Efesios 5:2 - Tz'utujil (Ja Cꞌacꞌa Chominem)

² In tewajoꞌ ewiꞌ caniꞌ xuban ja Cristo chake como arjaꞌ xokrajoꞌ, xuyaꞌ riꞌ pa camíc kumal. Ja tok cam pa kacuenta ja Cristo jariꞌ jun ofrenda, jun sacrificio chwach ja Dios in xel rucꞌuꞌx ja Dios trij.

Tz'utujil NT

² Twaj-o' ewi' ajni' xuban Cristo chka com arja' xokrajo', xuya' ri' pe cmic kmal. Tak xcoma pkacwent Cristo jara' jun ofrenda, jun sacrificio chwech Dios y nxel ta ruc'u'x Dios tzrij.

Efesios 5:2 Iomraidhean Croise

San Mateo 20:28

Caniꞌ xuban ja Ralcꞌwalaxel ja xoc alaxic cuqꞌuin ja winak, arjaꞌ pi waweꞌ chwachꞌulew pro ma rmal ta chi nilix cumal winak pro jariꞌ peti chi arjaꞌ noc jun ilinel quixin ja winak. In peti chakajaꞌ utzcꞌa chi arjaꞌ nuyaꞌ riꞌ pa camíc in ja rcamic e janila ja winak nerlokꞌbej chipan ja quil quemac. Queriꞌ xbij ja Jesús chique.

San Juan 13:34

Cꞌo jun cꞌacꞌa mandamiento nbij can chewe riꞌ, tewajoꞌ ewiꞌ. Caniꞌ nbanonto anin chewe nij ixnwajoꞌonto wiꞌ queriꞌ cꞌa tebanaꞌ ixix chakajaꞌ ni tewajoꞌ wiꞌ ewiꞌ. Jariꞌ ja cꞌacꞌa mandamiento nyaꞌ can chewe.

San Juan 6:51

Ja way ja nyowi cꞌacꞌa cꞌaslemal, ja way ja kajnakto chilaꞌ chicaj, anin cꞌariꞌ. Jawaꞌ way ja cꞌa xinbij kaj chewe riꞌ, xa nak ta xtitijo rxin jariꞌ ncꞌaseꞌe pro ni chijutij. Cꞌoli way ja xtinyaꞌ chique ja winak waweꞌ chwachꞌulew utzcꞌa chi cꞌo jun cꞌacꞌa cꞌaslemal nyataj chique. Ja way xtinyaꞌ jariꞌ ncuerpo anin. Queriꞌ xbij ja Jesús chique.

Romanos 15:16

Ja Dios ryaꞌon chwe chi nintajini nban ja samaj xin Jesucristo chiquicojol ja winak ja ma e aj Israel ta, ryaꞌon chwe chi nchꞌob chiquewach ja utzlaj tzij xin Dios. Jariꞌ samaj ryaꞌon ja Dios chwe utzcꞌa chi nenujach ja ma e aj Israel ta pa rukꞌaꞌ utzcꞌa chi neꞌoc e caniꞌ jun sacrificio ja nentzujuj chwach ja Dios pro jun sacrificio ja utz ntzꞌa̱t rmal ja Dios, jun sacrificio ja chꞌachꞌojirsan rmal ja rEspíritu Santo.

Romanos 4:25

Ja cꞌa kajaw Jesús arjaꞌ camsaxi rmal kil kamac in cꞌastaji chiquicojol camnakiꞌ utzcꞌa chi nba̱n chake rmal ja Dios caniꞌ mta kil kamac kabanon.

Romanos 8:3

Ja cꞌa ley xin Dios jariꞌ ma xcowin ta xokrutoꞌ ta chipan ja kil kamac. Como xa ok winak chewiꞌ tok ma xcowin ta ja ley xuqꞌuex ta ja ritzel tak naꞌoj kucꞌan. Pro ja Dios arjaꞌ cowini xokrutoꞌ, xutakto ja Ralcꞌwal ja ni xarwariꞌ jun. Peti ja Ralcꞌwal, xoc kach winak ja rok ajꞌil ok ajmaquiꞌ pro xarwariꞌ mta ril rumac arjaꞌ. Rmal kil kamac chewiꞌ tok takto. Queriꞌ cꞌa xuban ja Dios jariꞌ xkajsbej ja poder rxin ja il mac ja cꞌo pa tak kanma ja rok winak.

Romanos 8:37

Pro masqui nba̱n chake nojel awaꞌ ja cꞌa xinbij chewe riꞌ pro nij ajoj wiꞌ nokchꞌocmaji como ja Jesucristo nokrajoꞌ, cam pa kacuenta in nuyaꞌ chake chi nokchꞌocmaji.

1 Corintios 16:14

Ni ta necoj wiꞌ ja rajoben riꞌil xin Dios chi rbanic xa nak ta ja neban jeꞌe.

1 Corintios 5:7

Ma teban chi ta más ja ritzelal ja rebanonto ojer utzcꞌa chi bien kꞌalaj chi cꞌacꞌa chic ja recꞌaslemal, ix caniꞌ juleꞌ kꞌor cꞌacꞌa ja ni majun levadura ruqꞌuin. In ni katzij wiꞌ chi cꞌo jun cꞌacꞌa cꞌaslemal yatajnak chewe rmal ja Cristo pro jun cꞌaslemal ja ni majun itzelal rcꞌan. Queriꞌ nbij chewe como ja Cristo arjaꞌ camsaxi rmal ja kil kamac, ban tre caniꞌ nba̱n chique ja tak carnelo ja neꞌoc sacrificio ja necamsax parwiꞌ altar pa tak nmakꞌij pascua.

2 Corintios 2:14

Pro nmaltioxij tre ja Dios como arjaꞌ ni nokrcꞌaj wiꞌ in nokchꞌocmaji chakajaꞌ pro xa rumac ja xa jun kabanon ruqꞌuin ja Cristo chewiꞌ tok nokchꞌocmaji. Maltiox tre ja Dios chakajaꞌ como arjaꞌ ryaꞌon chake chi nokbe nat nakaj chi nekayaꞌaꞌ rbixic ja Jesucristo chique winak, jariꞌ caniꞌ rxulaꞌ jun akꞌom nekaj cuqꞌuin pro jun akꞌom ja congana quiꞌ rxulaꞌ.

2 Corintios 2:15

Como ajoj tok nkayaꞌ rbixic ja Jesucristo ok caniꞌ jun nakun ja congana quiꞌ rxulaꞌ nunaꞌ ja Dios pro caꞌiꞌ quewach ja winak ja necꞌaxan kaxin. Ecꞌoli ja netajini nquewil ja totajem xin Dios in tok nkayaꞌ rbixic ja Jesucristo chique jariꞌ utzlaj cꞌaslemal rcꞌamonto chique. Pro ecꞌo chic juleꞌ ja netajini nebe chipan ja nimlaj rpokonal in tok nkayaꞌ rbixic ja Jesucristo chique jariꞌ xa camíc rcꞌamonto chique. Jawaꞌ samaj xin Dios ja cꞌa xinbij chewe riꞌ ¿nak ta cꞌa xticowin ariꞌ xtirijkalej ta ja xta ruyon kaj?

2 Corintios 8:9

Como ixix bien ewotak chi ja kajaw Jesucristo congana samaji ja rutzil xin Dios pa ranma. Como arjaꞌ masqui congana biyom nabey pro ma xpokonaj ta xuyaꞌ can ja rbiyomal, ma xpokonaj ta xoc mebaꞌ pro emwal ixix tok xuban queriꞌ. Arjaꞌ xoc mebaꞌ utzcꞌa chi xa rmal ja rpobreꞌil tok nyataj ixix chewe ja biyomal xin Dios.

Gálatas 1:4

Ja Jesucristo arjaꞌ xuyaꞌ riꞌ pa camíc, camsax rmal ja kil kamac. Queriꞌ xuban jariꞌ xokrtobej pa rukꞌaꞌ ja ritzelal ja cꞌo chipan awaꞌ tiempo ja rokcꞌo wiꞌ riꞌ in tok xuban queriꞌ jariꞌ ni rvoluntad wiꞌ ja katataꞌ Dios ja xuban.

Gálatas 2:20

Ja chwe anin, anin jun xincamsax ruqꞌuin ja Cristo chwach ja cruz. Ja cꞌaslemal ja cꞌo chic chwe camic jariꞌ ma anin chi ta ja rincꞌasli, Cristo chic ja cꞌas pa wanma. Ja yukulbal nucꞌuꞌx ruqꞌuin ja Cristo ja Ralcꞌwal Dios jariꞌ cꞌayon chic wxin chipan awaꞌ cꞌaslemal ja cꞌo chic chwe waweꞌ chwachꞌulew. Janila ninrajoꞌ ja Cristo como arjaꞌ ma xpokonaj ta xuyaꞌ riꞌ pa camíc mwal.

Efesios 1:4

Ja tok majaꞌn titzꞌucarsaj ja rwachꞌulew tokoriꞌ xokruchaꞌto como bien rotakpi chic chi nkaban na jun ruqꞌuin ja Jesucristo. Xokruchaꞌto utzcꞌa chi noc na chake ja mero cꞌaslemal xin Dios utzcꞌa chi ni majun nak ta nokchapbexi ja tok nokqꞌuejeꞌ chwach.

Efesios 3:17

Ni ta xtiyukeꞌ wiꞌ ecꞌuꞌx ruqꞌuin ja Cristo in rmaltariꞌ ni ta xtiqꞌuejeꞌ wiꞌ ja Cristo pa tak ewanma. Ja wi queriꞌ neban jariꞌ nixtiqueꞌe chi utz chipan ja rajoben riꞌil xin Dios caniꞌ rbanic jun cheꞌ ja nat benak ja rcꞌamal pa tokꞌulew in caniꞌ rbanic jun jay ja bien tzꞌubul parwiꞌ ja rsimientoꞌil.

Efesios 3:19

Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios.

Efesios 4:15

Pro ja cꞌa nkaban, kas ta katzij nojel ja nkabij pro rachbil ta ja rajoben riꞌil xin Dios tok nkabij. Queriꞌ ta cꞌa nkaban utzcꞌa chi nokqꞌuiyi chi utz in nkaxim más kiꞌ ruqꞌuin ja Cristo como arjaꞌ ocnak wiꞌaj rxin ja cuerpo.

Efesios 4:2

Maxta kas ix nimak tenaꞌ kaj, xa nak ta ja newil chipan ja recꞌaslemal teyaꞌaꞌ pa rukꞌaꞌ ja Dios, tiqꞌuejeꞌe ja repaciencia in tok chaka jalal neban ofender ewiꞌ tecochꞌoꞌ pro ruqꞌuin ta ja rajoben riꞌil.

Efesios 5:15

Tebanaꞌ cꞌa cuenta, kas ta xtichꞌobtaj emwal janiꞌ ja recꞌaslemal, maxta queriꞌ teban ixix ja caniꞌ nqueban ja winak ja ma cotak ta janiꞌ rnaꞌoj ja Dios pro ja neban, tebanaꞌ ja rutzil como ixix ewotak chic janiꞌ rnaꞌoj ja Dios.

Efesios 5:25

Ja cꞌa rixix ja rix achiꞌiꞌ queꞌewajoꞌ ja rewixjayilal caniꞌ xuban ja Cristo chake ja rok iglesia congana xokrajoꞌ in xuyaꞌ riꞌ pa camíc kumal.

Filipenses 4:18

Nojel ja xetakto jariꞌ xurjach pa nukꞌaꞌ rmal ja kachꞌalal Epafrodito rmalariꞌ tok majun nak chi ta rjawaxic chwe camic, in caniꞌ biyom chic nnaꞌ kaj. Ja rayuda xeyaꞌ chwe jariꞌ caniꞌ jun ofrenda xetzujuj tre ja Dios pro jun ofrenda ja congana quiꞌ rxulaꞌ nunaꞌ ja Dios, utz nutzꞌat in kas nel rucꞌuꞌx trij.

Colosenses 3:14

Pro cꞌo jun ja más chi na ncꞌatzini chwach nojelal jariꞌ ja rajoben riꞌil como ja tok newajoꞌ ewiꞌ jariꞌ nuban jun chewe in nojel rwach ja rutzil neban rmal.

1 Tesalonicenses 4:9

Camic wachꞌalal, ja tre ja newajoꞌ ewiꞌ jariꞌ ma rjawaxic chi ta nbij chewe como Dios rkꞌalasan chic chewach nak rbanic chi newajoꞌ ewiꞌ.

1 Timoteo 2:6

Arjaꞌ xujach riꞌ pa quekꞌaꞌ ja winak chi camsaxi jariꞌ xokrlokꞌbej kanojelal ja rok winak. Ja xuban ja Jesús, Dios ni rchominto wiꞌ ja kꞌij rxin in yaꞌon chic rbixic.

1 Timoteo 4:12

Ja winak maxta ma catquinimaj ta xa rmal ja cꞌa at cꞌajol na. Pro ja naban, tacꞌutuꞌ ja rawutzil chiquewach ja kachꞌalal in ja naban quewariꞌ, ni utz wiꞌ nojel ja nabij in nojel ja naban chiquewach ja winak. In chakajaꞌ tiqꞌuejeꞌe ja rajoben riꞌil xin Dios pan acꞌaslemal, ja rEspíritu Santo ni ta arjaꞌ wiꞌ xtucꞌan awxin, ni tiyukeꞌ wiꞌ acꞌuꞌx ruqꞌuin ja Jesucristo in ni ta chꞌajchꞌoj wiꞌ ja rawanma.

Tito 2:14

Kumal ajoj tok xujach riꞌ pa quekꞌaꞌ ja winak chi camsaxi, xokrutoꞌ chipan ja kil kamac utzcꞌa chi arjaꞌ nchꞌachꞌojirsaj ja kacꞌaslemal. Queriꞌ xuban utzcꞌa chi nokoc tinamit rxin utzcꞌa chi nel kacꞌuꞌx trij ja banoj utzil.

Hebreos 8:3

Ja lokꞌlaj tak sacerdote ejeꞌeꞌ cꞌo jun samaj yatajnak chique chiquijujunal quewariꞌ, nquitzujuj chwach ja Dios ja nsipax cumal ja winak in chakajaꞌ nequitzujuj chicop ja necamsaxi parwiꞌ altar. Ja cꞌa Jesucristo como arjaꞌ lokꞌlaj sacerdote rjawaxic chi cꞌoli ntzujuj arjaꞌ chakajaꞌ.

Hebreos 9:14

Pior cꞌa ja rquiqꞌuel ja Cristo jariꞌ más chi na nim rsamaj. Ja Cristo arjaꞌ xtzujuj riꞌ chwach ja Dios, camsaxi, xoc jun sacrificio pro jun sacrificio ja ni majun ja maquita tzꞌakat tre in ja toꞌo rxin chi rbanic ja wariꞌ jariꞌ ja rEspíritu Santo ja ni mta wiꞌ qꞌuisic trij. Ja rquiqꞌuel ja Cristo janila nsamaji, nchꞌachꞌojirsaj chi utz ja kanma chi matitiꞌon chic ja kaconciencia in rmalariꞌ nokcowini nkayaꞌ can ja kabanon jeꞌe ja xa camíc rcꞌamonto in noksamaj chic pa rcuenta ja cꞌaslic Dios.

Hebreos 9:23

Chewiꞌ cꞌa tok rjawaxic chi noqui ja quiquiqꞌuel chicop chi rchꞌachꞌojirsbexic ja nakun jeꞌe ja xa rachbal ja cꞌo jeꞌe chilaꞌ chicaj. Pro ja tre ja mero cꞌo jeꞌe chilaꞌ chicaj ja xa ma rachbal ta rjawaxic jun sacrificio ja más chi na utz chwach ja quiquiqꞌuel chicop.

Hebreos 9:26

Ja wixta queriꞌ jaruꞌ pa tiempo winakarnakto ja rwachꞌulew qꞌuiylaj mul ta cꞌariꞌ camsanto. Pro ja xuban arjaꞌ, xa jutij peti, xtzujuj riꞌ chi camsax pa kacuenta, ja cꞌa rcamic jariꞌ xchupbej ja kil kamac kanojel. Ja tiempo ja pi wiꞌ jariꞌ qꞌuisbal rxin ja tiempo jeꞌe ja rchominto ja Dios ojer.

1 Pedro 4:8

Ja más rjawaxic congana tewajoꞌ ewiꞌ. Ja tok newajoꞌ ewiꞌ qꞌuiy ja nixcowini necuy rmal.

1 Juan 3:16

Ja Jesucristo arjaꞌ xuyaꞌ riꞌ chi camsax pa kacuenta, triꞌ nkotakij wiꞌ janiꞌ ja rajoben riꞌil. Queriꞌ chake ajoj chakajaꞌ yatal chakij chi matikapokonaj nkayaꞌ kiꞌ pa camíc pa quicuenta ja kachꞌalal.

1 Juan 3:23

Ja rmandamiento ja Dios quewaꞌ nbij chake riꞌ, tiyukeꞌ kacꞌuꞌx ruqꞌuin ja Jesucristo ja Ralcꞌwal in tikajoꞌ kiꞌ ja caniꞌ bin can chake rmal.

Apocalipsis 1:5

in xtecochij ta tre chakajaꞌ ja Jesucristo, arjaꞌ ocnak testigo xin Dios in ni katzij wiꞌ ja testigoꞌil nuyaꞌ, arjaꞌ ja Ralcꞌwalaxel nabey winak ja cꞌastaji chiquicojol ja camnakiꞌ, arjaꞌ cꞌo rukꞌaꞌ chique ja rey xin rwachꞌulew chi neruban mandar. Arjaꞌ janila xokrajoꞌ, xuchꞌaj ja kil kamac tre ja rquiqꞌuel

Apocalipsis 5:9

In cꞌo jun cꞌacꞌa bix nquibixaj tre ja Carnelo quewariꞌ: —Atat ni yatal wiꞌ chawe chi nacꞌam ja wuj in nawasaj ja sello rcꞌan. Queriꞌ nkabij chawe como atat xatcamsaxi in ja raquiqꞌuel jariꞌ xokalokꞌbej chi xokoc pa rcuenta ja Dios. Queriꞌ abanon chake xa nak ta tribu ja rokcꞌo wiꞌ, xa nak ta katzobal, xa nak ta katinamit, xa nak ta kanación.