Efesios 2:2 - Tz'utujil (Ja Cꞌacꞌa Chominem)

² Ja il mac ni chipan wiꞌ ixcꞌo wiꞌ nabey, xeban ja ritzelal ja caniꞌ nqueban ja winak ja xa ruqꞌuin rwachꞌulew yukul wiꞌ quecꞌuꞌx. Xa rvoluntad ja diablo xeban, jariꞌ diablo ja jefe quixin ja ritzel tak espíritu ja neqꞌuejeꞌ chicaj chipan ja aire. Jariꞌ itzel tak espíritu ja nesamaj pa tak canma ja winak ja maquenimani camic.

Tz'utujil NT

² J-il mac ne chpam wa' ixc'o wa' nabey, xeban rtzilal ajni' nqueban wnak je xruq'uin jawra tiemp rxin rwech ruch'lew ykul wa' quec'u'x. Je nrajo' diablo xjara' xeban, jara' diablo jefe cxin itzel tak espíritu jmajo'n nquekatz'et ta ruq'uin kk'awech. Jara' itzel tak espíritu je nquesmaja ptak canm wnak jmajo'n nqueniman ta camic.

Efesios 2:2 Iomraidhean Croise

San Mateo 11:19

In xinpi chic anin ja rin Alcꞌwalaxel ja xinoc alaxic cuqꞌuin ja winak, xinwaꞌ cuqꞌuin ja winak in cꞌoli vino xintij in rmalariꞌ bix chwe cumal ja winak chi xa in mun in xa in tijol vino in xa e wamigo ja molol tak impuesto e cachbil ja juleꞌ chic ajmaquiꞌ. Pro ja cꞌa ralcꞌwal Dios ejeꞌeꞌ bien chꞌobtajnak cumal chi ja Juan Bautista rnaꞌoj Dios ja nucoj in queriꞌ chwe anin rnaꞌoj Dios ncoj chakajaꞌ. Queriꞌ xbij chique ja winak.

San Mateo 13:22

Ja cꞌa rijaꞌtz ja kaj pa tak qꞌuix jariꞌ tibij tzij ja winak ja nquicꞌaxaj ja utzlaj tzij pro tok nqꞌuiswani xa jaꞌ nquibisoj chic ja xin rwachꞌulew in xa neba̱n engañar rmal ja mebaꞌil. Rmalcꞌariꞌ tok xa ncami ja utzlaj tzij ja cꞌo pa tak canma, mta rwach nuyaꞌ.

San Mateo 13:38

Ja chenoj jariꞌ ja rwachꞌulew. Ja utzlaj ijaꞌtz jariꞌ ja recꞌo pa rcuenta ja gobierno xin chilaꞌ chicaj. Ja ritzel tijcoꞌm jariꞌ ja recꞌo pa rcuenta ja diablo.

Marcos 4:19

pro tok nqꞌuiswani xa jaꞌ nquibisoj chic ja xin rwachꞌulew in xa neba̱n engañar rmal ja mebaꞌil in chaka benak chi nquiyarij nakun jeꞌe. Rmalcꞌariꞌ tok xa ncami ja utzlaj tzij ja cꞌo pa tak canma, mta rwach nuyaꞌ.

San Lucas 16:8

Ja cꞌa patrón tok xuyaꞌ cuenta tre ja rajsamajel ja ma utz ta xuban quewaꞌ xbij riꞌ: —Ja rajsamajel leꞌ congana listo ja xuban chwe, congana rnaꞌoj. Queriꞌ xbij ja patrón in cꞌo razón ja tok xbij queriꞌ como ja winak ja xa ruqꞌuin ja rwachꞌulew yukul wiꞌ quecꞌuꞌx ejeꞌeꞌ congana e listo tre ja banoj negocio cuqꞌuin ja cach banol tak negocio. Más chi na e listo chiquewach ja ralcꞌwal Dios ja sakirsan chic quebey.

San Lucas 22:31

Cꞌacꞌariꞌ xumaj tzij ja kajaw Jesucristo ruqꞌuin ja Simón Pedro, quewaꞌ xbij tre riꞌ: —Simón, bien tacꞌwaxaj ja xtinbij chawe riꞌ, ja Satanás arjaꞌ ixrcꞌutun tre ja Dios in yaꞌ lugar tre chi nixqꞌuejeꞌ na jurata pa rukꞌaꞌ in nixrkajsaj na chipan jun nimlaj prueba.

San Juan 12:31

Camic xurwilaꞌ ja tiempo chi nkꞌalajini nak rbanic ja ritzelal ja cꞌo pa tak canma ja winak waweꞌ chwachꞌulew, xurwilaꞌ ja tiempo chi nkajsax rchokꞌakꞌ ja Satanás ja nbano mandar waweꞌ chwachꞌulew in nbatataxel.

San Juan 13:2

Arjaꞌ rmajon waꞌim cuqꞌuin ja rdiscípulo. Ja cꞌa diablo arjaꞌ rbanon chic ja samaj pa ranma ja Judas Iscariote ja rcꞌajol Simón, rtakchiꞌin chic chi nujach ja Jesús pa quekꞌaꞌ ja winak ja netzelan rxin.

San Juan 13:27

Ja cꞌa Judas arjaꞌ tok cꞌamtaj rmal ja caxlanway cꞌacꞌariꞌ xoqui ja Satanás pa ranma in bix tre rmal ja Jesús: —Ja ramajon rchꞌobic chi naban jat, tabanaꞌ chanim, neꞌxi.

San Juan 14:30

Xa jurata chic incꞌo checojol chi noktzijon ewqꞌuin. Queriꞌ nbij chewe como ja Satanás ja nbano mandar waweꞌ chwachꞌulew arjaꞌ xajalal majaꞌn turkaji chi ninurchapaꞌ pro arjaꞌ mta rukꞌaꞌ chwe, majun nak ta ninrchapbej.

San Juan 15:19

Ja wixta ix cachbil ja winak ja xa ruqꞌuin rwachꞌulew yukul wiꞌ quecꞌuꞌx jariꞌ lokꞌ ta nixquenaꞌ ariꞌ. Pro jariꞌ ma ix cachbil ta como anin xixnuchaꞌ chiquicojol in xixnpartiꞌij rmalcꞌariꞌ tok itzel nixquetzꞌat.

San Juan 7:7

Como ja chewe ixix, ja winak mta moda itzel ta xquixquetzꞌat pro ma queriꞌ ta chwe anin, xa itzel ninquetzꞌat rmal ja nmajon rkꞌalasaxic chiquewach ja ritzelal nqueban.

San Juan 8:23

Ja cꞌa Jesús xbij chic jutij chique: —Ixix xa ix xin waweꞌ, ja cꞌa ranin in xin chilaꞌ chicaj, xa ix xin rwachꞌulew pro ja chwe anin ma in queriꞌ ta.

San Juan 8:44

Ixix ix ralcꞌwal ja diablo in nak cꞌo rgana ja diablo chi nuban nijawariꞌ cꞌol egana ixix neban chakajaꞌ. Ja diablo arjaꞌ ni camsanel wiꞌ ja tok winakarto ja rwachꞌulew. Nojelal ja nbij ja Dios xa rcꞌulel ja diablo como ja diablo arjaꞌ ni majutij ja katzij ta nbij. Ja tok nutzꞌak tzij ja diablo jariꞌ ni rxin wiꞌ como arjaꞌ ni tzꞌakol tzij wiꞌ, arjaꞌ kas nwinakarsani ja tzꞌakoj tak tzij.

Hechos 19:35

Peti ja secretario xin tinamit in tok qꞌuiswani cowini xerukꞌil ja winak cꞌacꞌariꞌ xbij chique: —Achiꞌiꞌ ja rix aj Efeso, canojel ja winak xa nak ta chi winakil bien cotak chi ixix ja rix aj Efeso yatajnak chewe chi ixix nixchajin rxin ja templo ja bar nya̱ꞌ wiꞌ rukꞌij ja lokꞌlaj Diana, bien cotak chakajaꞌ chi ixix nixchajin rxin ja rachbal Diana ja kajnakto chicaj.

Hechos 5:3

Ja cꞌa tok jachtaj rmal quewaꞌ bix tre rmal ja Pedro riꞌ: —Ananías, cꞌo jalal rjil ja rulew qꞌuejeꞌ can awqꞌuin. ¿Nak tre ja tok xaban queriꞌ? ¿Nak tre ja tok xayaꞌ lugar tre ja Satanás chi xoc pan awanma in xatrtakchiꞌij chi xatzꞌak tzij chwach ja rEspíritu Santo?

Romanos 12:2

Maxta tewcꞌaj ixix jun cꞌaslemal ja caniꞌ quicꞌaslemal winak ja xa ruqꞌuin rwachꞌulew yukul wiꞌ quecꞌuꞌx. Pro ja neban, kꞌij kꞌij teyaꞌaꞌ lugar tre ja Dios chi arjaꞌ nuqꞌuex ja renaꞌoj, teyaꞌaꞌ lugar tre chi nucoj cꞌacꞌa tak naꞌoj chewe. Queriꞌ ta xteban jutzꞌit utzcꞌa chi newotakij janiꞌ rvoluntad ja Dios utzcꞌa chi newotakij nak ja utz ntzꞌa̱t rmal ja Dios utzcꞌa chi newotakij chakajaꞌ chi ja rvoluntad ja Dios jariꞌ ni utz wiꞌ in majun nak ta falta tre.

1 Corintios 5:10

Pro tok xinbij queriꞌ chewe ma ja ta xinbij chewe chi maqueꞌekꞌijlaꞌ ja rebanol itzelal ja ma e kachꞌalal ta. Como ja waweꞌ chipan ja rwachꞌulew riꞌ ni newil wiꞌ ewiꞌ cuqꞌuin winak ja ma quiniman ta ja Jesucristo ja nqueban ja il mac owi cuqꞌuin winak ja chaka benak chi yarin quinakun winak neꞌoclaꞌ wiꞌ il owi cuqꞌuin ja ralakꞌomaꞌ owi cuqꞌuin ja nexuqueꞌ chwach rachbal jun winak owi chwach rachbal jun nakun. Ja wi newajoꞌ owi mani puersa newil ewiꞌ cuqꞌuin. Ja cꞌa wi mta egana newil ewiꞌ cuqꞌuin rjawaxic cꞌariꞌ chi nixel ta chipan awaꞌ rwachꞌulew riꞌ.

1 Corintios 6:11

In ecꞌoli chewe ja re quitakariꞌ nabey ja caniꞌ cꞌa xinbij kaj. Pro ja camic chꞌachꞌojirsan chic ja rewanma, camic ixpartiꞌin chic chi neban ja samaj xin Dios in camic ixcꞌulun chic rmal ja Dios, arjaꞌ rbanon chic chewe caniꞌ mta ewil emac ebanon. Pro xa rmal ja xa jun ebanon ruqꞌuin ja kajaw Jesucristo chewiꞌ tok banon queriꞌ chewe in rmal chakajaꞌ ja samaji pa tak ewanma ja rEspíritu Santo ja takonto rmal ja katataꞌ Dios.

2 Corintios 4:4

Matichꞌobtaj cumal como ja diablo ja rcojon riꞌ como dios waweꞌ chwachꞌulew arjaꞌ rmoyirsan ja quewiꞌ canma. Queriꞌ nuban ja diablo chique ja winak ja matiyukeꞌ quecꞌuꞌx ruqꞌuin ja Jesucristo utzcꞌa ja luz xin Dios matekaji pa tak canma. Jariꞌ luz jariꞌ ja utzlaj tzij xin Dios ja ncꞌutuwi chi janila nim rukꞌij ja Cristo. Ja cꞌa Cristo arjaꞌ ni junan quinaꞌoj ruqꞌuin ja Dios.

Gálatas 1:4

Ja Jesucristo arjaꞌ xuyaꞌ riꞌ pa camíc, camsax rmal ja kil kamac. Queriꞌ xuban jariꞌ xokrtobej pa rukꞌaꞌ ja ritzelal ja cꞌo chipan awaꞌ tiempo ja rokcꞌo wiꞌ riꞌ in tok xuban queriꞌ jariꞌ ni rvoluntad wiꞌ ja katataꞌ Dios ja xuban.

Efesios 1:21

Queriꞌ xuban ja Dios tre ja Cristo, xuyaꞌ tre chi noc pa rukꞌaꞌ ja kꞌetbaltzij pro ni majun kꞌetbaltzij ja maquita xoc pa rukꞌaꞌ, in xuyaꞌ tre chi más na nim rukꞌij arjaꞌ chiquewach canojelal ja kꞌetol tak tzij in ma queyon ta ja kꞌetol tak tzij ja re rxin awaꞌ tiempo riꞌ in queriꞌ chique ja re rxin chic jun tiempo ja majaꞌn tekawilaꞌ chakajaꞌ.

Efesios 2:11

Rmalcꞌariꞌ nbij chewe, kas turkaj chewe chi ja nabey ma ix tinamit ta xin Dios. Ixix ma ix aj Israel ta, ma ixbanon ta circuncidar, xa xixban despreciar cumal ja raj Israel: —Ja rixix xa ma ixbanon ta circuncidar, xecheꞌ chewe. Pro ja circuncisión ja cꞌo chique ja raj Israel jariꞌ jun circuncisión ja xa winak ebanyon.

Efesios 2:13

Pro ja cꞌa camic xa jun chic ebanon ruqꞌuin ja Cristo Jesús in masqui ja nabey cꞌa cꞌa nat ixcꞌo wiꞌ tre ja Dios pro ja camic xa nakaj chic ixcꞌo wiꞌ tre pro xa rmal ja rquiqꞌuel ja Cristo tok yatajnak queriꞌ chewe.

Efesios 2:3

In queriꞌ kabanto ajoj nabey chakajaꞌ, xa kavoluntad ajoj kaban kaj kayon, xa nak ta xuyaꞌ gana chake chi nkaban jariꞌ kaban. Kayaꞌ rgana ja ncꞌutuj ja kacuerpo, kanimaj ja ritzel tak naꞌoj kucꞌan in ni kaxin wiꞌ chi ok yicol ryewal ja Dios, nij ok junan cuqꞌuin ja juleꞌ chic winak triꞌ.

Efesios 4:17

Ja cꞌa xtinbij chic chewe riꞌ congana nban recomendar chewe pa rubiꞌ ja kajaw Jesucristo, maxta tewcꞌaj chic jun cꞌaslemal ja caniꞌ quicꞌaslemal ja juleꞌ chic winak ja ma e aj Israel ta como ja quinaꞌoj ejeꞌeꞌ mta noc wiꞌ.

Efesios 4:22

Pro quewaꞌ ja tijonem ja chꞌob chewach riꞌ, chi rjawaxic chi nechꞌakij can ja tzabuklaj cꞌaslemal ja rewcꞌan nabey, jun cꞌaslemal ja xa chuwirnak como xeyaꞌ ewiꞌ chi rbanic chaka nojel ta xeyarij ja xa engaño rcꞌamonto.

Efesios 5:6

Maxta quixban engañar cumal juleꞌ winak ja nquibij chi mta nuban chawe wi queriꞌ naban ja caniꞌ nqueban ja winak ja re quitakariꞌ caniꞌ cꞌa xinbij kaj chewe. Queriꞌ nbij chewe como xa rmal ja juleꞌ itzelal ja cꞌa xinbij kaj chewe riꞌ chewiꞌ tok npi ryewal ja Dios chiquij ja winak ja ni maqueniman wiꞌ.

Efesios 5:8

Como ja recꞌaslemal ixix ma queriꞌ chi ta ja caniꞌ nabey como ja nabey solo kꞌekumal ixcꞌayon pro ja camic luz xin Dios ixcꞌayon pro xa rmal ja xa jun ebanon ruqꞌuin ja kajaw Jesucristo chewiꞌ tok queriꞌ chic ebanon. Tebanaꞌ cꞌa ja bien nucꞌam riꞌ ruqꞌuin ja luz xin Dios como ix ralcꞌwal chic ja Dios ja sakirsyon ebey chewach.

Efesios 6:12

Queriꞌ nbij chewe como ja kas mero kacꞌulel ja kamajon chꞌaꞌoj cuqꞌuin ma ejeꞌeꞌ tariꞌ ja kach tak winak. Pro ja kas mero kacꞌulel ejeꞌeꞌ riꞌ canojelal ja ritzel tak ángel, juleꞌ itzel ángel ja nebano mandar waweꞌ chwachꞌulew pa tak quewiꞌ pa tak canma ja winak ja xa kꞌekumal ecꞌayon, juleꞌ itzel tak espíritu ja neqꞌuejeꞌ chicaj chipan ja aire.

Colosenses 1:21

Caniꞌ chewe ixix nabey nat ixcꞌo wiꞌ tre ja Dios, ni majun egana ruqꞌuin ja nbij ja Dios pa tak ewiꞌ pa tak ewanma, xa itzelal ja xeban. Pro ja camic ixtzurnak chic ruqꞌuin ja Dios, quewaꞌ xuban ja Dios chi echomarsaxic riꞌ,

2 Timoteo 4:10

como ja Demas arjaꞌ be chipan ja tinamit Tesalónica, xinruyaꞌ can xa rmal ja congana nel rucꞌuꞌx trij ja quicotemal xin rwachꞌulew. Ja Crescente jariꞌ xintak pa tak tinamit ja cꞌo pa rcuenta Galacia in xintak ja Tito chakajaꞌ pa tak tinamit ja cꞌo pa rcuenta Dalmacia.

Santiago 1:27

Ja religión ja kas utz ntzꞌa̱t rmal ja katataꞌ Dios in nucꞌut chi katzij chi animan ja Dios quewaꞌ rbanic riꞌ, jun, natbe cuqꞌuin acꞌalaꞌ ja ma ecꞌo chi ta ja quitataꞌ queteꞌ in cuqꞌuin chakajaꞌ ja rixokiꞌ ja malcaniꞌ ja recamnak chic ja quichajilal in neꞌatoꞌoꞌ nak cꞌo rjawaxic chique. In jun chic, naban cuenta awiꞌ chwach ja ritzelal ja nqueban ja winak ja xa ruqꞌuin ja rwachꞌulew yukul wiꞌ quecꞌuꞌx, naban cuenta awiꞌ utzcꞌa chi matitzꞌilori ja rawanma rmal ja ritzelal.

Santiago 1:7

Ja winak ja queriꞌ nqueban maxta tiquechꞌob kaj chi cꞌoli nyataj chique ja netajini nquicꞌutuj tre ja kajaw Dios.

Santiago 4:4

Xa más na yukul ecꞌuꞌx ruqꞌuin ja ntzujuj ja rwachꞌulew chwach ja nyukeꞌ ecꞌuꞌx ruqꞌuin ja Dios. ¿La ma ewotak ta cꞌa nak rcꞌamonto ja tok yukul ecꞌuꞌx ruqꞌuin ja ntzujuj ja rwachꞌulew? Ja tok queriꞌ neban jariꞌ xa necꞌullaꞌaj ja Dios. Ja winak ja ncajoꞌ nyukeꞌ quecꞌuꞌx ruqꞌuin ja rwachꞌulew xa nak ta chi winakil ejeꞌeꞌ neꞌoc rcꞌulel ja Dios.

1 Pedro 1:14

Como ix alcꞌwalaxelaꞌ rxin ja Dios tenimaj ja nbix chewe rmal chi neban. Maxta teban chic ja ma utz ta jeꞌe ja xel ecꞌuꞌx trij caniꞌ xebanto ja tok majaꞌn tichꞌobtaj emwal ja utzlaj tzij xin Jesucristo.

1 Pedro 4:3

Ja winak ja ma cotak ta rwach ja Dios ejeꞌeꞌ qꞌuiy rwach ja ritzelal nel quecꞌuꞌx trij in queriꞌ xebanto ixix chakajaꞌ. Congana qꞌuixbal xebanto in tok xeban nimak tak waꞌim xixchꞌujar rmal ja tijoj yaꞌ, xerak echiꞌ, xeban sícꞌ chꞌaꞌoj in chakajaꞌ más na lawuloꞌ xeban xixxuqueꞌ chiquewach cachbal tak winak in chwach rachbal tak nakun. Pro jariꞌ matel chic ecꞌuꞌx trij camic, itzel chic netzꞌat.

2 Pedro 2:14

Mta ariꞌ ja maquita nquiyarij rwach jun ixok, maquecos chi rbanic ja ritzelal. Ja winak ja ma cowirnak ta quewiꞌ canma chipan ja rtzobal Dios nequisiqꞌuij chipan ja ritzelal. Kas ntzuri nbantaj cumal chi rqꞌuiyirsaxic ja quimebaꞌil. Queriꞌ quibanic, ejeꞌeꞌ xa etzelan chic rmal ja Dios.

1 Juan 3:10

Waweꞌ nkatzꞌat wiꞌ echinatak ja ralcꞌwal Dios in echinatak ja ralcꞌwal diablo, ja wi ma utz ta ja nqueban in wi maquecajoꞌ ja cachꞌalal ma e ralcꞌwal Dios ta cꞌariꞌ.

1 Juan 3:8

Pro ja winak ja chaka nemacuni ejeꞌeꞌ riꞌ e ralcꞌwal diablo caniꞌ tre ja diablo arjaꞌ nij ajꞌil nij ajmac wiꞌ ja tok tzꞌucarsaxto ja rwachꞌulew. Ja cꞌa Ralcꞌwal Dios peti waweꞌ chwachꞌulew chi ryojic ja samaj ja nuban ja diablo.

1 Juan 4:4

Chakꞌlaj walcꞌwal, ixix ixcꞌo pa rcuenta ja Dios. Ja maestro ja ma Dios ta ecꞌayon ejeꞌeꞌ ma xecowin ta chewij, ixix xixchꞌeco quixin. Queriꞌ xeban como ja Dios ja cꞌo pa tak ewanma ixix más chi na kꞌaxnak rchokꞌakꞌ chwach ja diablo ja cꞌo pa tak canma ja winak ja xa ruqꞌuin rwachꞌulew yukul wiꞌ quecꞌuꞌx.

1 Juan 5:19

Kotak chakajaꞌ chi ajoj okcꞌo pa rcuenta ja Dios pro ja juleꞌ chic winak ja recꞌo chwachꞌulew xa pa rukꞌaꞌ ja diablo ecꞌo wiꞌ.

1 Juan 5:4

como arjaꞌ ryaꞌon kachokꞌakꞌ kanojel ja rok ralcꞌwal in rmalariꞌ ja ritzelal xin rwachꞌulew maticowin chakij, ajoj nokchꞌocmaji. Rmal ja yukulbal kacꞌuꞌx ruqꞌuin ja Jesucristo chewiꞌ tok nokchꞌocmaji.

Apocalipsis 12:9

Ja cꞌa nimlaj dragón arjaꞌ chꞌakixto. Jariꞌ dragón arjaꞌ ja rojer cumatz ja nbix tre chi Diablo in cꞌo jun chic rubiꞌ nbix tre, Satanás neꞌxi, arjaꞌ ja nbano engañar quixin canojel ja winak ja recꞌo chwachꞌulew. Chꞌakixto chwach ja rwachꞌulew e rachbil ja ritzel tak ángel rxin.

Apocalipsis 13:14

In xa neruban engañar ja winak ja recꞌo chwachꞌulew. Ja cꞌa nerbanbej engañar jariꞌ ja milagro nuban jeꞌe ja yatajnak tre chi nuban pro ni chwach ja jun chic itzel chicop tok nuban. In neruban mandar ja winak ja recꞌo chwachꞌulew chi nqueban rachbal ja jun chic itzel chicop ja soctajnak tzaꞌn espada nabey pro cꞌaseꞌe.

Apocalipsis 13:8

In canojel ja recꞌo chwachꞌulew xexuqueꞌ chwach, queriꞌ queban canojel ja mta quebiꞌ tzꞌibtal chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij. Jariꞌ libro rxin ja Carnelo ja xoc jun sacrificio, ja camsaxi, in tok majaꞌn titzꞌucarsaxi ja rwachꞌulew ni chominto chi wiꞌ triꞌ chi queriꞌ nba̱n tre.

Apocalipsis 16:17

In jun chic ángel ja vaso rcꞌan, ja cꞌo chipan jariꞌ xutix chicaj in cꞌo jun kulaj cꞌaxaxi congana nim, xelto chipan ja templo ja cꞌo chilaꞌ chicaj, triꞌ xelto wiꞌ ja bar cꞌo wiꞌ ja trono xin Dios, quewaꞌ xbij riꞌ: —Camic chomtajnak chic chi npeti ja rpokonal pro ni nojelal, neꞌe.

Apocalipsis 20:2

Ja cꞌa tok kajto xuchap ja dragón. Jariꞌ dragón arjaꞌ ja rojer cumatz ja binaꞌan tre Diablo owi Satanás. Ja cꞌa tok chaptaj rmal xubacꞌ, xuqꞌuiakel chipan ja nimlaj jul in xtzꞌapij rwiꞌ ja jul, bien seguro xuban tre. Ja cꞌa dragón triꞌ nqꞌuejeꞌ wiꞌ jun mil junaꞌ chipan ja jul. Queriꞌ ban tre utzcꞌa chi maqueruban chic engañar ja winak ja recꞌo pa tak nación. Ja cꞌa tok xtitzꞌakati ja jun mil junaꞌ rjawaxic chi nsokpixel jun tiempo pro xa ma nim chi ta.