Efesios 3:7 - Tz'utujil (Ja Cꞌacꞌa Chominem)

⁷ Jawaꞌ utzlaj tzij riꞌ jawaꞌ yaꞌon chi nukul chi nyaꞌ rbixic, jawaꞌ jun samaj xincochij tre ja Dios, ni majun nak ta xinchꞌecbej ta in janila samaji ja Dios pa ncꞌaslemal chi rbanic jawaꞌ samaj riꞌ.

Tz'utujil NT

⁷ Jawra utzlaj tzij ja c'a wa' y-on chnukul chquenya' rbixic, jawra jun samaj jxencochij tzra Dios, nmajo'n nak ta xench'ecbej y ajni'la xesmaja Dios chpam nc'aslemal che rbanic jawra samaj.

Efesios 3:7 Iomraidhean Croise

Hechos 9:15

—Jat ruqꞌuin como arjaꞌ ocnak jun ajsamajel ja nchaꞌon chi neryaꞌaꞌ nbixic anin chique ja winak ja ma e aj Israel ta e cachbil ja rey ja nebano mandar quixin in chique ja tinamit Israel chakajaꞌ.

Romanos 1:5

Rmal cꞌa arjaꞌ tok kacochin tre ja Dios ja rutzil ja nsipaj chake in rmal arjaꞌ chakajaꞌ tok yatajnak ajoj chake chi okocnak apóstol rxin. Ma chaka ta queriꞌ tok banon queriꞌ chake, rumac chi nokbe cuqꞌuin ja tinamit ja recꞌo nojel nat nakaj chwach ja rwachꞌulew chi nekayaꞌaꞌ rbixic ja Jesucristo chique utzcꞌa chi nyukeꞌ quecꞌuꞌx ruqꞌuin in nquinimaj ja rtzobal. Nojel ariꞌ nkaban, yaꞌbal rukꞌij arjaꞌ ja nkaban.

Romanos 12:3

Como ja Dios ryaꞌon chwe chi inocnak apóstol rxin ja Jesucristo chewiꞌ tok cꞌo jun paxbanem nyaꞌ chewe riꞌ chejujunal. Maxta congana ix nimak tenaꞌ kaj pro kas techꞌoboꞌ chi utz nak ja kas mero ebanic chejujunal. Bien techꞌoboꞌ chi Dios yoyon chewe ja yukulbal ecꞌuꞌx in xa chewiꞌ tok nixcowini neban ja samaj xin Dios.

Romanos 15:16

Ja Dios ryaꞌon chwe chi nintajini nban ja samaj xin Jesucristo chiquicojol ja winak ja ma e aj Israel ta, ryaꞌon chwe chi nchꞌob chiquewach ja utzlaj tzij xin Dios. Jariꞌ samaj ryaꞌon ja Dios chwe utzcꞌa chi nenujach ja ma e aj Israel ta pa rukꞌaꞌ utzcꞌa chi neꞌoc e caniꞌ jun sacrificio ja nentzujuj chwach ja Dios pro jun sacrificio ja utz ntzꞌa̱t rmal ja Dios, jun sacrificio ja chꞌachꞌojirsan rmal ja rEspíritu Santo.

1 Corintios 15:10

Pro ja Dios arjaꞌ xsipaj ja rutzil chwe in xa rmal ja rutzil xin Dios tok inocnak apóstol camic. In ma chaka ta queriꞌ xincochij ja rutzil tre pro congana samaji pa ncꞌaslemal. Más chi na samaj xin Dios xinban chiquewach ja juleꞌ chic pro ma anin ta xinsamaji nuyon, ja rutzil ja xincochij tre ja Dios jariꞌ ja samaji pa ncꞌaslemal.

1 Corintios 3:5

¿Nak cꞌa ocnak wiꞌ ja rApolos nechꞌob ixix in nak cꞌa inocnak wiꞌ anin chakajaꞌ? Ajoj xa ok moso rxin ja kajaw Jesucristo. Ja cꞌa tok yukeꞌ ecꞌuꞌx ruqꞌuin ja Jesucristo kumal jariꞌ Dios banowi, ma ajoj ta. Ajoj xa rbanic kaban ja samaj ja xuyaꞌ chake ja Dios chi ok caꞌiꞌ.

2 Corintios 3:6

Como ja Dios arjaꞌ ryaꞌon chake chi nokcowini nekatijoj winak tre ja cꞌacꞌa chominem xin Dios, jun chominem ja nnataj chake ja rEspíritu Santo, ma ja ta nnataj chake jun ley xin Dios ja chaka tzꞌibtali. Queriꞌ cꞌa rbanic como ja ley xin Dios ja chaka tzꞌibtali jariꞌ xa nucꞌut chikawach chi nokcam rmal ja kil kamac pro ja rEspíritu Santo jariꞌ nuyaꞌ jun cꞌacꞌa cꞌaslemal chake.

2 Corintios 4:1

Rmalcꞌariꞌ nbij chewe, jawaꞌ samaj ja kamajon rbanic riꞌ, como jun cochinem xin Dios chewiꞌ tok ni maticapuj wiꞌ kacꞌuꞌx chi rbanic.

Gálatas 2:8

Bien chꞌobtaj cumal como ejeꞌeꞌ bien kꞌalaj chic chiquewach chi congana samaji ja Dios ja tok xinyaꞌ rbixic ja utzlaj tzij chique ja ma e aj Israel ta. Caniꞌ tre ja Pedro congana samaji ja Dios tok xuyaꞌ rbixic chique ja raj Israel ni cꞌa queriꞌ xuban anin chwe chakajaꞌ.

Efesios 1:19

Kas ta xtichꞌobtaj emwal chakajaꞌ nak rbanic ja poder xin Dios ja nsamaji pa tak kacꞌaslemal ja yukul kacꞌuꞌx ruqꞌuin ja Jesucristo, pro jun poder ja más kꞌaxnak chi na como jariꞌ poder ja samaji

Efesios 3:2

Turkaj chewe chi ecꞌwaxan chic chi anin yaꞌon chi nukul chi nenyaꞌaꞌ rbixic chewe nak rbanic ja rutzil xin Dios ja nsipaj ja Dios chake.

Efesios 3:20

Ja cꞌa camic kas ta xtiyaꞌ rukꞌij ja Dios, arjaꞌ jun Dios janila nim ja poder cꞌo pa rukꞌaꞌ, jun poder ja ntajini nsamaji pa tak kacꞌaslemal camic. In rmal ja poder ja cꞌo pa rukꞌaꞌ mta nak ta ja maquita ncowini nuban. Xa nak ta nkacꞌutuj tre ncowini nuyaꞌ más chake chwach ja nkacꞌutuj tre. Xa nak ta nkachꞌob ja congana cꞌayew chi rbanic pro arjaꞌ ncowini nuban ja más na cꞌayew chwach ja nkachꞌob ajoj.

Efesios 3:8

Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Efesios 4:16

Arjaꞌ nqꞌuiyirsan kaxin ja rok cuerpo rxin, pro jun cuerpo ja bien banon rbanic, xa jun rbanon, rximon riꞌ chibil tak riꞌ in nutoꞌ riꞌ chibil tak riꞌ chakajaꞌ. Ja jujun miembro rxin ja cuerpo tok nuban ja samaj ja yatajnak tre chi nuban jariꞌ nqꞌuiyi chi utz ja cuerpo rmal, kas nrajoꞌ riꞌ chibil tak riꞌ.

Colosenses 1:29

Rmalcꞌariꞌ tok nmajon jun nimlaj lucha, congana ntij nukꞌij pro ja nyoꞌ wachokꞌakꞌ jariꞌ Jesucristo como arjaꞌ congana nsamaji pa ncꞌaslemal chi rbanic jawaꞌ samaj ja nmajon rbanic riꞌ.

1 Tesalonicenses 2:13

Ajoj ni nkamaltioxij wiꞌ tre ja Dios como ixix tok kabij ja rtzobal Dios chewe bien xeyaꞌ ewxquin tre, xenimaj chi rxin Dios in ma quixin winak ta. Dios nucoj ja rtzobal in camic nsamaji ja rtzobal pa tak ewanma ja yukul ecꞌuꞌx ruqꞌuin ja Jesucristo.

Hebreos 13:21

Dios ta cꞌa xtiyoꞌ chewe chi nnoji nojel rwach ja rutzil pa tak ewanma utzcꞌa chi nixcowini neban ja rvoluntad, xtuyaꞌ ta chewe chi nsamaji ja Jesucristo pa tak ewanma chi rwinakarsaxic jeꞌe nak ja nel rucꞌuꞌx trij. Ni ta xtiyaꞌ wiꞌ rukꞌij camic, chwak in chijutij. Amén.