Gálatas 2:1 - Tz'utujil (Ja Cꞌacꞌa Chominem)

¹ Cꞌa chi catorce junaꞌ ja tok xinbe chic jutij ja pa Jerusalén wachbil ja Bernabé in kacꞌamel ja Tito chakajaꞌ.

Tz'utujil NT

¹ C'catorce chic juna' tak xenba chic jmul pJerusalén wexbil Bernabé, y xkac'om ela Tito chka'.

Gálatas 2:1 Iomraidhean Croise

Hechos 11:25

Cꞌacꞌariꞌ be ja Bernabé pa Tarso chi rcanoxic ja Saulo.

Hechos 11:30

In queriꞌ queban, quetakel ja Bernabé rachbil Saulo chi ejeꞌeꞌ nequijachaꞌ ja rayuda pa quekꞌaꞌ ja ranciano ja repaꞌl chiquij ja kachꞌalal ja recꞌo pa Judea.

Hechos 12:25

Ja cꞌa Bernabé rachbil Saulo ja tok jachtaj can ja rayuda cumal xeꞌelel pa Jerusalén, xebe chic pan Antioquía in quecꞌamel ja Juan ja cꞌo chic jun rubiꞌ nbixi Marcos.

Hechos 13:2

Queban cꞌa jutij quimolon quiꞌ chi ryaꞌic rukꞌij ja Dios, quimajon rbanic ja rayuno ja tok cꞌoli bix chique rmal ja rEspíritu Santo quewariꞌ: —Anin enchaꞌon ja Bernabé in Saulo chi rbanic jun samaj. Camic queꞌepartiꞌij chi nequibanaꞌ ja samaj, queriꞌ bix chique.

Hechos 13:50

Pro ja cꞌa raj Israel ejeꞌeꞌ xebe cuqꞌuin juleꞌ ixokiꞌ ja nqueban respetar ja Dios ja nimak quekꞌij in cuqꞌuin chakajaꞌ ja principaliꞌ xin tinamit. Ja tok xeꞌekaj cuqꞌuin xequitakchiꞌij chi neyictaj chiquij ja Pablo in Bernabé. In queriꞌ queban, xequilasajto chipan ja lugar.

Hechos 14:12

Quibij tre ja Bernabé chi arjaꞌ ja dios rbinaꞌan Júpiter. In quibij tre ja Pablo chi arjaꞌ ja dios rbinaꞌan Mercurio como más ntzijoni ja Pablo.

Hechos 15:25

Rmalcꞌariꞌ ja tok kamol kiꞌ in xa jun kachꞌob, ecꞌo caꞌiꞌ kachꞌalal xekachaꞌ chi nebe ewqꞌuin, necachbilajel ja chakꞌlaj tak kachꞌalal Bernabé in Pablo.

1 Corintios 9:6

Owi maxla xa nuyon anin wachbil Bernabé ja mta kakꞌaꞌ tre chi noketzuk. ¿La xa kayon ajoj ja kas puersa noksamaj ruqꞌuin kakꞌaꞌ chi nkatzukbej kiꞌ nechꞌob ixix?

2 Corintios 2:13

Pro ni ma quiꞌ ta wiꞌ nucꞌuꞌx rumac ja ma xinwil ta triꞌ ja kachꞌalal Tito. Rmalcꞌariꞌ tok xinel chiquicojol ja kachꞌalal ja recꞌo pa Troas in xinbe chic chipan ja departamento Macedonia.

2 Corintios 8:16

Pro anin congana nmaltioxij tre ja Dios como arjaꞌ ryaꞌon pa ranma ja Tito chi congana noclaꞌ il chi rbanic cuenta ewxin, ni queriꞌ nuban ja Tito chi echajixic ja caniꞌ nintajini nban anin.

2 Corintios 8:23

Ja cꞌa Tito kacꞌamon kiꞌ ruqꞌuin chi noksamaj pan ecuenta, arjaꞌ wach ajsamajel xin Dios. Ja cꞌa re caꞌiꞌ chic kachꞌalal ejeꞌeꞌ echaꞌonel cumal ja juleꞌ chic kachꞌalal ja recꞌo pa tak iglesia jeꞌe in ja quicꞌaslemal jariꞌ ocnak yaꞌbal rukꞌij ja Cristo.

Gálatas 1:18

Cꞌa chi oxiꞌ junaꞌ xinbe wiꞌ pa Jerusalén, triꞌ xinbe wiꞌ utzcꞌa chi nwotakij rwach ja Pedro, olajuj kꞌij xenbanaꞌ ruqꞌuin.

Gálatas 2:13

Xa caꞌiꞌ rpalaj xuban ja Pedro in queriꞌ queban chic chakajaꞌ ja juleꞌ chic kachꞌalal ja raj Israel in pior cꞌa ja Bernabé arjaꞌ xuyaꞌ riꞌ chique chakajaꞌ, caniꞌ queban ejeꞌeꞌ queriꞌ xuban arjaꞌ chakajaꞌ.

Gálatas 2:3

Ejeꞌeꞌ chꞌobtaj cumal ja xinbij chique como ja Tito ja wachbil arjaꞌ ma aj Israel ta in tok laj ban puersa tre chi nba̱n circuncidar pro nixtacꞌa yataj ta lugar chique chi queban ta circuncidar.

Gálatas 2:9

Ja Jacobo, ja Pedro in Juan ejeꞌeꞌ xetzꞌati chi epaꞌl chiquij ja kachꞌalal in tok chꞌobtaj cumal nak rbanic ja samaj ja xincochij tre ja Dios cꞌacꞌariꞌ quechap kakꞌaꞌ ok caꞌiꞌ ruqꞌuin ja Bernabé jariꞌ quicꞌutbej chi xa jun chic kabanon cuqꞌuin. Xa jun kachꞌob cuqꞌuin, ajoj nokesamaj chiquicojol ja ma e aj Israel ta in ejeꞌeꞌ nesamaj chiquicojol ja raj Israel.

Colosenses 4:10

Ja kachꞌalal Aristarco arjaꞌ wachbil waweꞌ pa cheꞌ, arjaꞌ nutakel rutzil ewach. Ja kachꞌalal Marcos ja rchꞌalal Bernabé arjaꞌ nutakel rutzil ewach chakajaꞌ. Caniꞌ nbin chic chewe, ja wi xtekaji ja Marcos ewqꞌuin kas quiꞌil rcꞌulic tebanaꞌ.

Tito 1:4

Ja cꞌa ratat Tito xa junan yukul wiꞌ kacꞌuꞌx awqꞌuin ruqꞌuin ja Jesucristo, at ncꞌajol chwach ja Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja Jesucristo ja Toꞌonel kaxin. Ejeꞌeꞌ ta xtiquipokonaj awach.