Jeremías 7:9 - Bible in Tzotzil de Chenalhó with Deuterocanon

⁹ Ja' no'ox cha'elc'ajic, chamilvanic, chamulivajic; oy c'usi chavalic ta jtojol ti mu meleluque. Chachic'beic pom li Baale; ja' chbat avich'ic ta muc' li yantic diosetic ti mu xavotquinique.

Bible in Tzotzil de Chamula

⁹ Yu'un ta xa'elc'ajic, ta xamilvanic, ta xasa' amulic, naca yeilal no'ox ta xjelav avu'unic ti ta xava'an abaic ta rexticoe. Ta xavac'beic chic'bil pom ti Baale. Ta xanijan abaic ta yich'el ta muc' diosetic ti ma'uc aventaique.

Jeremías 7:9 Iomraidhean Croise

1 Reyes 18:21

Li Eliase inopaj batel ta stojol scotol li israeletique jech laj yalbe: —¿Baq'uin to chacomtsanic ti chib avo'ntonique? Me ja' cuxul Dios li Muc'ul Diose, ja' xavich'ic ta muc'. Yan me ja' cuxul li Baale, ja' xavich'ic ta muc' —xut. Li israeletique muc xtac'ov ic'otic.

Éxodo 20:3

“Mu me xavich'ic ta muc' yan diosetic. Jtuc no'ox xavich'icun ta muc'.

Isaías 1:13

Mu xa xavich'bicun tal yan matanal; i'ech' xa co'nton yu'un li xch'ayilal apomique. Mu xa sts'ic cu'un ti chatsobic tal scotol achi'iltaquic yu'un chapasic q'uin sventa ach' u, xchi'uc sventa chatsob abaic ta sc'ac'alil chacux avo'ntonique; mu'yuc stu chquil li q'uin chapasique yu'un toj chopoloxuc.

Isaías 58:2

Jujun c'ac'al vu'un chisa'icun yilel; oy ta yo'nton tsc'an tsna' scuyoj sbaic li c'usitic ta jc'ane. Xco'laj xchi'uc ja'ic yilel li boch'otic ja' tspasic c'usitic tuq'ue, ti mu'yuc scomtsanojic o li smantaltac Dios yu'unique. Chisc'anbicun tuq'uil mantaletic; tsc'an xa chnopajic tal ta jtojol yilel.

Jeremías 1:16

Yu'un ta xcac'beic tsots svocolic ta scoj smulic, yu'un la scomtsanicun, ja' bat yich'ic ta muc' li yan diosetique; ja' bat xchiq'uic pom ta stojol li sdiosic ti spasoj ta sc'ob stuquique.

Jeremías 11:13

Yu'un li Judae toj ep diosetic yu'un jech chac c'u cha'al li lumetic ta yosilale. Li Jerusalene toj ep scajleb matanaletic yu'un jech chac c'u cha'al li xoraliltaque, yu'un ja' te ta xchic' pom ta stojol li dios Baale.

Jeremías 11:17

“Vu'un li Muc'ul Diosun ti ta jpas ta mantal scotol te ta vinajele; vu'un la jts'un li Israel xchi'uc Judae. Laj xa cal ti chcac'be tal svocolique, ja' ta scoj smul li smomnich'nabique, yu'un la sa'bicun sc'ac'al co'nton ta sventa ti ja' ta xchiq'uic pom ta stojol li dios Baale”, xi li Muc'ul Diose.

Jeremías 13:10

Li chopol cristianoetic li'i, ti mu sc'an xa'ibicun jc'ope, ti ja' lec cha'yic o spasel li c'usi lec cha'ay stuquique, ti ja' bat yich'ic o ta muc', bat tunicuc yu'un, bat squejan sbaic ta stojol li yantic diosetique, ja' jech ta xc'otic jech chac c'u cha'al li achuc li'i ti mu'yuc xa c'usi stu oe.

Jeremías 18:15

Pero li jteclumale i'ul xa o xch'unojel yo'ntonic ta jtojol, ja' bat xchiq'uic pom ta stojol li diosetic ti mu'yuc stue; solel ch'ayemic o ta be. Ja' stamojic o batel li poco' be ta vo'onee; ja' li chucul be ti mu'yuc boch'o xotquine.

Jeremías 19:4

Yu'un li israeletique solel la syanijesic li banamil li'i. Li' la xchic'beic pom li yantic diosetic ti mu xotquinique, xchi'uc ti mu ono'ox xotquinic ec li smoltot syame'ique. Jech noxtoc li ajvaliletic ta Judae la snojesic ta xch'ich'al li boch'otic mu'yuc smulique.

Jeremías 32:29

Li caldeaetique ta xtal scontrainic li lum li'i; ta xac'beic sc'ac'al, ta xchiq'uic. Ta xchiq'uic noxtoc li naetic ti bu la xchic'beic pom ta stojol dios Baal te ta yamaq'uil sjole xchi'uc ti te laj yac'beic smotonin pasem ya'lel ts'usub li yantic diosetic sventa la sa'bicun sc'ac'al co'ntone.

Jeremías 44:3

Ja' ta scoj ti toj chopol c'usi la spasique, jech laj yaq'uic ilincun, yu'un ja' bat yich'ic ta muc' li yantic diosetique; ja' bat xchic'beic pom ta stojol li yantic diosetic ti mu xavotquinique, me ja'uc li amoltot ayame'ic ta vo'onee muc xotquinic ec.

Jeremías 44:8

Yu'un ja' no'ox chavaq'uic ilincun ta sventa li c'usi apasoj ta ac'obique, xchi'uc ti chachiq'uic pom ta stojol li yantic diosetic te ta Egipto ti bu talemoxuc ta nacleje. Ja' xa no'ox amotonic ti chaculesoxuc o, ti chopol chacomic o, ti mu'yuc atu cha'ilatic o yu'un li yantic banamile.

Jeremías 44:9

¿Me yu'un ich'ay ta avo'ntonic li smul amoltot ayame'ic ta vo'onee, li smul ajvaliletic ta Judae, xchi'uc li smul yajnilique, xchi'uc amul atuquic ec, xchi'uc smul avajnilic ti laj asa'ic ta yosilal Judá xchi'uc ta xoraltic ta Jerusalene?

Jeremías 48:35

Li Muc'ul Diose jech chal: “Ta xcules li cristianoetic ta Moabe, ja' li boch'otic tsmilic matanaletic ta toyol c'opojebaletique xchi'uc ti chchiq'uic pom ta stojol diosetic yu'unique”, xi li Muc'ul Diose.

Jeremías 5:2

Oy boch'otic chalic ta jamal ta jbi ti chiyich'icun ta muc' vu'un li Muc'ul Diosune, pero altic chalic”, xi li Diose.

Jeremías 5:7

Ja' yu'un jech chal li Muc'ul Diose: “¿C'u x'elan xu' ta jts'icbot yepal li amul le'e? Li anich'nabique la scomtsanicun; c'alal oy c'usi chalic ta jamale, ja' la st'abbeic sbi li c'usi muc diosuque. Laj cac'be ep sve'elic, pero ja' no'ox imulivajic; muc vu'cun laj yich'icun ta muc', ja' no'ox ibatic ta snail muliletic.

Jeremías 7:6

me mu xavuts'intaic li yanlumetique, li me'on ololetique, li me'on antsetique, me mu'yuc chamalbeic xch'ich'al li' ta banamil li boch'otic mu'yuc smulique, me mu'yuc chbat avich'ic ta muc' li yantic diosetic ti ja' no'ox chasa' avocolic yu'une,

Ezequiel 18:18

“Yan li stot ti ja' j'uts'intavaneje, ti ja' j'eleq'ue, ti chopol c'usi tspas ta stojol xchi'iltaque, le'e ta xcham ta scoj smul stuc.

Ezequiel 20:30

“Jech xavalbe noxtoc li smomnich'nab Israele: ‘Jech chayalboxuc li Muc'ul Diose: ¿C'u yu'un ti chabolibtas abaic ec jech chac c'u cha'al la spas li atot ame'ique, xchi'uc ti mu junuc avo'ntonic ta jtojol ec ta scoj ti ja' batem avo'ntonic yich'el ta muc' li sloc'obaltac adiosique?

Ezequiel 23:39

C'alal la xchic' xnich'onic sventa smoton sdiosique, ja'o ital ochicuc ta ch'ulna cu'un noxtoc; la sbolibtasic ta jyalel. Ja' jech la spasic te ta ch'ulna cu'un.

Ezequiel 5:11

Vu'un li Muc'ul Diosun ti yajvalun scotole, jamal ta xcal ta jbi jtuc ti jech ta jpase. Yu'un laj asoquesbeic sc'oplal ch'ulna cu'un ta scoj li loc'ometic laj avich'ic ta muc' ti toj chopol chquile, xchi'uc ta scoj li c'usi toj chopol laj apasique, ja' yu'un chajlilinoxuc o ta j'ech'el ec; mu'yuc chajpasboxuc perdón; mu'yuc chajc'uxubinoxuc o.

Oseas 2:13

Ta xcac'be stoj ti jayib c'ac'al la xchic' pom ta stojol baaletique, xchi'uc ta sventa ti la sc'ac'ubtas sba lec ta staq'uinal xchiquin, ta snats' ti c'alal bat sta yajmultaque, yu'un la ch'ayun o ta yo'nton li vu'une”, xi li Muc'ul Diose.

Oseas 6:9

Li paleetique ja' jechic jech chac c'u cha'al jtsob j'eleq'uetic ti oy boch'o tsmalaic ta bee. Ja' jech chmilvanic te ta sbelal Siquem li paleetique, ja' yu'un la spasic o li c'usi toj chopol ta pasele.

Amós 4:5

Aq'uic milbil matanal ta sventa li c'usi chatojic ta vocole; aq'uic li pan ti yich'oj svolesubil xch'ute. Alic batel, ja'uc xa ava'yejic ti chavaq'uic li matanal ta yutsil avo'ntonique, yu'un ja' jech oy ta avo'nton chatoy abaic”, xi li Muc'ul Diose.

Sofonías 1:5

Ta xculesic noxtoc li boch'otic chmuyic ta yamaq'uil jol na tsquejan sbaic batel ta stojol li c'usitic oy ta vinajele, xchi'uc li boch'otic tst'abbicun jbi c'alal oy c'usi chalique, xchi'uc ti tst'abbeic sbi noxtoc li sdiosic Milcome.

Malaquías 3:5

Li Muc'ul Dios ti tspas ta mantal scotol te ta vinajele jech chal: “Vu'un chtal jchapanoxuc. Vu'un ta jva'an jba ta testigo ta scontrainel li j'ac'chameletique, li jmulaviletique, li boch'otic tst'abbeic sbi Dios c'alal ch-epalc'opojique, xchi'uc li boch'otic tslo'laic j'abtel yu'unique, xchi'uc li boch'otic abul sba yu'unic me'on antsetic, xchi'uc me'on ololetique, xchi'uc li boch'o mu'yuc tuc' c'usi tspasbeic yanlumetique, ti solel mu'yuc jxi'elal cha'yic oe”, xi li Muc'ul Diose.

Romanos 2:2

Li Diose ta jna'tic ti tuc' chapanel chac' ta stojol li boch'otic jech tspasic chac le'e.

Deuteronomio 32:17

Ja' la smilbeic smoton li pucujetique, muc ja'uc laj yac'beic li Diose. Ja' laj yac'beic li c'usitic cuybilic ta diosetic ti mu ono'ox xotquinique, ti ach' to sliquele, ti ach' to svulele, ti mu'yuc ono'ox laj yich'ic ta muc' li stot sme'ic ta vo'onee.

Apocalipsis 21:8

Yan li me' jxi'eletique, li boch'otic mu xiyich'icun ta muq'ue, li boch'otic toj chopol c'usitic tspasique, li jmilvanejetique, li jmulaviletique, li j'ac'chameletique, li boch'otic chich'ic ta muc' c'usitic mu ja'uc Diose, xchi'uc scotol li j'epalc'opetique, ja' chjipatic ochel ta muc'ta c'oc' tsanbil ta azufre. Le'e ja' xchibal velta lajel”, xiyutun.

Apocalipsis 22:15

Yan li boch'o toj chopolique, li j'ac'chameletic jtuch'-oraetique, li jmulaviletique, li jmilvanejetique, xchi'uc li boch'otic chich'ic ta muc' c'usitic mu ja'uc Diose, xchi'uc scotol li boch'otic lec cha'yic puru epalc'ope, mu xu' ch-ochic ta lum.

Jueces 5:8

“C'alal la sa'ic yan diosetic yu'unique, te tsacbilic o ta pleito. Me junuc smaquic, me junuc lanza, muc xvinaj te ta stojol li cha'vinic ta mil (40,000) israeletique.