Éxodo 15:26 - Bible in Tzotzil de Chenalhó with Deuterocanon

²⁶ Jech i'albatic: “Me chavich'ic lec ta muc' c'usi chacalboxuc vu'un li Muc'ul Diosun avu'unique, me chapasic li c'usi ta jc'ane, me chach'unic, me chavich'ic ta muc' li mantaletic cu'une, mu'yuc ta xcac' taluc jchopuc avocolic jech chac c'u cha'al laj cac' ta stojol li egiptoetique. Yu'un vu'un Muc'ul Diosun; vu'un chajcoltaoxuc ta achamelic”, x'utatic yu'un li Diose.

Bible in Tzotzil de Chamula

²⁶ Xi albatique: “Mi ta xats'etan lec achiquinic ta ya'yiel ti c'usi ta xcal ti vu'un Ajvalil Diosun avu'unique, mi ja' ta xapasic ti c'usi lec ta xquile, mi ta xc'ot ta ch'unel avu'unic ti jmantaltaque, mi ta xc'ot ta pasel avu'unic ti oy c'usi tsots sc'oplal albil cu'une, mu'yuc ta jtac talel jtosuc ta atojolic ti c'usi chopol jech c'u cha'al laj jpas ta stojol ti egipcioetique. Yu'un vu'un jpoxtavanejun, jcoltavanejun, ti Ajvalil Diosun avu'unique.”

Éxodo 15:26 Iomraidhean Croise

1 Reyes 11:33

Li Salomone laj xa sbajun comel; ja' xa bat yich' ta muc' li Astorete, ja' li sme' diosic sidonetique, xchi'uc li Quemose, ja' li sdiosic moabetique, xchi'uc li Moloque, ja' li sdiosic amonetique. Toj chopol c'usitic la spas ta jtojol; muc ja'uc la xch'un li mantaletic, li chanubtaseletic cu'un jech chac c'u cha'al la xch'un li Davide, ja' li stote.

1 Reyes 11:38

Me chach'un scotol li c'usitic chacalbote xchi'uc me lec c'usitic chapas ta jtojole, me ja' chach'un li mantaletic xchi'uc li chanubtaseletic cu'un jech chac c'u cha'al la spas li cajtunel Davide, chajchi'inot o. Xchi'uc j'ech'el te chcac' comuc o ta atojolic xchi'uc amomnich'nabtac li abtel jech chac c'u cha'al laj calbe li Davide. Vo'ot chcac'bot aventain li lum Israele.

2 Reyes 2:21

Li Eliseoe te ibat ta nio'; te la stani ochel li ats'ame, jech laj yal: —Jech yaloj li Muc'ul Diose: ‘Li nio' li'i vu'un la jlecubtas, jech mu'yuc xa boch'o ta xcham, xchi'uc oy xa c'usi chlic ch'iuc noxtoc li' ta banamile’, xi li Muc'ul Diose —xi.

2 Reyes 20:5

“Sutan batel, jech xavalbe li Ezequiase, ja' li banquilal yu'un jteclumale: ‘Jech chayalbot li Muc'ul Diose, ja' li Dios yu'un amoltot Davide: Laj ca'ay li ac'ope, xchi'uc laj quil ti iloc' ya'lel asate, ja' yu'un ta jcoltaot. Le' ta oxib c'ac'ale xu' xa chabat ta jch'ulna.

2 Reyes 22:2

Toj lec c'usitic la spas ta stojol li Muc'ul Diose. Ja' co'ol la spas jech chac c'u cha'al la spas li smoltot David ta vo'onee. Me jutuc mu'yuc la stam yan be stuc.

Job 5:18

Me oy bu chtuch' yu'une, ja' chpix lec; ja' tsyayijes, ja' chpoxta noxtoc.

Salmos 103:3

Ja' chispasbun perdón yu'un scotol li jmule; ja' chiscoltaun ta sventa scotol c'usiuc no'ox c'ux chca'ay.

Salmos 147:3

Ta xpoxta li boch'otic oy svocol yo'ntonique; ta xpixbe lec li xtuch'emalique.

Salmos 81:9

Mu me oyuc yan diosetic te ta atojolic; mu me xaquejan abaic ta stojol li diosetic yu'un yan lumetique.

Éxodo 12:29

Li Muc'ul Diose ta o'lol ac'ubal ech' smilbe scotol sba xnich'nab li egiptoetic ta jujubej snaique. Icham c'alal ta sba xnich'on li ajvalil faraone, xchi'uc sba xnich'nabic li boch'otic ochemic ta chuquele, xchi'uc li sba yol sts'unub yovolique.

Éxodo 19:5

Ja' yu'un me chach'unic scotol li c'usi caloje, xchi'uc me chavich'ic ta muc' li c'usi chapanbil cu'une, vo'oxuc no'ox atuquic lec chaquiloxuc ta scotol li yantic lumetique yu'un ja' cu'un scotol li banamile.

Éxodo 19:6

Vo'oxuc pale c'otemoxuc cu'un, xchi'uc vo'oxuc jun lum ti voc'biloxuc o ta jtojole’, xi li Diose, uto li achi'iltaque —x'utat li Moisese.

Éxodo 20:2

“Vu'un Muc'ul Diosun avu'unic. Vu'un la jloq'uesoxuc tal ta Egipto ti bu to'ox tiq'uiloxuc ta mozoile.

Éxodo 23:25

Vu'un no'ox xavich'icun ta muc'; vu'un li Muc'ul Diosun avu'unique, jech ta xcac'be bendición li apanique xchi'uc li ava'alique. “Mu'yuc ta xcac' taluc chamel ta atojolic.

Isaías 55:3

A'yo ava'yic lec li c'usi chacalboxuque; la'ic ta jtojol, jech chacuxiic. Jech te chcom o ta atojolic sbatel osil li c'usi la jchapan ti jbel sc'oplal c'ux ta co'nton o li Davide.

Isaías 57:18

Jna' lec scotol ti c'u x'elan stalelique, pero ta jpoxtaic, ta jtojobtasic lec, ta xcac'be jun yo'ntonic; ta jmuq'uibtasbe yo'ntonic noxtoc li boch'otic chat yo'ntonique.

Jeremías 11:7

Ja' ti laj ono'ox calbe tal lec ya'yic li amoltot ayame'ic ta vo'one c'alal la jloq'uesic tal ta Egiptoe. Lec laj calbe tal ya'yic ti ac'o xch'unique; mu'yuc jquechanoj o yalel c'alal to tana, jech laj calbeic: Ja' me xach'unic li c'usi chacalboxuque xcutic ono'ox.

Jeremías 17:24

‘Ja' yu'un jech chacalboxuc: Me chach'unbicun c'usi chcale, me mu xacuch ochel avicatsic ta ti'coraltonetic li' ta Jerusalén ta sc'ac'alil chacux avo'ntonique, me chavoc'bicun o li sc'ac'alil chacux avo'ntonique, xchi'uc me mu'yuc chapasic jchopuc abtele,

Jeremías 30:17

Yan li vo'oxuque ta xcac' colanic lec; ta jpoxtaboxuc li atuch'emalique, ac'o me jech cha'albat ac'oplalic: ‘Li Sione comtsanbil o; mu'yuc xa boch'o oy ta yo'nton o’, ac'o me xi ac'oplalic”, xi li Muc'ul Diose.

Jeremías 33:6

Pero ta xlic jcoltaic, ta xlic jpoxtaic; ta xcac'be sta lec jun yo'ntonic, jech mu c'usi xal yo'ntonic o.

Jeremías 7:23

Ja' no'ox jech laj calbeic chac li'i: Ch'unic me li c'usi chacalboxuque, jech vu'un Diosun o avu'unic, jech vo'oxuc jteclumaloxuc o chac'otic ec. Ja' me pasic scotol li c'usi laj calboxuque yu'un jech lec chabatic, xcutic.

Jeremías 8:22

¿Me mu'yuc poxil te ta Galaade? ¿Me mu'yuc jpoxtavanej te? ¿C'u yu'un ti mu'yuc bu tsta xpoxilic li jchi'iltaque?

Ezequiel 18:5

Li boch'o tuc' yo'ntone, ti ja' tspas c'usi lec, c'usi tuc' ta pasele,

Oseas 11:3

Vu'un la jnit li Efraine; la jchanubtas ta xanubal, pero muc sna' ti vu'un la jchabie.

Oseas 6:1

La'ic acotolic, sutcutic batel ta stojol li Muc'ul Diose. Ja' laj yac' jvocoltic, ja' chixpoxtautic noxtoc; ja' la syayijesutic, ja' chixpixbutic noxtoc.

Levítico 26:13

Vu'un Muc'ul Diosun avu'unic ti la jloq'uesoxuc tal ta Egiptoe yu'un mu jc'an ti te tiq'uiloxuc o ta mozoil yu'unique. Jech vu'un la jtuch' ya'yel li slasual yabtejeb vacax ti acuchojic ti toj ole. Laj cac' ti jun xa avo'nton tuc' xateltun chaxanovique.

Levítico 26:3

“Me chach'unic, me chapasic li mantaletic xchi'uc li chanubtaseletic cu'une,

Números 12:13

Ja' yu'un li Moisese lic sc'anbe vocol li Diose, jech laj yalbe: “Dios cu'un, avocoluc coltao ta sventa li xchamele”, xi.

Deuteronomio 12:25

Mu me xati'ic, yu'un jech lec chabatic xchi'uc avalab anich'nabic ta sventa ti ja' chapasic c'usi tuc' ta stojol li Muc'ul Diose.

Deuteronomio 12:28

“A'yo me ava'yic. Ch'unic me scotol li c'usitic laj calboxuque, yu'un jech lec chabatic achi'uc avalab anich'nabic me ja' chapasic c'usitic tuc' xchi'uc c'usi lec chil li Muc'ul Diose.

Deuteronomio 13:18

Ja' no'ox venta me chach'unbeic scotol li c'usi chayalboxuque, xchi'uc me chapasic scotol li mantaletic laj calboxuc ava'yic li' ta orae, xchi'uc me ja' chapasilanic li c'usitic lec chile.

Deuteronomio 28:27

“Li Muc'ul Diose ta xac' avich' avocolic ta epal c'a'el chameletic jech chac c'u cha'al ic'ot ta pasel ta stojol li egiptoetique. Xchi'uc chastaoxuc ep ch'ieletic, ch'inin, tan-se'p xchi'uc spintoal ti mu stac' poxtael oe.

Deuteronomio 28:58

“Me mu xanopes abaic ta spasel scotol li chanubtaseletic ts'ibabil li' ta vune, xchi'uc me mu chavich'beic ta muc' smuc'ul, yutsil sbi li Muc'ul Diose,

Deuteronomio 28:60

Xchi'uc chac' licuc ta atojolic scotol li vocoletic, li chameletic ti laj yich'ic li egiptoetique. Toj ep chaxi'ic yu'un. Chac' avocolic scotol c'ac'al.

Deuteronomio 32:39

Vu'un no'ox jtuc Muc'ul Diosun, mu'yuc yan diosetic jech chac c'u cha'al vu'un. Vu'un ta xcac' acuxlejalic; vu'un ta jpoj sutel noxtoc. Vu'un ta xcac' yayijanic; vu'un ta jpoxta noxtoc. Mu'yuc boch'o xu' yu'un tspoj sba loq'uel ta jc'ob.

Deuteronomio 5:1

Li Moisese lic stsob scotol li israeletique, jech laj yalbe: “Jchi'iltac israeletic, a'yo me ava'yic li mantaletique xchi'uc li c'usitic chacalboxuc li' ta orae. Chanic me lec. Pasilanic me scotol ora.

Deuteronomio 7:15

Li Muc'ul Diose mu xac' taluc chamel ta atojolic, xchi'uc muc xac' taluc li c'usitic toj chopolique, ti toj xi'balic sba jech chac c'u cha'al ava'yojbeic sc'oplal ic'ot ta pasel ta Egiptoe. Yan li avajcontraique chcac' taluc ta stojolic scotol, yu'un ac'o sta ep svocolic.