Efesios 5:3 - Tz'utujil (Ja Cꞌacꞌa Chominem)

³ Ja cꞌa tok nekꞌijlaꞌ ewiꞌ maxta tetzijoj juleꞌ il mac ja nqueban achiꞌiꞌ cuqꞌuin ixokiꞌ in nixtacꞌa juleꞌ chic chakajaꞌ ja xa ntzꞌilorsaj ja ranaꞌoj in nixtacꞌa ja ta chakajaꞌ ja ritzelal ja nquiyarij winak pa tak canma. Nojel awaꞌ ja cꞌa xinbij chewe riꞌ nixtacꞌa xtetzijoj ta jutzꞌit. Ja tok at xin Dios ma yatal chi ta chawij chi natzijoj ja wariꞌ.

Tz'utujil NT

³ Mtetzijoj ta jle' il mac je nqueban ach-i' cuq'uin ixki' nexte jle' chic chka' jxe ntz'ilorsaj ana'oj, y nexte je' rtzilal chka' jnecyarij wnak ptak canm. Njelal jawrara jxenbij kaja chewa nexte xtetzijoj ta jtz'it. Tak at rtnamet Dios majo'n yatanak xta chawij che natzijoj jawrara.

Efesios 5:3 Iomraidhean Croise

San Mateo 15:19

Queriꞌ nbij chewe como pan awanma nwinakarto wiꞌ ja ritzel tak naꞌoj caniꞌ tre banoj camíc, caniꞌ tre tok cꞌo jun natoc ruqꞌuin ja wi ma awixjayil ta owi ma awachajil ta, caniꞌ tre banoj alakꞌ, caniꞌ tre ja nayaꞌ testigoꞌil ja ma katzij ta in caniꞌ tre ja tok nabij juleꞌ tzij tre ja Dios ja xa ofensa rcꞌamonto tre.

San Lucas 12:15

Cꞌacꞌariꞌ ja Jesús xbij chique ja winak: —Tebanaꞌ cuenta ewiꞌ, maxta quixban engañar rmal ja yarin mebaꞌil. Queriꞌ nbij chewe como ni majun winak masqui congana mebaꞌil cꞌo ruqꞌuin pro ma ja tariꞌ ja mebaꞌil nyowi rcꞌaslemal, neꞌ chique.

San Lucas 16:14

Ja cꞌa fariseo ejeꞌeꞌ quicꞌaxaj chakajaꞌ nojel ja xbij ja Jesús tre ja mebaꞌil. Rmalcꞌariꞌ tok quemaj ryokꞌic como ejeꞌeꞌ chaka benak chi nquiyarij ja mebaꞌil xin rwachꞌulew.

Hechos 15:20

Xarwariꞌ nkaban, nkatakel rbixic cuqꞌuin chi ma tiquetiꞌ ta ja tiꞌij ja tzujun chiquewach cachbal tak winak owi chwach rachbal tak nakun. In jun chic, ma queꞌoc ta cuqꞌuin ixokiꞌ ja ma e quixjayilal ta in ja rixokiꞌ chakajaꞌ ma queꞌoc ta cuqꞌuin ja rachiꞌiꞌ ja ma e quichajilal ta. In jun chic, ma tiquetiꞌ ta ja tiꞌij ja wi ma elnak ta rquiqꞌuel ja chicop. In jun chic, ma tiquetiꞌ ta ja quicꞌ.

Hechos 20:33

Ma rmal ta pwok, ma rmal ta tziak xinyarij ta ja tok xixntijoj tre ja rtzobal Dios.

Romanos 1:29

Ejeꞌeꞌ xa emakꞌenirnak chi rbanic nojel rwach ja ritzelal. Xa il mac nqueban achiꞌiꞌ cuqꞌuin ixokiꞌ, xa itzel netzꞌatoni, chaka benak chi yarin quinakun winak, nqueban itzel chique winak in nquiakir canma chiquij in nequicamsaj. Xa e ticol tak chꞌaꞌoj, xa e banol tak engaño in nojel ja rutzil xa itzel nquetzꞌat.

Romanos 16:2

Ja cꞌa tok xtekaj ewqꞌuin congana nban recomendar chewe chi necꞌul pa rubiꞌ ja kajaw Jesucristo como nijawariꞌ yatal chake chi nkaban ja rok tinamit xin Dios. Ja kas nwajoꞌ chewe chi netoꞌ ja kachꞌalal Febe tre xa nak ta ncꞌatzin tre como arjaꞌ e qꞌuiy ja kachꞌalal ertoꞌon in chakajaꞌ inrtoꞌon anin.

Romanos 6:13

Maxta teyaꞌ rgana ja il mac xtucoj chi ta ja rekꞌaꞌ ewakan chi rbanic juleꞌ itzelal pro ja neban, teyaꞌaꞌ rgana ja Dios. Kas turkaj chewe nak ja rebanon nabey caniꞌ ixcamnak chipan ja rewil emac pro ja cꞌa Dios xixrucꞌas in xuyaꞌ jun cꞌacꞌa cꞌaslemal chewe. Ja cꞌa rekꞌaꞌ ewakan jariꞌ tejachaꞌ pa rukꞌaꞌ ja Dios utzcꞌa chi noc juleꞌ samajbal banbal utzil.

1 Corintios 10:8

Maxta komacun cuqꞌuin ixokiꞌ ja caniꞌ queban juleꞌ chique. Como xuban jutij ecꞌoli chique queban ja il mac cuqꞌuin ixokiꞌ in e veintitrés mil ja xecam rmal pro jariꞌ mismo kꞌij xecami.

1 Corintios 5:1

Cꞌo takaꞌan jun itzelal bantajnak checojol elnak rbixic como cꞌo jun chewe xucꞌam ja rteꞌbal. Jariꞌ congana itzel na, xnaꞌ xa ma queriꞌ ta nqueban ja winak ja ma cotak ta rwach ja Dios.

1 Corintios 6:13

Ja tre kaway ni ja wiꞌ rsamaj chi nnojsaj kapan in tre kapan chakajaꞌ ni ja wiꞌ rsamaj chi nsamajij ja way ja nkatij pro jariꞌ nerilaꞌ na jun kꞌij tok mchita way mchita kapan como ja Dios nuqꞌuis na chi caꞌiꞌ. Pro ja tre kacuerpo ma ja ta rsamaj ja xkoꞌoc ta cuqꞌuin ixokiꞌ ja wi ma kixjayilal ta, jariꞌ ma rubey ta. Pro ja rsamaj ja kacuerpo jariꞌ chi noqui jun samajbal rxin ja kajaw Jesucristo in chakajaꞌ ja kajaw Jesucristo arjaꞌ nuban cuenta ja kacuerpo.

1 Corintios 6:18

Ja natoc ruqꞌuin jun ixok ja ma awixjayil ta jariꞌ ma teyaꞌ ta ewiꞌ ixix tre, quixanmaj chwach. Ja tok naban jeꞌe ja ritzelal ma ni ta tre ja racuerpo naban wiꞌ itzel pro ja tok natoc ruqꞌuin jun ixok ja ma awixjayil ta jariꞌ ni tre ja racuerpo naban wiꞌ itzel.

2 Corintios 12:21

Anin nxbej wiꞌ emwal como ja tok xquinekaj chic jutij ewqꞌuin maxla quewaꞌ xtuban chwe ja Dios riꞌ, maxla xa qꞌuixbal nnaꞌ chic chewach rmal ja rebanon. Maxla rjawaxic chi ninokꞌ cumal ja recꞌoli chewe ja ni cꞌo wiꞌ ja il mac queban ojer in ni cꞌa cꞌo na wiꞌ ja ritzelal ja quimajon rbanic camic caniꞌ chique ja winak ja nqueban xa nak ta ja ntzꞌilorsaj ja racꞌaslemal in chique ja rachiꞌiꞌ ja nemacun cuqꞌuin ixokiꞌ in chique ja winak ja ni majun queqꞌuix nqueban ja ritzelal chiquewach ja winak.

Efesios 5:12

Como congana itzel ja nqueban jeꞌe pan awatali, nixtacꞌa cꞌo ta ngana nintzijon tre, xa qꞌuixbal nnaꞌ rmal.

Efesios 5:5

Como ixix bien ewotak chi ja herencia xin Dios matiyataj chique ja rachiꞌiꞌ in ixokiꞌ ja xa nemacuni nixtacꞌa chique ta ja winak ja nqueban jeꞌe ja xa ntzꞌilor anaꞌoj rmal in nixtacꞌa chique ta ja winak ja chaka benak chi nquiyarij quinakun cach tak winak. Ja cꞌa wi chaka benak chi nayarij quinakun winak jariꞌ xa nakun jeꞌe nayaꞌ rukꞌij, xa jariꞌ ocnak adios. Bien ewotak chi ja winak ja re quitakariꞌ ejeꞌeꞌ matiyataj chique ja herencia chi xqueꞌoc ta chipan ja gobierno rxin ja Cristo rachbil Dios ja Tatixel.

Filipenses 1:27

Xar nbij chewe wachꞌalal, ni ta newcꞌaj wiꞌ jun utzlaj cꞌaslemal ja caniꞌ nucꞌut chikawach ja utzlaj tzij xin Cristo. Ja wi xtitzur mwal chi ninbe ewqꞌuin owi masqui ma xtitzur ta pro xarwariꞌ nurkaj ta rbixic wqꞌuin chi xa jun ebanon. Cow ta nixpeꞌi wachꞌalal, xa jun tebanaꞌ, xta jun neban chi rbanic jun lucha utzcꞌa xtibe ta pa nim ja utzlaj tzij xin Jesucristo in xtiyukeꞌ ta quecꞌuꞌx ja winak ruqꞌuin ja Jesucristo rmal.

Colosenses 3:5

Como ixcamnak chic chwach ja il mac ma teban chi ta ixix ja ritzelal ja caniꞌ nqueban winak waweꞌ chwachꞌulew. Quewaꞌ nqueban riꞌ, xa il mac nqueban achiꞌiꞌ cuqꞌuin ixokiꞌ, xa nquitzꞌilorsaj ja quinaꞌoj, chaka benak chi nquiyarij quiꞌ, solo itzelal ja ncajoꞌ. In jun chic nqueban, chaka benak chi nquiyarij quinakun winak. Ja tok chaka benak chi nquiyarij quinakun winak jariꞌ xa nakun jeꞌe nqueyaꞌ rukꞌij, xa jariꞌ ocnak quidios.

1 Tesalonicenses 4:3

Ja nrajoꞌ ja Dios chewe chi neyaꞌ ewiꞌ pa rukꞌaꞌ xajutij utzcꞌa chi arjaꞌ nixrucꞌaj chipan ja utzlaj cꞌaslemal. Quewaꞌ nrajoꞌ ja Dios chewe riꞌ, ni majun achi xtoc ta ruqꞌuin jun ixok ja wi ma rxjayil ta in ni majun ixok xtuyaꞌ ta lugar tre jun achi chi xtoc ta ruqꞌuin ja wi ma rchajil ta.

1 Tesalonicenses 4:7

Como ja Dios arjaꞌ okrchaꞌon chi nkaban ja rutzil, ma itzel tak naꞌoj ta nrajoꞌ chake chi nkaban.

1 Timoteo 2:10

Ja nqueban, tiquicꞌutuꞌ ja cutzil chiquewach winak como ja nebini chi cotak rwach ja Dios nijawariꞌ yatal chique chi nquecꞌut.

1 Timoteo 3:3

Ma tikꞌabar ta in ma banol chꞌaꞌoj ta. Ja rjawaxic tre cꞌo rpaciencia in chakajaꞌ maxta congana tel rucꞌuꞌx trij pwok.

1 Timoteo 6:10

Como ja tok congana nel acꞌuꞌx trij ja pwok triꞌ npi wiꞌ nojel rwach ja ritzelal. In ecꞌoli queriꞌ queban, quiyarij ja pwok in rmalariꞌ tok queyaꞌ can ja utzlaj tijonem xin Jesucristo in queyon queyaꞌ quiꞌ chipan ja rpokonal.

2 Timoteo 3:2

Treriꞌ tiempo quewaꞌ quibanic ja winak riꞌ, xa ejeꞌeꞌ nquilokꞌokꞌoj kaj quiꞌ queyon, congana nel quecꞌuꞌx trij ja pwok in congana nqueyaꞌ quekꞌij chakajaꞌ, kas e nimak nquenaꞌ kaj. In chakajaꞌ xa itzel netzijoni, maquequinimaj quitataꞌ queteꞌ, matiquimaltioxij ja rutzil nba̱n chique, xa e itzel tak winak chwa Dios.

Tito 1:11

Jariꞌ winak queꞌakꞌilaꞌ como ejeꞌeꞌ ni pa tak familia nequeyoj ja winak pa tak cochoch, xa itzel tak tijonem nquecꞌut chiquewach. Jariꞌ nquichꞌecbej ja quipwok pro ma utz ta rchꞌaquic nqueban.

Tito 1:7

Ja nebano cuenta ja kachꞌalal ejeꞌeꞌ e ajsamajelaꞌ rxin ja Dios. Rmalariꞌ tok rjawaxic chique chi utz ja quicꞌaslemal. Maxta ma tuyaꞌ ta pa cuenta ja nbix tre. Maxta ma cꞌayew ta npi ryewal in ma tikꞌabar ta in ma banol chꞌaꞌoj ta. In chakajaꞌ maxta congana tel rucꞌuꞌx trij ja pwok in utz rchꞌaquic tibanaꞌ.

Tito 2:3

In queriꞌ chique ja naniꞌ chakajaꞌ ja rjawaxic nqueban quewariꞌ, nqueban cuenta ja quicꞌaslemal ja caniꞌ nrajoꞌ ja Dios chique chi nqueban, maxta tiqueban molon tak tzij, ma quekꞌabar ta, tiquiyaꞌaꞌ jun utzlaj ejemplo chiquewach ja rixokiꞌ ja ma e rijaꞌ ta.

Hebreos 12:16

Maxta cꞌo jun chewe toc ruqꞌuin jun chic ja wi ma rxjayil ta owi ma rchajil ta. Ja ntzujuj ja Dios chake maxta cꞌo jun chewe tuban tre ni ma vale ta chwach. Caniꞌ tre ja rEsaú ojer, ja nabey rwinakil xuban tre ni ma vale ta chwach, xa xcꞌayij pon, xa jutzꞌit ti rway xcꞌutuj pa rqꞌuexwach.

1 Pedro 5:2

Queꞌeyukꞌuj chi utz ja rtinamit Dios. Nojel ecꞌuꞌx nojel ewanma queꞌewcꞌaj, maxta chaka ix puersa. Maxta xa rmal pwok teyarij más ja tok neꞌewcꞌaj pro kas tel ecꞌuꞌx chi cucꞌaxic.

2 Pedro 2:10

In más chi na lawuloꞌ nuban chique ja winak ja xa nqueyaꞌ quiꞌ tre ja ritzel tak yarinem ja cꞌo pa tak canma. Ejeꞌeꞌ xa itzel nquenaꞌ ja neba̱n mandar rmal ja kajaw Jesucristo. Ejeꞌeꞌ matiquixbej quiꞌ nqueban ja ritzelal, ni nqueban wiꞌ xa nak ta ja cꞌo quigana nqueban. Queriꞌ quibanic matiquixbej quiꞌ nquibij itzel tak tzij chique ja nimak quekꞌij.

2 Pedro 2:14

Mta ariꞌ ja maquita nquiyarij rwach jun ixok, maquecos chi rbanic ja ritzelal. Ja winak ja ma cowirnak ta quewiꞌ canma chipan ja rtzobal Dios nequisiqꞌuij chipan ja ritzelal. Kas ntzuri nbantaj cumal chi rqꞌuiyirsaxic ja quimebaꞌil. Queriꞌ quibanic, ejeꞌeꞌ xa etzelan chic rmal ja Dios.

2 Pedro 2:3

Ejeꞌeꞌ riꞌ ja ritzel tak maestro xa pwok nquiyarij in rmalariꞌ congana xquixquekꞌol, xtiquibij buen tak tzij chewe ja nquiwasbej ja pwok chewe. Pro ja Dios ojer cꞌo jun juicio rchominto quixin, ejeꞌeꞌ nequilaꞌ na jun kꞌij tok xqueꞌekaj chwach ja rpokonal.

Apocalipsis 2:14

Pro cꞌo jun ja nchꞌaꞌ chewe camic riꞌ. Ecꞌo jujun ja recꞌo checojol netajini nquinimaj ja tijonem rxin ja Balaam. Como ja Balaam ojer arjaꞌ xuchꞌob chwach ja Balac nak nuban chi nerkajsaj ja tinamit Israel chipan ja ritzelal. Queriꞌ xuban in rmalariꞌ tok cꞌoli quetij ja tinamit Israel ja tzujun chiquewach cachbal tak winak owi chwach rachbal tak nakun in xeꞌoc cuqꞌuin juleꞌ ixokiꞌ ja ma quixjayilal ta.

Apocalipsis 2:21

Anin nyaꞌon tiempo tre chi nuqꞌuex ja rnaꞌoj pro arjaꞌ ni matirajoꞌ wiꞌ nuqꞌuex, cꞌa rmajon na rbanic ja il mac cuqꞌuin ja rachiꞌiꞌ.

Apocalipsis 21:8

Pro ja xa nquixbej quiꞌ nqueban chꞌaꞌoj ruqꞌuin ja ritzelal ejeꞌeꞌ nebe chipan ja yaꞌ ja yujun juleꞌ caniꞌ kꞌol ruqꞌuin rmajon cꞌatem, jariꞌ ja rcaꞌmul camíc. In queriꞌ nba̱n chique chakajaꞌ ja ma yukul ta quecꞌuꞌx ruqꞌuin ja Jesucristo in chique ja xa quitzꞌilorsaj ja canma chipan ja ritzelal in chique ja camsanelaꞌ in chique ja banol il mac ja rachiꞌiꞌ cuqꞌuin ixokiꞌ in chique ajꞌitzaꞌ in chique ja nexuqueꞌ chiquewach cachbal tak winak in chwach rachbal tak nakun jeꞌe in chique canojel ja tzꞌakol tak tzij.

Apocalipsis 22:15

Pro ja winak ja xa nquitzꞌilorsaj ja canma chipan ja ritzelal ejeꞌeꞌ matiyaꞌ lugar chique chi xqueꞌoc ta chipan ja tinamit in queriꞌ nba̱n chique chakajaꞌ ja rajꞌitzaꞌ in chique ja banol il mac ja rachiꞌiꞌ cuqꞌuin ixokiꞌ in chique ja camsanelaꞌ in chique ja nexuqueꞌ chiquewach cachbal tak winak in chwach rachbal tak nakun jeꞌe in chique canojel ja nel quecꞌuꞌx chi rbanic ja tzꞌakoj tak tzij.

Apocalipsis 9:21

In chakajaꞌ ja winak ma xqueyaꞌ can ta ja banoj camíc in ma xqueyaꞌ can ta ja banoj tak samaj quixin ajꞌitzaꞌ in ma xqueyaꞌ can ta ja banoj il mac ja rachiꞌiꞌ cuqꞌuin ixokiꞌ in nixtacꞌa banoj alakꞌ ta queyaꞌ can ta chakajaꞌ.