Apocalipsis 2:13 - Tz'utujil (Ja Cꞌacꞌa Chominem)

¹³ —Anin bien wotak ja rebanon in masqui triꞌ ixcꞌo wiꞌ ja bar cꞌo wiꞌ ja trono rxin ja Satanás pro ni ma ineyaꞌon can ta wiꞌ in tok bix chewe chi neyaꞌ can ja yukulbal ecꞌuꞌx wqꞌuin ni ma xeyaꞌ can ta wiꞌ. In nixtacꞌa xeyaꞌ can ta ja yukulbal ecꞌuꞌx wqꞌuin chakajaꞌ ja tok camsaxi ja rAntipas, arjaꞌ jun testigo wxin in ni ma xuyaꞌ can ta wiꞌ ja yukulbal rucꞌuꞌx wqꞌuin in camsax checojol triꞌ chipan ja lugar ja bar cꞌo wiꞌ ja Satanás.

Tz'utujil NT

¹³ —Anen bien wutkin jebnon. Mesque tzra' ixc'o wa' abar c'o wa' retrono Satanás per nmajo'n eney-on cta, y tak xbixa chewa chneya' cana yukbal ec'u'x wq'uin per nmajo'n xeya' cta. Y nmajo'n xeya' cta yukbal ec'u'x wq'uin chka' tak xcomsasa Antipas, arja' jun testigo wxin y nmajo'n xuya' cta yukbal ruc'u'x wq'uin, y xcomsasa checjol tzra' chpam lwar abar c'o wa' Satanás.

Apocalipsis 2:13 Iomraidhean Croise

San Mateo 10:23

Ja cꞌa tok nba̱n pokon chewe chipan jun tinamit quixanmaji, jix chic cha jun chic tinamit. Queriꞌ nbij chewe como ni katzij wiꞌ ja xtinbij chewe riꞌ, ja tok majaꞌn quixkꞌax chipan nojel ja tinamit ja cꞌo pa rcuenta Israel can ninpi chic jutij, anin ja rin Alcꞌwalaxel ja xinoc alaxic cuqꞌuin ja winak.

San Mateo 24:9

Ja cꞌa rixix nixjach na pa quekꞌaꞌ winak chi nba̱n pokon chewe in nixcamsax na. Xa itzel nixtzꞌat na cumal ja winak ja recꞌo nojel tak nación pro mwal anin ja tok xtiban queriꞌ chewe.

San Mateo 4:10

Ja cꞌa Jesús quewaꞌ xbij tre riꞌ: —Jat, catel chinwach Satanás como tzꞌibtal can chipan ja rtzobal Dios chi xa ruyon ja Dios ja rawajaw catxuqueꞌ chwach, xa ruyon arjaꞌ tayaꞌaꞌ rukꞌij, queriꞌ nbij, neꞌ tre.

San Lucas 21:17

Xa itzel nixtzꞌat na cumal canojel ja winak pro mwal anin ja tok xtiban queriꞌ chewe.

Hechos 22:20

In jun chic, ja tok camsaxi ja rEsteban ja rajsamajel awxin, anin incꞌo triꞌ ja bar camsax wiꞌ, in conforme triꞌ chi camsaxi, anin xinchajini ja quitziak ja xecamsan rxin, xincheꞌ tre.

Hechos 9:14

In cꞌuluto camic urkajnak chic waweꞌ, yaꞌonto tre cumal ja jefe quixin sacerdote chi cꞌo rukꞌaꞌ chake chi nokrucojel preso kanojel ja nkanataj abiꞌ, neꞌxi rmal ja rAnanías.

1 Tesalonicenses 5:21

Tecꞌwaxaj chi utz nojel ja nbixi ja wi utz owi ma utz ta, ja cꞌa wi utz tenimaj.

1 Timoteo 5:8

Rjawaxic chi neꞌatoꞌ ja rawachꞌalal in más chi na rjawaxic chi neꞌatoꞌ ja recꞌo pan awochoch. Ja wi cꞌo jun maquerutoꞌ ja rchꞌalal jariꞌ ncꞌutbej chi mta ja yukulbal rucꞌuꞌx ruqꞌuin ja Jesucristo, arjaꞌ más na lawuloꞌ chiquewach ja winak ja ma quiniman ta ja Jesucristo.

2 Timoteo 1:13

Ja utzlaj tijonem ja xincꞌut chawach jariꞌ ocnak abase chi quitijoxic ja winak, maxta tayaꞌ can in ni ta nyukeꞌ wiꞌ acꞌuꞌx ruqꞌuin ja Jesucristo, ni ta nqꞌuejeꞌ wiꞌ ja rajoben riꞌil xin Dios pan acꞌaslemal como jariꞌ rcꞌamonto chake ja Cristo Jesús ja yukul kacꞌuꞌx ruqꞌuin.

2 Timoteo 2:12

Ja wi nkacochꞌ ja rpokonal ja xtipi chakij jariꞌ xkoꞌoc rach kꞌetol tak tzij ja Jesucristo. Ja wi nkapokonaj nkabij chi okcꞌo pa rcuenta arjaꞌ nbij na chake chakajaꞌ chi ma ok rxin ta.

Hebreos 10:23

Ja Dios arjaꞌ ni nuyaꞌ wiꞌ ja rtzujunto rmalcꞌariꞌ wachꞌalal cow kopeꞌe jutzꞌit chi raybexic, maxta ticapuj kacꞌuꞌx.

Hebreos 3:6

Ja cꞌa Cristo chakajaꞌ xuban cumplir ja samaj xin Dios, arjaꞌ cꞌayon ja tinamit xin Dios pro ma moso ta, arjaꞌ Alcꞌwalaxel. In ajoj ok tinamit xin Dios ja wi cow xkopeꞌi, ja wi ni ma xtikayaꞌ can ta wiꞌ ja yukulbal kacꞌuꞌx ruqꞌuin, ja wi ni xkoquicot wiꞌ chi raybexic ja Jesús.

Santiago 2:7

¿La ma ejeꞌeꞌ ta cꞌa biyomaꞌ chakajaꞌ ja xa itzel netzijon tre ja rubiꞌ ja Jesucristo? pro makanaꞌ maquita congana nim rukꞌij ja rubiꞌ ja Jesucristo, in chakajaꞌ ja rubiꞌ ja Jesucristo jariꞌ nataxi pan ecuenta chi echajixic.

Apocalipsis 1:5

in xtecochij ta tre chakajaꞌ ja Jesucristo, arjaꞌ ocnak testigo xin Dios in ni katzij wiꞌ ja testigoꞌil nuyaꞌ, arjaꞌ ja Ralcꞌwalaxel nabey winak ja cꞌastaji chiquicojol ja camnakiꞌ, arjaꞌ cꞌo rukꞌaꞌ chique ja rey xin rwachꞌulew chi neruban mandar. Arjaꞌ janila xokrajoꞌ, xuchꞌaj ja kil kamac tre ja rquiqꞌuel

Apocalipsis 11:3

Ja cꞌa ranin ecꞌo caꞌiꞌ testigo wxin nyaꞌ na chique chi nqueyaꞌ rbixic ja ntzobal, jun mil doscientos sesenta kꞌij ja nqueyaꞌ rbixic in ejeꞌeꞌ quicojon juleꞌ tziak banbal bis. Queriꞌ ja bix chwe.

Apocalipsis 12:11

Pro ja rejeꞌeꞌ quechꞌec ja Diablo, ja quichꞌecbej rxin jariꞌ ja rquiqꞌuel ja Carnelo in chakajaꞌ ja testigoꞌil queyaꞌ tre ja Jesucristo in ma xquipokonaj ta queyaꞌ quiꞌ pa camíc rmal.

Apocalipsis 13:2

Ja ritzel chicop xintzꞌat caniꞌ rbanic jun balam pro ja rkan caniꞌ rkan oso in ja rwarey caniꞌ rwarey cój. Ja cꞌa dragón, ja poder ja cꞌo pa rukꞌaꞌ in ja rtrono jariꞌ xujach tre ja ritzel chicop in congana nim ja kꞌetbaltzij xujach tre chakajaꞌ.

Apocalipsis 14:12

Waweꞌ nkatzꞌat wiꞌ chi ja tinamit xin Dios ja ni nquinimaj wiꞌ ja rmandamiento in ni yukul wiꞌ quecꞌuꞌx ruqꞌuin ja Jesucristo ejeꞌeꞌ congana ncꞌatzin chique ja quipaciencia chi nquecochꞌ quewach chipan ja penak chiquij.

Apocalipsis 17:14

Ejeꞌeꞌ nechꞌojin na ruqꞌuin ja Carnelo pro ja cꞌa Carnelo arjaꞌ nchꞌocmaji. Nchꞌocmaji como arjaꞌ ocnak Jefe quixin nimak tak jefe, arjaꞌ ocnak Rey quixin nimak tak rey. Ja cꞌa rachbil ejeꞌeꞌ esiqꞌuin echaꞌon rmal ja Dios in ni yukul wiꞌ quecꞌuꞌx ruqꞌuin. Queriꞌ xbij ja ángel chwe.

Apocalipsis 17:6

Ja rixok xintzꞌat arjaꞌ kꞌabarel pro ja kꞌabarsan rxin jariꞌ ja quiquiqꞌuel ja tinamit xin Dios in ja quiquiqꞌuel ja xecam rmal ja yukulbal quecꞌuꞌx ruqꞌuin ja Jesús. Ja ranin congana cꞌascꞌoꞌi xintzꞌat ja rixok.

Apocalipsis 2:2

—Anin bien wotak ja rebanon, wotak chi janila jun cꞌayewalaj samaj xin Dios ja remajon rbanic, wotak chi janila ecochꞌon ewach chipan in wotak chi ni majun egana cuqꞌuin ja ritzel tak winak pro ja rebanon xeꞌecꞌambajaj ja winak ja nebini chi e apóstol pro ma e apóstol ta in xewotakij chi xa e tzꞌakol tak tzij.

Apocalipsis 3:11

Bien tecꞌwaxaj, anin ninbe chic jutij chwachꞌulew chanim, tebanaꞌ cuenta ja yatajnak chic chewe utzcꞌa chi ni majun nak ta xtilasan ta chewe ja recorona.

Apocalipsis 3:3

Rmalcꞌariꞌ nbij chewe, kas turkaj chewe ja utzlaj tijonem ja cꞌutunto chewach nabey in xeyaꞌ ewxquin tre. Camic, ni jaꞌ wiꞌ tijonem tenimaj in teqꞌuexaꞌ ja renaꞌoj. Nowi maquixcꞌascꞌoti, can ninbe ewqꞌuin pro ma ewotak ta nak hora xquinekaji caniꞌ nuban jun alakꞌom ja ni majun otakyon nak hora tok nekaji.