Efesios 4:5 - Tz'utujil (Ja Cꞌacꞌa Chominem)

⁵ Xa jun ja Kajaw, xa jun ja bar yukul wiꞌ kacꞌuꞌx, xa jun ja bautismo

Tz'utujil NT

⁵ Xjun Kajaw, xjun abar ykul wa' kac'u'x, xjun jbautismo.

Efesios 4:5 Iomraidhean Croise

San Mateo 28:19

Rmalcꞌariꞌ nbij chewe, jix cuqꞌuin ja winak ja recꞌo nojel tak nación, queꞌetijoj utzcꞌa chi neꞌoc ndiscípulo, queꞌebanaꞌ bautizar pa rubiꞌ ja Tatixel, ja Ralcꞌwalaxel in ja rEspíritu Santo.

Hechos 10:36

Xutakto ja Jesucristo ja kajaw kanojelal ja rok winak, kuqꞌuin ajoj xutakto wiꞌ ja rok aj Israel chi xuryaꞌaꞌ rbixic ja utzlaj tzij chake ja rcꞌamonto quicotemal.

Hechos 2:36

Rmalcꞌariꞌ tok nbij chewe, ja Jesús arjaꞌ rip chwa cruz como ixix xixcꞌutuni ja camíc trij pro jariꞌ mismo Jesús cojon chic rmal ja Dios como Rajaw nojelal, cojon chic rmal como Cristo. Bien tewotakij ja cꞌa xinbij chewe riꞌ in bien ticotakij chakajaꞌ ja kach tak aj Israel pro ni canojelal. Queriꞌ xbij ja Pedro chique.

Romanos 3:30

Quixin como xa jun ja Dios in ja Dios arjaꞌ utz nerutzꞌat na ja raj Israel ja wi xtiyukeꞌ quecꞌuꞌx ruqꞌuin ja Jesucristo in xa rumac ja yukulbal quecꞌuꞌx tok nerwasajel na libre in nuban chique caniꞌ mta quil quemac quibanon. Ja cꞌa ma e aj Israel ta utz nerutzꞌat na chakajaꞌ ja wi xtiyukeꞌ quecꞌuꞌx ruqꞌuin ja Jesucristo in xa rumac ja yukulbal quecꞌuꞌx tok nerwasajel na libre in nuban chique caniꞌ mta quil quemac quibanon.

1 Corintios 1:13

Queriꞌ takaꞌan ja rbixic xurkaj wqꞌuin pro ¿la e oxiꞌ quijiꞌ laꞌan ja Cristo nechꞌob ixix? ¿La anin on xinri̱p chwach cruz pan ecuenta chewiꞌ? ¿La pa nubiꞌ laꞌan anin ixbanon bautizar chewiꞌ? Jariꞌ ma queriꞌ ta wachꞌalal.

1 Corintios 1:2

in nkatakel ewqꞌuin wachꞌalal ja rix iglesia ja rixcꞌo chipan ja tinamit Corinto. Ja Dios arjaꞌ ixrpartiꞌin chi neban ja rsamaj pro xa rmal ja xa jun ebanon ruqꞌuin ja Cristo Jesús ja tok rbanon queriꞌ chewe. Arjaꞌ ixrchaꞌon chi ixocnak ix tinamit rxin in ma eyon ta ixix ja rbanon queriꞌ chewe, queriꞌ rbanon chique chakajaꞌ canojel ja winak ja nquinataj rubiꞌ ja kajaw Jesucristo xa nak ta chi tinamital ecꞌo wiꞌ. Ja Jesucristo arjaꞌ cajaw ejeꞌeꞌ in kajaw ajoj chakajaꞌ.

1 Corintios 12:13

Queriꞌ nbij chewe como xa jun mismo Espíritu Santo xokbanbex bautizar kanojelal, xa jun cuerpo ban chake chi ok aj Israel chi ma ok aj Israel ta, chi ok esclavo chi ok libre, xa jun mismo Espíritu Santo ja xoc pa tak kanma chi nimlaj kanojelal.

1 Corintios 12:5

In qꞌuiy rwach chakajaꞌ ja samaj xin Dios pro xa jun mismo kajaw Jesucristo ja ncojo kaxin chi rbanic ja samaj.

1 Corintios 8:6

Pro ja cꞌa rajoj bien kotak chi xa jun ja Dios, arjaꞌ Tatixel, ruqꞌuin arjaꞌ winakarnakto wiꞌ nojelal ja winakarsanto jeꞌe, arjaꞌ winakarsyon kaxin utzcꞌa chi nokoc ok yaꞌbal rukꞌij. In bien kotak chakajaꞌ chi xa jun ja kajaw jariꞌ Jesucristo, arjaꞌ cojon rmal ja Dios chi rwinakarsaxic nojelal ja winakarsanto jeꞌe in rmal arjaꞌ tok cꞌo jun cꞌacꞌa cꞌaslemal yatajnak chic chake.

2 Corintios 11:4

Queriꞌ nbij chewe como ixix chaka quiꞌ chewe ja tok ecꞌoli winak neꞌekaj ewqꞌuin, nqueyaꞌ rbixic jun Jesús chewe ja junwiꞌ chi na chwach ja kayaꞌ rbixic ajoj chewe. In jun chic, chaka quiꞌ chewe wi noc jun chic espíritu chewe ja junwiꞌ chi na chwach ja rEspíritu Santo ja xoc chewe nabey. In jun chic, chaka quiꞌ chewe chakajaꞌ wi nenimaj jun chic tijonem ja utzlaj tzij xin Jesucristo neꞌxi, pro xa junwiꞌ chi na chwach ja xenimaj nabey.

Gálatas 5:6

Ja tok xa jun naban ruqꞌuin ja Cristo Jesús jariꞌ macatrutoꞌ ja natban circuncidar in macatrutoꞌ chakajaꞌ ja macatban circuncidar. Pro ja ntoꞌo awxin jariꞌ tok nyukeꞌ acꞌuꞌx ruqꞌuin ja Jesucristo, tok nsamaji ja yukulbal acꞌuꞌx chi rwinakarsaxic ja rajoben riꞌil xin Dios pan acꞌaslemal.

Efesios 4:13

Queriꞌ rbanic in nerilaꞌ na jun kꞌij ja tok mta ariꞌ ja maquita jun nkaban rmal ja yukulbal kacꞌuꞌx ruqꞌuin ja Ralcꞌwal Dios in rmal ja bien nkotakij na ja kas mero rnaꞌoj. Queriꞌ cꞌa xtikaban, congana xtitzꞌakat na chi utz ja kanaꞌoj, xtinoj na pa tak kanma ajoj nojelal ja nojnak pa ranma ja Cristo.

Filipenses 2:11

Queriꞌ rbanon ja Dios utzcꞌa chi canojelal ja winak quewaꞌ xtiquibij riꞌ: —Ja Jesucristo arjaꞌ Rajaw nojelal. Queriꞌ xtiquibij na tre xa nak ta chi tzobalil netzijon wiꞌ. Ja tok queriꞌ nqueban jariꞌ noc yaꞌbal rukꞌij ja Dios ja Tatixel.

Filipenses 3:8

In ma ruyon tariꞌ, queriꞌ nbanon tre nojelal como jariꞌ ma vale ta chwach ja xinwotakij rwach ja wajaw Cristo Jesús. Ja tok xinwotakij rwach ja Cristo jariꞌ más na vale chwach nojelal. Rmal ja Cristo chewiꞌ tok nyaꞌon can nojelal in ja chwe anin nojel ja nyaꞌon can jariꞌ xa caniꞌ juleꞌ kꞌayis ja nel pa mes. Anin nyaꞌon can nojelal utzcꞌa chi nqꞌuejeꞌe ja Cristo pa wanma pro ni chijutij.

Tito 1:1

Anin in Pablo ntzꞌibajel chawe ja carta riꞌ Tito. Anin in ajsamajel rxin ja Dios in chakajaꞌ in apóstol rxin ja Jesucristo. Arjaꞌ xinrutak cuqꞌuin ja rechaꞌon rmal ja Dios chi quitoꞌic utzcꞌa chi nyukeꞌ más quecꞌuꞌx ruqꞌuin utzcꞌa chakajaꞌ chi ncotakij ja utzlaj tijonem xin Jesucristo ja natrucꞌaj chipan jun utzlaj cꞌaslemal ja caniꞌ nrajoꞌ ja Dios.

Tito 1:4

Ja cꞌa ratat Tito xa junan yukul wiꞌ kacꞌuꞌx awqꞌuin ruqꞌuin ja Jesucristo, at ncꞌajol chwach ja Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja Jesucristo ja Toꞌonel kaxin. Ejeꞌeꞌ ta xtiquipokonaj awach.

Hebreos 13:7

Quenataj emwal ja kachꞌalal ja xeꞌucꞌan ewxin, ejeꞌeꞌ quechꞌob chewach ja rtzobal Dios. Techꞌoboꞌ chi utz janiꞌ ja quicꞌaslemal tok xeqꞌuejeꞌ waweꞌ chwachꞌulew in caniꞌ queban congana yukeꞌ quecꞌuꞌx ruqꞌuin ja Dios ni ta quirwariꞌ neban ixix chakajaꞌ.

Hebreos 6:6

Ja cꞌa wi nqueyaꞌ can jariꞌ kas kꞌalawachili nquemaj chic jutij ripic ja Ralcꞌwal Dios chwach cruz in nqueyaꞌ ruqꞌuix chiquewach ja winak chakajaꞌ chewiꞌ tok matiyataj chic chique ja xtiquinimaj chi ta jutij.

Santiago 2:18

Pro maxla cꞌo jun nbij chi junwiꞌ ja yukulbal kacꞌuꞌx ruqꞌuin ja Dios in junwiꞌ chi na ja rutzil jeꞌe ja nkaban. Pro anin nbij tre chi ma katzij ta ja yukulbal rucꞌuꞌx ruqꞌuin ja Dios ja wi mta ja rutzil nuban ja ncꞌutbej chi ni katzij wiꞌ chi cꞌoli ja yukulbal rucꞌuꞌx. Ja wi katzij chi cꞌo yukulbal nucꞌuꞌx ruqꞌuin ja Dios ma chaka ta cꞌoli pro nsamaji, ja cꞌa rutzil ja nban jeꞌe jariꞌ ncꞌutuwi chi cꞌoli.

1 Pedro 3:21

In queriꞌ cꞌa chake ajoj camic chakajaꞌ como pa yaꞌ nokban wiꞌ bautizar in noktotaji. Ja bautismo ma acuerpo ta nuchꞌaj pro ja rubey tok natban bautizar jariꞌ nacꞌutbej jun chꞌajchꞌojlaj anma tre ja Dios. Queriꞌ nkaban noktotaji in xa rmal ja rcꞌastajic ja Jesucristo chewiꞌ tok noktotaji.

2 Pedro 1:1

Anin in Simón Pedro, in ajsamajel rxin ja Jesucristo in chakajaꞌ in apóstol rxin. Anin ntzꞌibaj ja carta riꞌ in ntakel ewqꞌuin ixix ja rewilon chic ja lokꞌlaj yukulbal ecꞌuꞌx ruqꞌuin ja Jesucristo. Ja yukulbal ecꞌuꞌx ruqꞌuin ja Jesús nim rukꞌij, junan ruqꞌuin ja caniꞌ kawilon ajoj. Ja Jesucristo arjaꞌ Dios, arjaꞌ Toꞌonel kaxin in rmal ja rutzil rcꞌamonto tok nokcꞌuli rmal ja Dios in rmalariꞌ tok ewilon chic ja yukulbal ecꞌuꞌx ruqꞌuin.

Judas 1:20

Pro ja cꞌa chewe ixix chakꞌlaj wachꞌalal, ja ta neban nixqꞌuiyi in nixtiqueꞌe chi utz chipan ja tijonem xin Jesucristo, jariꞌ tijonem mero ruqꞌuin Dios penak wiꞌ. In jun chic, xta jun neban ruqꞌuin ja rEspíritu Santo chi rbanic ja roración.

Judas 1:3

Chakꞌlaj wachꞌalal, como anin congana ngana nchꞌob más chewach nak rbanic ja totajem xin Dios ja kacochin tre ewqꞌuin jariꞌ punto laj xinyaꞌ chipan jun carta nabey. Pro ja camic cꞌo chic jun punto ja más chi na rjawaxic chi nyaꞌ chipan ja carta como ja camic congana rjawaxic chi nixnuban animar chi congana ta neban cuenta ja tijonem xin Jesucristo ja kaniman ewqꞌuin utzcꞌa chi matiqꞌuextaji. Jariꞌ tijonem ja yatajnak chake ja rok tinamit xin Dios in ni mta wiꞌ qꞌuextajic trij.