Efesios 4:10 - Tz'utujil (Ja Cꞌacꞌa Chominem)

¹⁰ Queriꞌ rbanic como ja Cristo ja xurkaj kaj waweꞌ chwachꞌulew arjaꞌ mismo ja joteꞌ chic chilaꞌ chicaj pro más chi na chicaj xekaj nojoj wiꞌ, ni majun bar ta triꞌ ja maquita xekaj nojoj wiꞌ.

Tz'utujil NT

¹⁰ Cara' rbanic com Cristo xerkaja wawe' chwech ruch'lew y ja' mism xojte'a chcaj, per nmás chna chcaj xekaj wa', nmajo'n abar tzra' jche mquita xekaj wa'.

Efesios 4:10 Iomraidhean Croise

San Mateo 24:34

Ni katzij wiꞌ ja xtinbij chewe riꞌ, ja tinamit Israel ejeꞌeꞌ cꞌa ecꞌo na ja tok nbantaj cumplir nojel awaꞌ wariꞌ, ma chupnak ta quewach.

San Lucas 24:44

Cꞌacꞌariꞌ xbij chique: —Camic bantaj cumplir ja tzij ja xinbij chewe tokoriꞌ tok majaꞌn quincami como ja xinbij chewe chi puersa nbantaj na cumplir nojel ja tzꞌibtal can chwe chipan ja rtzobal Dios caniꞌ tre ja tzꞌibtal can rmal ja Moisés in cumal ja juleꞌ chic profeta xin Dios in chakajaꞌ ja tzꞌibtal can chwe chipan ja libro xin salmo, neꞌ chique.

San Juan 1:16

Ja Ralcꞌwalaxel janila nojnak ja rutzil xin Dios pa ranma in jariꞌ utzil ocnak chic chake ajoj in xa janiꞌ npi más npi más pa tak kanma in xa sipan chake.

San Juan 19:24

Rmalcꞌariꞌ ja soldado quewaꞌ quibij chibil tak quiꞌ riꞌ: —Mejor matikarak ja wariꞌ, kabanaꞌ suerte trij nak xtikajben chake, xecheꞌe. Queriꞌ queban in triꞌ bantaj wiꞌ cumplir ja tzꞌibtal can ojer chipan ja rtzobal Dios, quewaꞌ nbij riꞌ: —Quejach ja ntziak chiquewach in cꞌo jun ja ntziak queban suerte trij, queriꞌ ja tzꞌibtal can in ni queriꞌ queban ja soldado.

San Juan 19:28

Ja Jesús arjaꞌ rotak chi tzurnak chic rmal nojelal ja samaj ja yatajnak tre chi nurbanaꞌ cꞌacꞌariꞌ xbij: —Chakichiꞌ nnaꞌ, neꞌe. Ja tok xbij awaꞌ tzij riꞌ triꞌ bantaj wiꞌ cumplir ja tzꞌibtal can ojer chipan ja rtzobal Dios.

San Juan 19:36

Queriꞌ bantaji como ni rjawaxic wiꞌ chi bantaj cumplir ja tzꞌibtal can tre ja Cristo chipan ja rtzobal Dios ojer como quewaꞌ nbij riꞌ: —Ni majun rbakil xtikꞌip ta, neꞌe.

Hechos 1:11

Ja cꞌa rachiꞌiꞌ quibij chique ja rapóstol: —Achiꞌiꞌ ja rix aj Galilea ¿nak tre ja tok nixcaꞌy chicaj? Ja Jesús arjaꞌ joteꞌ chewach chilaꞌ chicaj pro nmelojpi chi na jutij. Ja caniꞌ xetzꞌat tok joteꞌ chicaj ni cꞌa queriꞌ nuban chic ja tok xtimelojto chic jutij, xecheꞌ chique.

Hechos 1:9

Ja cꞌa tok tzuri tzij rmal cꞌacꞌariꞌ joteꞌ chicaj pro ni chiquewach in wawax chiquewach rmal juleꞌ sutzꞌ.

Hechos 2:33

Cꞌacꞌariꞌ jotbax chilaꞌ chicaj rmal ja Dios in yataj tre rmal ja Tatixel chi xutakto ja rEspíritu Santo waweꞌ chwachꞌulew ja caniꞌ tzujun tre ojer. Ja cꞌa rixix, ja remajon rtzꞌatic camic in ja remajon rcꞌaxaxic jariꞌ Espíritu Santo banowi.

Hechos 3:18

Pro ja xeban jariꞌ ni rchominto wiꞌ ja Dios in queriꞌ bantaji ja caniꞌ rbin can ojer chipan ja rtzobal. Como canojel ja profeta xin Dios ejeꞌeꞌ quitzꞌiban can ojer chi ja Cristo nutij na ja rpokonal.

2 Corintios 12:2

Anin cꞌo jun achi wotak rwach, arjaꞌ xa jun quibanon ruqꞌuin ja Cristo. Ja cꞌa rachi arjaꞌ tuban catorce junaꞌ ja cꞌoli xuban, chaka jalal tok cꞌamarel chilaꞌ chicaj in cꞌa chi rox caj xekaj wiꞌ. Ja wi ni rachbil rcuerpo tok cꞌamarel owi ma rachbil ta jariꞌ ma wotak ta, solo Dios otakyon.

Efesios 3:19

Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios.

Colosenses 1:19

Queriꞌ rbanic como nojelal ja nojnak pa ranma ja katataꞌ Dios jariꞌ nojnak pa ranma ja Ralcꞌwal Dios chakajaꞌ como queriꞌ rvoluntad ja Dios.

Colosenses 2:9

Maxta quixban engañar como xa ruqꞌuin Cristo nkatzꞌat wiꞌ nak ja kas mero rbanic ja Dios como arjaꞌ ocnak kach winak in nojel ja cꞌo pa ranma ja Dios ni majun ja maquita cꞌo pa ranma ja Cristo chakajaꞌ.

1 Timoteo 3:16

Ni katzij wiꞌ chi congana nim rukꞌij ja rkꞌalasan chikawach ja Dios tre nojel ja rcꞌamonto ja Jesucristo. Quewaꞌ ja rkꞌalasan chikawach riꞌ. Ja Dios qꞌuejeꞌ waweꞌ chwachꞌulew, xoc kach winak. Kꞌalasax rmal ja rEspíritu Santo chi ni katzij wiꞌ nojel ja xbij tok qꞌuejeꞌ waweꞌ. In tzꞌat cumal ja ángel. Yaꞌ rbixic chique ja winak pa tak nación jeꞌe. In ecꞌoli chique ja winak nojel rwachꞌulew quinimaj. In joteꞌ pa gloria chilaꞌ chicaj. Queriꞌ ja rkꞌalasan chikawach ja Dios.

Hebreos 4:14

Wachꞌalal, ja Jesús ja Ralcꞌwal Dios como arjaꞌ ocnak jun lokꞌlaj sacerdote kaxin ja ncojo kaxin chwach ja Dios in como arjaꞌ chijutij ekajnak triꞌ ja bar cꞌo wiꞌ ja Dios rmalcꞌariꞌ nbij jutzꞌit rubiꞌ chewe, cow kopeꞌi jutzꞌit, maxta tikayaꞌ can ja utzlaj tzij ja kaniman.

Hebreos 7:26

Queriꞌ cꞌa rbanic ja Jesús, nij arjaꞌ wiꞌ ja lokꞌlaj sacerdote ja ncꞌatzin chake. Arjaꞌ ni utz wiꞌ ntzꞌa̱t rmal ja Dios. Majun nak ta itzel rbanon ta. Ni majun ril rumac. Lasaxel chiquicojol ja rajꞌil ajmaquiꞌ, cꞌamarel chilaꞌ chicaj ja bar cꞌo wiꞌ ja Dios.

Hebreos 8:1

Queriꞌ cꞌa rbanic ja lokꞌlaj sacerdote kaxin, jariꞌ ja más na rjawaxic chi nchꞌobtaj emwal. Arjaꞌ cꞌa chilaꞌ chicaj xekaj wiꞌ, triꞌ xetzꞌabeꞌ wiꞌ pa riquikꞌaꞌ ja bar tzꞌubul wiꞌ ja Dios.