Efesios 1:18 - Tz'utujil (Ja Cꞌacꞌa Chominem)

¹⁸ Ja nwajoꞌ anin chewe kas ta xtijaktaji chi utz ja rewiꞌ ewanma utzcꞌa chi nixcowini nechꞌob nak rbanic nojel ja rewayben ja rtzujun chewe ja Dios in ixrsiqꞌuin chi neꞌewilaꞌ na. Kas ta xtichꞌobtaj emwal nak rbanic ja herencia xin Dios ja nyataj chake ja rok tinamit xin Dios, pro jun herencia janila nim rukꞌij, caniꞌ jun nimlaj mebaꞌil ja nyataj chake.

Tz'utujil NT

¹⁸ Jquenwajo' anen chewa kas ta xtjaktaja ewá' ruq'uin ewanm ch-utz c'ara' che nquixecwina nech'ob nak rbanic njelal jeweyben je rtzujun Dios chewa, y ixrsiq'uin chnewla' na. Kas ta xtch'obtaja ewmal nak rbanic herencia rxin Dios je nyataja chka je ok rtnamet Dios, per jun herencia ajni'la nim ruk'ij, jun nimlaj mibil je nyataja chka.

Efesios 1:18 Iomraidhean Croise

San Mateo 13:15

—Queriꞌ nbij chique ja winak leꞌ como ja canma cowirnak in ja quixquin cꞌayew chi noc chipan ja nbix chique in ja quewach xa quiyupun. Queriꞌ nqueban como mta quigana nquetzꞌat ja ncꞌu̱t chiquewach in nixtacꞌa cꞌo ta quigana nquicꞌaxaj ja nbix chique in nixtacꞌa cꞌo ta quigana nquechꞌob pa tak canma ja nchꞌo̱b chiquewach in nixtacꞌa cꞌo ta quigana chakajaꞌ nemeloj wqꞌuin utzcꞌa chi ncuy ja quil quemac, neꞌe ja Dios. Queriꞌ cꞌa ja bitajnak can.

Marcos 10:17

Ja Jesús kas elem nuban chi numajel chic jutij rubey ja tok cꞌo jun achi cꞌamcꞌol ranim peti, xuqueꞌ chwach in quewaꞌ xbij tre riꞌ: —Maestro, atat congana at utzlaj achi. ¿Nak nban utzcꞌa chi nyataj chwe ja utzlaj cꞌaslemal ja mta qꞌuisic trij? neꞌe ja rachi.

San Lucas 24:45

Cꞌacꞌariꞌ xuchꞌob más chiquewach ja rtzobal Dios,

Hechos 16:14

Cꞌo cꞌa jun chique ja rixokiꞌ Lidia rubiꞌ, chipan ja tinamit Tiatira penak wiꞌ. Ja cꞌa Lidia arjaꞌ ajcꞌay juleꞌ buen tak tziak morada in nuban respetar ja Dios. Ja cꞌa Pablo arjaꞌ rmajon rbixic ja rtzobal Dios in ja Dios arjaꞌ xuyaꞌ tre ja Lidia chi xnimaj ja nbij.

Hechos 26:18

utzcꞌa chi nasakirsaj quebey chiquewach. Camic e caniꞌ moyaꞌ, pa kꞌekumal ecꞌo wiꞌ pro neꞌacoj na pa sakil. Neꞌel na pa rukꞌaꞌ ja Satanás in neꞌoc chi na pa rukꞌaꞌ ja Dios. Queriꞌ naban chique utzcꞌa chi ncuytaji ja quil quemac utzcꞌa chi cꞌo jun herencia nyataj na chique chiquicojol ja winak ja rechꞌachꞌojirsan chic chipan ja quil quemac rmal ja yukulbal quecꞌuꞌx wqꞌuin. Queriꞌ xbij ja Jesús chwe.

Romanos 11:29

Queriꞌ nbij chewe como ja Dios mta moda xtuqꞌuex ta ja rnaꞌoj. Ja wi cꞌoli rsipan chawe nij awxin wariꞌ owi atrchaꞌon chi atocnak tinamit rxin nij at rtinamit wariꞌ chakajaꞌ.

Romanos 2:4

Owi maxla xa ni mta nqueban tre nojel ja rbanon pa quicuenta ja Dios como arjaꞌ janila ja rutzil ryaꞌon chique, janila rcuyun ja ryewal chiquij, janila ja rpaciencia cuqꞌuin. ¿La ma cotak ta cꞌa chi ja Dios tok nuyaꞌ ja rutzil chique ma chaka ta nuyaꞌ chique pro rumac chi nqueqꞌuex ja quinaꞌoj, rumac chi nqueyaꞌ can ja ritzelal?

2 Corintios 4:4

Matichꞌobtaj cumal como ja diablo ja rcojon riꞌ como dios waweꞌ chwachꞌulew arjaꞌ rmoyirsan ja quewiꞌ canma. Queriꞌ nuban ja diablo chique ja winak ja matiyukeꞌ quecꞌuꞌx ruqꞌuin ja Jesucristo utzcꞌa ja luz xin Dios matekaji pa tak canma. Jariꞌ luz jariꞌ ja utzlaj tzij xin Dios ja ncꞌutuwi chi janila nim rukꞌij ja Cristo. Ja cꞌa Cristo arjaꞌ ni junan quinaꞌoj ruqꞌuin ja Dios.

2 Corintios 4:6

Queriꞌ kabanon como ja Dios arjaꞌ cꞌo jun luz rtakonto pa tak kanma ja caniꞌ xuban ojer tok xbij chi: —Tiwinakari ja luz, neꞌe, in winakari ja luz chipan ja kꞌekumal. Queriꞌ rbanon chake utzcꞌa chi nchꞌaꞌani ja luz xin Dios pa tak kanma in rmalariꞌ ja winak xticotakij na chi ruqꞌuin ja Jesucristo natzꞌat wiꞌ chi janila nim rukꞌij ja Dios.

Gálatas 5:5

Queriꞌ nbij chewe como ajoj ma ja chi ta ja ley okucꞌayon pro jaꞌ Espíritu Santo cꞌayon chic kaxin chi raybexic ja kꞌij ja tok Dios xkorutoꞌ chijutij tokoriꞌ tok ni majun chic kil kamac in rmal ja yukulbal kacꞌuꞌx ruqꞌuin ja Jesucristo tok nba̱n queriꞌ chake, jariꞌ kas nokquicoti chi raybexic.

Efesios 1:11

In chakajaꞌ como xa jun kabanon ruqꞌuin ja Jesucristo chewiꞌ tok cꞌo jun herencia xin Dios ja yatajnak chake. Ja Dios ni rchominto wiꞌ ojer chi nuyaꞌ chake ja herencia, nijawariꞌ rchꞌobonto chakij. Xa nak ta ja nbantaj jeꞌe mta ariꞌ ja maquita nsamaji ja Dios chipan chi rbanic cumplir ja rvoluntad arjaꞌ.

Efesios 1:7

Ja tok xa jun kabanon ruqꞌuin ja Jesucristo jariꞌ okwasanel chic libre pa rukꞌaꞌ ja il mac como arjaꞌ xutoj ja kil kamac tre ja rquiqꞌuel. Ja tok xa jun kabanon ruqꞌuin jariꞌ cuytajnak chic ja kil kamac. Ja Dios tok xuban queriꞌ chake jariꞌ caniꞌ jun nimlaj mebaꞌil xsipaj chake.

Efesios 2:12

Kas turkaj chewe nak ja rebanon nabey. Jun, ma ewotak ta triꞌ chi cꞌo jun Cristo. In jun chic, ma ix cachbil ta ja tinamit xin Dios, mta ekꞌaꞌ tre ja xchomarsaj jeꞌe ja Dios ruqꞌuin ja rtinamit ja bar xtzujuj wiꞌ chique chi nerilaꞌ na jun kꞌij ja tok nequilaꞌ ja totajem xin Dios. Ni majun totajem ewayben ta triꞌ, ixcꞌo chipan ja rwachꞌulew in cꞌuluto ma ewotak ta rwach ja Dios triꞌ.

Efesios 3:16

Ja Tatixel janila jun nimlaj gloria cꞌo ruqꞌuin, arjaꞌ ta xtiyoꞌ chewe ja rpoder, xtuyaꞌ ta chewe chi ja rEspíritu Santo ncowirsaj chi utz ja cꞌacꞌa cꞌaslemal ewcꞌan pa tak ewanma.

Efesios 3:8

Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

Efesios 4:1

Rmal cꞌa nojel awaꞌ ja nmajon rbixic chewe riꞌ congana nban recomendar chewe chi newcꞌaj jun utzlaj cꞌaslemal. Anin ja rincojon preso camic rmal ja samaj rxin ja kajaw Jesucristo congana nban recomendar chewe chi newcꞌaj jun cꞌaslemal ja bien nucꞌam riꞌ ruqꞌuin ja utzlaj cꞌaslemal ja nrajoꞌ ja Dios chewe chi newcꞌaj ja tok xixrsiqꞌuij.

Efesios 4:4

Xa jun cuerpo rxin ja Jesucristo, xa jun Espíritu Santo, in caniꞌ tre ja gobierno xin Dios ja kayben jariꞌ xa jun chakajaꞌ, jariꞌ Dios xokrsiqꞌuij chi nokqꞌuejeꞌ chipan.

Efesios 5:8

Como ja recꞌaslemal ixix ma queriꞌ chi ta ja caniꞌ nabey como ja nabey solo kꞌekumal ixcꞌayon pro ja camic luz xin Dios ixcꞌayon pro xa rmal ja xa jun ebanon ruqꞌuin ja kajaw Jesucristo chewiꞌ tok queriꞌ chic ebanon. Tebanaꞌ cꞌa ja bien nucꞌam riꞌ ruqꞌuin ja luz xin Dios como ix ralcꞌwal chic ja Dios ja sakirsyon ebey chewach.

Filipenses 3:14

pro congana nmajon rtijic nukꞌij utzcꞌa chi nenwilaꞌ na ja bar xquinekaj wiꞌ ja bar xtiyaꞌ wiꞌ chwe ja premio como cꞌo jun premio nyataj chake ja tok xa jun kabanon ruqꞌuin ja Jesucristo jariꞌ nokban invitar rmal ja katataꞌ Dios chi nokeqꞌuejeꞌ na ruqꞌuin chilaꞌ chicaj.

Colosenses 1:12

Ni ta nemaltioxij wiꞌ tre ja katataꞌ Dios como arjaꞌ ryaꞌon chake chi ajoj jun cꞌo kakꞌaꞌ tre ja herencia ja nuyaꞌ chake ja rok rtinamit, ryaꞌon chake chi nokqꞌuejeꞌ chipan jun gobierno ja bar nchꞌaꞌan wiꞌ ja gloria xin Dios.

Colosenses 1:23

Xarwariꞌ, rjawaxic chi mateyaꞌ can ja yukulbal ecꞌuꞌx ruqꞌuin ja Jesucristo, rjawaxic chi bien nixtiqueꞌe in cow nixpeꞌi, maxta ma quixquicot chi ta chi raybexic ja tzujun chake rmal ja Dios ja caniꞌ ncꞌu̱t chikawach rmal ja utzlaj tzij xin Jesucristo. Ekajnak chic rbixic ja utzlaj tzij ewqꞌuin in chakajaꞌ elnak rbixic chique canojel ja winak ja recꞌo chwachꞌulew. Anin ja rin Pablo yatajnak chwe chi nintajini nyaꞌ rbixic jawaꞌ utzlaj tzij riꞌ.

Colosenses 1:27

como ja Dios arjaꞌ rchꞌobon chic chiquewach ja rtinamit chi cꞌo chic ja Cristo pa tak ewanma ja ma ix aj Israel ta in rmalariꞌ ewotak chic chi nixeqꞌuejeꞌ na pa gloria ruqꞌuin ja Dios. Jawaꞌ ja cꞌa xinbij chewe riꞌ xa awatali nabey pro ja Dios rkꞌalasan chic chikawach camic utzcꞌa chi triꞌ nkatzꞌat wiꞌ chi janila nim ja gloria xin Dios ja nsamaji checojol ixix ja ma ix aj Israel ta.

Colosenses 1:5

Queriꞌ neban como cꞌo jun nimlaj herencia xin Dios ewayben ja cꞌolon chilaꞌ chicaj. Jawaꞌ herencia riꞌ ecꞌwaxan chic nak rbanic, tokoriꞌ xecꞌwaxaj ja tok bix chewe ja utzlaj tzij xin Jesucristo pro juleꞌ tzij ja ni majun tzꞌakoj tzij rcꞌan.

Colosenses 2:2

Nmajon rbanic jun lucha utzcꞌa chi bien nquexim quiꞌ chipan ja rajoben riꞌil xin Dios in rmaltariꞌ ncowir quewiꞌ canma chipan ja utzlaj tzij xin Jesucristo. Ja kas nwajoꞌ chique, kas ta nqꞌuejeꞌe ja quiseguro, kas ta nchꞌobtaj cumal nak rbanic ja rkꞌalasan chic ja katataꞌ Dios chikawach jariꞌ caniꞌ jun nimlaj mebaꞌil nuyaꞌ chake como arjaꞌ rkꞌalasan chic chikawach nak rbanic ja Cristo.

Colosenses 3:15

Xtiqꞌuejeꞌ ta ja quicotemal xin Dios pa tak ewanma, ja tariꞌ xtucꞌan ewxin. Como ja Dios arjaꞌ xixruchaꞌ utzcꞌa chi nqꞌuejeꞌe ja quicotemal xin Dios checojol como arjaꞌ xa jun rbanon chewe, xa jun cuerpo ebanon. Maxta maquita nemaltioxij tre ja Dios ja rbanon chewe.

1 Tesalonicenses 2:12

In chakajaꞌ kabij chewe chi ni neban wiꞌ ja caniꞌ nrajoꞌ ja Dios chewe chi neban como ix rxin chic ja Dios, arjaꞌ ni nixrsiqꞌuij wiꞌ chi nixqꞌuejeꞌ na chipan ja gobierno xin Dios pa gloria.

1 Tesalonicenses 5:8

Pro ja rajoj ja sakil cꞌayon kaxin in rmalariꞌ tok nbij chewe, bien kachꞌoboꞌ nojel ja nkaban. Congana tiyukeꞌ kacꞌuꞌx ruqꞌuin ja Jesucristo in nkajoꞌ kiꞌ jariꞌ nkatobej kiꞌ caniꞌ nuban jun soldado cꞌoli nuyaꞌ chwarucꞌuꞌx ja ntobej riꞌ. In koquicoti chi raybexic ja katotajic jariꞌ chakajaꞌ nkatobej kiꞌ caniꞌ nuban jun soldado cꞌoli nucoj pa rwiꞌ ja ntobej rwiꞌ.

2 Tesalonicenses 1:11

Rmalcꞌariꞌ tok ni nkaban wiꞌ orar pan ecuenta, ja nkajoꞌ chewe chi ja katataꞌ Dios utz nixrutzꞌat in nquicot chewij como ixrsiqꞌuin, ixcꞌo pa rukꞌaꞌ. In nkajoꞌ chakajaꞌ chi Dios nuyaꞌ chewe chi neban cumplir nojel ja rutzil ja remajon rchꞌobic in nuyaꞌ chewe chakajaꞌ chi neqꞌuis nojel ja samaj ja remajon rbanic rmal ja yukul ecꞌuꞌx ruqꞌuin ja Jesucristo.

2 Tesalonicenses 2:16

Ja katataꞌ Dios congana nokrajoꞌ in rmal ja rutzil chijutij xyukbaꞌ kacꞌuꞌx in xuyaꞌ chake chi nokquicoti nkaybej más ja rutzil. Ja ngana anin ja kajaw Jesucristo in ja katataꞌ Dios nquiyukbaꞌ ta ecꞌuꞌx in nqueyaꞌ ta ewachokꞌakꞌ chipan ja utzlaj tzij ja remajon rbixic in tre nojel ja rutzil ja remajon rbanic.

1 Timoteo 6:12

Tatijaꞌ akꞌij chi rbixic ja utzlaj tijonem xin Jesucristo. Maxta tayaꞌ can ja utzlaj cꞌaslemal ja mta qꞌuisic trij como ja Dios arjaꞌ xuyaꞌ chawe chi nawil ja utzlaj cꞌaslemal in e qꞌuiy ja winak xakꞌalasaj chiquewach chi cꞌo yukulbal acꞌuꞌx ruqꞌuin, jariꞌ buena xaban tok xaban queriꞌ.

Tito 2:13

In chakajaꞌ ja rutzil xin Dios nucꞌut chikawach chi npi chi na jutij ja Jesucristo, arjaꞌ nimlaj Dios kaxin, arjaꞌ Toꞌonel kaxin. In kotak chic chi ja tok xtipeti congana nim chic rukꞌij triꞌ in camic nokquicoti chi raybexic.

Tito 3:7

In rmalariꞌ tok utz chic noktzꞌat rmal ja Dios como arjaꞌ xsipaj ja rutzil chake in cꞌo jun herencia nyataj na chake. Jariꞌ herencia ja cꞌacꞌa cꞌaslemal ja mta qꞌuisic trij in jariꞌ kotak chi nyataj na chake in nokquicoti chi raybexic.

Hebreos 10:32

Pro ixix wachꞌalal turkaj cꞌa chewe chi ja kas nabey ja tok sakirsaxto ja rebey rmal ja Jesucristo xixcowini xecochꞌ nojel ja pi chewij, janila jun lucha janila jun rpokonal xetij pro xecochꞌ nojelal.

Hebreos 6:4

Ja cꞌa winak ja nqueyaꞌ can ja Jesucristo mta moda xtiyataj chi ta chique chi xtiqueqꞌuex chi ta jutij ja quinaꞌoj. Ja nabey kꞌalasax chiquewach janiꞌ ja katataꞌ Dios chi ja rbanic caniꞌ jun nimlaj luz nsakirsaj ja quebey chiquewach. Quenaꞌ chakajaꞌ janiꞌ rquiꞌil ja rutzil ja quicochij tre ja Dios. Chakajaꞌ yataj chique chi qꞌuejeꞌe ja rEspíritu Santo pa tak canma.

1 Pedro 1:3

Kayaꞌaꞌ rukꞌij ja Dios, arjaꞌ Tatixel rxin ja kajaw Jesucristo, congana xpokonaj kawach, xuyaꞌ chake chi xokalax chic jutij. Ja Jesucristo arjaꞌ yataj tre rmal ja Dios chi cꞌastaj rwach chiquicojol ja camnakiꞌ chewiꞌ tok yataj chake chi xokalax chic jutij. Rmalariꞌ tok ni maticapuj wiꞌ kacꞌuꞌx chi raybexic ja rutzil xin Dios

1 Pedro 3:9

Ja tok nba̱n itzel chewe owi tok cꞌoli ja pokonlaj tak tzij nbix chewe maxta teyaꞌ rjil rcꞌaxel. Ja neban, tebanaꞌ ja rutzil. Ja Dios arjaꞌ xixrsiqꞌuij chi ix banol tak utzil. Queriꞌ xuban utzcꞌa chi newilaꞌ na ja rutzil ixix chakajaꞌ rmalcꞌariꞌ tok nbij chewe, ni tebanaꞌ wiꞌ ja rutzil.

1 Pedro 5:10

Pro xa ma nim ta ja tiempo rxin ja rpokonal cꞌacꞌariꞌ ja Dios arjaꞌ xtuyaꞌ chewe xa nak ta ja ma tzꞌakat ta chewe, arjaꞌ ncowirsaj ja rewanma in nuyaꞌ ja rewachokꞌakꞌ in nuyaꞌ chewe chi cow nixpeꞌi, majun nak ta xquixcꞌamoꞌel ta. Arjaꞌ nojel rwach ja rutzil cꞌo ruqꞌuin in rmal ja Jesucristo tok xokrsiqꞌuij chi nokeqꞌuejeꞌ na pa gloria pro jun gloria ja mta qꞌuisic trij.