Éxodo 32:22 - Bible in Tzotzil de Chenalhó with Deuterocanon

²² Itac'ov li Aarone: —Quits'in, mu xa'ilin ta jtojol. Li jchi'iltactique xana' ono'ox ti ja' tsc'an tspasic li c'usitic chopole.

Bible in Tzotzil de Chamula

²² Ti Aarone xi laj staq'ue: —Yojtot, mu xaviltaun, yu'un xana' lec ti jteclum li'e, ja' me'inem xa'iic ta spasel ti c'usi chopole.

Éxodo 32:22 Iomraidhean Croise

Génesis 44:18

Li Judae inopaj batel ta stojol li Josee, jech laj yalbe: —Cajval, ta jc'anbot vocol, yu'un oy c'usi ta xcalbot ta mucul. Mu me xa'ilin ta jtojol, yu'un li vo'ote co'ol avabtel achi'uc li faraone.

Salmos 36:4

Puru chopol xa c'usi tsnopilan o c'alal mochol ta svayab. Ja' xa stamoj o batel li chopol bee; mu xa sc'an xilinta o li c'usi chopole.

Éxodo 14:11

Jech laj yalbeic li Moisese: —¿Me yu'un mu'yuc muquinaltic te ta Egipto ti laj aloq'uesuncutic tal, ti li' tal chamcuncutic ta xocol banamil avu'une? ¿C'u yu'un ti jech laj apasbuncutique? ¿C'u yu'un ti laj aloq'uesuncutic tal ta Egiptoe?

Éxodo 15:24

Li israeletique te lic chopolc'opojicuc ta stojol li Moisese, jech la sjac'beic: “¿C'usi ta xcuch'tic?”, xutic.

Éxodo 16:20

Pero oy jayibuc muc xch'unic c'usi laj yal li Moisese. Laj to scomtsanic sventa yoc'omal. Ti c'u yepal la scomtsanique ivoc' xuvital, xchi'uc ituib. Li Moisese i'ilin ta stojol li xchi'iltaque.

Éxodo 16:28

Ja' yu'un li Muc'ul Diose jech laj yalbe li Moisese: —¿Baq'uin to chlic ach'unic li jmantaltaque xchi'uc li c'usitic yan calojboxuque?

Éxodo 32:1

C'alal laj yil israeletic ti ijalij ta vits li Moisese, la stsob sbaic tal ta stojol li Aarone, jech laj yalbeic: —Pasbun jdioscutic yu'un ja' ba'yucbe chbat cu'uncutic. Yu'un li Moisés ti la sloq'uesuncutic tal ta Egiptoe, mu jna'tic c'usi la spas ti yoquel to mu'yuc ta sut tale —xutic.

Éxodo 32:21

Li Moisese jech laj yalbe li Aarone: —¿C'usi la spasbot li jchi'iltactic li'i ti laj avac'be spasic tsatsal mulile? —xut.

Proverbios 4:16

Yu'un li stuquique mu x'och svayelic ti me mu'yuc spasic c'usi chopole; mu'yuc vayel ta yo'ntonic ti me mu xyal ta lum junuc yu'unique.

Deuteronomio 31:27

Yu'un jna'oj ti vo'oxuc mero jbajmantaloxuque, ti jtoybaoxuque. Yu'un c'alal li' to cuxulun ta atojolique, ep ono'ox laj atoy abaic ta stojol li Muc'ul Diose. Buuc xa me lichame, ¿c'u to x'elan chabatic?

Deuteronomio 9:24

Ta sliqueb c'alal lic jchi'inoxuc tale, mu'yuc ono'ox xquil ti lec jch'unej mantaloxuque. ¡Puru jbajmantaloxuc ono'ox ta stojol li Muc'ul Diose!

Deuteronomio 9:7

“Mu me xch'ay ta avo'ntonic ti ep laj avaq'uic ilinuc te ta xocol banamil li Muc'ul Diose. C'alal laloq'uic tal ta Egiptoe, xchi'uc c'alal to lavulic li'i, scotol ora laj abajilanbeic li smantale.

1 Samuel 15:15

Itac'ov li Saule: —Ja' laj quich'becutic tal li amalequetique. Yu'un li jchi'iltactique muc smilic li chijetic ti bu ven lequique xchi'uc li vacaxetique yu'un ja' sventa ta jmilbetic smotonin li Muc'ul Dios cu'untique. Pero scotol li yantique la jmilcutic comel —xi.

1 Samuel 15:21

Pero li jchi'iltactique laj yich'ic comel li vacaxetic, li chijetic ti bu ven lequic ti sc'oplal chlaje, yu'un ja' sventa ta jmilbetic smotonin te ta Gilgal li Muc'ul Dios cu'untique —xi.

1 Samuel 15:24

Li Saule jech laj yalbe li Samuele: —Ta melel laj xa jta jmul; ja' la jbajbe smantal li Muc'ul Diose xchi'uc li mantal laj avalbune yu'un ja' lixi' yu'un li jchi'iltactique; ja' la jch'unbeic li c'usi la sc'anique.