Jeremías 8:16 - Bible in Tzotzil de Chenalhó with Deuterocanon

¹⁶ ¡Tal xa li cajcontratique! Taj to ta Dan xvinaj xjuch'te-juch'te tal yic'al sni' li sca'ique. Chnic xa scotol banamil yu'unic li yech'al ye sca'ic ti sts'ijlajetic no'ox tale. Ja' xa tal soquesic li banamil xchi'uc scotol li c'usitic oye; tal soquesic li lumetic xchi'uc scotol li boch'otic te nacajtique”, xiic.

Bible in Tzotzil de Chamula

¹⁶ Tal xa ma' ti jcontrainvanejetique. Xvinaj xa talel le' ta jteclum Dan xvuch'et xa talel sni' ti sca'ique. C'alal xjiq'uiq'uet no'oxe, ta xnic scotol ti banomil yu'une. Tal xa slilin ti jteclume, ti jnaclejetique, xchi'uc scotol ti c'usitic oy yu'une.”

Jeremías 8:16 Iomraidhean Croise

Job 39:20

¿Me vo'ot chavac' ti xbitic no'ox jech chac c'u cha'al c'ulubetique? ¿Me vo'ot chavac' ti xpiet no'ox sni', ti xi'bal xa sba ta q'uelele?

Salmos 24:1

Li Muc'ul Diose ja' yu'un sbejel li banamile; ja' yu'un scotol li c'usitic oye xchi'uc scotol li c'usitic cuxajtic ta banamile.

Jeremías 10:25

Ja' te xamal batel sc'ac'al avo'nton ta stojol li lumetic ti mu xayotquinicote, xchi'uc ta stojol li jujun banamil ti mu'yuc chasc'anbicot vocole, yu'un ja' la sti'ic ya'yel li smomnich'nabtac Jacobe; laj yulesic o, la syavnaijesbeic o li slumalique.

Jeremías 3:24

Li diosetic ti chac' no'ox q'uexlale ja' la sve' scotol c'usi oy yu'unic li jmoltotaccutic ti c'alal biq'uituncutic to'oxe, ja' li xchijic, li xvacaxic, xchi'uc li squerem stsebique.

Jeremías 30:16

Pero li boch'otic chayuts'intaoxuque ta xcac' ta uts'intael ec; li avajcontrataque chucbil ta xbatic ta yan banamil ec. Li boch'otic la spojboxuc batel c'usitic oy avu'unique ta xich'ic pojbel c'usi oy yu'unic ec. Li boch'otic laj yelc'an c'usi oy avu'unique ta xich'ic elc'anbel batel c'usi oy yu'unic ec.

Jeremías 30:5

Jech laj yal: “Ta xvinaj ov ta scoj tsots xi'el, tsots vocol, xchi'uc at-o'nton.

Jeremías 4:24

La jq'uel noxtoc li vitsetique, solel xniclajetic ta jyalel; scotol li bic'tal vitsetique xnechlajetic noxtoc.

Jeremías 4:7

Li leone loq'uem xa tal ta xch'en; li boch'o ta sjines jujun banamile sbats'il xa tal xanubal, loq'uem xa tal ta yosilal, yu'un chtal yules li avosilalic, li lumetic avu'unique; ta sjines comel, mu'yuc xa yajval chcom yu'unic o.

Jeremías 47:3

Li totiletique chlaj stsatsalic ta scoj xi'elal ti xbatatet no'ox tal li svoy ca'etique, ti xchac'lajet no'ox tal caretaetique, ti squits'lajet no'ox tal li yacantaque; jech mu'yuc xa ta stuc'ulanic o li xnich'nabique.

Jeremías 5:17

Ja' chtal sve'ic li c'usitic chloc' avu'unique; ja' chtal slajesic li ave'elique. Ta sti'ic noxtoc li aquerem atsebique, xchi'uc ta sti'ic scotol li achijic avacaxique. Ta slajesic scotol li ts'usubtic xchi'uc li higotic avu'unique. Ta yabtejebic ta sjinesic scotol li alumalic ti lec setbilic ta tsatsal coralton, ti ja' apatoj avo'ntonic yu'une”, xi.

Jeremías 50:42

Oy lec sflechaic xchi'uc slanzaic; ven simaronic, me jutuc mu'yuc c'uxubinel ta yo'ntonic. Ti c'alal ch-avanique, ja' jech chac c'u cha'al xbac' muc'ta nab. Cajajtic ta ca' chtalic; lec chapalic sventa chtal stsaquic ta pleito li Babiloniae.

Jeremías 51:29

Li banamile ta xnic, ta xbac', yu'un ta xac' c'otuc ta pasel c'usi xchapanoj ta stojol Babilonia li Muc'ul Diose. Ta sc'atajes o ta xocol banamil; mu'yuc xa boch'o te chnaqui o.

Jeremías 6:23

Toj ven simaronic, me jutuc mu'yuc c'uxubinel yu'unic o; ta flecha xchi'uc ta jich'il taq'uinetic lec ts'ubajtic sni' ta xmilvanic o. C'alal ch-avanique, ja' jech chac c'u cha'al nab ti xvo'et no'oxe. Cajajtic lec ta ca' chtalic, chapalic tal lec ta sventa chtal stsacoxuc ta pleito, vo'oxuc ti yalab xnich'naboxuc lum Sione”, xi.

Nahúm 3:2

Xlach'lun no'ox li nucule; squits'lajet no'ox li yacan caretaetique. Xvil no'ox tal ta anil li ca'etique; toyolic no'ox xbit tal li caretae.

Habacuc 3:10

C'alal laj yilicot li vitsetique, iniquic ta xi'el; ijelov tsatsal chauquil vo' ta sbaic. Li muc'ta nabe tsots ibac'; toyolic no'ox stoy muyel sc'ob.

1 Corintios 10:26

Yu'un li banamile xchi'uc scotol li c'usitic oye ja' yu'un li Cajvaltique.

1 Corintios 10:28

Yan me oy boch'o jech chayalboxuque: “Li ti'bol li'i ja' smoton li c'usitic cuybil ta diose”, me xie, mu me xati'ic, yu'un jech mu xlo'ilaj yo'nton avu'unic li boch'o laj yale.

Jueces 18:29

Li lume Dan laj yac'beic sbi. Ja' laj yich'be sbi li stotique, ja' li xnich'on Israele. Ja' yu'un Dan la sbiin li lume; ja' li Lais to'ox sbie.

Jueces 20:1

Scotol li israeletic xlic ta Dan c'alal ta Beerseba xchi'uc c'alal ta Galaade la stsob sba scotolic te ta Mizpa ta stojol li Muc'ul Diose. Jech chac c'u cha'al jun no'ox vinic laj ya'ay sba ta scotolic.

Jueces 5:22

“Xc'ojlajet no'ox tal svoy li ca'etique; xc'uletic no'ox ta anil li muc'tic ca'etique.