Apocalipsis 11:18 - Tz'utujil (Ja Cꞌacꞌa Chominem)

¹⁸ Ja nación jeꞌe congana yictaj quiyewal chawij pro ja camic xurwilaꞌ ja kꞌij chi atat yictaj awayewal chiquij. Camic xurwilaꞌ ja kꞌij chi nkꞌe̱t tzij chiquij ja camnakiꞌ in xurwilaꞌ ja kꞌij ja nyataj wiꞌ ja rtojbalil chique ja rajsamajelaꞌ awxin caniꞌ chique ja profeta in caniꞌ chique ja juleꞌ chic tinamit awxin, caniꞌ chique canojelal ja nqueban respetar ja rabiꞌ chi nimak quekꞌij chi ma nimak ta quekꞌij. Camic xurwilaꞌ ja kꞌij chi ja neyojo rxin ja rwachꞌulew neyojtaj ejeꞌeꞌ chakajaꞌ. Queriꞌ ja quibij tre.

Tz'utujil NT

¹⁸ Je' nación congan xyictaja cyiwal chawij per camic xerla' k'ij che atet xyictaja awyiwal chquij j-e'. Camic xerla' k'ij che nk'e'ta tzij chquij je' cnomki', y xerla' k'ij je nyataj wa' rtojbalil chca je' ajsmajma' awxin ajni' chca je' profeta, ajni' chca jle' chic tnamet awxin, ajni' chca conjelal je nqueban respetar abi' che nmak quek'ij y che me nmak ta quek'ij. Camic xerla' k'ij cxin je nqueyjowa rxin rwech ruch'lew che nqueyo'ja j-e' chka'. Cara' xecbij tzra.

Apocalipsis 11:18 Iomraidhean Croise

San Mateo 5:12

Ja tok queriꞌ nqueban chewe quixquicoti pro congana quixquicoti como jariꞌ cꞌo jun nimlaj rtojbalil ja nyataj na chewe chilaꞌ chicaj. Quixquicoti como queriꞌ ban chique ja rojer tak profeta chakajaꞌ ban itzel chique.

San Lucas 1:50

Ni npokonaj wiꞌ kawach ja wi nkaxbej kiꞌ chwach, niquirwariꞌ nuban chake ja rok winak xa nak ta tiempo nokqꞌuejeꞌ wiꞌ waweꞌ chwachꞌulew.

Hebreos 9:27

Caniꞌ chique ja winak ejeꞌeꞌ cayben ja camíc pro xa jutij necami, ma caꞌmul ma oxmul ta. Ja cꞌa cajal chic chiquewach xa kꞌetoj tzij chic ja majaꞌn tiban chiquij.

Apocalipsis 10:7

pro nutakto chanim. Ja cꞌa tok xterilaꞌ ja kꞌij tok ncꞌaxaxi rukul ja trompeta ja xtixulax rmal ja qꞌuisbal ángel tokocꞌariꞌ xtikꞌalajini nojelal ja rchominto ja Dios ja rawatali nabey, xtibantaj cumplir nojelal ja caniꞌ xbij can chique ja profeta ja rajsamajelaꞌ rxin. Queriꞌ xbij ja ángel.

Apocalipsis 11:2

Pro ja rwajay ja cꞌo chwach ja templo jariꞌ ma tawetaj ta como jariꞌ jachon pa quekꞌaꞌ ja ma e aj Israel ta in ja rejeꞌeꞌ cuarentidós icꞌ neqꞌuejeꞌ chwach ja santilaj tinamit xin Dios in nquepakꞌ chi cakan.

Apocalipsis 13:10

Ja nechapo quixin ja winak chi nequecoj preso pa quekꞌaꞌ jariꞌ necha̱p chic ejeꞌeꞌ chakajaꞌ, neꞌoc na preso. Ja re cojol tak espada chi quicamsaxic ja winak jariꞌ necamsax chic ejeꞌeꞌ chakajaꞌ tzaꞌn tak espada. Waweꞌ cꞌa nkatzꞌat wiꞌ chi ja tinamit xin Dios rjawaxic chi nquecochꞌ quewach chipan ja rpokonal, rjawaxic chi ni nyukeꞌ wiꞌ quecꞌuꞌx ruqꞌuin ja Jesucristo.

Apocalipsis 13:16

In chakajaꞌ neruban mandar canojel ja winak chi nco̱j quetal chi quekꞌaꞌ ja quiquikꞌaꞌ owi chi quipalaj, pro ni canojelal ja winak nba̱n queriꞌ chique wi e nimak tak winak owi mani, wi e biyomaꞌ owi xa e tak mebaꞌiꞌ, wi e libre owi xa ecꞌayin pa quekꞌaꞌ winak.

Apocalipsis 14:10

ejeꞌeꞌ congana lawuloꞌ nba̱n chique, npi ryewal ja Dios chiquij pro ni ma jutzꞌit ja ryewal ja maquita nucoj chiquij. Congana nquetij na rpokonal pa kꞌakꞌ, cꞌoli caniꞌ kꞌol rmajon cꞌatem neqꞌuejeꞌ chipan pro ni chiquewach ja santilaj ángel in chwach ja Carnelo tok xtiban queriꞌ chique.

Apocalipsis 15:1

In cꞌo chic jun xintzꞌat ja cꞌo chilaꞌ chicaj ja congana cꞌascꞌoꞌi xintzꞌat. Ecꞌo wukuꞌ ángel xenutzꞌat, wukuꞌ rwach ja rpokonal cꞌo pa quekꞌaꞌ, jariꞌ ja qꞌuisbal tak rpokonal. Jawaꞌ wukuꞌ rwach rpokonal riꞌ ja tok nocꞌowi kꞌax cꞌariꞌ ja ryewal Dios, mchita, chewiꞌ ja tok nbix qꞌuisbal tak rpokonal tre.

Apocalipsis 15:7

Pi jun chique ja re quijiꞌ, xujach jujun vaso chique ja wukuꞌ ángel oro ocnak. Ja cꞌa vaso nojnak ryewal ja Dios chipan, jariꞌ Dios ja ni mta wiꞌ camíc trij.

Apocalipsis 18:6

Teyaꞌaꞌ rjil rcꞌaxel nojel ja ritzelal rbanon chewe. Xarwariꞌ más chi na nim ja rtojbalil teyaꞌaꞌ tre. Ja wi congana rpokonal quitijon ja winak rmal más chi na ja teyaꞌaꞌ arjaꞌ tre.

Apocalipsis 19:15

Cꞌo jun espada elnakto pa ruchiꞌ congana is rutzaꞌm, jariꞌ nucoj chiquij ja winak ja recꞌo pa tak nación jeꞌe chi nersocbej. Congana jun nimlaj poder nqꞌuejeꞌ pa rukꞌaꞌ ja nucoj chiquij chi cow neruchap tre in nerbanbej mandar. Arjaꞌ neruyaꞌ ja winak chipan jun nimlaj rpokonal, nerupakꞌ chi rkan caniꞌ nuban jun achi nupakꞌ chakan ja uva chipan ja jul ja bar nlasax wiꞌ ja riyaꞌl in ja Dios ja ni majun poder ja maquita cꞌo pa rukꞌaꞌ, arjaꞌ janila ncꞌotsaj ryewal chiquij.

Apocalipsis 19:18

Netij ja camnak tak cuerpo quixin rey, quixin capitán in quixin soldado ja congana quichokꞌakꞌ. Netij ja cuerpo quixin quiej in quixin ja netzꞌabeꞌ chiquij chakajaꞌ. Netij ja cuerpo quixin ja winak xa nak ta chi winakil, chi e libre chi e esclavo, chi nimak quekꞌij in chi ma nimak ta quekꞌij chakajaꞌ, neꞌ chique.

Apocalipsis 19:5

Cꞌo cꞌa jun kulaj xelto triꞌ ja bar cꞌo wiꞌ ja trono, quewaꞌ nbij riꞌ: —Camic, ewanojel ja rix ajsamajelaꞌ rxin ja Dios congana teyaꞌaꞌ rukꞌij ja Dios, ewanojel ja nixbano respetar rxin chi nimak ekꞌij chi ma nimak ta ekꞌij camic teyaꞌaꞌ rukꞌij, necheꞌe.

Apocalipsis 20:12

Cꞌacꞌariꞌ xenutzꞌat ja camnakiꞌ chi nimak quekꞌij chi ma nimak ta quekꞌij, ejeꞌeꞌ epaꞌloc chwach ja Dios in cꞌo cꞌa juleꞌ libro jaktaji. In cꞌo chi na jun ja libro jaktaji chakajaꞌ, jariꞌ libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij. Ja cꞌa camnakiꞌ ejeꞌeꞌ kꞌet tzij chiquij in ja kꞌetbex tzij chiquij jariꞌ ja tzꞌibtal chipan ja juleꞌ chic libro nak ja quibanon chipan ja quicꞌaslemal.

Apocalipsis 20:15

In xa nak ta ja ma tzꞌibtal ta rubiꞌ chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij ejeꞌeꞌ xeqꞌuiakel chipan ja yaꞌ ja yujun juleꞌ caniꞌ kꞌol ruqꞌuin rmajon cꞌatem.

Apocalipsis 22:12

Ja Jesús quewaꞌ nbij riꞌ: —Bien tecꞌwaxaj, anin ninbe chic jutij chwachꞌulew chanim, ncꞌamonto ja rtojbalil quixin ja winak chiquijujunal nak quibanon chipan ja quicꞌaslemal.