abanon chwe utzcꞌa chi anin cꞌoli ja utzlaj cꞌaslemal nyaꞌ chique canojel ja winak ja reꞌayaꞌon chwe pro jun utzlaj cꞌaslemal ja mta qꞌuisic trij.

San Juan 17:22

Caniꞌ ayaꞌon chwe chi bien kꞌalaj chi atat atcꞌayon ja ncꞌaslemal in queriꞌ nbanon anin chakajaꞌ, nyaꞌon chique chi bien kꞌalaj chi atat atcꞌayon ja quicꞌaslemal ejeꞌeꞌ chakajaꞌ. Queriꞌ nbanon chique utzcꞌa chi xta jun xtiqueban ja caniꞌ kabanon ajoj awqꞌuin como xa jun kabanon.

San Juan 17:5

Camic Nataꞌ, tayaꞌaꞌ chwe chi queriꞌ nkaban chic awqꞌuin pa gloria ja caniꞌ kabanon nabey ja tok majaꞌn titzꞌucarsaxi ja rwachꞌulew, congana nim nukꞌij triꞌ. Tayaꞌaꞌ chwe chi ninbe chic jutij awqꞌuin pa gloria ja bar nkꞌalajin wiꞌ chi congana nim nukꞌij.

San Juan 6:37

Canojel ja winak ja neyataj chwe rmal ja Tatixel ejeꞌeꞌ neꞌurkaj wqꞌuin in tok neꞌurkaji mta ariꞌ ja maquita nenucꞌul canojelal.

San Juan 6:39

Ja Tatixel ja takyonpi wxin quewaꞌ rvoluntad riꞌ, chi canojel ja reyaꞌon chwe rmal ni majun chique xtintzꞌilaꞌ ta in tok xterilaꞌ ja qꞌuisbal tiempo nenuyic canojelal chipan ja camíc.

San Juan 8:58

Ja cꞌa Jesús xbij chic chique: —Ni katzij wiꞌ ja xtinbij chewe riꞌ, anin nij incꞌo chi wiꞌ ja tok majaꞌn talaxi ja rAbraham, neꞌ chique.

1 Corintios 13:12

In queriꞌ cꞌa chake ajoj camic, cꞌo jeꞌe ja xin Dios kotak pro xarwariꞌ ma claro ta chikawach nojelal, caniꞌ tre tok natzꞌat awach chipan jun chꞌichꞌ ja ma bien ta claro natcaꞌy chipan. Pro ja tok xtucꞌul riꞌ kawach ruqꞌuin ja Jesucristo jariꞌ ni claro chic chikawach triꞌ. Ja camic masqui wotak janiꞌ rnaꞌoj ja Dios pro cꞌa cꞌo na ja ma kas ta claro chinwach nak rbanic. Pro ja tok xtipi chic jutij ja Jesucristo jariꞌ ni claro chic chinwach triꞌ pro ni nojelal, caniꞌ tre ja Dios camic arjaꞌ ni bien claro chwach janiꞌ ja nnaꞌoj anin pro ni nojelal.

2 Corintios 3:18

In ajoj kanojelal ja yukul kacꞌuꞌx ruqꞌuin ja kajaw Jesucristo majun nak ta botzben ta kapalaj, kamajon rtzꞌatic camic ja kajaw Jesucristo chi más kꞌaxnak chi na ruchꞌaꞌ Dios cꞌo ruqꞌuin. In como kamajon rtzꞌatic chi congana nim rukꞌij chewiꞌ tok noktajini nokqꞌuextaji, ntajini noqui ja kanaꞌoj ajoj ja caniꞌ rnaꞌoj arjaꞌ, xa janiꞌ npi más npi más ja ruchꞌaꞌ pa tak kanma. In nojel ariꞌ ruqꞌuin ja rEspíritu rxin ja kajaw Jesucristo npi wiꞌ.

2 Corintios 4:6

Queriꞌ kabanon como ja Dios arjaꞌ cꞌo jun luz rtakonto pa tak kanma ja caniꞌ xuban ojer tok xbij chi: —Tiwinakari ja luz, neꞌe, in winakari ja luz chipan ja kꞌekumal. Queriꞌ rbanon chake utzcꞌa chi nchꞌaꞌani ja luz xin Dios pa tak kanma in rmalariꞌ ja winak xticotakij na chi ruqꞌuin ja Jesucristo natzꞌat wiꞌ chi janila nim rukꞌij ja Dios.

2 Corintios 5:8

Pro ni yukul wiꞌ kacꞌuꞌx ruqꞌuin ja Dios in como kotak chi matutzꞌat riꞌ kawach ruqꞌuin ja kajaw Jesucristo chipan awaꞌ jun cuerpo ja kucꞌan camic xa chewiꞌ tok más na kagana ja nkayaꞌ can awaꞌ jun cuerpo ja kucꞌan riꞌ in nokbe ruqꞌuin ja kajaw Jesucristo ja bar cꞌo wiꞌ ja mero kochoch.

Filipenses 1:23

Xarwariꞌ cꞌo ngana nincami in nineqꞌuejeꞌ ruqꞌuin ja Cristo jariꞌ más chi na utz ja nnaꞌ anin.

1 Tesalonicenses 4:17

Cꞌacꞌariꞌ ja cꞌa ecꞌas na chake junan necꞌamarel chicaj pa sutzꞌ cuqꞌuin chi rcꞌulic ja kajaw Jesucristo. Queriꞌ nkaban, nokqꞌuejeꞌ chijutij ruqꞌuin.

1 Pedro 1:21

Rmal ja Cristo chewiꞌ tok yukul chic ecꞌuꞌx ruqꞌuin ja Dios. Jariꞌ mismo Dios ja xuyaꞌ tre ja Cristo chi cꞌastaji chiquicojol ja camnakiꞌ in xuyaꞌ tre chakajaꞌ chi congana nim chic rukꞌij. Rmalcꞌariꞌ tok ruqꞌuin ja Dios yukul wiꞌ ecꞌuꞌx, rmalcꞌariꞌ chakajaꞌ tok ewotak chi ja Dios arjaꞌ nyowi ja rutzil ja rewayben.

1 Juan 3:2

Chakꞌlaj wachꞌalal, anin nbij chewe chi ok ralcꞌwal chic ja Dios camic. Majaꞌn tikꞌalasax chikawach nak kabanic ja tok xkoqꞌuextaji pa jun kꞌij xarwariꞌ kotak chi ja tok xtipi chic jutij ja Jesucristo ajoj nij ok queriꞌ chic triꞌ ja caniꞌ arjaꞌ. Nkatzꞌat na chi utz triꞌ janiꞌ ja kas mero rbanic ja Jesucristo chewiꞌ tok nokoqui ja caniꞌ arjaꞌ.

Apocalipsis 21:22

Ja tinamit mta jun templo xintzꞌat chipan como ja kajaw Dios ja ni majun poder ja maquita cꞌo pa rukꞌaꞌ, arjaꞌ rachbil ja Carnelo ejeꞌeꞌ eꞌocnak templo rxin ja tinamit.

Apocalipsis 3:21

Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi neꞌoc wach tak kꞌetol tzij, nincachbilaj chipan ja ntrono caniꞌ xinban anin xinchꞌocmaji in xinwachbilaj ja nataꞌ Dios chipan ja rtrono.