Efesios 3:8 - Tz'utujil (Ja Cꞌacꞌa Chominem)

⁸ Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Tz'utujil NT

⁸ Chwa anen yatanak wa' jawra samaj mesque xe mnim ta nuk'ij quenna' kaja chquewech jle' chic kch'alal je rtnamet Dios, chwa anen yatanak wa' chquenba ewq'uin jme ix aj Israel ta che cney-a' rbixic chewa njelal je nkawil ruq'uin Cristo, jara' jun nimlaj mibil nkawil per jun mibil ncongan nim, mesquier ncatecwina nawilaj.

Efesios 3:8 Iomraidhean Croise

San Lucas 14:22

Queriꞌ cꞌa xuban ja moso ja caniꞌ bixel tre. Ja cꞌa tok melojto chic quewaꞌ xbij tre ja rpatrón riꞌ: —Taꞌ, xenbanaꞌ ja caniꞌ xabij chwe pro ja tzꞌulbal cꞌa cꞌo na ja mta rajaw, neꞌ tre.

San Juan 1:16

Ja Ralcꞌwalaxel janila nojnak ja rutzil xin Dios pa ranma in jariꞌ utzil ocnak chic chake ajoj in xa janiꞌ npi más npi más pa tak kanma in xa sipan chake.

Hechos 5:41

Xebe ja rapóstol, congana nequicoti como yataj chique chi quetij pokon pa rubiꞌ ja Jesucristo.

Hechos 9:15

—Jat ruqꞌuin como arjaꞌ ocnak jun ajsamajel ja nchaꞌon chi neryaꞌaꞌ nbixic anin chique ja winak ja ma e aj Israel ta e cachbil ja rey ja nebano mandar quixin in chique ja tinamit Israel chakajaꞌ.

Romanos 11:33

Janila nim ja rchominto jeꞌe ja Dios, congana ja rutzil ryaꞌon chake, congana xucoj rnaꞌoj, ni majun ja maquita rotak. Ni majun nak ta cowinnak ta rkꞌiꞌon ta nojel ja rnaꞌoj, ni majun nak ta cowinnak ta rchꞌobon ta nojel ja nuban jeꞌe.

Romanos 12:10

Caniꞌ nuban jun winak lokꞌ nerunaꞌ ja rchꞌalal queriꞌ ta cꞌa neban ixix chakajaꞌ kas lokꞌ tenaꞌaꞌ ewiꞌ chibil tak ewiꞌ in tebanaꞌ respetar ewiꞌ chibil tak ewiꞌ chakajaꞌ.

Romanos 2:4

Owi maxla xa ni mta nqueban tre nojel ja rbanon pa quicuenta ja Dios como arjaꞌ janila ja rutzil ryaꞌon chique, janila rcuyun ja ryewal chiquij, janila ja rpaciencia cuqꞌuin. ¿La ma cotak ta cꞌa chi ja Dios tok nuyaꞌ ja rutzil chique ma chaka ta nuyaꞌ chique pro rumac chi nqueqꞌuex ja quinaꞌoj, rumac chi nqueyaꞌ can ja ritzelal?

1 Corintios 1:30

Dios cꞌa yoyon chewe nojelal. Arjaꞌ yoyon chewe jun cꞌacꞌa cꞌaslemal pro xa rmal ja Cristo Jesús chewiꞌ tok ryaꞌon chewe. Arjaꞌ takoto rxin ja Cristo chi katoꞌic in xa rmal ja Cristo ja tok yatajnak chake ja naꞌoj xin Dios in xa rmal ja Cristo chakajaꞌ tok Dios nokrucꞌul in nuban chake caniꞌ mta kil kamac in xa rmal ja Cristo chakajaꞌ tok kꞌij kꞌij noc más chꞌajchꞌoj ja kanma in xa rmal ja Cristo chakajaꞌ tok ma ok preso chi ta pa rukꞌaꞌ ja il mac in noketotaj na chijutij.

1 Corintios 15:9

Ja cꞌa ranin kas in lawuloꞌ chiquewach ja juleꞌ chic apóstol, ja nnaꞌ kaj anin ma yatal ta chwe chi inocnak apóstol. In lawuloꞌ como congana pokon xinban chique ja riglesia ja rtinamit Dios.

1 Corintios 2:9

Pro ja cꞌa queban, queriꞌ ja caniꞌ tzꞌibtal can chipan ja rtzobal Dios, quewaꞌ nbij riꞌ: —Ja Dios cꞌoli ja rchominto ja nuyaꞌ na chique ja winak ja neꞌajoꞌn rxin pro jariꞌ ni majun winak rtzꞌaton ta ruqꞌuin ta rwach in nixtacꞌa rcꞌaxan ta ruqꞌuin ta rxquin in nixtacꞌa chꞌobtajnak ta rmal pa ranma chakajaꞌ, neꞌe.

Gálatas 2:8

Bien chꞌobtaj cumal como ejeꞌeꞌ bien kꞌalaj chic chiquewach chi congana samaji ja Dios ja tok xinyaꞌ rbixic ja utzlaj tzij chique ja ma e aj Israel ta. Caniꞌ tre ja Pedro congana samaji ja Dios tok xuyaꞌ rbixic chique ja raj Israel ni cꞌa queriꞌ xuban anin chwe chakajaꞌ.

Efesios 2:7

Queriꞌ cꞌa xuban chake utzcꞌa ja winak ja majaꞌn queqꞌuejeꞌ chipan awaꞌ tiempo ja rokcꞌo wiꞌ riꞌ ejeꞌeꞌ tok xqueqꞌuejeꞌ na chwachꞌulew jariꞌ bien nchꞌobtaj cumal ja rutzil ja xuban chake, bien nchꞌobtaj cumal chi ja Dios congana jun nimlaj utzil nsipaj chawe ja tok xa jun naban ruqꞌuin ja Cristo Jesús.

Efesios 3:1

Rmalcꞌariꞌ tok anin nmajon rbanic orar pan ecuenta. Anin ja rin Pablo incojon preso camic rumac ja samaj xin Cristo Jesús ja xinban pan ecuenta ja ma ix aj Israel ta.

Efesios 3:16

Ja Tatixel janila jun nimlaj gloria cꞌo ruqꞌuin, arjaꞌ ta xtiyoꞌ chewe ja rpoder, xtuyaꞌ ta chewe chi ja rEspíritu Santo ncowirsaj chi utz ja cꞌacꞌa cꞌaslemal ewcꞌan pa tak ewanma.

Efesios 3:19

Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios.

Efesios 3:2

Turkaj chewe chi ecꞌwaxan chic chi anin yaꞌon chi nukul chi nenyaꞌaꞌ rbixic chewe nak rbanic ja rutzil xin Dios ja nsipaj ja Dios chake.

Filipenses 2:3

Maxta cꞌo chꞌaꞌoj teban, maxta teyaꞌ kaj ekꞌij eyon pro ja neban, tebanaꞌ taknoꞌy ewanojelal. Quirtawaꞌ xtechꞌob kaj pa tak ewanma riꞌ: —Ja wachbil ejeꞌeꞌ ja más na e utz canojelal chinwach anin, xquixcheꞌ kaj ta chejujunal.

Filipenses 4:19

Ja nataꞌ Dios arjaꞌ nuyaꞌ na chewe ixix chakajaꞌ xa nak ta ja ncꞌatzin chewe como más kꞌaxnak chi na ja rmebaꞌil ja nuyaꞌ chawe tok xa jun abanon ruqꞌuin ja Cristo Jesús.

Colosenses 1:27

como ja Dios arjaꞌ rchꞌobon chic chiquewach ja rtinamit chi cꞌo chic ja Cristo pa tak ewanma ja ma ix aj Israel ta in rmalariꞌ ewotak chic chi nixeqꞌuejeꞌ na pa gloria ruqꞌuin ja Dios. Jawaꞌ ja cꞌa xinbij chewe riꞌ xa awatali nabey pro ja Dios rkꞌalasan chic chikawach camic utzcꞌa chi triꞌ nkatzꞌat wiꞌ chi janila nim ja gloria xin Dios ja nsamaji checojol ixix ja ma ix aj Israel ta.

1 Timoteo 1:13

Queriꞌ xuban chwe masqui anin nabey xa itzel xintzijon tre, xinban pokon chique ja xeniman rxin in xintzꞌuj. Pro ja Dios arjaꞌ xpokonaj nwach como anin ma wotak ta ja xinban como jariꞌ tiempo ma nniman ta ja Jesucristo.

1 Timoteo 1:15

Ja Cristo Jesús arjaꞌ pi waweꞌ chwachꞌulew chi katoꞌic ja rok ajꞌil ja rok ajmaquiꞌ. Jariꞌ tzij ni katzij wiꞌ in yatal chique canojelal ja winak chi nquinimaj. In anin más na nim ja wil numac chiquewach canojelal.

1 Timoteo 2:7

In rmalariꞌ tok xinchaꞌi chi xinoc apóstol rxin ja Jesucristo chi nyaꞌ rbixic. In yataj chwe chi xinbe cuqꞌuin ja ma e aj Israel ta chi quitijoxic. Jariꞌ ni katzij wiꞌ, ja Jesucristo arjaꞌ rotak chi ni katzij wiꞌ, ma npayil ta. Ja tijonem ja xinyaꞌ chique jariꞌ nak rbanic chi nyukeꞌ quecꞌuꞌx ruqꞌuin ja Jesucristo in nak rbanic ja utzlaj tzij ja rcꞌamonto.

2 Timoteo 1:11

In rmal ja utzlaj tzij xin Jesucristo chewiꞌ tok xinchaꞌi chi xinoc apóstol rxin chi nyaꞌ rbixic in yataj chwe chi xinbe cuqꞌuin ja winak ja ma e aj Israel ta in jariꞌ utzlaj tzij xentijoj tre.

Apocalipsis 3:18

Rmalcꞌariꞌ tok cꞌo jun consejo nyaꞌ chewe riꞌ, mejor telokꞌoꞌ chwe ja puro oro ja kꞌaxnak pa kꞌakꞌ utzcꞌa chi nixoqui ix biyomaꞌ ja ni katzij wiꞌ chi ix biyomaꞌ. In telokꞌoꞌ chwe ja tziak sak ja necoj chewij utzcꞌa chi ma ixchꞌanal chi ta nixtzꞌati in ma qꞌuixbal ta nenaꞌ. In telokꞌoꞌ chwe chakajaꞌ ja rakꞌom ja neyaꞌ pan ewach utzcꞌa chi njaktaji ja rewach.