Apocalipsis 20:4 - Tz'utujil (Ja Cꞌacꞌa Chominem)

⁴ Cꞌacꞌariꞌ cꞌo juleꞌ trono xintzꞌat in ecꞌoli ja retzꞌubul chipan, yatajnak chique chi xeꞌoc e kꞌetol tak tzij. In xintzꞌat ja canma ja winak ja lasax quewiꞌ ja xecamsax rmal ja testigoꞌil ja queyaꞌ trij ja Jesús in rmal ja rtzobal Dios. Ejeꞌeꞌ riꞌ ja ma xexuqueꞌ ta chwach ja ritzel chicop nixtacꞌa chwach ta ja rachbal in ma xqueyaꞌ ta lugar tre chi coj retal chi quipalaj in nixtacꞌa chi quekꞌaꞌ ta chakajaꞌ. In xecꞌastaji, xeꞌoc e rach kꞌetol tak tzij ja Cristo tre jun mil junaꞌ.

Tz'utujil NT

⁴ C'jara' c'ola jle' trono xentz'et y ec'ola etz'bula chpam, yatanak chca che xe'oca e k'toy tak tzij. Y xentz'et canm wnak jxelsasa quewá' jxecomsasa rmal testig-il je xqueya' tzrij Jesús y rmal rtzojbal Dios. Arj-e' majo'n xexque' ta chwech itzel chcop nexte chwech rechbal, y majo'n xqueya' ta c'as tzra che xya' ta rital chqueplaj y nexte chquek'a' ta chka'. Y xec'astaja, xe'oca e k'toy tak tzij ruq'uin Cristo jun mil juna'.

Apocalipsis 20:4 Iomraidhean Croise

San Mateo 19:28

Cꞌacꞌariꞌ ja Jesús xbij chique: —Ni katzij wiꞌ ja xtinbij chewe riꞌ, ixix nixoc na wach kꞌetol tak tzij chipan ja cꞌacꞌa rwachꞌulew. Tokoriꞌ tok xquinpi chic anin ja rin Alcꞌwalaxel ja xinoc alaxic cuqꞌuin ja winak in cꞌo jun trono ja nintzꞌabeꞌ chipan ja ncꞌutu wxin chi congana nim nukꞌij. In ixix chakajaꞌ ja nij ixtran wiꞌ chwij cꞌo cablajuj trono nixtzꞌabeꞌ chipan in nyataj chewe chi nixoc kꞌetol tak tzij pa quewiꞌ ja winak ja cablajuj tribu rxin ja tinamit Israel.

San Mateo 24:10

Chipan ariꞌ tiempo e qꞌuiy ja winak ja xtiqueyaꞌ can ja yukulbal quecꞌuꞌx ja cꞌo wqꞌuin in ecꞌoli ja cachbil xa nequejach pa quekꞌaꞌ ja netzelan quixin, xa itzel xtiquetzꞌat chic quiꞌ chibil tak quiꞌ.

Marcos 6:16

Pro ja Herodes tok xcꞌaxaj ja nquibij ja winak arjaꞌ quewaꞌ xbij chic riꞌ: —Mni, ma queriꞌ ta. Ja rachi arjaꞌ Juan ja xinyaꞌ orden chi lasax rwiꞌ, arjaꞌ cꞌariꞌ ja cꞌastaj chiquicojol camnakiꞌ, neꞌe.

Marcos 6:27

Ja rey alnak xuyaꞌ orden tre jun soldado chi nbe, nerlasaj rwiꞌ ja Juan Bautista in nucꞌamto.

Marcos 9:11

Cꞌacꞌariꞌ quicꞌaxaj tre ja Jesús: —¿Nak cꞌa tre ja maestro xin ley ejeꞌeꞌ nquibij chi ja rElías rjawaxic chi arjaꞌ npi na nabey chwach ja Cristo? xecheꞌ tre.

San Lucas 1:17

Ja tok xtoc achi nnabeyaj chwach ja Cristo chi rchomarsaxic ja rubey, ni queriꞌ ranma ja caniꞌ ranma ja rojer profeta Elías in queriꞌ rpoder chakajaꞌ ja caniꞌ rpoder ja rElías. Jariꞌ nyataj na tre ja racꞌajol utzcꞌa chi nerchomarsaj ja tatixelaꞌ cuqꞌuin ja tak calcꞌwal utzcꞌa chakajaꞌ chi ja winak ja ma e nimanelaꞌ ta ncotakij ncucꞌaj jun utzlaj cꞌaslemal. Queriꞌ cꞌa xtuban, nerchomij pon ja winak utzcꞌa chi quichomin chic quiꞌ chi rcꞌulic ja kajaw Cristo. Queriꞌ xbij ja ángel tre ja Zacarías.

San Lucas 14:14

Ja wi queriꞌ naban jariꞌ cꞌo jun quicotemal xin Dios xtiyataj na chawe como ja winak ja cꞌa xennataj riꞌ ejeꞌeꞌ maquecowini xtiqueyaꞌ ta rcꞌaxel chawe. Natquicoti como cꞌo jun rtojbalil ja xtiyataj na chawe, tokoriꞌ xtiyataji ja tok xquecꞌastaji ja winak ja utz netzꞌa̱t rmal ja Dios.

San Lucas 22:30

Queriꞌ nban chewe utzcꞌa chi nyataj chewe chi xa junan xkowaꞌ wiꞌ ewqꞌuin pa mesa chipan ja ngobierno utzcꞌa chakajaꞌ chi nyataj chewe chi nixoqui ix kꞌetol tak tzij pa quewiꞌ ja cablajuj tribu rxin ja tinamit Israel, neꞌe ja Jesús chique ja rapóstol.

San Juan 14:19

Xajalal majaꞌn quinbe. Ja cꞌa tok xquinbe maquinquetzꞌat chic ja winak ja xa ruqꞌuin rwachꞌulew yukul wiꞌ quecꞌuꞌx pro ja rixix ninetzꞌat chi na. Como anin wcꞌan ja utzlaj cꞌaslemal ja mta qꞌuisic trij rmalariꞌ newcꞌaj na ixix chakajaꞌ ja utzlaj cꞌaslemal ja mta qꞌuisic trij.

Romanos 11:15

Ja Dios tok ma xerucꞌul chi ta ja raj Israel rmalcꞌariꞌ tok xixchomtaj chic ixix ruqꞌuin ja ma ix aj Israel ta. Pior cꞌa ja tok xterilaꞌ ja kꞌij tok xquerucꞌul chic jutij, ja queriꞌ caniꞌ ecamnak nabey pro caniꞌ necꞌastaj chiquicojol camnakiꞌ.

Romanos 8:17

Caniꞌ nba̱n tre jun alcꞌwalaxel cꞌo jun herencia nja̱ch tre in queriꞌ cꞌa chake ajoj chakajaꞌ, cꞌo jun herencia xin Dios majaꞌn tijach chake, ajoj jun xtijach na chake ja herencia ruqꞌuin ja Cristo. Queriꞌ xtikaban ja wi ajoj jun chakajaꞌ matikapokonaj ja xtikatij rpokonal ja caniꞌ xuban ja Cristo utzcꞌa chi ajoj jun xtiyataj na chake chi nchꞌaꞌan chakij ja gloria xin Dios ja caniꞌ yatajnak tre ja Cristo.

2 Timoteo 2:12

Ja wi nkacochꞌ ja rpokonal ja xtipi chakij jariꞌ xkoꞌoc rach kꞌetol tak tzij ja Jesucristo. Ja wi nkapokonaj nkabij chi okcꞌo pa rcuenta arjaꞌ nbij na chake chakajaꞌ chi ma ok rxin ta.

Apocalipsis 1:2

Anin nyaꞌon testigoꞌil trij ja rtzobal Dios, nyaꞌon testigoꞌil trij ja kꞌalasan rmal ja Jesucristo, nojel ja xintzꞌat nyaꞌon testigoꞌil trij.

Apocalipsis 1:9

Anin in Juan, in ewachꞌalal, in ewachbil chi rtijic ja rpokonal, in ewachbil chipan ja gobierno xin Dios, in ewachbil chi rcochꞌic nojel ja npi chakij rmal ja xa jun kabanon ruqꞌuin ja Jesucristo. Ja tok kꞌalasax chinwach ja xtintzꞌibaj chewe riꞌ tokoriꞌ tok xinqꞌuejeꞌ chipan ja lugar Patmos ja cꞌo pa mar. Rumac ja rtzobal Dios in rumac ja nyaꞌon rbixic ja Jesucristo chewiꞌ tok xinqꞌuejeꞌ triꞌ.

Apocalipsis 11:11

Ja cꞌa tok tzꞌakat oxiꞌ kꞌij in nicꞌaj xoqui ja rEspíritu Santo chique ja caꞌiꞌ testigo, jun Espíritu ja nyowi cꞌaslemal ja takonto rmal ja Dios. Cꞌacꞌariꞌ yataj chique chi xepeꞌi in ja xetzꞌato quixin congana quixbej quiꞌ cumal.

Apocalipsis 11:15

Jun chic ángel xulaj ja rtrompeta. Ja cꞌa tok xultaj rmal cꞌo juleꞌ nimak tak kulaj cꞌaxaxi chilaꞌ chicaj, quewaꞌ nbij riꞌ: —Ja gobierno jeꞌe ja cꞌo chwachꞌulew, camic ocnak pa rukꞌaꞌ ja kajaw Dios in pa rukꞌaꞌ ja Cristo ja rchaꞌon. Camic arjaꞌ nbano mandar como Rey in ni nuban wiꞌ mandar camic, chwak in chijutij, neꞌe.

Apocalipsis 11:3

Ja cꞌa ranin ecꞌo caꞌiꞌ testigo wxin nyaꞌ na chique chi nqueyaꞌ rbixic ja ntzobal, jun mil doscientos sesenta kꞌij ja nqueyaꞌ rbixic in ejeꞌeꞌ quicojon juleꞌ tziak banbal bis. Queriꞌ ja bix chwe.

Apocalipsis 11:7

Ja caꞌiꞌ testigo tok xtitzꞌakati ja tiempo rxin ja testigoꞌil ja nqueyaꞌ ja cꞌa ritzel chicop nelto in nchꞌojin cuqꞌuin. Ja ritzel chicop jariꞌ ja nelto chipan ja lugar ja cꞌa cꞌa nat cꞌo wiꞌ xeꞌ ulew chipan ja kꞌekumal, arjaꞌ xticowin chiquij xquercamsaj.

Apocalipsis 12:11

Pro ja rejeꞌeꞌ quechꞌec ja Diablo, ja quichꞌecbej rxin jariꞌ ja rquiqꞌuel ja Carnelo in chakajaꞌ ja testigoꞌil queyaꞌ tre ja Jesucristo in ma xquipokonaj ta queyaꞌ quiꞌ pa camíc rmal.

Apocalipsis 14:11

Congana sib neli chipan ja lugar ja bar nquetij wiꞌ rpokonal. Ja cꞌa sib njoteꞌe njoteꞌe, ni mta wiꞌ qꞌuisic trij. Nixtacꞌa nexulaꞌn ta jutzꞌit, chi pa kꞌij chi chakꞌaꞌ nij ecꞌo wiꞌ chipan ja rpokonal. Queriꞌ cꞌa nba̱n chique ja winak ja nexuqueꞌ chwach ja ritzel chicop in chwach ja rachbal chakajaꞌ in chique canojel xa nak ta ja neyoꞌ lugar tre chi nco̱j chique ja retal rubiꞌ ja ritzel chicop.

Apocalipsis 15:2

In cꞌoli xintzꞌat caniꞌ jun mar ja vidrio ocnak in caniꞌ kꞌakꞌ ryujun riꞌ ruqꞌuin. In xenutzꞌat ja winak ja xechꞌocmaji ja ma xban ta cowinem chiquij rmal ja ritzel chicop in ma xexuqueꞌ ta chwach ja rachbal in ma xqueyaꞌ ta lugar tre chi ncoji ja retal chique in nixtacꞌa ja número rxin ja rubiꞌ coj ta chique chakajaꞌ, ejeꞌeꞌ epaꞌl chuchiꞌ ja mar ja vidrio ocnak, cucꞌan ja arpa xin Dios.

Apocalipsis 17:8

Ja ritzel chicop xatzꞌat arjaꞌ cꞌasli ja rojer pro ja camic mchita pro ncꞌaseꞌ chi na jutij. Arjaꞌ nelto chipan ja nimlaj jul ja cꞌa cꞌa nat nekaj wiꞌ xeꞌ ulew. Ja cꞌa tok elnakto chic chipan ja jul nbe chi na chipan ja nimlaj rpokonal. Ja winak ja recꞌo chwachꞌulew kas xticꞌascꞌoꞌi xtiquetzꞌat ja ritzel chicop, nqueyaꞌ na rukꞌij. Ejeꞌeꞌ riꞌ winak ja mta quebiꞌ tzꞌibtal chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij, jariꞌ biꞌaj tzꞌibtal chipan ja libro ja tok majaꞌn titzꞌucarsaxi ja rwachꞌulew. Ja winak ma chaka ta cꞌascꞌoꞌi xtiquetzꞌat ja chicop, rumac chi arjaꞌ cꞌasli ja rojer pro ja camic mchita pro ncꞌaseꞌ chi na jutij.

Apocalipsis 2:26

Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta in ni matiqueyaꞌ can wiꞌ ja mandamiento wxin, anin xtinyaꞌ chique chi neꞌoc e kꞌetol tak tzij pa quewiꞌ ja winak ja recꞌo pa tak nación jeꞌe.

Apocalipsis 20:6

Congana quiꞌil chique waꞌ ja necꞌastaji nabey, ejeꞌeꞌ e xin Dios, ja cꞌa rcaꞌmul camíc mta rukꞌaꞌ chique. Pro ja nqueban, neꞌoc na e sacerdote rxin ja Dios. Neꞌoc na e sacerdote rxin ja Cristo in neꞌoc e rach kꞌetol tak tzij ja Cristo tre jun mil junaꞌ.

Apocalipsis 22:5

Chipan ariꞌ tiempo mchita akꞌaꞌ noqui, maticꞌatzin chic lámpara chique nixtacꞌa kꞌij ta chakajaꞌ como ja kajaw Dios arjaꞌ nchꞌaꞌani neruyaꞌ pa sakil, ja cꞌa rejeꞌeꞌ neꞌoqui como rey pro ni chijutij.

Apocalipsis 3:21

Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi neꞌoc wach tak kꞌetol tzij, nincachbilaj chipan ja ntrono caniꞌ xinban anin xinchꞌocmaji in xinwachbilaj ja nataꞌ Dios chipan ja rtrono.

Apocalipsis 4:4

Ja cꞌa trono cꞌo chic veinticuatro trono rsutin riꞌ trij in ecꞌo veinticuatro anciano e jujun etzꞌubul chipan. Ejeꞌeꞌ quicojon sakatak tziak in quicojon jujun corona pa quewiꞌ oro ocnak.

Apocalipsis 6:9

Ja cꞌa Carnelo xlasaj chic jun ja sello. Ja cꞌa tok lastaj rmal anin xenutzꞌat ja canma ja recamsan rmal ja rtzobal Dios in rmal ja testimonio ja quiyaꞌon. Chuxeꞌ ja raltar cꞌo wiꞌ ja canma.

Apocalipsis 7:3

in quewaꞌ xbij chique riꞌ: —Maxta teban camíc chwach ja rwachꞌulew nixtacꞌa pa mar in nixtacꞌa tre ta jun cheꞌ. Cꞌa tokoriꞌ neban ja tok xticojtaji sello kumal ja nkacojbej quetal ja rajsamajelaꞌ rxin ja Dios chi quipalaj, neꞌ chique.