Éxodo 33:5 - Bible in Tzotzil de Chenalhó with Deuterocanon

⁵ Yu'un li Muc'ul Diose jech laj yalbe li Moisese: —Jech xavalbe li achi'iltaque: ‘Li vo'oxuque ven jtoyba cristianooxuc. ¡Me chtal jchi'inoxuc jliqueluque, ta ora ta xculesoxuc acotolic! Loq'uesic ta ora li c'usitic c'upilic sba avac'oj ta abec'talique; te ta jnop c'usi ta jpasboxuc’, uto —x'utat li Moisese.

Bible in Tzotzil de Chamula

⁵ Yu'un ti Diose xi ono'ox laj yalbe ya'i ti Moisese: —Xi xavalbe ya'i ti israeletique: “Ti vo'oxuque, toyobba jteclumoxuc. Yu'un xu' ta jtub ats'unubalic ti mi ta jchi'inoxuc uni jliqueluque. Loq'uesic ta ora no'ox ti c'usitic c'upil sba alapojique. Ta jq'uel quil c'usi xu' ta jpas ta atojolic.”

Éxodo 33:5 Iomraidhean Croise

Génesis 18:21

Li' ta orae te chibat, yu'un chbat jq'uel me melel ti toj tsots smulic jech c'u cha'al li'albate. Yu'un jech ta jna' o me melel —xi.

Génesis 22:12

Jech laj yal li j'almantale: —Mu me c'usi xapasbe li quereme, yu'un jna'oj ti chavich' ta muc' li Diose, yu'un muc xajalan ti c'ajumal jun anich'on oye —x'utat.

Job 34:20

Li cristianoetique ta jliquel no'ox xu' chchamic; ta o'lol ac'ubal no'ox xu' chch'ayic batel; li boch'otic tsots svu'elique muc ta stsatsaluc cristiano chchamic.

Salmos 139:23

Q'uelun lec avil c'u xi'elan, Dios cu'un; otquino lec li c'usi oy ta co'ntone; q'uelbun avil c'u x'elan co'nton, otquino lec avil li c'usitic ta jnope.

Salmos 73:19

Anil no'ox xu' chchamic; ta xi'el no'ox xu' chlajic, jech ta xch'ayic o batel.

Éxodo 32:9

Li Muc'ul Diose jech to laj yalbe li Moisese: —Li achi'iltaque, laj xa quil ti stalelic toj tsots yo'ntonique.

Éxodo 33:6

Jech li israeletique te ta vits Horeb lic scomtsanic stunesel li c'usitic c'upilic sbae.

Isaías 22:12

Ja' jech sc'ac'alil chac' oc'anic li Muc'ul Dios ti ech'em svu'ele, chac' avat avo'ntonic, chac' ajux stsotsil ajolic, xchi'uc chac' alapic c'u'il ti ch'ixlajan ta lapele.

Isaías 48:4

Jna'oj ono'ox ti toj toybaoxuque, ti xco'laj xchi'uc tsatsal taq'uin li avo'ntonique, ti xco'laj xchi'uc bronce taq'uin li ajolique.

Lamentaciones 4:6

Li jchi'iltac ta jlumale ijelov to smulic jech chac c'u cha'al smulic li cristianoetic ta Sodoma ta vo'onee, ja' li lum ti ta anil no'ox i'ulesate, ti ma'uc to uts oy boch'o ay scontraine.

Joel 2:12

Ja' yu'un jech chal li Muc'ul Diose: “Sutanic tal ta jtojol ta scotol avo'ntonic; ictaic ixim, oc'anic, ato avo'ntonic.”

Números 16:21

—Voc'o abaic loq'uel ta stojol li achi'iltaquique yu'un ta xculesic scotolic ta ora no'ox —x'utatic. 6

Hechos 7:51

“Li vo'oxuque toj tsots avo'ntonic. Ja' jech avo'ntonic xchi'uc ja' jech achiquinic jech chac c'u cha'al li boch'otic mu'yuc yich'ojic circuncisione. Scotol ora contra chavilic li Ch'ul Espiritue. Ja' chapasic jech chac c'u cha'al la spasic li amoltot ayame'ic ta vo'onee.

Deuteronomio 8:2

Vuleso me ta avo'ntonic scotol c'u x'elan li be bu laj yic'oxuc tal cha'vinic (40) jabil ta xocol banamil li Muc'ul Dios cu'untique. Le'e ja' sventa la sbic'tajesoxuc, xchi'uc la sq'uelboxuc avo'ntonic, yu'un tsc'an tsna' me chac'an chach'unbeic, o me mu xac'an xach'unbeic li smantaltaque.