Apocalipsis 9:21 - Tz'utujil (Ja Cꞌacꞌa Chominem)

²¹ In chakajaꞌ ja winak ma xqueyaꞌ can ta ja banoj camíc in ma xqueyaꞌ can ta ja banoj tak samaj quixin ajꞌitzaꞌ in ma xqueyaꞌ can ta ja banoj il mac ja rachiꞌiꞌ cuqꞌuin ixokiꞌ in nixtacꞌa banoj alakꞌ ta queyaꞌ can ta chakajaꞌ.

Tz'utujil NT

²¹ Chka' je' wnak majo'n xqueya' cta bnoj cmic, y majo'n xqueya' cta bnoj tak samaj cxin aj-itza', y majo'n xqueya' cta bnoj il mac je' ach-i' nque'oca cuq'uin ixki', y nexte bnoj alak' xqueya' cana chka'.

Apocalipsis 9:21 Iomraidhean Croise

San Mateo 15:19

Queriꞌ nbij chewe como pan awanma nwinakarto wiꞌ ja ritzel tak naꞌoj caniꞌ tre banoj camíc, caniꞌ tre tok cꞌo jun natoc ruqꞌuin ja wi ma awixjayil ta owi ma awachajil ta, caniꞌ tre banoj alakꞌ, caniꞌ tre ja nayaꞌ testigoꞌil ja ma katzij ta in caniꞌ tre ja tok nabij juleꞌ tzij tre ja Dios ja xa ofensa rcꞌamonto tre.

2 Corintios 12:21

Anin nxbej wiꞌ emwal como ja tok xquinekaj chic jutij ewqꞌuin maxla quewaꞌ xtuban chwe ja Dios riꞌ, maxla xa qꞌuixbal nnaꞌ chic chewach rmal ja rebanon. Maxla rjawaxic chi ninokꞌ cumal ja recꞌoli chewe ja ni cꞌo wiꞌ ja il mac queban ojer in ni cꞌa cꞌo na wiꞌ ja ritzelal ja quimajon rbanic camic caniꞌ chique ja winak ja nqueban xa nak ta ja ntzꞌilorsaj ja racꞌaslemal in chique ja rachiꞌiꞌ ja nemacun cuqꞌuin ixokiꞌ in chique ja winak ja ni majun queqꞌuix nqueban ja ritzelal chiquewach ja winak.

Gálatas 5:20

In jun chic, nexuqueꞌe ja winak chiquewach cachbal tak winak in chwach rachbal tak nakun in nequinimaj ja rajꞌitzaꞌ. In juleꞌ chic rwach ja ritzelal nqueban caniꞌ tre cꞌullaꞌan tak riꞌil, chꞌaꞌoj, aquiakarem, ayewal. In cꞌoli nqueban xa por interés. Cꞌoli nquejach quiꞌ como junwiꞌ nquechꞌob juleꞌ in junwiꞌ chi na nquechꞌob juleꞌ chic.

Apocalipsis 13:13

In chakajaꞌ nuban nimak tak milagro, cꞌo nariꞌ nuban, nkajto kꞌakꞌ rmal chicaj pro ni chiquewach winak tok nuban queriꞌ.

Apocalipsis 13:15

In yataj tre chi cowini xuyaꞌ rxulanbal ja rachbal ja jun chic itzel chicop in cowini ja rachbal tzijoni chi nuyaꞌ orden chi necamsaxi ja winak ja maquexuqueꞌ chwach ja rachbal ja jun chic itzel chicop.

Apocalipsis 13:7

In yaꞌ lugar tre chakajaꞌ chi chꞌojin cuqꞌuin ja tinamit xin Dios, yaꞌ lugar tre chi arjaꞌ cowin chiquij xercamsaj. In yataj tre chakajaꞌ chi neꞌoc pa rukꞌaꞌ canojelal ja winak xa nak ta tribu ecꞌo wiꞌ, xa nak ta tinamit ecꞌo wiꞌ, xa nak ta tzobal netzijon wiꞌ in xa nak ta nación ecꞌo wiꞌ.

Apocalipsis 14:8

In pi chic jun ja ángel quewaꞌ nbij riꞌ: —Kaji ja nimlaj tinamit Babilonia, yojtaji. Queriꞌ rbanon ja Babilonia como arjaꞌ caniꞌ jun itzel ixok xa xeruban engañar ja winak ja recꞌo nojel tak nación, puersa xuban chique chi junwiꞌ yukeꞌ wiꞌ quecꞌuꞌx, ma ruqꞌuin ta ja Dios ja katzij chi Dios in ja Dios arjaꞌ pi ryewal chiquij rmal, neꞌe.

Apocalipsis 16:6

Queriꞌ nbij chawe como ja winak ejeꞌeꞌ quetix quiquiqꞌuel ja profeta awxin, xequicamsaj in queriꞌ queban chique juleꞌ chic tinamit awxin chakajaꞌ. Pro ja cꞌa camic xayaꞌ rjil rcꞌaxel chique, ja yaꞌ xacoj quicꞌ chiquewach in jariꞌ nquetij camic in jariꞌ ni yatal wiꞌ chiquij chi queriꞌ ban chique, neꞌe ja ángel.

Apocalipsis 17:2

Jawaꞌ ritzel ixok riꞌ, ja rey ja recꞌo chwach ja rwachꞌulew ejeꞌeꞌ quibanon ja ritzelal ruqꞌuin. In chakajaꞌ arjaꞌ rbanon ja ritzelal cuqꞌuin ja winak ja recꞌo chwachꞌulew in lawuloꞌ quibanon rmal, caniꞌ vino ryaꞌon chique ekꞌabarnak rmal. Queriꞌ xbij ja ángel chwe.

Apocalipsis 17:4

Ja cꞌa rixok arjaꞌ congana rwekon riꞌ, rcojon juleꞌ tziak morada in quiak caniꞌ rcoloril quicꞌ, in cꞌo juleꞌ chic rcojon ja congana nimak rjil caniꞌ tre oro caniꞌ tre perla in caniꞌ tre tak abaj ja banon rbanic. Ja rixok cꞌo jun vaso rcꞌan puro oro ocnak. Jariꞌ vaso nojnak chipan ja ritzelal ja rbanon ja rixok caniꞌ tre ja rbanon jeꞌe ja xa chuw chwach ja Dios in caniꞌ tre ja xa ntzꞌilor awanma rmal.

Apocalipsis 17:5

Ja cꞌa rixok cꞌo jun biꞌaj tzꞌibtal chi rpalaj pro jariꞌ biꞌaj ma chaka ta biꞌaj, rjawaxic chi nawasaj anaꞌoj trij ja nbij. Quewaꞌ ja biꞌaj riꞌ: —Babilonia ja congana nim rukꞌij, queteꞌ ja ritzel tak ixokiꞌ, ruqꞌuin arjaꞌ winakarnakto wiꞌ ja bantajnak jeꞌe chwachꞌulew ja xa chuw chwach ja Dios. Queriꞌ nbij ja biꞌaj.

Apocalipsis 18:3

Queriꞌ rbanon como arjaꞌ caniꞌ jun itzel ixok xa xeruban engañar ja winak ja recꞌo nojel nación, junwiꞌ yukeꞌ wiꞌ quecꞌuꞌx rmal, ma ruqꞌuin ta ja Dios ja katzij chi Dios in ja Dios arjaꞌ pi ryewal chiquij rmal. In chakajaꞌ ja rey ja recꞌo chwach ja rwachꞌulew ejeꞌeꞌ quibanon ja ritzelal ruqꞌuin ja Babilonia. In chakajaꞌ ja raj negocio ja recꞌo chwach ja rwachꞌulew, ejeꞌeꞌ eꞌocnak biyomaꞌ rmal ja negocio queban ruqꞌuin como ja mebaꞌil ja cꞌo ruqꞌuin nabey congana nim, nojel rwach ja mebaꞌil bukul ruqꞌuin in arjaꞌ congana nuyaꞌ rukꞌij rmal.

Apocalipsis 19:2

Como arjaꞌ nojel ja rpokonal nutakto niquirwariꞌ ja caniꞌ rbinto in ni rubey wiꞌ chakajaꞌ. Como arjaꞌ xukꞌet tzij trij ja nimlaj ixok itzel ixok. Jariꞌ ixok arjaꞌ xa xuyoj ja quicꞌaslemal ja winak waweꞌ chwachꞌulew, xa rmal ja rixok tok junwiꞌ yukeꞌ wiꞌ quecꞌuꞌx ja winak in ma ruqꞌuin ta ja Dios ja katzij chi Dios. Arjaꞌ xercamsaj ja rajsamajelaꞌ rxin ja Dios pro ja camic Dios xuyaꞌ rjil rcꞌaxel tre. Queriꞌ ja quibij.

Apocalipsis 21:8

Pro ja xa nquixbej quiꞌ nqueban chꞌaꞌoj ruqꞌuin ja ritzelal ejeꞌeꞌ nebe chipan ja yaꞌ ja yujun juleꞌ caniꞌ kꞌol ruqꞌuin rmajon cꞌatem, jariꞌ ja rcaꞌmul camíc. In queriꞌ nba̱n chique chakajaꞌ ja ma yukul ta quecꞌuꞌx ruqꞌuin ja Jesucristo in chique ja xa quitzꞌilorsaj ja canma chipan ja ritzelal in chique ja camsanelaꞌ in chique ja banol il mac ja rachiꞌiꞌ cuqꞌuin ixokiꞌ in chique ajꞌitzaꞌ in chique ja nexuqueꞌ chiquewach cachbal tak winak in chwach rachbal tak nakun jeꞌe in chique canojel ja tzꞌakol tak tzij.

Apocalipsis 22:15

Pro ja winak ja xa nquitzꞌilorsaj ja canma chipan ja ritzelal ejeꞌeꞌ matiyaꞌ lugar chique chi xqueꞌoc ta chipan ja tinamit in queriꞌ nba̱n chique chakajaꞌ ja rajꞌitzaꞌ in chique ja banol il mac ja rachiꞌiꞌ cuqꞌuin ixokiꞌ in chique ja camsanelaꞌ in chique ja nexuqueꞌ chiquewach cachbal tak winak in chwach rachbal tak nakun jeꞌe in chique canojel ja nel quecꞌuꞌx chi rbanic ja tzꞌakoj tak tzij.

Apocalipsis 9:20

Ja cꞌa juleꞌ chic winak ja ma xecamsax ta rmal awaꞌ ja roxiꞌ rwach rpokonal riꞌ ejeꞌeꞌ nixtacꞌa queqꞌuex ta jutzꞌit quinaꞌoj queyaꞌ can ta ja banoj cachbal tak winak owi rachbal tak nakun. In nixtacꞌa queyaꞌ can ta ja yaꞌoj quekꞌij ja demonio in nixtacꞌa queyaꞌ can ta ja yaꞌoj quekꞌij cachbal tak winak in rachbal tak nakun ja oro ocnak owi plata owi bronce owi abaj owi cheꞌ pro como xa e cachbal xa chewiꞌ tok maquecaꞌyi nixtacꞌa nquicꞌaxaj ta ja nbix chique in nixtacꞌa nebin ta jutzꞌit.