Efesios 1:21 - Tz'utujil (Ja Cꞌacꞌa Chominem)

²¹ Queriꞌ xuban ja Dios tre ja Cristo, xuyaꞌ tre chi noc pa rukꞌaꞌ ja kꞌetbaltzij pro ni majun kꞌetbaltzij ja maquita xoc pa rukꞌaꞌ, in xuyaꞌ tre chi más na nim rukꞌij arjaꞌ chiquewach canojelal ja kꞌetol tak tzij in ma queyon ta ja kꞌetol tak tzij ja re rxin awaꞌ tiempo riꞌ in queriꞌ chique ja re rxin chic jun tiempo ja majaꞌn tekawilaꞌ chakajaꞌ.

Tz'utujil NT

²¹ Cara' xuban Dios tzra Cristo, xuya' tzra che noca pruk'a' jk'atbaltzij per nmajo'n jun k'atbaltzij che mquita xoca pruk'a', y xuya' tzra che más na nim ruk'ij que chquewech conjelal e k'toy tak tzij, y mqueyon ta e k'toy tak tzij je nquebnowa mandar chpam jawra tiemp rxin rwech ruch'lew per chka' jec'ola chpam tiemp jpenak.

Efesios 1:21 Iomraidhean Croise

San Mateo 12:32

Ja wi cꞌo jun winak xa nak ta chi winakil masqui arjaꞌ nbij juleꞌ tzij tre ja Ralcꞌwalaxel ja xoc alaxic cuqꞌuin ja winak, juleꞌ tzij ja xa ofensa rcꞌamonto tre, jariꞌ cꞌo cuytajic trij pro wi nbij juleꞌ tzij tre ja rEspíritu Santo ja xa ofensa rcꞌamonto tre jariꞌ ni mta wiꞌ cuytajic trij nixtacꞌa chipan awaꞌ tiempo ja rokcꞌo wiꞌ riꞌ in nixtacꞌa chipan ja jun chic tiempo ja majaꞌn tipeti.

Hechos 4:12

Solo ruqꞌuin ja Jesús nkawil wiꞌ ja totajem xin Dios, ni majun nak chi ta rtakonto ja Dios waweꞌ chwachꞌulew ja ntoꞌo kaxin, neꞌe ja Pedro.

Efesios 2:2

Ja il mac ni chipan wiꞌ ixcꞌo wiꞌ nabey, xeban ja ritzelal ja caniꞌ nqueban ja winak ja xa ruqꞌuin rwachꞌulew yukul wiꞌ quecꞌuꞌx. Xa rvoluntad ja diablo xeban, jariꞌ diablo ja jefe quixin ja ritzel tak espíritu ja neqꞌuejeꞌ chicaj chipan ja aire. Jariꞌ itzel tak espíritu ja nesamaj pa tak canma ja winak ja maquenimani camic.

Efesios 3:10

Queriꞌ xuban ja Dios utzcꞌa chi ja lokꞌlaj tak ángel ja recꞌo chilaꞌ chicaj ejeꞌeꞌ nkꞌalasax chic chiquewach ja nimak tak naꞌoj xin Dios ja xucoj ja Dios chi rbanic cumplir ja rchominto ojer chi nuban pro kumal ajoj ja rok iglesia tok necowini ja ángel nquechꞌob ja wariꞌ.

Efesios 6:12

Queriꞌ nbij chewe como ja kas mero kacꞌulel ja kamajon chꞌaꞌoj cuqꞌuin ma ejeꞌeꞌ tariꞌ ja kach tak winak. Pro ja kas mero kacꞌulel ejeꞌeꞌ riꞌ canojelal ja ritzel tak ángel, juleꞌ itzel ángel ja nebano mandar waweꞌ chwachꞌulew pa tak quewiꞌ pa tak canma ja winak ja xa kꞌekumal ecꞌayon, juleꞌ itzel tak espíritu ja neqꞌuejeꞌ chicaj chipan ja aire.

Colosenses 2:10

Ja cꞌa rixix como xa jun ebanon chic ruqꞌuin ja Cristo chewiꞌ tok ewilon chic nojel xa nak ta ncꞌatzin tre ja recꞌaslemal como arjaꞌ ni majun kꞌetbaltzij ja maquita cꞌo pa rukꞌaꞌ.

Colosenses 2:15

Arjaꞌ xkajsaj quichokꞌakꞌ ja cꞌo kꞌetbaltzij pa quekꞌaꞌ, bien xkꞌalasaj chiquewach winak chi arjaꞌ chꞌocmaji tokoriꞌ tok camsaxi ja Cristo chwach cruz.

Hebreos 1:4

Ja Ralcꞌwal Dios yataj tre chi más chi na nim rukꞌij arjaꞌ chiquewach ja ángel. In chakajaꞌ ja rubiꞌ yaꞌ tre jariꞌ más chi na nim rukꞌij chwach ja quebiꞌ ja ángel.

Hebreos 2:5

Como ja Dios arjaꞌ ma pa quekꞌaꞌ ta ángel rcojon wiꞌ ja cꞌacꞌa rwachꞌulew ja penak ja kamajon rnataxic ewqꞌuin camic.

Hebreos 4:14

Wachꞌalal, ja Jesús ja Ralcꞌwal Dios como arjaꞌ ocnak jun lokꞌlaj sacerdote kaxin ja ncojo kaxin chwach ja Dios in como arjaꞌ chijutij ekajnak triꞌ ja bar cꞌo wiꞌ ja Dios rmalcꞌariꞌ nbij jutzꞌit rubiꞌ chewe, cow kopeꞌi jutzꞌit, maxta tikayaꞌ can ja utzlaj tzij ja kaniman.

1 Pedro 3:22

Arjaꞌ cꞌastaji, joteꞌ chilaꞌ chicaj in camic cꞌo pa riquikꞌaꞌ ja Dios. Arjaꞌ cꞌo rukꞌaꞌ chique ja ángel, cꞌo rukꞌaꞌ chique espíritu, majun kꞌetbaltzij ja maquita cꞌo rukꞌaꞌ tre.