San Juan 1:14 - Tz'utujil (Ja Cꞌacꞌa Chominem)

¹⁴ Ja Ralcꞌwalaxel ja nkꞌalasani janiꞌ rnaꞌoj ja Dios arjaꞌ kajto, xoc kach winak, qꞌuejeꞌ chikacojol. Katzꞌat ruqꞌuin kawach chi ja rcꞌaslemal arjaꞌ mero rcꞌaslemal ja Dios, junan ruqꞌuin ja rcꞌaslemal Dios Tatixel, mchita jun ralcꞌwal ja Tatixel ja queriꞌ chi ta. Arjaꞌ nojnak ja rutzil xin Dios pa ranma, nojel ja nuchꞌob, nojel ja nbij in nojel ja nuban ni katzij wiꞌ.

Tz'utujil NT

¹⁴ Je Rlec'walxel je Rtzojbal Dios arja' xkaj ta, xoca wnak, xec'je'a chkacjol. Xkatz'et regloria y nmajo'n chic jun gloria cara' ta, com ja' Ttixel majo'n chic jun Rlec'wal cara' ta, arja' nnojnak utzil rxin Dios pranm. Njelal jnuch'ob, njelal je nbij, y njelal jnuban ne ktzitzij wa'.

San Juan 1:14 Iomraidhean Croise

San Mateo 1:16

Ja Jacob, tatixel rxin José. Ja José, arjaꞌ rchajil María in jariꞌ María ruteꞌ ja Jesús ja Cristo nokcheꞌ tre.

San Lucas 2:11

Quewaꞌ ja utzlaj tzij ja ncꞌamonto chewe riꞌ, ja camic cꞌo jun Toꞌonel ewxin cꞌa xalaxi, pa Belén xalax wiꞌ ja bar xalax wiꞌ ja rojer rey David. Ja cꞌa Toꞌonel arjaꞌ ja Cristo ja kajaw.

San Lucas 2:7

Triꞌ cꞌa xalax wiꞌ ja ti ral talaꞌ, ti nabey winak. Xubar pa tziak. Ja cꞌa tok bartaj rmal cꞌo jun quiwabal chicop xcanoj in xcotzꞌbaꞌ chipan. Queriꞌ cꞌa xuban, pa quicꞌolibal chicop xeqꞌuejeꞌ na wiꞌ como enojnak chic ja winak chipan ja posada.

San Lucas 9:32

Ja cꞌa Pedro arjaꞌ congana majtajnak ma waram in queriꞌ chique ja rachbil chakajaꞌ pro quecochꞌ. Quetzꞌat ja Jesús chi ja gloria xin Dios ntajini nchꞌaꞌan trij in xequetzꞌat ja caꞌiꞌ achiꞌiꞌ chakajaꞌ ja recꞌo ruqꞌuin.

San Juan 1:1

Ja kas nabey tok ni majun nak ta tzꞌucarsan ni cꞌo chi wiꞌ triꞌ ja Ralcꞌwalaxel ja nkꞌalasani janiꞌ rnaꞌoj ja Dios. Xa jun quibanon ruqꞌuin ja Dios in ni Dios wiꞌ arjaꞌ chakajaꞌ.

San Juan 11:40

—¿La ma xinbij ta cꞌa chawe ja wi nyukeꞌ acꞌuꞌx wqꞌuin natzꞌat na chi ja Dios congana rchokꞌakꞌ in congana nim rukꞌij? neꞌe ja Jesús tre.

San Juan 14:6

—Pro anin cꞌa ja rin bey, wqꞌuin anin niltaj wiꞌ nojelal ja ni katzij wiꞌ ja ni majun engaño rcꞌan in anin ninyowi ja utzlaj cꞌaslemal ja mta qꞌuisic trij. Mta jun nak ta xtekaj ta ruqꞌuin ja Tatixel ja maquita yukul rucꞌuꞌx wqꞌuin.

San Juan 14:9

Ja cꞌa Jesús xbij tre: —Felipe ¿nak tre tok nabij queriꞌ chwe chi anin ncꞌut chewach ja Tatixel pro tuban waꞌan qꞌuiylaj tiempo incꞌol ewqꞌuin, la majaꞌn cꞌa tichꞌobtaj amwal ariꞌ nak nbanic? pro ja reꞌotakyon nwach jariꞌ cotak cꞌa rwach ariꞌ ja Tatixel.

San Juan 17:22

Caniꞌ ayaꞌon chwe chi bien kꞌalaj chi atat atcꞌayon ja ncꞌaslemal in queriꞌ nbanon anin chakajaꞌ, nyaꞌon chique chi bien kꞌalaj chi atat atcꞌayon ja quicꞌaslemal ejeꞌeꞌ chakajaꞌ. Queriꞌ nbanon chique utzcꞌa chi xta jun xtiqueban ja caniꞌ kabanon ajoj awqꞌuin como xa jun kabanon.

San Juan 17:24

Nataꞌ, ja winak ja reꞌayaꞌon chwe cꞌo ngana chi triꞌ neꞌeqꞌuejeꞌ wiꞌ ja bar xquineqꞌuejeꞌ wiꞌ anin. Queriꞌ nwajoꞌ chique utzcꞌa chi necowini nquetzꞌat ja nimlaj gloria xin Dios wcꞌan ja caniꞌ ayaꞌon chwe. Como atat nij inawajoꞌonto wiꞌ ja tok majaꞌn titzꞌucarsaxto ja rwachꞌulew.

San Juan 18:37

—¿La katzij chi at rey? neꞌe ja Pilato tre. Ja cꞌa Jesús xbij chic tre: —In rey nacꞌa caniꞌ cꞌa xabij kaj, xcꞌa rmalariꞌ tok inpenak waweꞌ chwachꞌulew, xcꞌa rmalariꞌ chakajaꞌ tok xinalaxi. Inpenak chi rkꞌalasaxic chiquewach ja winak nak ja kas mero rbey Dios. Canojel ja winak ja cꞌo quigana ruqꞌuin ja rbey Dios ejeꞌeꞌ nqueyaꞌ quixquin tre chi rcꞌaxaxic ja nmajon rbixic chique, neꞌ tre.

San Juan 2:11

Jawaꞌ nabey milagro xuban ja Jesús, pa Caná xuban wiꞌ ja cꞌo pa rcuenta Galilea, jawaꞌ xcꞌutbej chiquewach ja rdiscípulo chi congana nim rukꞌij in yukeꞌ quecꞌuꞌx ruqꞌuin.

San Juan 3:16

Ja Dios congana nerajoꞌ canojelal ja winak rmalcꞌariꞌ tok xutakto waweꞌ chwachꞌulew ja Ralcꞌwal, xarariꞌ jun. Queriꞌ xuban utzcꞌa chi canojelal ja winak ja xtiyukeꞌ quecꞌuꞌx ruqꞌuin ejeꞌeꞌ maquetakel chipan ja rpokonal, nyataj na chique jun utzlaj cꞌaslemal ja ni mta wiꞌ qꞌuisic trij.

San Juan 3:18

Canojelal ja winak ja nyukeꞌ quecꞌuꞌx ruqꞌuin ja Ralcꞌwal Dios ejeꞌeꞌ mchita kꞌetoj tzij xin Dios chiquij pro ja cꞌa matiyukeꞌ quecꞌuꞌx ruqꞌuin ejeꞌeꞌ kꞌeton chic tzij chiquij rmal ja Dios chi neta̱kel chipan ja rpokonal. Como matiyukeꞌ quecꞌuꞌx ruqꞌuin ja Ralcꞌwal Dios chewiꞌ tok nba̱n queriꞌ chique.

San Juan 6:51

Ja way ja nyowi cꞌacꞌa cꞌaslemal, ja way ja kajnakto chilaꞌ chicaj, anin cꞌariꞌ. Jawaꞌ way ja cꞌa xinbij kaj chewe riꞌ, xa nak ta xtitijo rxin jariꞌ ncꞌaseꞌe pro ni chijutij. Cꞌoli way ja xtinyaꞌ chique ja winak waweꞌ chwachꞌulew utzcꞌa chi cꞌo jun cꞌacꞌa cꞌaslemal nyataj chique. Ja way xtinyaꞌ jariꞌ ncuerpo anin. Queriꞌ xbij ja Jesús chique.

San Juan 8:32

Ja wi queriꞌ neban newotakij na janiꞌ ja nnaꞌoj in newotakij na chakajaꞌ chi ni katzij wiꞌ ja ntzobal in tok xtewotakij jariꞌ nixwasanel libre, neꞌ chique.

Hechos 13:33

jariꞌ rbanon chic cumplir ja Dios pa katiempo ajoj ja rok quiy quemam can como arjaꞌ xuyic ja Jesús chipan ja camíc. Caniꞌ tzꞌibtal can chipan ja rtzobal Dios chipan ja rcab salmo quewaꞌ nbij ja Dios tre ja Cristo riꞌ: —Atat at Walcꞌwal, camic xincꞌut chiquewach ja winak chi at Walcꞌwal, queriꞌ xbij tre.

Romanos 8:3

Ja cꞌa ley xin Dios jariꞌ ma xcowin ta xokrutoꞌ ta chipan ja kil kamac. Como xa ok winak chewiꞌ tok ma xcowin ta ja ley xuqꞌuex ta ja ritzel tak naꞌoj kucꞌan. Pro ja Dios arjaꞌ cowini xokrutoꞌ, xutakto ja Ralcꞌwal ja ni xarwariꞌ jun. Peti ja Ralcꞌwal, xoc kach winak ja rok ajꞌil ok ajmaquiꞌ pro xarwariꞌ mta ril rumac arjaꞌ. Rmal kil kamac chewiꞌ tok takto. Queriꞌ cꞌa xuban ja Dios jariꞌ xkajsbej ja poder rxin ja il mac ja cꞌo pa tak kanma ja rok winak.

Romanos 9:5

Makanaꞌ maquita e quijaꞌtzul can ja rAbraham ja rIsaac in Jacob, makanaꞌ maquita cach aj Israel ja Cristo tok xoc kach winak waweꞌ chwachꞌulew. Ja Cristo arjaꞌ Dios in majun ja maquita cꞌo rukꞌaꞌ tre, kas ta xtiyaꞌ rukꞌij camic, chwak in chijutij. Amén.

1 Corintios 15:47

Ja rAdán arjaꞌ waweꞌ chwachꞌulew winakarto wiꞌ, ulew ocnak in ruqꞌuin arjaꞌ winakarnakto wiꞌ ja nabey cꞌaslemal ja xin waweꞌ chwachꞌulew. Ja kajaw Jesucristo arjaꞌ chilaꞌ chicaj pi wiꞌ in ruqꞌuin arjaꞌ winakarnakto wiꞌ ja jun chic cꞌaslemal cꞌacꞌa ja xin chilaꞌ chicaj.

2 Corintios 12:9

Pro arjaꞌ quewaꞌ xbij chwe riꞌ: —Matinwasaj chawe como anin nsipaj ja wutzil chawe in ni majun nak chi ta ncꞌatzin chawe. Queriꞌ nbij chawe como ja poder ja cꞌo wqꞌuin más chi na nsamaji chipan ja racꞌaslemal ja tok bien nchꞌobtaj amwal chi xa at jun achi at débil, neꞌ chwe. Rmalcꞌariꞌ ja tok congana ninquicoti nyaꞌ nukꞌij rmal ja debilidad ja cꞌo jeꞌe chwe utzcꞌa chi ni nsamaj wiꞌ ja poder xin Cristo chipan ja ncꞌaslemal.

Gálatas 4:4

Pro ja Dios tok tzꞌakati ja tiempo ja chomarsanto rmal tokocꞌariꞌ xutakto ja Cristo ja Ralcꞌwal. Xalaxi ja Ralcꞌwal Dios chwirukꞌaꞌ jun ixok in qꞌuejeꞌ na pa rukꞌaꞌ ja ley ja yaꞌon can tre ja Moisés ojer rmal ja Dios.

Efesios 3:8

Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Colosenses 1:19

Queriꞌ rbanic como nojelal ja nojnak pa ranma ja katataꞌ Dios jariꞌ nojnak pa ranma ja Ralcꞌwal Dios chakajaꞌ como queriꞌ rvoluntad ja Dios.

Colosenses 2:3

Ruqꞌuin ja Cristo nkawil wiꞌ ja naꞌoj xin Dios pro ni nojelal, ruqꞌuin arjaꞌ nkawil wiꞌ nojelal ja nrajoꞌ ja Dios chake chi nkotakij jariꞌ caniꞌ jun nimlaj mebaꞌil nkawil. Pro solo ruqꞌuin ja Cristo nkawil wiꞌ.

Colosenses 2:9

Maxta quixban engañar como xa ruqꞌuin Cristo nkatzꞌat wiꞌ nak ja kas mero rbanic ja Dios como arjaꞌ ocnak kach winak in nojel ja cꞌo pa ranma ja Dios ni majun ja maquita cꞌo pa ranma ja Cristo chakajaꞌ.

1 Timoteo 3:16

Ni katzij wiꞌ chi congana nim rukꞌij ja rkꞌalasan chikawach ja Dios tre nojel ja rcꞌamonto ja Jesucristo. Quewaꞌ ja rkꞌalasan chikawach riꞌ. Ja Dios qꞌuejeꞌ waweꞌ chwachꞌulew, xoc kach winak. Kꞌalasax rmal ja rEspíritu Santo chi ni katzij wiꞌ nojel ja xbij tok qꞌuejeꞌ waweꞌ. In tzꞌat cumal ja ángel. Yaꞌ rbixic chique ja winak pa tak nación jeꞌe. In ecꞌoli chique ja winak nojel rwachꞌulew quinimaj. In joteꞌ pa gloria chilaꞌ chicaj. Queriꞌ ja rkꞌalasan chikawach ja Dios.

Hebreos 1:3

Caniꞌ tre ja ruchꞌaꞌ kꞌij ruqꞌuin nkatzꞌat wiꞌ nak rbanic ja kꞌij in queriꞌ cꞌa tre ja Ralcꞌwal Dios chakajaꞌ ruqꞌuin nkatzꞌat wiꞌ chi janila nim rukꞌij ja Dios. Ja Dios in ja Ralcꞌwal ni junan quinaꞌoj chi e caꞌiꞌ, ni majun nak ta rjalben ta riꞌ. Ja Ralcꞌwal Dios mta nak ta ja winakarsan jeꞌe ja maquita arjaꞌ chapyon rxin utzcꞌa chi matichictaji in matiyojtaji, ja cꞌa nchapbej jariꞌ ja rtzobal como ja tzij nbij congana poder rcꞌan. Ja cꞌa xuban nabey peti, xokurchꞌachꞌojirsaj chipan ja kil kamac cꞌacꞌariꞌ be chilaꞌ chicaj, xetzꞌabeꞌ pa riquikꞌaꞌ ja nimlaj katataꞌ Dios.

Hebreos 1:5

Ja Dios tzijonnak can tre ja Ralcꞌwal quewariꞌ: —Atat at Walcꞌwal. Camic nyaꞌon acꞌaslemal, chenak can tre. Pro ni majutij xbij ta walcꞌwal tre jun ángel. In chakajaꞌ tzijonnak can chic jutij tre quewariꞌ: —Anin in Tatixel rxin, arjaꞌ Walcꞌwal, chenak can tre. Pro ni majutij xbij ta queriꞌ tre jun ángel.

Hebreos 10:5

Rmalcꞌariꞌ ja Cristo tok pi waweꞌ chwachꞌulew quewaꞌ xbij tre ja Tatixel riꞌ: —Ja ratat, ma ja tariꞌ nawajoꞌ ja necamsaxi juleꞌ chicop chawach nixtacꞌa ja ta ja juleꞌ chic ja ntzujux jeꞌe chawach. Pro ja ncuerpo anin jariꞌ achomarsan, ja cꞌariꞌ ntzujux na chawach.

Hebreos 2:11

Ja Jesús nerchꞌachꞌojirsaj ja winak chipan ja quil quemac. Ja cꞌa nechꞌachꞌojirsaxi ejeꞌeꞌ xa junan quitataꞌ ruqꞌuin, ejeꞌeꞌ e ralcꞌwal Dios chakajaꞌ. Rmalcꞌariꞌ ja Jesús ma junwiꞌ ta nunaꞌ nbij chake chi ok rchꞌalal.

Hebreos 5:5

In queriꞌ xuban ja Jesucristo chakajaꞌ, arjaꞌ ma xuyaꞌ kaj ta rukꞌij ruyon, ma xumin ta riꞌ chipan ja lokꞌlaj sacerdoteꞌil pro chaꞌi rmal ja Tatixel caniꞌ tzꞌibtal can quewariꞌ: —Atat at Walcꞌwal, camic nyaꞌon acꞌaslemal, neꞌe.

1 Juan 4:14

In ajoj chakajaꞌ katzꞌat rwach ja Jesucristo ja Ralcꞌwal Dios in nkayaꞌ rbixic chi arjaꞌ takto rmal ja Tatixel, xoc Toꞌonel kaxin kanojelal ja rok winak.

1 Juan 4:9

Ja Dios xutakto ja Ralcꞌwal chi katoꞌic, ni xarwariꞌ jun ja Ralcꞌwal. Triꞌ nkatzꞌat wiꞌ chi nokrajoꞌ ja Dios como xutakto ja Ralcꞌwal waweꞌ chwachꞌulew. Queriꞌ xuban utzcꞌa chi rmal ja Ralcꞌwal nkawil ja utzlaj cꞌaslemal ja mta qꞌuisic trij.

2 Juan 1:7

Queriꞌ nbij chawe como e qꞌuiy ja banol tak engaño ja reꞌelnak chic, ebenak cuqꞌuin ja winak ja xa ruqꞌuin rwachꞌulew yukul wiꞌ quecꞌuꞌx, ejeꞌeꞌ nquipokonaj nquibij chi xoc kach winak ja Jesucristo ja tok peti waweꞌ chwachꞌulew. Xa nak ta ja nbano queriꞌ arjaꞌ banol engaño in xa rcꞌulel ja Cristo.

Apocalipsis 19:13

Cꞌo jun tziak rcojon congana quicꞌ trij in ja rubiꞌ nbix tre quewariꞌ, ja Ralcꞌwalaxel ja nkꞌalasani janiꞌ rnaꞌoj ja Dios neꞌxi.

Apocalipsis 21:3

Cꞌo cꞌa jun kulaj xincꞌwaxaj penak chilaꞌ chicaj congana nim rukul, quewaꞌ nbij riꞌ: —Camic ja Dios ni chiquicojol ja winak nqꞌuejeꞌ chi wiꞌ. Arjaꞌ nqꞌuejeꞌ cuqꞌuin in ejeꞌeꞌ nij e tinamit wiꞌ rxin. Dios mismo ja nqꞌuejeꞌ cuqꞌuin, arjaꞌ Dios quixin.