Efesios 1:19 - Tz'utujil (Ja Cꞌacꞌa Chominem)

¹⁹ Kas ta xtichꞌobtaj emwal chakajaꞌ nak rbanic ja poder xin Dios ja nsamaji pa tak kacꞌaslemal ja yukul kacꞌuꞌx ruqꞌuin ja Jesucristo, pro jun poder ja más kꞌaxnak chi na como jariꞌ poder ja samaji

Tz'utujil NT

¹⁹ Kas ta xtch'obtaja ewmal chka' nak rbanic rpoder Dios jnesmaja ptak kc'aslemal je ykula kac'u'x ruq'uin Jesucristo, per jun poder más na k'axnak chna com jara' poder xesmaja

Efesios 1:19 Iomraidhean Croise

San Juan 3:6

Ja cꞌaslemal ja yatajnak chique ja winak cumal ja quitataꞌ queteꞌ jariꞌ xa ni junan wiꞌ ruqꞌuin ja caniꞌ quixin ja quitataꞌ queteꞌ. Ja cꞌa cꞌaslemal ja nyataj chawe rmal ja rEspíritu Santo jariꞌ ni junan wiꞌ ruqꞌuin ja caniꞌ rcꞌaslemal ja rEspíritu Santo.

Hechos 26:18

utzcꞌa chi nasakirsaj quebey chiquewach. Camic e caniꞌ moyaꞌ, pa kꞌekumal ecꞌo wiꞌ pro neꞌacoj na pa sakil. Neꞌel na pa rukꞌaꞌ ja Satanás in neꞌoc chi na pa rukꞌaꞌ ja Dios. Queriꞌ naban chique utzcꞌa chi ncuytaji ja quil quemac utzcꞌa chi cꞌo jun herencia nyataj na chique chiquicojol ja winak ja rechꞌachꞌojirsan chic chipan ja quil quemac rmal ja yukulbal quecꞌuꞌx wqꞌuin. Queriꞌ xbij ja Jesús chwe.

Romanos 1:16

Queriꞌ nbij chewe como ja utzlaj tzij xin Cristo, anin ma qꞌuixbal ta nnaꞌ nyaꞌ rbixic. Ma qꞌuixbal ta como ja utzlaj tzij xin Cristo jariꞌ ja nimlaj poder xin Dios, nerutoꞌ ja winak chipan ja quil quemac, nerutoꞌ xa nak ta chi winakil ja nyukeꞌ quecꞌuꞌx ruqꞌuin ja Jesucristo. Cuqꞌuin ja raj Israel xekaj wiꞌ rbixic nabey in chakajaꞌ ntajini nekaji camic cuqꞌuin ja ma e aj Israel ta.

2 Corintios 4:7

Jawaꞌ luz xin Dios ja cꞌa xinbij kaj chewe riꞌ caniꞌ jun nimlaj mebaꞌil kucꞌan pro ja rajoj xa ok ulew, xa ok caniꞌ juleꞌ bojoꞌy ja cꞌolon juleꞌ nimak tak mebaꞌil chipan. Queriꞌ cꞌa rbanon chake ja Dios utzcꞌa chi ja nimlaj poder ja nsamaji pa tak kacꞌaslemal jariꞌ ni kꞌalaj wiꞌ chi ruqꞌuin Dios penak wiꞌ in ma ajoj ta kawinakarsan nojoj kayon.

2 Corintios 5:17

Queriꞌ cꞌa rbanic, ja wi xa jun abanon ruqꞌuin ja Cristo jariꞌ at cꞌacꞌa winak chic, ja tzabuklaj tak naꞌoj awcꞌan nabey jariꞌ kꞌaxnak can chic, cꞌacꞌa chic nojelal.

Efesios 2:10

Queriꞌ nbij chewe como ja utzlaj cꞌaslemal ja kucꞌan camic Dios winakarsyon, ma ajoj ta como arjaꞌ xuyaꞌ jun cꞌacꞌa cꞌaslemal chake, tokoriꞌ xuyaꞌ chake ja tok xa jun kaban ruqꞌuin ja Cristo Jesús. Xuyaꞌ jun cꞌacꞌa cꞌaslemal chake utzcꞌa chi nkaban chic ja rutzil pro juleꞌ utzil ja ni rchominto wiꞌ ojer chi nkaban.

Efesios 3:20

Ja cꞌa camic kas ta xtiyaꞌ rukꞌij ja Dios, arjaꞌ jun Dios janila nim ja poder cꞌo pa rukꞌaꞌ, jun poder ja ntajini nsamaji pa tak kacꞌaslemal camic. In rmal ja poder ja cꞌo pa rukꞌaꞌ mta nak ta ja maquita ncowini nuban. Xa nak ta nkacꞌutuj tre ncowini nuyaꞌ más chake chwach ja nkacꞌutuj tre. Xa nak ta nkachꞌob ja congana cꞌayew chi rbanic pro arjaꞌ ncowini nuban ja más na cꞌayew chwach ja nkachꞌob ajoj.

Efesios 3:7

Jawaꞌ utzlaj tzij riꞌ jawaꞌ yaꞌon chi nukul chi nyaꞌ rbixic, jawaꞌ jun samaj xincochij tre ja Dios, ni majun nak ta xinchꞌecbej ta in janila samaji ja Dios pa ncꞌaslemal chi rbanic jawaꞌ samaj riꞌ.

Efesios 6:10

Wachꞌalal, jawaꞌ qꞌuisbal paxbanem nyaꞌ chewe riꞌ, cow quixpeꞌi pa rubiꞌ ja kajaw Jesucristo, tecojoꞌ ja nimlaj poder ja nuyaꞌ.

Filipenses 2:13

Queriꞌ nbij chewe como ja katataꞌ Dios arjaꞌ nsamaji pa tak ewanma chi rbanic ja rvoluntad, arjaꞌ nyoꞌ chewe chi npit egana ruqꞌuin ja rutzil ja najoꞌx chewe rmal chi neban in nuyaꞌ ja rewachokꞌakꞌ chakajaꞌ chi nixcowini neban cumplir ja rvoluntad.

Filipenses 3:21

Ajoj xok way xok yaꞌ pro ja Jesucristo nerilaꞌ na jun kꞌij tok xtuqꞌuex na ja kacuerpo. Caniꞌ xuban arjaꞌ tok qꞌuextaji ja rcuerpo congana chic ruchꞌaꞌ queriꞌ cꞌa xtuban tre ja kacuerpo ajoj chakajaꞌ. Jariꞌ bien ncowini nuban como ja rchokꞌakꞌ congana nim rmalariꞌ noc na pa rukꞌaꞌ nojelal.

Colosenses 1:29

Rmalcꞌariꞌ tok nmajon jun nimlaj lucha, congana ntij nukꞌij pro ja nyoꞌ wachokꞌakꞌ jariꞌ Jesucristo como arjaꞌ congana nsamaji pa ncꞌaslemal chi rbanic jawaꞌ samaj ja nmajon rbanic riꞌ.

Colosenses 2:12

Queriꞌ cꞌa rbanic como xixban bautizar in tok xixban bautizar jariꞌ caniꞌ ixix jun xixmuk ruqꞌuin ja Cristo, caniꞌ ixix jun xixcꞌastaj ruqꞌuin chakajaꞌ. Queriꞌ xeban como cꞌoli ja yukulbal ecꞌuꞌx ruqꞌuin ja nimlaj poder ja xucoj ja Dios ja tok xucꞌas ja Cristo chiquicojol camnakiꞌ.

1 Tesalonicenses 1:5

Ja tok kabij chewe ja utzlaj tzij xin Jesucristo ma ruyon tariꞌ tok kabij, jaꞌ Espíritu Santo congana xucoj rchokꞌakꞌ, congana samaji pa tak ewanma. In chakajaꞌ bien xetzꞌat chi congana yukul kacꞌuꞌx ruqꞌuin ja kabij chewe. Ja tok xokqꞌuejeꞌ checojol bien ewotak chi utzlaj ejemplo kacꞌut chewach utzcꞌa chi newotakij nak rbanic ja utzlaj cꞌaslemal.

2 Tesalonicenses 1:11

Rmalcꞌariꞌ tok ni nkaban wiꞌ orar pan ecuenta, ja nkajoꞌ chewe chi ja katataꞌ Dios utz nixrutzꞌat in nquicot chewij como ixrsiqꞌuin, ixcꞌo pa rukꞌaꞌ. In nkajoꞌ chakajaꞌ chi Dios nuyaꞌ chewe chi neban cumplir nojel ja rutzil ja remajon rchꞌobic in nuyaꞌ chewe chakajaꞌ chi neqꞌuis nojel ja samaj ja remajon rbanic rmal ja yukul ecꞌuꞌx ruqꞌuin ja Jesucristo.

Santiago 1:18

Ja xuban, xuyaꞌ chake chi kacꞌaxaj ja utzlaj tzij xin Jesucristo in rmalariꞌ xokalax chic jutij in kawil ja utzlaj cꞌaslemal. Queriꞌ xuban chi xokoc nabey tak cosecha chiquewach ja juleꞌ chic winak como nijawariꞌ rvoluntad ja rchominto.

1 Pedro 4:11

Ecꞌoli chewe quicochin tre ja Dios chi necowini nqueyaꞌ mensaje, kas turkaj chique chi rtzobal Dios ja nquecoj, ma quinaꞌoj ta winak ja nquecoj. In chakajaꞌ ecꞌoli ja yatajnak chique chi necowini nequetoꞌ winak, kas turkaj chique chi ja Dios arjaꞌ yoyon chique chi necowini nequetoꞌ. Rmal ja Jesucristo chewiꞌ tok qꞌuiy rwach ja yatajnak chewe ja recochin tre ja Dios, tebanaꞌ cꞌa nojelal chi nyabex rukꞌij. Ni ta xtiyaꞌ wiꞌ rukꞌij, ni ta xtinatax wiꞌ chi pa rukꞌaꞌ cꞌo wiꞌ nojelal camic, chwak in chijutij. Amén.