Apocalipsis 21:7 - Tz'utujil (Ja Cꞌacꞌa Chominem)

⁷ Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta jariꞌ nyataj chique ja herencia xin Dios pro ni chi nojelal, ja cꞌa ranin nij in Dios wiꞌ quixin in ejeꞌeꞌ nij e walcꞌwal wiꞌ.

Tz'utujil NT

⁷ Achnak nquech'ecmaja y majo'n nqueya' ta qui' pruk'a' rtzilal che xqueruch'ec ta jara' nyataja chca herencia rxin Dios per ne che njelal, anen ne en Dios wa' cxin y j-e' ne e wlec'wal wa'.

Apocalipsis 21:7 Iomraidhean Croise

San Mateo 19:29

In ja winak xa nak ta chi winakil ja wi cꞌoli quiyaꞌon can caniꞌ tre cochoch owi caniꞌ chique quinimal owi quechakꞌ owi canaꞌ owi caniꞌ chique quitataꞌ queteꞌ owi caniꞌ chique quixjayilal owi calcꞌwal owi caniꞌ tre culew, ja cꞌa wi mwal anin ja tok quiyaꞌon can jariꞌ más chi na qꞌuiy ja xtiyataj na chique chwach ja caniꞌ quiyaꞌon can. In chakajaꞌ cꞌo jun herencia nyataj chique jariꞌ ja utzlaj cꞌaslemal ja mta qꞌuisic trij.

San Mateo 25:21

In bix tre rmal ja rpatrón: —Utz xaban tre ja samaj, atat at jun utzlaj moso, janila naban cumplir ruqꞌuin ja rasamaj. Xa ti ma nim ta ja xinyaꞌ can chawe pro xaban cumplir. Camic, más chi na qꞌuiy xtinyaꞌ chawe chi nasamajij. Camic catajoꞌ, ninawachbilaj chipan ja quicotemal, neꞌxi.

San Mateo 25:34

Ja cꞌa recꞌo pa riquikꞌaꞌ quewaꞌ xtibij chique riꞌ: —Ixix utz ixtzꞌaton rmal ja nataꞌ Dios, camic quixajoꞌ cꞌa, quixoc chipan ja gobierno xin chilaꞌ chicaj, jariꞌ ja herencia ewxin chominto ojer ja tok majaꞌn titzꞌucarsaxi ja rwachꞌulew.

Marcos 10:17

Ja Jesús kas elem nuban chi numajel chic jutij rubey ja tok cꞌo jun achi cꞌamcꞌol ranim peti, xuqueꞌ chwach in quewaꞌ xbij tre riꞌ: —Maestro, atat congana at utzlaj achi. ¿Nak nban utzcꞌa chi nyataj chwe ja utzlaj cꞌaslemal ja mta qꞌuisic trij? neꞌe ja rachi.

Romanos 8:14

Queriꞌ rbanic como kanojel ja rokucꞌan rmal ja rEspíritu Santo ajoj cꞌariꞌ ok ralcꞌwal Dios.

Romanos 8:19

Ja cꞌa chicop in tijcoꞌm jeꞌe e cachbil chakajaꞌ xa nak ta ja retzꞌucarsanto rmal ja Dios ejeꞌeꞌ caniꞌ kas tzꞌel pon quewach trij ja kꞌij ja xtikꞌalajin wiꞌ ja nimlaj gloria xin Dios ja xtichꞌaꞌan chakij ja rok ralcꞌwal Dios.

2 Corintios 6:16

In jun chic, ja cachbal tak winak owi rachbal tak nakun ja nexuqueꞌ winak chiquewach ni ma rubey ta wiꞌ ja xqueco̱j ta chipan ja rochoch Dios. Queriꞌ nbij chewe como ix rochoch ja cꞌaslic Dios ja caniꞌ bitajnak can rmal ja Dios quewariꞌ: —Noc na wochoch ja canma in ninqꞌuejeꞌ na chiquicojol. Ja tok xterilaꞌ riꞌ tiempo anin in Dios chic quixin, ja cꞌa rejeꞌeꞌ e ntinamit chic triꞌ, neꞌe.

2 Corintios 6:18

ninoc Tatixel ewxin in nixoc tak ncꞌajol, nixoc tak nmeꞌal. Queriꞌ ja bitajnak can rmal ja kajaw Dios ja ni majun poder ja maquita cꞌo pa rukꞌaꞌ.

Hebreos 8:10

Ja tok xterilaꞌ ja tiempo anin cꞌo chi na jun ja chominem ja nchomarsaj na cuqꞌuin ja riy rumam can ja rIsrael in quewaꞌ rbanic riꞌ. Ja ley ja xquenbanbej mandar jariꞌ pa tak quewiꞌ xtincoj wiꞌ in xtintzꞌibaj pa tak canma chakajaꞌ. Anin in Dios quixin in ejeꞌeꞌ e ntinamit.

1 Pedro 3:9

Ja tok nba̱n itzel chewe owi tok cꞌoli ja pokonlaj tak tzij nbix chewe maxta teyaꞌ rjil rcꞌaxel. Ja neban, tebanaꞌ ja rutzil. Ja Dios arjaꞌ xixrsiqꞌuij chi ix banol tak utzil. Queriꞌ xuban utzcꞌa chi newilaꞌ na ja rutzil ixix chakajaꞌ rmalcꞌariꞌ tok nbij chewe, ni tebanaꞌ wiꞌ ja rutzil.

Apocalipsis 2:11

Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta ejeꞌeꞌ mta rukꞌaꞌ ja rcab camíc chique xtuban ta pokon chique. Queriꞌ ja natzꞌibajel tre ja ángel rxin ja riglesia ja cꞌo pan Esmirna, neꞌ chwe.

Apocalipsis 2:17

Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi nquetij ja maná ja rawatali in nyaꞌ na jujun abaj sak chique chakajaꞌ in jariꞌ abaj cꞌo jun biꞌaj cꞌacꞌa tzꞌibtal chwach ja majun otakyon, xa ruyon ja njach wiꞌ ja rabaj arjaꞌ notakini. Queriꞌ ja natzꞌibajel tre ja ángel rxin ja riglesia ja cꞌo Pérgamo, neꞌ chwe.

Apocalipsis 2:25

Xarwariꞌ, ja utzlaj tijonem ja cꞌol ewqꞌuin ni tenimaj wiꞌ, ni ta quirwariꞌ ebanon ja tok xquinpi chic jutij.

Apocalipsis 2:7

Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi nquetij rwach ja cheꞌ ja rcꞌamonto ja utzlaj cꞌaslemal ja mta qꞌuisic trij. Jariꞌ cheꞌ ja cꞌo pa nicꞌaj tre ja lugar paraíso ja bar cꞌo wiꞌ ja Dios. Queriꞌ ja natzꞌibajel tre ja ángel rxin ja riglesia ja cꞌo pa Efeso, neꞌ chwe.

Apocalipsis 21:3

Cꞌo cꞌa jun kulaj xincꞌwaxaj penak chilaꞌ chicaj congana nim rukul, quewaꞌ nbij riꞌ: —Camic ja Dios ni chiquicojol ja winak nqꞌuejeꞌ chi wiꞌ. Arjaꞌ nqꞌuejeꞌ cuqꞌuin in ejeꞌeꞌ nij e tinamit wiꞌ rxin. Dios mismo ja nqꞌuejeꞌ cuqꞌuin, arjaꞌ Dios quixin.