Apocalipsis 14:10 - Tz'utujil (Ja Cꞌacꞌa Chominem)

¹⁰ ejeꞌeꞌ congana lawuloꞌ nba̱n chique, npi ryewal ja Dios chiquij pro ni ma jutzꞌit ja ryewal ja maquita nucoj chiquij. Congana nquetij na rpokonal pa kꞌakꞌ, cꞌoli caniꞌ kꞌol rmajon cꞌatem neqꞌuejeꞌ chipan pro ni chiquewach ja santilaj ángel in chwach ja Carnelo tok xtiban queriꞌ chique.

Tz'utujil NT

¹⁰ wcara' nqueban jara' congan lowlo' nba'n na chca y npeta ryiwal Dios chquij, per nmajo'n jtz'it ryiwal mquita nucsaj chquij. Congan nquetaj na lowlo' pk'ak' ruq'uin azufre, per ne chquewech santlaj tak ángel y chwech Carne'l tak xtba'na cara' chca.

Apocalipsis 14:10 Iomraidhean Croise

San Mateo 20:22

Ja cꞌa Jesús arjaꞌ xbij chique ja ral ja rixok: —Ixix xa ma ewotak ta ja nixtajini necꞌutuj chwe. ¿La nixcowini xtetij ja rpokonal ja caniꞌ xtintij anin? Como ja xtiban anin chwe caniꞌ ninban bautizar chipan jun nimlaj rpokonal. Ja cꞌa rixix ¿la necochꞌ nixkꞌax chipan? neꞌ chique. —Nokcowini, xecheꞌ tre.

San Mateo 25:41

Ja cꞌa recꞌo pa rxcon quewaꞌ xtibij chique riꞌ: —Ixix ja xa itzel ixtzꞌaton rmal ja Dios quixel chinwach, camic nixbe chipan ja kꞌakꞌ ja mta qꞌuisic trij, jariꞌ kꞌakꞌ xa rmal ja diablo tok chomin chi nta̱kel arjaꞌ chipan e rachbil ja ángel rxin.

San Mateo 26:39

Cꞌacꞌariꞌ junwiꞌ xyonaj pon wiꞌ riꞌ ruyon, xuqueꞌe in xumaj rbanic oración: —Nataꞌ, anin nwajoꞌ nabij ta chwe chi maquita ninkꞌax chipan awaꞌ rpokonal ja penak chinwach riꞌ xarwariꞌ ni ta cꞌa xquinkꞌax wiꞌ chipan ja wi queriꞌ nawajoꞌ chwe chi nban, neꞌ tre ja Tatixel.

Marcos 8:38

Queriꞌ nbij chewe como ja winak ja recꞌo chipan awaꞌ tiempo riꞌ xa nak ta chi winakil wi xa qꞌuixbal nquenaꞌ nquecoj quiꞌ wqꞌuin in wi xa qꞌuixbal nquenaꞌ rmal ja ntzobal, anin chakajaꞌ qꞌuixbal nnaꞌ chi xquenucoj ta pa ncuenta. Anin ja rin Alcꞌwalaxel ja xinoc alaxic cuqꞌuin ja winak xa qꞌuixbal nnaꞌ chi xquenucoj ta pan ncuenta tokoriꞌ tok xquinpi chic jutij e wachbil ja ángel xin Dios ja tok congana nchꞌaꞌan chic chwij ja gloria xin Dios. Ja winak ja recꞌo chipan awaꞌ tiempo riꞌ ejeꞌeꞌ xa quiyaꞌon can ja Dios in junwiꞌ chi na yukul wiꞌ quecꞌuꞌx, congana il mac ja netajini nqueban, neꞌe ja Jesús chique.

Marcos 9:44

Triꞌ nquetij wiꞌ rpokonal ja winak pro jun rpokonal ja ni mta wiꞌ qꞌuisic trij in ja kꞌakꞌ ni mta wiꞌ chupic trij.

Hechos 10:22

—Ajoj oktakonto awqꞌuin rmal jun capitán Cornelio rubiꞌ. Arjaꞌ congana utzlaj achi in nxbej riꞌ chwach ja Dios. Congana utz ntzꞌa̱t cumal ja rawach tak aj Israel pro ni canojelal. Cꞌo cꞌa jun ángel xin Dios xbij tre chi nutak asiqꞌuixic utzcꞌa chi natbe ruqꞌuin utzcꞌa chi ncꞌaxaj nak ja xtabij tre. Rmalcꞌariꞌ ja tok okpenak awqꞌuin camic, xecheꞌ tre.

2 Tesalonicenses 1:7

in nuyaꞌ na chewe chi mchita rpokonal netij in queriꞌ chake ajoj chakajaꞌ. Queriꞌ xtibantaji ja tok xtipi chic jutij ja kajaw Jesús, arjaꞌ pa rxak kꞌakꞌ cꞌoto wiꞌ e rachbil ja ángel rxin ja congana quichokꞌakꞌ.

Judas 1:7

In nwajoꞌ nnataj chewe chakajaꞌ ja ban chique ja winak ja recꞌo chipan ja caꞌiꞌ tinamit Sodoma in Gomorra ojer e cachbil ja recꞌo chipan juleꞌ chic tinamit ja cꞌo chiquinakaj. Ejeꞌeꞌ chakajaꞌ quimajon rbanic juleꞌ itzelal, achiꞌiꞌ nemacun cuqꞌuin cach tak achiꞌiꞌ in ixokiꞌ nemacun cuqꞌuin cach tak ixokiꞌ. Pro chaka jalal tok cꞌoli ja kꞌakꞌ kajto trij ja quitinamit in cꞌati ja tinamit rmal, jariꞌ noc ejemplo rxin ja nimlaj rpokonal chipan ja jun chic kꞌakꞌ ja ni mta wiꞌ chupic trij.

Apocalipsis 15:7

Pi jun chique ja re quijiꞌ, xujach jujun vaso chique ja wukuꞌ ángel oro ocnak. Ja cꞌa vaso nojnak ryewal ja Dios chipan, jariꞌ Dios ja ni mta wiꞌ camíc trij.

Apocalipsis 16:19

Ja cꞌa nimlaj tinamit oxiꞌ xuban rmal ja cubarkan in ja juleꞌ chic nimak tak tinamit ja cꞌo pa tak nación jeꞌe jariꞌ be pa tokꞌulew rmal chakajaꞌ. Ja cꞌa Dios arjaꞌ xurkaj tre ja nimlaj tinamit Babilonia, janila xcꞌotsaj ryewal trij. Ja cꞌa xuban, nojel ja rpokonal ja rchomarsanto chi nutakto trij ja tinamit Babilonia puersa xutij na.

Apocalipsis 18:3

Queriꞌ rbanon como arjaꞌ caniꞌ jun itzel ixok xa xeruban engañar ja winak ja recꞌo nojel nación, junwiꞌ yukeꞌ wiꞌ quecꞌuꞌx rmal, ma ruqꞌuin ta ja Dios ja katzij chi Dios in ja Dios arjaꞌ pi ryewal chiquij rmal. In chakajaꞌ ja rey ja recꞌo chwach ja rwachꞌulew ejeꞌeꞌ quibanon ja ritzelal ruqꞌuin ja Babilonia. In chakajaꞌ ja raj negocio ja recꞌo chwach ja rwachꞌulew, ejeꞌeꞌ eꞌocnak biyomaꞌ rmal ja negocio queban ruqꞌuin como ja mebaꞌil ja cꞌo ruqꞌuin nabey congana nim, nojel rwach ja mebaꞌil bukul ruqꞌuin in arjaꞌ congana nuyaꞌ rukꞌij rmal.

Apocalipsis 18:6

Teyaꞌaꞌ rjil rcꞌaxel nojel ja ritzelal rbanon chewe. Xarwariꞌ más chi na nim ja rtojbalil teyaꞌaꞌ tre. Ja wi congana rpokonal quitijon ja winak rmal más chi na ja teyaꞌaꞌ arjaꞌ tre.

Apocalipsis 19:15

Cꞌo jun espada elnakto pa ruchiꞌ congana is rutzaꞌm, jariꞌ nucoj chiquij ja winak ja recꞌo pa tak nación jeꞌe chi nersocbej. Congana jun nimlaj poder nqꞌuejeꞌ pa rukꞌaꞌ ja nucoj chiquij chi cow neruchap tre in nerbanbej mandar. Arjaꞌ neruyaꞌ ja winak chipan jun nimlaj rpokonal, nerupakꞌ chi rkan caniꞌ nuban jun achi nupakꞌ chakan ja uva chipan ja jul ja bar nlasax wiꞌ ja riyaꞌl in ja Dios ja ni majun poder ja maquita cꞌo pa rukꞌaꞌ, arjaꞌ janila ncꞌotsaj ryewal chiquij.

Apocalipsis 19:20

Ja cꞌa ritzel chicop arjaꞌ chapi, xoc preso rachbil ja profeta ja ma katzij ta chi profeta. Jariꞌ profeta ja xuban juleꞌ milagro chwach ja ritzel chicop ja xerbanbej engañar ja winak. Ejeꞌeꞌ riꞌ winak ja xeyoꞌ lugar tre chi coj chique ja retal ja ritzel chicop in ja xexuqueꞌ chwach ja rachbal. Ja cꞌa ritzel chicop rachbil ja profeta xechapi, ecꞌasli xeqꞌuiakel chipan ja nimlaj lugar ja cꞌoli nojnak chipan caniꞌ kꞌol in rmajon cꞌatem.

Apocalipsis 20:10

Ja cꞌa Diablo ja bano engañar quixin arjaꞌ qꞌuiakel chipan ja nimlaj lugar ja cꞌoli nojnak chipan caniꞌ kꞌol in rmajon cꞌatem. Triꞌ qꞌuiakel wiꞌ ja bar ecꞌo chi wiꞌ ja ritzel chicop rachbil ja profeta ja ma katzij ta chi profeta. Triꞌ nba̱n wiꞌ pokon chique chi pa kꞌij chi chakꞌaꞌ, chijutij nebe chipan ja rpokonal, ni maqueꞌel wiꞌ chipan.

Apocalipsis 20:14

Ja camíc rachbil ja lugar ja bar xeqꞌuejeꞌ wiꞌ camnakiꞌ jariꞌ qꞌuiakel chipan ja nimlaj lugar ja cꞌoli nojnak chipan caniꞌ kꞌol in rmajon cꞌatem. Ja tok natbe riꞌ chipan ja lugar jariꞌ ja rcaꞌmul camíc.

Apocalipsis 21:8

Pro ja xa nquixbej quiꞌ nqueban chꞌaꞌoj ruqꞌuin ja ritzelal ejeꞌeꞌ nebe chipan ja yaꞌ ja yujun juleꞌ caniꞌ kꞌol ruqꞌuin rmajon cꞌatem, jariꞌ ja rcaꞌmul camíc. In queriꞌ nba̱n chique chakajaꞌ ja ma yukul ta quecꞌuꞌx ruqꞌuin ja Jesucristo in chique ja xa quitzꞌilorsaj ja canma chipan ja ritzelal in chique ja camsanelaꞌ in chique ja banol il mac ja rachiꞌiꞌ cuqꞌuin ixokiꞌ in chique ajꞌitzaꞌ in chique ja nexuqueꞌ chiquewach cachbal tak winak in chwach rachbal tak nakun jeꞌe in chique canojel ja tzꞌakol tak tzij.