Efesios 3:1 - Tz'utujil (Ja Cꞌacꞌa Chominem)

¹ Rmalcꞌariꞌ tok anin nmajon rbanic orar pan ecuenta. Anin ja rin Pablo incojon preso camic rumac ja samaj xin Cristo Jesús ja xinban pan ecuenta ja ma ix aj Israel ta.

Tz'utujil NT

¹ Rmal c'ara' tak anen nemjon rbanic oración pnecwent. Anen en Pablo encsan pcars camic rmal samaj rxin Cristo Jesús jxenban pnecwent ixix jme ix aj Israel ta.

Efesios 3:1 Iomraidhean Croise

San Lucas 21:12

Pro ja tok majaꞌn tibantaj cumplir nojel awaꞌ ja cꞌa xinbij chewe riꞌ cꞌo jeꞌe rpokonal netij na pa quekꞌaꞌ ja winak. Nixquechap na, nixquecꞌamel pa tak jay xin molbal riꞌil, nixquecoj pa tak cheꞌ, nixquecꞌamel chiquewach rey, nixquecꞌamel chiquewach gobernador pro mwal anin tok xtiban queriꞌ chewe.

Hechos 21:33

Cꞌacꞌariꞌ be ja coronel ruqꞌuin ja Pablo, xucoj preso in xuyaꞌ orden chi nba̱cꞌ tre caꞌiꞌ cadena. Ja cꞌa tok bacꞌtaj rmal quewaꞌ xbij chique ja winak riꞌ: —¿Nak chi achiꞌal cꞌawaꞌ wariꞌ? ¿Nak ril xuban? neꞌ chique.

Hechos 23:18

In queriꞌ xuban ja capitán, xucꞌamel ja ralaꞌ ruqꞌuin ja coronel. Ja tok xekaj ruqꞌuin quewaꞌ xbij tre riꞌ: —Ja Pablo ja kacojon pa cheꞌ arjaꞌ xinrsiqꞌuij in xbij chwe chi nunyaꞌaꞌ awaꞌ jun alaꞌ riꞌ awqꞌuin como arjaꞌ cꞌo jun rtakquil nurbij chawe, neꞌ tre.

Hechos 26:29

Ja cꞌa Pablo quewaꞌ xbij riꞌ: —Ja wi xa jurata owi cꞌamalo pro ja kas nwajoꞌ chawe atat in chewe ixix chakajaꞌ ewanojel ja nixtajini necꞌwaxaj ja nmajon rbixic chewe camic, triꞌ ta nyukeꞌ wiꞌ ecꞌuꞌx ja bar yukul wiꞌ nucꞌuꞌx anin pro xarwariꞌ mta ngana xquixoc ta preso ja caniꞌ nbanon anin camic riꞌ, neꞌe.

Hechos 9:15

—Jat ruqꞌuin como arjaꞌ ocnak jun ajsamajel ja nchaꞌon chi neryaꞌaꞌ nbixic anin chique ja winak ja ma e aj Israel ta e cachbil ja rey ja nebano mandar quixin in chique ja tinamit Israel chakajaꞌ.

2 Corintios 1:6

Ajoj tok nkatij rpokonal jariꞌ cꞌoli rcꞌamonto chewe como nokcowini nkayukbaꞌ más ecꞌuꞌx in nixtotaj más rmal ja Dios. Ja cꞌa tok Dios nyukbaꞌ kacꞌuꞌx ajoj jariꞌ nokcowini nkayukbaꞌ chic ecꞌuꞌx ixix in nixtotaj más rmal ja Dios. Jawaꞌ ja cꞌa xinbij chewe riꞌ congana nixrutoꞌ chi rcochꞌic nojel ja rpokonal ja caniꞌ nokkꞌax ajoj chipan.

2 Corintios 10:1

Camic nwajoꞌ nintzijon ewqꞌuin chique ja winak ja xa netajini nquilasaj ntzijoxic, quewaꞌ nquibij chwe riꞌ: —Ja Pablo tok cꞌoli chikacojol congana nuban tinoꞌy pro ja cꞌa tok mchita chikacojol cꞌa tokoriꞌ nucoj cowlaj tak tzij chakij, necheꞌe. Pro anin ja rin Pablo congana nban recomendar chewe, kas tinataj jutzꞌit emwal ja rejemplo ja xuyaꞌ can ja Cristo como arjaꞌ xuban tinoꞌy, nojel xujach pa rukꞌaꞌ ja Dios in congana rpaciencia cuqꞌuin ja winak.

2 Corintios 11:23

Ejeꞌeꞌ kas nqueyaꞌ quekꞌij chi e ajsamajelaꞌ rxin ja Cristo pro anin más chi na in ajsamajel chiquewach ejeꞌeꞌ rxin ja Cristo. Pro ja nintajini nbij chewe camic riꞌ caniꞌ xa ma in chꞌobol ta. Anin más chi na samaj xin Cristo nbanon, qꞌuiylaj mul inrapan rmal ja rtzobal Dios, qꞌuiylaj mul inqꞌuejenak pa cheꞌ in qꞌuiylaj mul jutzꞌit laj xincamsaxi.

Gálatas 5:11

Wachꞌalal, ecꞌoli ja nebin chwe chi anin cꞌa nmajon na rbixic chique winak chi rjawaxic chi neba̱n circuncidar. Ja wi queriꞌ nbij chique winak ¿nak cꞌa tre tok cꞌa cꞌo na pokon nba̱n chwe cumal ja wach tak aj Israel? Ja wixta nbij chique winak chi neba̱n circuncidar maquita cꞌa npi quiyewal ariꞌ ja wach tak aj Israel ja tok nnataj chique ja rcamic ja Jesucristo chwach cruz.

Gálatas 5:2

Teyaꞌaꞌ ewxquin tre ja xtinbij chewe riꞌ, ja wi xquixban circuncidar in wi nyukeꞌ chic ecꞌuꞌx ruqꞌuin ja circuncisión jariꞌ majun nak ta rcꞌamonpi ta ja Cristo chewe.

Gálatas 5:24

In kanojel ja rok xin Jesucristo kayaꞌon can ja tzabuklaj cꞌaslemal ja kucꞌan nabey rachbil nojelal ja ritzelal ja kayarij jariꞌ caniꞌ karipon chic chwach cruz.

Efesios 3:11

Ja Dios ni rchominto wiꞌ ojer chi nuban jawaꞌ ja nmajon rbixic chewe riꞌ, jawaꞌ ni rchominto wiꞌ ja tok majaꞌn titzꞌucarsaj ja rwachꞌulew. Ja cꞌa tok xutakto ja kajaw Jesucristo waweꞌ chwachꞌulew tokoriꞌ xurbantaj cumplir ja rchominto ojer.

Efesios 3:13

Rmal cꞌa nojel awaꞌ ja nmajon rbixic chewe riꞌ chewiꞌ tok nbij chewe, masqui anin incꞌo chipan ja rpokonal emwal camic pro maxta ticapuj ecꞌuꞌx rmal como ja rpokonal ja nmajon rtijic pan ecuenta jariꞌ gloria xin Dios rcꞌamonto chewe.

Efesios 3:8

Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Efesios 4:1

Rmal cꞌa nojel awaꞌ ja nmajon rbixic chewe riꞌ congana nban recomendar chewe chi newcꞌaj jun utzlaj cꞌaslemal. Anin ja rincojon preso camic rmal ja samaj rxin ja kajaw Jesucristo congana nban recomendar chewe chi newcꞌaj jun cꞌaslemal ja bien nucꞌam riꞌ ruqꞌuin ja utzlaj cꞌaslemal ja nrajoꞌ ja Dios chewe chi newcꞌaj ja tok xixrsiqꞌuij.

Efesios 6:20

Rmal ja utzlaj tzij xin Jesucristo chewiꞌ tok inocnak jun ajsamajel rxin ja Jesucristo pro jun ajsamajel ja bacꞌon pa cadena como incojon pa cheꞌ camic. Tebanaꞌ orar pa ncuenta utzcꞌa chi ni matinxbej wiꞌ wiꞌ chi nyaꞌ más rbixic ja utzlaj tzij como nijawariꞌ ja yatal chwe chi nban.

Filipenses 1:7

Ni rubey wiꞌ chi queriꞌ nchꞌob chewij ewanojel wachꞌalal como ixix ixcꞌo pa wanma. Como ixix wachꞌalal ecꞌamon ewiꞌ wqꞌuin chi rbanic ja samaj ja yaꞌon chwe rmal ja Dios chi nban. Ja tok ninqꞌuejeꞌ pa cheꞌ ninetoꞌ in chakajaꞌ tok ecꞌoli winak ja nechꞌaꞌo rxin ja utzlaj tzij xin Jesucristo ninetoꞌ chi rchꞌaꞌic chique ja nquibij, ninetoꞌ chi rkꞌalasaxic chiquewach chi jariꞌ utzlaj tzij ruqꞌuin ja Dios penak wiꞌ.

Colosenses 1:24

Ja cꞌa camic incꞌo chipan ja rpokonal chi etoꞌic pro ninquicot rmal. Como anin in rachbil ja Cristo chi rtijic ja rpokonal ja majaꞌn tikꞌax trij como cꞌa ntiꞌon na tre ja Cristo nojel ja nba̱n chake ja rok cuerpo rxin ja rok iglesia.

Colosenses 4:18

In camic anin ja rin Pablo ntakel rutzil ewach pro jariꞌ anin nintzꞌibanel ruqꞌuin nukꞌaꞌ. Maxta temestaj chi anin inbacꞌon pa cadena waweꞌ pa cheꞌ. Ja rutzil xin Dios xtiqꞌuejeꞌ ta ewqꞌuin. Amén.

Colosenses 4:3

In tebanaꞌ orar pa kacuenta ajoj chakajaꞌ, tecꞌutuj tre ja Dios chi arjaꞌ nujak jun bey chikawach utzcꞌa chi nkayaꞌ más rbixic ja rtzobal. Ajoj nkajoꞌ nkayaꞌ más rbixic ja kꞌalasan chic tre ja Cristo ja ma kꞌalasan ta nabey. Rmalariꞌ tok incꞌol anin pa cheꞌ camic.

2 Timoteo 1:16

Pro ja Onesíforo arjaꞌ ma queriꞌ ta xuban chwe chewiꞌ tok nwajoꞌ chi ja kajaw Dios xtipokonan ta quewach ja rfamilia. Ja Onesíforo qꞌuiylaj mul xyukbaꞌ nucꞌuꞌx in ma qꞌuixbal ta xunaꞌ mwal chi inocnak preso.

2 Timoteo 1:8

Rmalariꞌ nbij chawe, maxta qꞌuixbal tanaꞌ ja nayaꞌ rbixic ja Jesucristo. Ja camic in preso rmal ja rtzobal Dios, maxta qꞌuixbal tanaꞌ mwal anin chakajaꞌ. Ma tapokonaj ta cꞌa ja npi jeꞌe chawij rmal ja ramajon rbixic ja utzlaj tzij xin Jesucristo pro ja rawachokꞌakꞌ ja yatajnak chawe rmal ja Dios xa ruqꞌuin ariꞌ nacochꞌ nojelal.

Filemón 1:1

Anin in Pablo, inocnak preso pa cheꞌ pro rmal ja Jesucristo tok queriꞌ nbanon. Filemón, anin wachbil ja kachꞌalal Timoteo nkatzꞌibaj awaꞌ carta riꞌ in camic ntakel awqꞌuin. Atat at kachbil chipan ja samaj xin Jesucristo in congana natkajoꞌ.

Filemón 1:23

Ja kachꞌalal Epafras nutakel rutzil ewach, arjaꞌ wachbil waweꞌ pa cheꞌ pro rumac ja xa jun rbanon ruqꞌuin ja Cristo Jesús tok cꞌo pa cheꞌ.

Apocalipsis 2:10

Ma texbej ta ewiꞌ chwach ja rpokonal ja nixkꞌax na chipan. Bien tecꞌwaxaj ja xtinbij chewe riꞌ, ecꞌoli chewe ja diablo arjaꞌ nerucoj na pa cheꞌ jariꞌ nixrtakchibej chi neyaꞌ can ja yukulbal ecꞌuꞌx ruqꞌuin ja Dios in lajuj kꞌij nixqꞌuejeꞌ na chipan ja rpokonal. Ni ta yukul wiꞌ ecꞌuꞌx ruqꞌuin ja Dios chijutij, ni ta quirwariꞌ ebanon ja tok xquixcami. Ja wi queriꞌ neban cꞌo jun corona ja nyataj chewe jariꞌ ja utzlaj cꞌaslemal ja mta qꞌuisic trij.