Apocalipsis 20:12 - Tz'utujil (Ja Cꞌacꞌa Chominem)

¹² Cꞌacꞌariꞌ xenutzꞌat ja camnakiꞌ chi nimak quekꞌij chi ma nimak ta quekꞌij, ejeꞌeꞌ epaꞌloc chwach ja Dios in cꞌo cꞌa juleꞌ libro jaktaji. In cꞌo chi na jun ja libro jaktaji chakajaꞌ, jariꞌ libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij. Ja cꞌa camnakiꞌ ejeꞌeꞌ kꞌet tzij chiquij in ja kꞌetbex tzij chiquij jariꞌ ja tzꞌibtal chipan ja juleꞌ chic libro nak ja quibanon chipan ja quicꞌaslemal.

Tz'utujil NT

¹² C'jara' xenutz'et cnomki' che nmak quek'ij y jme nmak ta quek'ij, arj-e' epa'l oca chwech Dios y c'ola jle' libro xjaktaja. Y c'o chna jun libro xjaktaja chka', jara' libro abar tz'ibtal wa' quebi' jyatanak chca utzlaj c'aslemal rxin Dios je rxin junlic. Je cnomki' arj-e' xk'a'ta tzij chquij, y je xk'etbexa tzij chquij jara' jtz'ibtanak chpam jle' chic libro jnak quebnon chpam cc'aslemal.

Apocalipsis 20:12 Iomraidhean Croise

San Mateo 11:22

Pro anin nbij chewe, ja tok xterilaꞌ ja nimlaj kꞌij xin juicio más chi na nim ja rpokonal xtetij ixix chwach ja xtiquetij ja raj Tiro in ja raj Sidón.

San Mateo 16:27

Queriꞌ nbij chewe como anin ja rin Alcꞌwalaxel ja xinoc alaxic cuqꞌuin ja winak ninpi chi na jutij e wachbil ja ángel wxin, tokoriꞌ ja gloria xin Dios congana nchꞌaꞌan chwij in ja winak nunyaꞌaꞌ na rtojbalil chique chiquijujunal ja queban waweꞌ chwachꞌulew.

San Lucas 10:20

Camic ja ritzel tak espíritu nixquinimaj pro maxta xa rmalariꞌ quixquicoti. Mejor ja neban, como tzꞌibtali ja rebiꞌ chilaꞌ chicaj rmal tariꞌ nixquicoti, neꞌ chique.

Hechos 24:15

Anin nnimaj chi nerilaꞌ na jun kꞌij ja tok Dios nuyaꞌ chique ja camnakiꞌ chi necꞌastaji chi e utz chi ma e utz ta in queriꞌ nquinimaj ja wach tak aj Israel leꞌ chakajaꞌ.

Romanos 2:6

Rubey nuban como arjaꞌ nuyaꞌ na rtojbalil chique ja winak janiꞌ queban chipan ja quicꞌaslemal chiquijujunal.

1 Corintios 4:5

Ja cꞌa tok xtipi chic jutij ja kajaw Jesucristo jariꞌ tiempo xin kꞌetoj tzij rmalcꞌariꞌ nbij chewe chi ma tekꞌetlaꞌ pon chi ta tzij ixix trij jun winak. Ja cꞌa tok xtipeti ja kajaw Jesucristo arjaꞌ nlasaj na pa sakil nojel ja rawatali, arjaꞌ nkꞌalasaj na chakajaꞌ nojel ja nkachꞌob kaj pa tak kanma. Ja cꞌa tok xtikꞌalastaj rmal cꞌacꞌariꞌ ja Dios arjaꞌ xtibin chake chikajujunal wi utz kabanon owi mani.

2 Corintios 5:10

Queriꞌ nbij chewe como rjawaxic chi nokekaj na chwach ja kꞌetbaltzij rxin ja Cristo kanojelal utzcꞌa chi triꞌ nokkꞌalajin wiꞌ nak ja kabanon chipan ja cuerpo ja kucꞌan waweꞌ chwachꞌulew utzcꞌa chi nyataj chake chikajujunal ja rtojbalil ja kabanon wi utzil ja kabanon owi xa itzelal.

Filipenses 4:3

In atat chakajaꞌ ja rat utzlaj wach ajsamajel tabanaꞌ jun utzil, queꞌapaxbaj jutzꞌit ja kachꞌalal ixokiꞌ Evodia in Síntique utzcꞌa chi nquichomij quiꞌ. Como ejeꞌeꞌ congana xesamaji, kachbilaj kiꞌ cuqꞌuin chi rbixic ja utzlaj tzij xin Jesucristo in queriꞌ xuban chakajaꞌ ja Clemente e rachbil canojel ja juleꞌ chic wach tak ajsamajelaꞌ. Ejeꞌeꞌ tzꞌibtal quebiꞌ chipan ja libro xin Dios ja bar tzꞌibtal wiꞌ quebiꞌ ja winak ja nyataj chique ja utzlaj cꞌaslemal ja mta qꞌuisic trij.

Apocalipsis 11:18

Ja nación jeꞌe congana yictaj quiyewal chawij pro ja camic xurwilaꞌ ja kꞌij chi atat yictaj awayewal chiquij. Camic xurwilaꞌ ja kꞌij chi nkꞌe̱t tzij chiquij ja camnakiꞌ in xurwilaꞌ ja kꞌij ja nyataj wiꞌ ja rtojbalil chique ja rajsamajelaꞌ awxin caniꞌ chique ja profeta in caniꞌ chique ja juleꞌ chic tinamit awxin, caniꞌ chique canojelal ja nqueban respetar ja rabiꞌ chi nimak quekꞌij chi ma nimak ta quekꞌij. Camic xurwilaꞌ ja kꞌij chi ja neyojo rxin ja rwachꞌulew neyojtaj ejeꞌeꞌ chakajaꞌ. Queriꞌ ja quibij tre.

Apocalipsis 13:8

In canojel ja recꞌo chwachꞌulew xexuqueꞌ chwach, queriꞌ queban canojel ja mta quebiꞌ tzꞌibtal chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij. Jariꞌ libro rxin ja Carnelo ja xoc jun sacrificio, ja camsaxi, in tok majaꞌn titzꞌucarsaxi ja rwachꞌulew ni chominto chi wiꞌ triꞌ chi queriꞌ nba̱n tre.

Apocalipsis 17:8

Ja ritzel chicop xatzꞌat arjaꞌ cꞌasli ja rojer pro ja camic mchita pro ncꞌaseꞌ chi na jutij. Arjaꞌ nelto chipan ja nimlaj jul ja cꞌa cꞌa nat nekaj wiꞌ xeꞌ ulew. Ja cꞌa tok elnakto chic chipan ja jul nbe chi na chipan ja nimlaj rpokonal. Ja winak ja recꞌo chwachꞌulew kas xticꞌascꞌoꞌi xtiquetzꞌat ja ritzel chicop, nqueyaꞌ na rukꞌij. Ejeꞌeꞌ riꞌ winak ja mta quebiꞌ tzꞌibtal chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij, jariꞌ biꞌaj tzꞌibtal chipan ja libro ja tok majaꞌn titzꞌucarsaxi ja rwachꞌulew. Ja winak ma chaka ta cꞌascꞌoꞌi xtiquetzꞌat ja chicop, rumac chi arjaꞌ cꞌasli ja rojer pro ja camic mchita pro ncꞌaseꞌ chi na jutij.

Apocalipsis 19:5

Cꞌo cꞌa jun kulaj xelto triꞌ ja bar cꞌo wiꞌ ja trono, quewaꞌ nbij riꞌ: —Camic, ewanojel ja rix ajsamajelaꞌ rxin ja Dios congana teyaꞌaꞌ rukꞌij ja Dios, ewanojel ja nixbano respetar rxin chi nimak ekꞌij chi ma nimak ta ekꞌij camic teyaꞌaꞌ rukꞌij, necheꞌe.

Apocalipsis 2:23

Ja cꞌa xtinban chique ja ral jariꞌ nencamsaj in ja riglesia nojelal bien xtichꞌobtaj cumal chi anin nincowini ntzꞌat xa nak ta ja cꞌo pa tak quewiꞌ pa tak canma ja winak, ni majun awatal ta chinwach in anin nyaꞌ na rtojbalil chewe ja rebanon chejujunal, ja cꞌa rebanon jariꞌ ncꞌutuni janiꞌ ja rtojbalil ja xtinyaꞌ chewe.

Apocalipsis 20:11

Cꞌacꞌariꞌ cꞌo jun nimlaj trono sak xintzꞌat in chakajaꞌ xintzꞌat ja tzꞌubul chipan. Qꞌuisi ja caj, qꞌuisi ja rwachꞌulew, ma xucochꞌ ta qꞌuejeꞌ ta chwach ja tzꞌubul chipan ja trono, sachi pro chijutij.

Apocalipsis 20:13

Xecꞌastaji ja camnakiꞌ canojelal, ja wi pa mar ecꞌo wiꞌ owi xa nak ta lugar ecꞌo wiꞌ pro xecꞌastaji canojelal in kꞌet tzij chiquij. Ja kꞌetbex tzij chiquij jariꞌ ja quibanon chipan ja quicꞌaslemal.

Apocalipsis 20:15

In xa nak ta ja ma tzꞌibtal ta rubiꞌ chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij ejeꞌeꞌ xeqꞌuiakel chipan ja yaꞌ ja yujun juleꞌ caniꞌ kꞌol ruqꞌuin rmajon cꞌatem.

Apocalipsis 21:27

Pro ni majun nak ta ja xta itzel xtoc ta chipan. Ja banol tak itzelal e cachbil ja tzꞌakol tak tzij ni majun chique xqueꞌoc ta chipan. Ja neꞌoc chipan xa queyon ja cꞌo quebiꞌ tzꞌibtal chipan ja libro rxin ja Carnelo, jariꞌ libro ja bar tzꞌibtal wiꞌ quebiꞌ ja nyataj chique ja utzlaj cꞌaslemal ja mta qꞌuisic trij.

Apocalipsis 22:12

Ja Jesús quewaꞌ nbij riꞌ: —Bien tecꞌwaxaj, anin ninbe chic jutij chwachꞌulew chanim, ncꞌamonto ja rtojbalil quixin ja winak chiquijujunal nak quibanon chipan ja quicꞌaslemal.

Apocalipsis 3:5

Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta jariꞌ cꞌo juleꞌ tziak sak ja nyataj na chique chi nquecoj in anin matinchup quebiꞌ chipan ja libro ja bar tzꞌibtal wiꞌ quebiꞌ ja winak ja yatajnak chique ja utzlaj cꞌaslemal ja mta qꞌuisic trij in tok xqueꞌekaj chwach ja Nataꞌ e rachbil ja ángel ni chiquewach nbij wiꞌ chi ecꞌo pa ncuenta.