Jeremías 21:4 - Bible in Tzotzil de Chenalhó with Deuterocanon

⁴ Jech yaloj li Muc'ul Diose, ja' li Dios yu'un Israele: ‘Li avajsoldado ti tstsaquic ta pleito li ajvalil ta Babiloniae xchi'uc li caldeaetic te setuojoxuc ta pat coraltone, ta xcac' suticuc ta spatic, te ta jtsob ta yut lum scotol.

Bible in Tzotzil de Chamula

⁴ ‘Ti Ajvalil Dios yu'un ti Israele, xi ta xale: Ta xcac' tunuc ta sjolic yabtejebtac avajsoldadotac ti ta stsac sbaic ta leto xchi'uc ti caldeoetic ti oyic ta pat moque, yajsoldadotac yu'un ti ajvalil ta Babiloniae. Ta jtsobic ochel talel li' ta jteclume.

Jeremías 21:4 Iomraidhean Croise

Isaías 10:4

Mu'yuc xa c'usi xu' avu'unic; ja' no'ox te xamutste-mutsteic xchi'uc li yan jchuqueletique. Te chachi'inic ta lajel li boch'otic chamenic xae. Pero mu ono'ox xlaj o sc'ac'al yo'nton li Diose; te staoj yav sye'oj o sc'ob.

Isaías 13:4

Chvinaj tsots vochlajetel ta vitsetic; xco'laj xchi'uc ep cristiano te oyic. Chvinaj x'avlajetic li cristianoetic ta jujun banamile; ja' li epal lum te stsoboj sbaique. Li Muc'ul Dios ti ech'em svu'ele ch-ech' sq'uel me lec chapal li yajsoldadotac sventa pleitoe.

Isaías 5:5

Lec oy, chacalboxuc ava'yic c'usi ta jpasbe li ts'usubtic cu'une: ta jloq'uesbe li scoralile yu'un jech ac'o yich' ulesel; ta jvuq'uesbe li scoraltonale yu'un ac'o tal yich' pech'ilanel ta teq'uel.

Jeremías 20:4

Yu'un jech yaloj li Muc'ul Diose: ‘Ta xcac' ti te chlic asibtas aba atuque xchi'uc ta xi'ic avu'un scotol li boch'o lec xac'opan aba achi'uque. Le'e te ta asat ta xlajic ta milel yu'un li avajcontraique. Jech noxtoc, scotol li jnaclumetic ta Judae ta xcac' ta sc'ob li ajvalil ta Babiloniae, jech chucbil chbatic ta Babilonia banamil, o me chich'ic milel comel.

Jeremías 21:3

Ja' yu'un jech laj yalbe li boch'otic tacbilic batele: “Jech xavalbeic ya'ay li ajvalil Sedequiase:

Jeremías 32:24

“Li' ta orae spasoj xa lec stec'ubic ta patpat coralton li caldeaetique yu'un tspojic li lume. Li israeletique ta xa x'ochic ta c'abal ta scoj pleito, vi'nal, xchi'uc ta tsatsal chamel. Ja' xa li' chc'ot ta pasel ti jech ono'ox avaloje.

Jeremías 32:3

Yu'un ja'o ichucat yu'un li ajvalil Sedequías ti c'alal laj yal c'usi i'albat yu'un Muc'ul Diose. Jech laj yal: “Jech chal li Muc'ul Diose: ‘Li lum li'i ta xcac' ochuc ta sc'ob ajvalil ta Babilonia, jech ta sventain o.

Jeremías 32:5

Persa chich' iq'uel batel ta Babilonia; te chcom o, ja' to c'alal chbat jq'uele. Ac'o me chlic spas pleito xchi'uc li caldeaetique, mu xu' yu'un o’, xi li Muc'ul Diose”, xut.

Jeremías 33:5

Ja' ti chtal yich' contrainel yu'un li caldeaetique, ti nojem chcom ta animaetic yu'unique. Vu'un ta xcac' chamicuc ta sc'ac'al co'nton. Jech ta jmac jsat ta stojolic ta scoj ti toj chopol c'usitic tspasique.

Jeremías 35:17

Ja' yu'un jech chcal vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele: Ta xcac' taluc ta atojolic te ta Judá xchi'uc ta stojol jnaclumetic ta Jerusalén scotol li vocol ti caloj ono'ox chacac'boxuque. Yu'un la jc'opanoxuc pero muc xatac'ovic; laj quic'oxuc pero muc xavich'ic ta muc', xi li Diose’, uto”, xiyutun.

Jeremías 39:3

Scotol li banquilaletic yu'un ajvalil ta Babiloniae i'ochic batel; te la snacan lec sbaic ta muc'ta ti'coralton. Ja'ic li Nergal-sarezer, Samgar-nebo, Sarsequim, ja' li mero banquilaletic yu'un ajvalile, xchi'uc yan Nergal-sarezer ja' banquilal noxtoc.

Jeremías 52:18

Laj yich'ic batel noxtoc li yavil tane, li palaetique, li xtuch'ubil xmechail candiletique, li muc'tic tazaetique, li cucharaetique xchi'uc scotol li c'usitic pasbilic ta bronce sventa chtun ta stojol Diose.

Lamentaciones 2:3

Ta yipal sc'ac'al yo'nton la slajesbe stsatsal li Israele. C'alal itsacat yu'un li yajcontraique, li Muc'ul Diose la sloq'ues batel li svu'el ta stojolique; xco'laj xchi'uc laj yac' tal c'oc' te ta stojol li Jacobe, jech la xchic' scotol li c'usitic la stae.

Lamentaciones 2:5

Li Cajvaltique xco'laj xchi'uc yajcontra Israel ic'ot, yu'un laj yules o li Israele. La svuq'ues scotol li muc'tic naetique xchi'uc la sjines scotol li tsatsal coraltonetique. Laj yepajesbe at-o'nton xchi'uc oq'uel ta stojol li jnaclumetic ta Judae.

Lamentaciones 2:7

La sjip o ta yo'nton li scajleb smotone; la sbaj comel li ch'ulna yu'une. Laj yac'be ta sc'ob jcontrainvanejetic li coralton yu'un lume. Xvochetic no'ox te ta ch'ulna jech chac c'u cha'al ta yorail q'uin.

Ezequiel 39:3

Ts'acal ta jc'asbot li st'ilesubil aflecha te atsacoj ta ats'etc'obe; ta jipbot yalel li flechaetic te atsacoj ta abats'ic'obe.

Oseas 9:12

Ac'o me oy bu chch'i li squeremique, ta jpojbeic loq'uel ta stojolic. ¡Toj abul sbaic ec c'alal me ta jvoc' jba loq'uel ta stojolique!

Zacarías 14:2

Ta sc'ac'alil le'e, li Muc'ul Diose ta stsob tal scotol cristianoetic ta yantic banamil sventa chtal stsaquic ta c'op li Jerusalene. Ta x'och ta c'abal li lume. Ta xich'ic pojbel scotol li c'usitic oy ta snaique; ta xich'ic uts'intael li antsetic yu'unique; ta xich'ic chuquel batel ta yan banamil j'o'loluc li jnaclumetique. Ti c'u to yepal chcomique li' chnaquiic o.

San Mateo 22:7

C'alal laj ya'ay li ajvalile, i'ilin. La stac batel yajsoldadotac yu'un bat smilic li jmilvanejetique. La xchic'beic comel li slumalique.