1 Juan 5:13 - Tz'utujil (Ja Cꞌacꞌa Chominem)

¹³ Anin xintzꞌibajel ja carta riꞌ in ntakel ewqꞌuin ixix ja yukul ecꞌuꞌx ruqꞌuin ja Jesucristo ja Ralcꞌwal Dios. Ja xintzꞌibaj chipan jariꞌ nyabej eseguro chi ixix ewcꞌan chic ja utzlaj cꞌaslemal ja mta qꞌuisic trij.

Tz'utujil NT

¹³ Anen xentz'ibaj ela jawra carta y quentak ela ewq'uin ixix je ykula ec'u'x ruq'uin Jesucristo je Rlec'wal Dios. Jxentz'ibaj chpam jara' quenyabej eseguro che ixix ewc'an chic utzlaj c'aslemal je rxin junlic.

1 Juan 5:13 Iomraidhean Croise

San Juan 1:12

Pro kanojelal ja xokniman rxin, kanojelal ja yukeꞌ kacꞌuꞌx ruqꞌuin, arjaꞌ xuyaꞌ chake chi xokoc ok ralcꞌwal Dios,

San Juan 2:23

Ja cꞌa tok majtaji ja waꞌim rxin ja nmakꞌij pascua chipan ja tinamit Jerusalén triꞌ qꞌuejeꞌ wiꞌ ja Jesús in e qꞌuiy chique ja winak yukeꞌ quecꞌuꞌx ruqꞌuin rmal ja milagro ja xuban jeꞌe chiquewach.

San Juan 20:31

Pro cꞌoli ja xintzꞌibaj chipan awaꞌ jun libro riꞌ utzcꞌa chi nenimaj ja Jesús chi arjaꞌ ja Cristo ja Ralcꞌwal Dios in tok queriꞌ nenimaj jariꞌ nyataj chewe ja utzlaj cꞌaslemal ja mta qꞌuisic trij como jariꞌ nyataj chake ja tok xa jun nkaban ruqꞌuin.

San Juan 21:24

Jariꞌ mismo discípulo arjaꞌ ntajini nkꞌalasaj nojel awaꞌ ja bantaji riꞌ, arjaꞌ tzꞌibyon nojel ja cꞌo chipan awaꞌ jun libro riꞌ in bien kotak chi ni katzij wiꞌ ja nbij.

San Juan 3:18

Canojelal ja winak ja nyukeꞌ quecꞌuꞌx ruqꞌuin ja Ralcꞌwal Dios ejeꞌeꞌ mchita kꞌetoj tzij xin Dios chiquij pro ja cꞌa matiyukeꞌ quecꞌuꞌx ruqꞌuin ejeꞌeꞌ kꞌeton chic tzij chiquij rmal ja Dios chi neta̱kel chipan ja rpokonal. Como matiyukeꞌ quecꞌuꞌx ruqꞌuin ja Ralcꞌwal Dios chewiꞌ tok nba̱n queriꞌ chique.

San Juan 5:24

Bien tecꞌwaxaj ja xtinbij chewe riꞌ, ja wi cꞌo jun winak nuyaꞌ rxquin tre ja ntzobal in wi yukul rucꞌuꞌx ruqꞌuin ja Tatixel ja takyonpi wxin jariꞌ rcꞌan chic ja utzlaj cꞌaslemal ja ni mta wiꞌ qꞌuisic trij in matitakel chipan ja nimlaj rpokonal, arjaꞌ kꞌaxnakpi chic chipan ja camíc, jariꞌ rwilon chic ja utzlaj cꞌaslemal.

Hechos 3:16

Camic emajon rtzꞌatic ja rachi riꞌ ja tzuri in bien ewotak rwach. Pa rubiꞌ ja Jesús tok tzuri. Ja Dios arjaꞌ tzursan rxin como ajoj cꞌo yukulbal kacꞌuꞌx ruqꞌuin ja Jesús. Ja Jesús arjaꞌ ryaꞌon chake chi cꞌo yukulbal kacꞌuꞌx ruqꞌuin in rmal ja yukulbal kacꞌuꞌx ruqꞌuin ja Jesús chewiꞌ tok utz chic ja rachi, mchita ntiꞌon tre in ni chewach ja tok tzuri.

Hechos 4:12

Solo ruqꞌuin ja Jesús nkawil wiꞌ ja totajem xin Dios, ni majun nak chi ta rtakonto ja Dios waweꞌ chwachꞌulew ja ntoꞌo kaxin, neꞌe ja Pedro.

2 Corintios 5:1

Ja cꞌa kacuerpo jariꞌ ocnak caniꞌ rochoch ja kanma waweꞌ chwachꞌulew in wi xa nyojtaji jariꞌ bien kotak chi cꞌo chi na jun rochoch ja kanma chilaꞌ chicaj ja nyataj chi na chake rmal ja Dios pro jun jay ja ma winak ta ebanyon in ni mta wiꞌ qꞌuisic trij.

Gálatas 4:6

Como ix alcꞌwalaxelaꞌ chic chewiꞌ tok Dios rtakonto ja rEspíritu Santo rxin ja Ralcꞌwal pa tak ewanma: —Nataꞌ, Padre, neꞌ kaj ja rEspíritu Santo pa tak ewanma.

1 Pedro 5:12

Ja kachꞌalal Silvano cꞌo nconfianza ruqꞌuin rmalariꞌ tok nyaꞌel tre ja ti carta riꞌ chi nerjachaꞌ chewe. Ja xintzꞌibaj chipan ja carta chi ncowirsaj más ja rewanma, nucꞌut chewach ja rutzil ja nsipaj ja Dios ja katzij chi utzil, ni tiyukeꞌ wiꞌ ecꞌuꞌx ruqꞌuin.

1 Juan 1:4

Ja katzꞌibaj riꞌ nkatakel ewqꞌuin utzcꞌa chi nqꞌuiyi in nwachini ja quicotemal xin Dios pa tak ewanma.

1 Juan 2:1

Chakꞌlaj walcꞌwal, jawaꞌ jun carta ja ntakel ewqꞌuin riꞌ utzcꞌa chi maquixmacuni. Pro wi cꞌo jun chewe chaka jalal xuban ril bien kotak chi cꞌo jun ja nsamaj pa kacuenta chwach Dios ja Tatixel jariꞌ ja Jesucristo, arjaꞌ ni utz wiꞌ ja nuban.

1 Juan 2:21

Anin ntzꞌibajel ja carta chewe riꞌ pro ma rmal ta chi majaꞌn tichꞌobtaj emwal nak rbanic ja utzlaj tzij pro como chꞌobtajnak chic emwal chewiꞌ tok ntzꞌibajel chewe. Ixix bien ewotak chi ja tzꞌakoj tzij ni matucꞌam wiꞌ riꞌ ruqꞌuin ja utzlaj tzij xin Jesucristo.

1 Juan 2:25

In quewaꞌ rtzujun can chake riꞌ, jun utzlaj cꞌaslemal ja mta qꞌuisic trij.

1 Juan 2:26

Jawaꞌ xintzꞌibaj chewe riꞌ cumal ja winak ja ncajoꞌ nqueyaꞌ jun tijonem chewe ja xa nquiyojbej ja tijonem eniman.

1 Juan 3:23

Ja rmandamiento ja Dios quewaꞌ nbij chake riꞌ, tiyukeꞌ kacꞌuꞌx ruqꞌuin ja Jesucristo ja Ralcꞌwal in tikajoꞌ kiꞌ ja caniꞌ bin can chake rmal.

1 Juan 4:9

Ja Dios xutakto ja Ralcꞌwal chi katoꞌic, ni xarwariꞌ jun ja Ralcꞌwal. Triꞌ nkatzꞌat wiꞌ chi nokrajoꞌ ja Dios como xutakto ja Ralcꞌwal waweꞌ chwachꞌulew. Queriꞌ xuban utzcꞌa chi rmal ja Ralcꞌwal nkawil ja utzlaj cꞌaslemal ja mta qꞌuisic trij.

1 Juan 5:10

Kanojel ja yukul kacꞌuꞌx ruqꞌuin ja Ralcꞌwal Dios cꞌo chic ja testigoꞌil xin Dios pa tak kanma ja nyabex kaseguro. Ja wi matanimaj ja nbij ja Dios nel cꞌariꞌ xa caniꞌ tzꞌakol tzij nacoj wiꞌ. Queriꞌ naban ja wi matanimaj ja testigoꞌil ja ryaꞌonto ja Dios tre ja Ralcꞌwal.

1 Juan 5:11

Ja testigoꞌil xin Dios quewaꞌ nucꞌut chikawach riꞌ, chi arjaꞌ Dios ryaꞌon chake ja utzlaj cꞌaslemal ja mta qꞌuisic trij in ruqꞌuin ja Ralcꞌwal nkawil wiꞌ.

1 Juan 5:20

In kotak chakajaꞌ chi ja Jesús ja Ralcꞌwal Dios peti waweꞌ chwachꞌulew in xuyaꞌ chake chi kotakij rwach ja Dios ja katzij chi Dios. In ajoj xa jun kabanon ruqꞌuin ja Dios ja katzij chi Dios in xa jun kabanon ruqꞌuin ja Jesucristo ja Ralcꞌwal, ruyon arjaꞌ ja Dios ja katzij chi Dios, ruyon arjaꞌ nyowi ja utzlaj cꞌaslemal ja mta qꞌuisic trij.