Ester 6:12 - Bible in Tzotzil de Chenalhó with Deuterocanon

¹² C'alal isutic batel ta xanel lum li Mardoqueoe, te ibat ta sti' spasubmantal li ajvalile; yan li Amane ta ora isut batel ta sna, chat xa yo'nton xchi'uc smacoj batel sat.

Bible in Tzotzil de Chamula

¹² C'alal tsuts ti xanobal ta ca' une, ti Mardoqueoe sut batel ta chotlej ta sti'na sna ti ajvalile. Ti Amane svoloj xa ta maquel sat, bat ta anil ta sna.

Ester 6:12 Iomraidhean Croise

2 Samuel 15:30

Li Davide imuy batel ta muyebaltic te ta Olivatic. Te x'oc'olet muyel, xpixoj batel sjol, xchi'uc jeche' xbixbun batel yacan. Scotol li xchi'iltac bat xchi'ine xpixojic batel sjolic ec, xchi'uc x'oc'oletic batel.

2 Samuel 17:23

C'alal laj yil Ahitofel ti muc xc'ot ta pasel c'usi laj yale, lic xchapan sburo; isut batel ta sna te ta slumal ti bu ivoq'ue. C'alal c'ot xchapan lec snae, bat sjoc'an sba ta te', jech icham o. Te ibat yich' muquel yo' bu mucul li stote.

1 Reyes 20:43

Li ajvalil ta Israele ch-ilin xa batel, xchi'uc ep laj yat yo'nton. C'alal ic'ot ta Samariae, te c'ot ochuc ta spasubmantal.

1 Reyes 21:4

C'alal isut batel ta sna li Acabe, toj ep chat yo'nton, xchi'uc ch-ilin ta sventa ti c'u x'elan itac'bat yu'un li Nabote. Yu'un i'albat ti mu xu' ja' chich' li c'usi ac'bil comel yu'un stot sme'e. C'alal ic'ot ta sna li Acabe, mu sc'an xve'; te no'ox c'ot xmochan sba ta svayab sq'ueloj batel c'alna.

1 Reyes 21:6

Itac'ov li Acabe: —Yu'un la jac'be ts'usubtic yu'un li Nabot nacal ta Jezreele. Laj calbe ti xu' ta jtojbe ta taq'uin, ti xu' ta jq'uextabee, pero muc xiyac'bun —xut.

2 Crónicas 26:20

C'alal laj yil banquilal pale Azarías xchi'uc yantic paleetic ti oy xa c'a'el chamel ta sti'ba li ajvalile, ta ora la sloq'uesic ta Ch'ulna. Jech ec li stuque oy xa ta yo'nton tsc'an chloc' ta ora, yu'un laj yil ti i'ac'bat xa stoj smul yu'un Muc'ul Diose.

Ester 2:19

C'alal xchibal velta xa'ox laj yich'ic tsobel li stsebetique, li Mardoqueoe te chotol ta sti' spasubmantal li ajvalile.

Ester 6:11

Li Amane la stsac li c'u'il xchi'uc ca'e. Laj yac'be slap li Mardoqueoe, xchi'uc la scajan batel ta ca'. La snitbe batel sca' ta ba'yucbe; te laj yic' batel ta o'lol yut lum; te x'avet batel ta ba'yucbe, jech i'avan: “¡Ja' jech chich' pasbel li vinic boch'o tsc'an chac' ta ich'el ta muc' li ajvalile!”, xi.

Ester 7:8

Li ajvalile isut tal yan velta te yo' bu oy li ve'lile, pero li Amane ja'o la spatan sba ta sc'anbe vocol bu chcux yo'nton li Estere. Li ajvalile jech laj yal: —¿Me yu'un chac'an chavuts'inta li' ta jna noxtoc li Estere? —xut. C'alal naca to laj yal jech li ajvalile, li j'abteletic yu'une, la smacbeic sat li Amane. Oy jun j'abtel yu'un, Harbona sbi, jech laj yalbe li ajvalile: —Te ta sna li Amane oy yac'oj ta pajel lec te' sventa te tsjoc'an ox li Mardoqueo li boch'o lec c'usi laj yal ta atojole. Li te' spajojique oy van chibuc xcha'vinic (22) metro stayal —xut. Li ajvalile jech yal: —Ja' te xbat ajoc'anic —xi.

Job 20:5

¿Me mu xana' ti mu jaluc xcuxet yo'ntonic li boch'otic chopolique, xchi'uc ti jliquel no'ox lec stse'inic li boch'otic mu'yuc ta yo'ntonic Diose?

Job 9:24

Li banamile ja' chac'be ta sc'ob li boch'otic chopolique; ja' tsmacbe satic li jchapanvanejetic yu'unique. Me ma'uc tspas jech li Diose, ¿boch'o jech tspas cha'e?

1 Samuel 3:15

Li Samuele ivay yan velta. Ja' to ilic ta sob yoc'omal; la sjamanbe li sti' ch'ulnae. Pero li Samuele ta xi' ta yalbel Elí li c'usi i'albat yu'un Muc'ul Diose.