Efesios 1:23 - Tz'utujil (Ja Cꞌacꞌa Chominem)

²³ Ajoj ja rok iglesia ok cuerpo rxin ja Cristo in ja rcꞌaslemal ja Cristo nnoji pa tak kacꞌaslemal ajoj como ok cuerpo rxin in ni majun bar ta triꞌ ja maquita cꞌo wiꞌ arjaꞌ.

Tz'utujil NT

²³ Ajoj ja ok iglesia ja ok cuerpo rxin Cristo y njelal jnojnak chpam rc'aslemal Cristo nnoja ptak kc'aslemal ajoj com ok cuerpo rxin y nmajo'n abar mquita c'o wa' ja'.

Efesios 1:23 Iomraidhean Croise

San Juan 1:16

Ja Ralcꞌwalaxel janila nojnak ja rutzil xin Dios pa ranma in jariꞌ utzil ocnak chic chake ajoj in xa janiꞌ npi más npi más pa tak kanma in xa sipan chake.

Romanos 13:5

Rmalcꞌariꞌ nbij chewe, ni rjawaxic wiꞌ chi nkanimaj ja ley ja cꞌo pa rukꞌaꞌ ja kꞌetbal tak tzij. Pro ¿la xa rmal chi matikaj chakij ja castigo xin Dios, la xa chewiꞌ tok rjawaxic chi nkanimaj? Mni, pro ni rjawaxic wiꞌ chi nkanimaj como bien kotak chi queriꞌ nrajoꞌ ja Dios chake chi nkaban.

1 Corintios 12:6

In qꞌuiy rwach chakajaꞌ ja poder nkacoj chi rbanic ja samaj xin Dios pro xa jun mismo Dios ja nyoꞌ chake ja poder kanojelal xa nak ta chi poderal.

1 Corintios 15:28

Ja cꞌa Ralcꞌwalaxel tok cojon chic pa rukꞌaꞌ nojelal arjaꞌ xtujach chic riꞌ pa rukꞌaꞌ ja Tatixel. Queriꞌ cꞌa xtuban utzcꞌa chi ni ruyon chi wiꞌ ja Dios xtibano chic mandar triꞌ in majun nak chi ta ja maquita xtiniman chic rxin.

Efesios 2:16

Queriꞌ xuban chake utzcꞌa chi caniꞌ xa jun cuerpo nkaban ja rok caꞌiꞌ tinamit in nokchomtaj ruqꞌuin ja Dios chi ok caꞌiꞌ pro xa rmal ja rcamic chwach cruz chewiꞌ tok nokchomtaji como ja rcamic jariꞌ xlasbej ja cꞌullaꞌan riꞌil ja cꞌo chikacojol nabey.

Efesios 3:10

Queriꞌ xuban ja Dios utzcꞌa chi ja lokꞌlaj tak ángel ja recꞌo chilaꞌ chicaj ejeꞌeꞌ nkꞌalasax chic chiquewach ja nimak tak naꞌoj xin Dios ja xucoj ja Dios chi rbanic cumplir ja rchominto ojer chi nuban pro kumal ajoj ja rok iglesia tok necowini ja ángel nquechꞌob ja wariꞌ.

Efesios 3:19

Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios.

Efesios 4:10

Queriꞌ rbanic como ja Cristo ja xurkaj kaj waweꞌ chwachꞌulew arjaꞌ mismo ja joteꞌ chic chilaꞌ chicaj pro más chi na chicaj xekaj nojoj wiꞌ, ni majun bar ta triꞌ ja maquita xekaj nojoj wiꞌ.

Efesios 4:12

Jawaꞌ samaj xsipaj chake chi nkaban utzcꞌa chi bien ntzꞌakat chake ja rok xin Dios xa nak ta ja ncꞌatzin chake chi nokcowini nkaban ja samaj xin Dios utzcꞌa chi nokqꞌuiy rmal ja rok cuerpo rxin ja Cristo.

Efesios 4:13

Queriꞌ rbanic in nerilaꞌ na jun kꞌij ja tok mta ariꞌ ja maquita jun nkaban rmal ja yukulbal kacꞌuꞌx ruqꞌuin ja Ralcꞌwal Dios in rmal ja bien nkotakij na ja kas mero rnaꞌoj. Queriꞌ cꞌa xtikaban, congana xtitzꞌakat na chi utz ja kanaꞌoj, xtinoj na pa tak kanma ajoj nojelal ja nojnak pa ranma ja Cristo.

Efesios 4:4

Xa jun cuerpo rxin ja Jesucristo, xa jun Espíritu Santo, in caniꞌ tre ja gobierno xin Dios ja kayben jariꞌ xa jun chakajaꞌ, jariꞌ Dios xokrsiqꞌuij chi nokqꞌuejeꞌ chipan.

Colosenses 1:24

Ja cꞌa camic incꞌo chipan ja rpokonal chi etoꞌic pro ninquicot rmal. Como anin in rachbil ja Cristo chi rtijic ja rpokonal ja majaꞌn tikꞌax trij como cꞌa ntiꞌon na tre ja Cristo nojel ja nba̱n chake ja rok cuerpo rxin ja rok iglesia.

Colosenses 2:19

Queriꞌ nqueban como ma bien ta jun quibanon ruqꞌuin ja Cristo. Ja Cristo arjaꞌ wiꞌaj kaxin kanojelal ja rok cuerpo rxin in rmal arjaꞌ tok nokqꞌuiyi. Caniꞌ rbanic jun cuerpo xa jun rbanon, rximon riꞌ chibil tak riꞌ in nnimaj ja nbix tre rmal ja wiꞌaj chi nuban utzcꞌa chi nqꞌuiyi. In queriꞌ cꞌa chake ajoj chakajaꞌ, ja tok nkanimaj ja nbix chake rmal ja Cristo chi nkaban jariꞌ nokqꞌuiy rmal pro jun qꞌuiyem ja utz ntzꞌa̱t rmal ja Dios.

Colosenses 3:11

Xa ok jun kanojelal ja kucꞌan jawaꞌ cꞌacꞌa cꞌaslemal ja cꞌa xinbij kaj chewe riꞌ wi ok aj Israel owi ma ok aj Israel ta, wi okbanon circuncidar owi ma okbanon ta circuncidar, wi makocowini noktzijon pa griego, wi congana lawuloꞌ ja tinamit ja rokpenak wiꞌ, wi ok libre owi ok esclavo, pro xa ok jun kanojelal ja kucꞌan ja cꞌacꞌa cꞌaslemal como ja Cristo arjaꞌ nqꞌuejeꞌ pa tak kanma kanojelal in nuban jun chake, solo Cristo ja nim rukꞌij.

Colosenses 3:15

Xtiqꞌuejeꞌ ta ja quicotemal xin Dios pa tak ewanma, ja tariꞌ xtucꞌan ewxin. Como ja Dios arjaꞌ xixruchaꞌ utzcꞌa chi nqꞌuejeꞌe ja quicotemal xin Dios checojol como arjaꞌ xa jun rbanon chewe, xa jun cuerpo ebanon. Maxta maquita nemaltioxij tre ja Dios ja rbanon chewe.