1 Juan 4:7 - Tz'utujil (Ja Cꞌacꞌa Chominem)

⁷ Chakꞌlaj wachꞌalal, congana rjawaxic chi nkajoꞌ kiꞌ. Ja rajoben riꞌil ruqꞌuin Dios winakarnakto wiꞌ. Ja nawajoꞌ awiꞌ jariꞌ at ralcꞌwal Dios, jariꞌ awotak rwach ja Dios.

Tz'utujil NT

⁷ Quilaj tak wch'alal, congan nc'atzina che nkajo' ki'. Ja ojben ri'il ruq'uin Dios wankernak twa'. Wnawajo' awi' jara' at rlec'wal Dios, jara' awutkin rwech Dios.

1 Juan 4:7 Iomraidhean Croise

San Juan 13:34

Cꞌo jun cꞌacꞌa mandamiento nbij can chewe riꞌ, tewajoꞌ ewiꞌ. Caniꞌ nbanonto anin chewe nij ixnwajoꞌonto wiꞌ queriꞌ cꞌa tebanaꞌ ixix chakajaꞌ ni tewajoꞌ wiꞌ ewiꞌ. Jariꞌ ja cꞌacꞌa mandamiento nyaꞌ can chewe.

San Juan 17:3

Ja utzlaj cꞌaslemal ja mta qꞌuisic trij quewaꞌ rbanic riꞌ, ja winak tok cotak janiꞌ ja ranaꞌoj atat ja xa ayon chi ni katzij wiꞌ chi at Dios in tok cotak janiꞌ nnaꞌoj anin ja rin Jesucristo ja rinatakonto waweꞌ chwachꞌulew jariꞌ cucꞌan ja utzlaj cꞌaslemal ja mta qꞌuisic trij.

1 Corintios 8:3

Pro ja wi nawajoꞌ ja Dios jariꞌ natruban reconocer ja Dios chi at rxin.

2 Corintios 4:6

Queriꞌ kabanon como ja Dios arjaꞌ cꞌo jun luz rtakonto pa tak kanma ja caniꞌ xuban ojer tok xbij chi: —Tiwinakari ja luz, neꞌe, in winakari ja luz chipan ja kꞌekumal. Queriꞌ rbanon chake utzcꞌa chi nchꞌaꞌani ja luz xin Dios pa tak kanma in rmalariꞌ ja winak xticotakij na chi ruqꞌuin ja Jesucristo natzꞌat wiꞌ chi janila nim rukꞌij ja Dios.

Gálatas 4:9

Ja cꞌa camic chic ewotak chic rwach ja Dios, o ja más rubey, arjaꞌ xurotakij kaj ewach nabey pro ¿nak cꞌa nechꞌob ja tok nixmeloj chic jutij chewij como nixtajini nenimaj chic juleꞌ costumbre ja rocꞌowinak chic rtiempo pro jariꞌ majun totajem majun utzil rcꞌamonpi ta chewe? Pro cꞌo takaꞌan egana nixoc chic jutij pa rukꞌaꞌ.

Gálatas 5:22

Pro ja rEspíritu Santo quewaꞌ nwachij pa tak kacꞌaslemal riꞌ, nkajoꞌ kiꞌ, cꞌoli ja quicotemal xin Dios pa tak kanma, mta chꞌaꞌoj nkaban, cꞌo kapaciencia, cꞌo jun quiꞌlaj anma kucꞌan, nkatoꞌ kiꞌ chibil tak kiꞌ, nkaban cumplir ja nkatzujuj,

2 Timoteo 1:7

Como ja rEspíritu Santo ja yatajnak chake rmal ja Dios ma ja ta xbeben riꞌil rcꞌamonto chake pro quewaꞌ rcꞌamonto chake riꞌ, nuyaꞌ kachokꞌakꞌ, nuyaꞌ ja rajoben riꞌil xin Dios pa tak kacꞌaslemal in nuyaꞌ chake chi bien nkachꞌob ja nkaban.

1 Pedro 1:22

Ja rEspíritu Santo arjaꞌ xuyaꞌ chewe chi xenimaj ja utzlaj tzij xin Jesucristo jariꞌ utzlaj tzij xechꞌachꞌojirsbej ja rewanma. Queriꞌ xeban in rmalariꞌ tok nixcowin chic neꞌewajoꞌ ja kachꞌalal in ma chi echiꞌ ta cꞌo wiꞌ tok neꞌewajoꞌ. Rmalcꞌariꞌ nbij chewe, tewajoꞌ ewiꞌ pro nojel ecꞌuꞌx nojel ewanma.

1 Juan 2:10

Ja wi neꞌawajoꞌ ja rawachꞌalal jariꞌ ni pa sakil chi wiꞌ atcꞌo wiꞌ in majun nak chi ta xcatcꞌamoꞌel chi ta chipan jun itzelal.

1 Juan 2:29

Ixix bien ewotak chi ni utz wiꞌ rnaꞌoj ja Jesucristo in triꞌ cꞌa newotakij wiꞌ chi canojel ja winak ja ni utz wiꞌ ja nqueban ejeꞌeꞌ riꞌ e ralcꞌwal Dios.

1 Juan 2:3

Ja wi nkanimaj ja mandamiento xin Jesucristo triꞌ nkatzꞌat wiꞌ chi kotak rwach.

1 Juan 2:4

Ja wi cꞌo jun nbij chi arjaꞌ rotak rwach ja Jesucristo pro wi matinimaj ja rmandamiento jariꞌ xa tzꞌakol tzij, mta rtzobal Dios pa ranma.

1 Juan 2:7

Wachꞌalal, ja ntzꞌibajel chewe riꞌ ma jun cꞌacꞌa mandamiento ta, jawaꞌ jun ojer mandamiento ecꞌwaxan chic ja kas yaꞌto chewe nabey, jariꞌ chi nawajoꞌ awiꞌ.

1 Juan 3:9

Ja wi at ralcꞌwal Dios jariꞌ awcꞌan ja cꞌaslemal xin Dios in macatmacuni. Rmal ja rat ralcꞌwal Dios chewiꞌ tok mta moda natmacuni.

1 Juan 4:11

Chakꞌlaj wachꞌalal, queriꞌ xuban ja Dios, arjaꞌ congana xokrajoꞌ rmalcꞌariꞌ nbij chewe chi yatal chakij chi nkajoꞌ kiꞌ ajoj chakajaꞌ.

1 Juan 4:12

Ja Dios majun nak ta tzꞌatyon rxin pro wi nkajoꞌ kiꞌ jariꞌ nqꞌuejeꞌ pa tak kanma ja Dios in chakajaꞌ nqꞌuiyi nwachini pa tak kanma ja rajoben riꞌil rxin.

1 Juan 4:16

Ajoj kotak chi ja Dios nokrajoꞌ, yukul kacꞌuꞌx ruqꞌuin ja rajoben riꞌil rcꞌan. Ja Dios ni rxin wiꞌ ni rcꞌan wiꞌ ja rajoben riꞌil. Kanojelal ja kucꞌan chic ja rajoben riꞌil xin Dios jariꞌ okcꞌo pa ranma ja Dios in queriꞌ chake ajoj chakajaꞌ cꞌoli ja Dios pa tak kanma.

1 Juan 4:20

Ja wi cꞌo jun nbij: —Anin nwajoꞌ ja Dios, wi neꞌe, pro wi xa itzel nutzꞌat jun rchꞌalal jariꞌ xa tzꞌakol tzij. Ja rawachꞌalal cꞌoloc chawach, natzꞌat rwach pro wi matawajoꞌ ¿nak ta cꞌa moda ariꞌ natcowini nawajoꞌ ja Dios ja matitzꞌattaji?

1 Juan 4:8

Ja Dios arjaꞌ ni rcꞌan wiꞌ ja rajoben riꞌil rmalcꞌariꞌ ja tok nbij chewe, ja wi matawajoꞌ awiꞌ jariꞌ ma awotak ta rwach ja Dios.

1 Juan 5:1

Kanojel ja kaniman ja Jesús chi arjaꞌ ja Cristo ja chaꞌon rmal ja Dios, ja wi queriꞌ kaniman ok ralcꞌwal Dios cꞌariꞌ. Caniꞌ tre jun alcꞌwalaxel ja wi nrajoꞌ ja rtataꞌ nerajoꞌ cꞌariꞌ chakajaꞌ ja juleꞌ chic rchꞌalal.

2 Juan 1:5

Camic wachꞌalal, congana nban recomendar chawe chi ni nkajoꞌ wiꞌ kiꞌ. Pro jariꞌ jun mandamiento ma cꞌa ta winakari pro ni bitajnakto wiꞌ chake nabey chi rjawaxic chi nkajoꞌ kiꞌ.