1 Juan 1:3 - Tz'utujil (Ja Cꞌacꞌa Chominem)

³ Ja katzꞌaton in ja kacꞌaxan jariꞌ nkayaꞌ rbixic chewe utzcꞌa chi ixix jun nixquicot kuqꞌuin rmal como xa jun kabanon ruqꞌuin ja Dios ja Tatixel in chakajaꞌ xa jun kabanon ruqꞌuin ja Jesucristo ja Ralcꞌwal.

Tz'utujil NT

³ Jkatz'ton y je kc'axan jara' nkaya' rbixic chewa ch-utz c'ara' ixix jun nquixquicota kuq'uin rmal ja', com xjun kabnon ruq'uin Dios Ttixel y chka' xjun kabnon ruq'uin Jesucristo je Rlec'wal.

1 Juan 1:3 Iomraidhean Croise

San Juan 17:11

Padre Santo, camic maquinqꞌuejeꞌ chic más waweꞌ chwachꞌulew pro ja rejeꞌeꞌ neqꞌuejeꞌ na pro ja ranin ninmeloj chic jutij awqꞌuin. Pan abiꞌ atat queꞌachajij can queꞌawaraj can ja reꞌayaꞌon chwe utzcꞌa xta jun xtiqueban ja caniꞌ kabanon ajoj awqꞌuin xa jun kabanon.

San Juan 17:21

Camic nban pon orar pa quicuenta utzcꞌa chi xta jun xtiqueban canojelal ja winak ja nyukeꞌ quecꞌuꞌx wqꞌuin caniꞌ kabanon ajoj awqꞌuin Nataꞌ como atat xa jun abanon wqꞌuin in xa jun nbanon anin awqꞌuin chakajaꞌ. Ja kas ngana anin xta jun xtiqueban kuqꞌuin canojelal utzcꞌa ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ xtiquinimaj chi atat attakyonto wxin.

San Juan 17:25

Nataꞌ, atat nij at utzlaj kꞌetol tzij wiꞌ pro ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ xa ma cotak ta janiꞌ ja ranaꞌoj pro ja ranin wotak in chakajaꞌ ja winak ja recꞌo wqꞌuin ja reꞌayaꞌon chwe ejeꞌeꞌ cotak chi atat attakyonto wxin.

San Juan 17:3

Ja utzlaj cꞌaslemal ja mta qꞌuisic trij quewaꞌ rbanic riꞌ, ja winak tok cotak janiꞌ ja ranaꞌoj atat ja xa ayon chi ni katzij wiꞌ chi at Dios in tok cotak janiꞌ nnaꞌoj anin ja rin Jesucristo ja rinatakonto waweꞌ chwachꞌulew jariꞌ cucꞌan ja utzlaj cꞌaslemal ja mta qꞌuisic trij.

San Juan 19:35

Jawaꞌ ja bantaji riꞌ anin xintzꞌat ruqꞌuin nwach in ja xintzꞌat jariꞌ nyaꞌon chic rbixic in bien wotak chi ni katzij wiꞌ in camic nbij chic chewe utzcꞌa chi nenimaj ixix chakajaꞌ.

Hechos 13:32

Ja camic cꞌo jun utzlaj tzij kacꞌamonto chewe quewariꞌ, ja tzujux can chique ja katiꞌt kamamaꞌ ojer rmal ja Dios

Hechos 13:41

—Ixix ja rix yokꞌonelaꞌ bien tecꞌwaxaj, congana cꞌascꞌoꞌi xtetzꞌat ja tok xtikaji ja nimlaj juicio chewij. Como anin cꞌo jun nimlaj milagro xtinban pan etiempo ixix pro jariꞌ matenimaj masqui cꞌo jun xtichꞌobo chewach. Queriꞌ rbin can ja Dios, neꞌe ja Pablo chique.

Hechos 2:42

Ejeꞌeꞌ congana quetij quekꞌij chi rotakixic ja tijonem ja ncꞌu̱t chiquewach cumal ja rapóstol, xa jun quibanon. Ni nquemol wiꞌ quiꞌ chi rtijic ja caxlanway jariꞌ nquinatbej rxin ja Jesús. Chijutij quimajon rbanic ja roración.

Hechos 20:27

Como anin nchꞌobon chewach ja rvoluntad Dios pro nojelal, ni majun nak ta ja xinwawaj ta chewach.

Hechos 4:20

Ajoj mta moda ja maquita xtikayaꞌ rbixic ja katzꞌaton in ja kacꞌaxan, xecheꞌ chique.

Romanos 15:27

Ejeꞌeꞌ ma e aj Israel ta pro kas quiꞌ quecꞌuꞌx queyaꞌ ja rayuda chique ja raj Israel pro ni yatal wiꞌ chique chi nqueyaꞌ como cꞌoli caniꞌ jun quecꞌas cuqꞌuin. Cꞌoli quecꞌas como ejeꞌeꞌ tok quewil ja totajem xin Dios, cumal ja raj Israel tok quewil. Chewiꞌ cꞌa ja tok yatal chique chi nequetoꞌ ja raj Israel tre jun ayuda.

1 Corintios 1:30

Dios cꞌa yoyon chewe nojelal. Arjaꞌ yoyon chewe jun cꞌacꞌa cꞌaslemal pro xa rmal ja Cristo Jesús chewiꞌ tok ryaꞌon chewe. Arjaꞌ takoto rxin ja Cristo chi katoꞌic in xa rmal ja Cristo ja tok yatajnak chake ja naꞌoj xin Dios in xa rmal ja Cristo chakajaꞌ tok Dios nokrucꞌul in nuban chake caniꞌ mta kil kamac in xa rmal ja Cristo chakajaꞌ tok kꞌij kꞌij noc más chꞌajchꞌoj ja kanma in xa rmal ja Cristo chakajaꞌ tok ma ok preso chi ta pa rukꞌaꞌ ja il mac in noketotaj na chijutij.

1 Corintios 1:9

Como ja Dios arjaꞌ ni mta wiꞌ ja maquita xtuban cumplir ja rtzujun chewe, arjaꞌ xixsiqꞌuini in xbij chewe chi ix rachbil chic ja Ralcꞌwal jariꞌ ja kajaw Jesucristo.

1 Corintios 15:1

Ja cꞌa camic wachꞌalal, anin nwajoꞌ nchꞌob chic jutij chewach nak rbanic ja utzlaj tzij xin Jesucristo. Xinyaꞌ rbixic chewe nabey in xenimaj. Xa rmalawaꞌ utzlaj tzij riꞌ tok cow nixpeꞌi

2 Corintios 13:14

Ja rutzil ja nsipaj ja kajaw Jesucristo rachbil ja rajoben riꞌil xin Dios jariꞌ xtiqꞌuejeꞌ ta ewqꞌuin ewanojelal in xtiqꞌuejeꞌ ta ja rEspíritu Santo ewqꞌuin chakajaꞌ, xta jun xtuban chewe ewanojelal. Amén.

Efesios 3:6

Quewaꞌ rbanic ja kꞌalasan chic chikawach riꞌ, ja rixix ja ma ix aj Israel ta ix kachbil chic ja rok aj Israel tre ja herencia xin Dios ja nyataj na chake, xa jun cuerpo kabanon chic ewqꞌuin, ixix jun nyataj na chewe ja tzujunto ojer rmal ja Dios pro xa rmal ja xa jun ebanon ruqꞌuin ja Cristo chewiꞌ tok nyataj chewe. Jariꞌ yataj chewe ja tok xecꞌwaxaj ja utzlaj tzij xin Jesucristo.

Filipenses 1:7

Ni rubey wiꞌ chi queriꞌ nchꞌob chewij ewanojel wachꞌalal como ixix ixcꞌo pa wanma. Como ixix wachꞌalal ecꞌamon ewiꞌ wqꞌuin chi rbanic ja samaj ja yaꞌon chwe rmal ja Dios chi nban. Ja tok ninqꞌuejeꞌ pa cheꞌ ninetoꞌ in chakajaꞌ tok ecꞌoli winak ja nechꞌaꞌo rxin ja utzlaj tzij xin Jesucristo ninetoꞌ chi rchꞌaꞌic chique ja nquibij, ninetoꞌ chi rkꞌalasaxic chiquewach chi jariꞌ utzlaj tzij ruqꞌuin ja Dios penak wiꞌ.

Filipenses 2:1

Wachꞌalal, ja tok xa jun kabanon ruqꞌuin ja Cristo ¿la matiyukbaꞌ cꞌa riꞌ kacꞌuꞌx ariꞌ rmal? ¿La matikanaꞌ cꞌariꞌ ja rajoben riꞌil xin Dios ja rcꞌamonto chake in nxucꞌuxuꞌi kanma rmal? ¿La makoquicot cꞌariꞌ rmal ja rEspíritu Santo chi arjaꞌ nokrachbilaj? ¿La ma lokꞌ ta cꞌa nkanaꞌ kiꞌ ariꞌ, la matipokonaj cꞌa riꞌ kawach ariꞌ rmal?

Filipenses 3:10

Queriꞌ nwajoꞌ anin utzcꞌa chi bien nwotakij janiꞌ rnaꞌoj ja wajaw Jesucristo utzcꞌa chi bien nwotakij nak rbanic ja poder xin Dios pro jun poder ja cꞌaso rxin ja Jesucristo chiquicojol camnakiꞌ. Anin nwajoꞌ nwachbilaj ja Jesucristo chi rtijic ja rpokonal, nwajoꞌ nwachbilaj chipan ja rcamic

Colosenses 1:13

Arjaꞌ xokrutoꞌ pa rukꞌaꞌ ja kꞌekumal in xokrucoj chic chipan ja gobierno xin Jesucristo ja chakꞌlaj Ralcꞌwal.

1 Tesalonicenses 1:10

in tok xeꞌeyaꞌ can ja cachbal tak winak in rachbal tak nakun in maquixxuqueꞌ chic chiquewach in nixquicot chic chi raybexic ja kꞌij tok xtipi chic jutij ja Ralcꞌwal Dios chilaꞌ chicaj. Arjaꞌ Jesús yataj tre rmal ja Dios chi cꞌastaji chiquicojol ja camnakiꞌ, arjaꞌ noktoꞌowi chipan ja ryewal Dios ja penak chakij.

1 Timoteo 6:2

In masqui quiniman chic ja Jesucristo ja quipatrón pro maxta tiquechꞌob chi ma rjawaxic ta chi nequeban respetar xa rmal chi e kachꞌalal chic. Pro ja ta nqueban, más chi ta na utz nqueban tre ja samaj como e kachꞌalal chic ja quipatrón in neꞌajoꞌx rmal ja Dios. Jawaꞌ ja xintzꞌibaj riꞌ queꞌatijoj ja kachꞌalal tre in queꞌabanaꞌ animar chi nquinimaj.

Hebreos 2:12

Caniꞌ tzꞌibtal chipan ja rtzobal Dios ja Ralcꞌwalaxel quewaꞌ xbij tre ja Tatixel riꞌ: —Anin nyaꞌ na abixic chique ja wachꞌalal, nbixaj na abiꞌ chiquicojol ja nquemol quiꞌ chi anataxic. Queriꞌ nbij.

Hebreos 3:1

Rmalcꞌariꞌ tok nbij chewe wachꞌalal, techꞌoboꞌ jutzꞌit ja Cristo Jesús, bien techꞌoboꞌ wachꞌalal ja rix tinamit xin Dios, ja rixchaꞌon rmal ja Dios chi nixeqꞌuejeꞌ na ruqꞌuin chilaꞌ chicaj. Ja cꞌa Jesús arjaꞌ takto, xucꞌamto ja tijonem ja kaniman in camic arjaꞌ ocnak jun lokꞌlaj sacerdote ja paꞌl trij jawaꞌ tijonem riꞌ.

Hebreos 3:14

Caniꞌ kabanonto ja kas nabey yukul kacꞌuꞌx ruqꞌuin ja Jesucristo, ja cꞌa wi ni cow wiꞌ xkopeꞌi chi ryukbaxic kacꞌuꞌx ruqꞌuin, ja wi ni matikayaꞌ can wiꞌ jariꞌ ni katzij wiꞌ chi xa jun kabanon ruqꞌuin.

1 Pedro 5:1

Camic nwajoꞌ nintzijon cuqꞌuin ja recꞌayon quixin ja kachꞌalal ja recꞌo checojol como anin jun in cachbil. Anin xintzꞌat nojel ja rpokonal ja xutij ja Cristo. In anin jun chakajaꞌ xquintzꞌatowi ja Jesucristo ja tok xtipi chic jutij tokoriꞌ tok nkꞌalajin na chi congana nim rukꞌij.

2 Pedro 1:16

Ajoj kachꞌob chewach nak rbanic ja tok xtipi chic jutij ja kajaw Jesucristo chi congana chic kꞌaxnak ja rchokꞌakꞌ triꞌ. Ja kacoj kabase tok kabij chewe jariꞌ tok yataj chake chi katzꞌat ruqꞌuin kawach ja Jesucristo tok rucꞌaj ja ruchꞌaꞌ Dios. Ma ja ta kacoj kabase juleꞌ ojer tak tzij ja xa winakarsan cumal winak quibanon rbanic.

1 Juan 1:1

Jawaꞌ jun carta ja nkatakel chewe riꞌ rcꞌamonto nak rbanic ja Ralcꞌwal Dios ja Yoꞌl utzlaj cꞌaslemal ja mta qꞌuisic trij, arjaꞌ xurkꞌalasani janiꞌ rnaꞌoj ja Dios. Ja Ralcꞌwal Dios arjaꞌ ni cꞌo wiꞌ ja tok tzꞌucarsaxto ja rwachꞌulew. Ajoj katzꞌat ruqꞌuin kawach, kacꞌaxaj ja xbij, katzꞌat janiꞌ ja rcꞌaslemal, kachap ruqꞌuin kakꞌaꞌ.

1 Juan 1:5

Ja xtikatzꞌibaj riꞌ jawaꞌ tijonem kacꞌaxan ja bix chake rmal ja Jesucristo quewariꞌ, ja Dios arjaꞌ ni sakil wiꞌ rcꞌan, ni utz wiꞌ ja nuban, majun kꞌekumal rcꞌan ta.

1 Juan 1:7

Pro wi sakil cꞌayon kaxin caniꞌ tre ja Dios arjaꞌ ni pa sakil wiꞌ cꞌo wiꞌ, ja wi queriꞌ kabanon xcꞌa jun kabanon ariꞌ. Ja wi queriꞌ kabanon ja rquiqꞌuel ja Jesucristo ja Ralcꞌwal jariꞌ nchꞌachꞌojirsaj nojel ja kil kamac nkaban.