Apocalipsis 19:12 - Tz'utujil (Ja Cꞌacꞌa Chominem)

¹² Ja parwach caniꞌ rxak kꞌakꞌ ncaꞌyi in ja pa rwiꞌ congana qꞌuiy corona rcojon. In cꞌo jun biꞌaj tzꞌibtal chi rpalaj in jariꞌ biꞌaj ni majun nak ta otakyon nak rcꞌamonto, xa ruyon arjaꞌ otakyon nak rbanic.

Tz'utujil NT

¹² Jpe rk'arwech ajni' ruxak k'ak' nca'ya, y congan q'uiy corona rucsan pe rwá'. Y c'ola jun bi'aj tz'ibtala chuplaj y jara' bi'aj nmajo'n nak ojtakyona nak rec'mon ta, xruyon arja' ojtakyona nak rbanic.

Apocalipsis 19:12 Iomraidhean Croise

San Mateo 11:27

In xbij chic chique: —Ni majun nak ta ja maquita jachon pa nukꞌaꞌ rmal ja Nataꞌ. Ni majun nak ta otakyon ja kas mero rnaꞌoj ja Ralcꞌwalaxel pro ja rotakyon xa ruyon ja Dios ja Tatixel. In chakajaꞌ ni majun nak ta otakyon ja kas mero rnaꞌoj ja Tatixel pro ja rotakyon xa nuyon anin ja rin Alcꞌwalaxel, in ja renchaꞌon chi nkꞌalasaj chiquewach, ejeꞌeꞌ cotak chakajaꞌ.

San Mateo 21:5

—Ja winak ja recꞌo chipan ja tinamit Sión quewaꞌ tebij chique riꞌ: —Tetzꞌataꞌ mpeꞌ leꞌ, peti ja Rey ewxin, arjaꞌ matuyaꞌ rukꞌij, xa trij jun ti bur tzꞌubulto wiꞌ. Ja ti bur cꞌa ti coꞌl na, ral jun bur banol ijkaꞌm, catcheꞌ chique. Queriꞌ bitajnak can rmal ja profeta.

San Mateo 28:18

Peti ja Jesús in quewaꞌ xbij chique riꞌ: —Nojel ja poder xin chilaꞌ chicaj jachon pa nukꞌaꞌ rachbil nojel ja poder xin rwachꞌulew.

San Lucas 10:22

Cꞌacꞌariꞌ xbij: —Ni majun nak ta ja maquita jachon pa nukꞌaꞌ rmal ja Nataꞌ. Ni majun nak ta otakyon ja kas mero rnaꞌoj ja Ralcꞌwalaxel pro ja rotakyon xa ruyon ja Dios ja Tatixel. In chakajaꞌ ni majun nak ta otakyon ja kas mero rnaꞌoj ja Tatixel pro ja rotakyon xa nuyon anin ja rin Alcꞌwalaxel, in ja renchaꞌon chi nkꞌalasaj chiquewach, ejeꞌeꞌ cotak chakajaꞌ, neꞌe.

San Juan 17:11

Padre Santo, camic maquinqꞌuejeꞌ chic más waweꞌ chwachꞌulew pro ja rejeꞌeꞌ neqꞌuejeꞌ na pro ja ranin ninmeloj chic jutij awqꞌuin. Pan abiꞌ atat queꞌachajij can queꞌawaraj can ja reꞌayaꞌon chwe utzcꞌa xta jun xtiqueban ja caniꞌ kabanon ajoj awqꞌuin xa jun kabanon.

San Juan 17:12

Anin tok xinqꞌuejeꞌ cuqꞌuin waweꞌ chwachꞌulew pan abiꞌ atat xenuban cuenta, majun nak ta chique xtzꞌilaꞌ ta riꞌ, xa jun chique ja xtzꞌilaꞌ riꞌ pro jariꞌ ja ni yatal wiꞌ trij chi nutij pokon chipan ja juicio. Queriꞌ xuban utzcꞌa chi nbantaj cumplir ja tzꞌibtal can ojer chipan ja rtzobal Dios.

Efesios 1:21

Queriꞌ xuban ja Dios tre ja Cristo, xuyaꞌ tre chi noc pa rukꞌaꞌ ja kꞌetbaltzij pro ni majun kꞌetbaltzij ja maquita xoc pa rukꞌaꞌ, in xuyaꞌ tre chi más na nim rukꞌij arjaꞌ chiquewach canojelal ja kꞌetol tak tzij in ma queyon ta ja kꞌetol tak tzij ja re rxin awaꞌ tiempo riꞌ in queriꞌ chique ja re rxin chic jun tiempo ja majaꞌn tekawilaꞌ chakajaꞌ.

Hebreos 2:9

Pro ja Jesús jariꞌ nkatzꞌat chi arjaꞌ takto waweꞌ chwachꞌulew, xoc kach winak in ban tre chi ma kas ta nim chic rukꞌij chiquewach ja ángel. Pro ja camic yaꞌon chic tre rmal ja Dios chi janila nim chic rukꞌij como xurtijaꞌ kaj ja rpokonal, camsaxi. Queriꞌ ban tre utzcꞌa chi xurcam kaj pa kacuenta chikajujunal. Rmal ja rutzil ja nsipaj ja Dios chake chewiꞌ tok cam pa kacuenta.

Apocalipsis 1:14

Ja rsamal rwiꞌ congana sak sak in ja parwach caniꞌ rxak kꞌakꞌ.

Apocalipsis 12:3

In cꞌo chi na jun retal ja winakari chilaꞌ chicaj, chaka jalal tok winakar jun nimlaj chicop, jun itzel chicop binaꞌan tre dragón, quiak rij, wukuꞌ rwiꞌ in lajuj rucꞌaꞌ. Ja jujun rwiꞌ jujun corona rcojon tre.

Apocalipsis 13:1

Anin xinpeꞌe chiꞌ mar pa snayiꞌ, cꞌo chi na jun itzel chicop xintzꞌat, ntajini nelto pa mar, wukuꞌ rwiꞌ in lajuj rucꞌaꞌ. Ja jujun rucꞌaꞌ jujun corona rcꞌan. Ja jujun rwiꞌ jujun biꞌaj rcꞌan, ja cꞌa biꞌaj xa ofensa rcꞌamonto tre ja Dios.

Apocalipsis 19:16

Ja tziak rcojon cꞌo jun biꞌaj tzꞌibtal trij in bien kꞌalaj ja bar tzꞌibtal wiꞌ, quewaꞌ nbij ja biꞌaj riꞌ, Rey quixin nimak tak rey, Jefe quixin nimak tak jefe.

Apocalipsis 3:12

Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi neꞌoqui e caniꞌ rkan tak jay rxin ja templo rxin ja nDios, xajutij neqꞌuejeꞌ triꞌ, ni majun nak ta xtilasan ta quixin chipan. In jun chic, can ntzꞌibaj na rubiꞌ ja nDios chiquij in ntzꞌibaj rubiꞌ ja tinamit rxin ja nDios chiquij chakajaꞌ. Jawaꞌ tinamit riꞌ jariꞌ ja cꞌacꞌa Jerusalén ja nelto chicaj ruqꞌuin ja nDios in nkajto cꞌa chwach ja rwachꞌulew. In cꞌo jun biꞌaj cꞌacꞌa wxin jariꞌ ntzꞌibaj chiquij chakajaꞌ.

Apocalipsis 6:2

In chaka jalal tok xintzꞌat jun quiej sak rij in cꞌo jun tzꞌubul trij rcꞌan jun arco ja nbanbej chꞌaꞌoj. Cꞌo jun corona jach tre. Ja cꞌa tok jachtajel tre cꞌacꞌariꞌ be, xumaj quichꞌaquic ja rcꞌulel, be chi quichꞌaquic canojelal.